د لوېدیځ ډېری ورځپاڼو د کابل په دشتبرچي کې د انتخاباتو لپاره د نوم لیکنې په یوه مرکز کې د پرونۍ چاودنې او په افغانستان کې د راروانو انتخاباتو په اړه مطالب خپاره کړي دي.
- مېرور انلاین
انګلیسي مېرور انلاین خپرونه لیکي، د افغانستان د ولسي جرګې او ولسوالیو د شوراګانو انتخابات چې له څو ځل ځنډ وروسته د تلې په ۲۸مه نېټه ترسره کېږي، له جدي خنډونو سره مخامخ دي.
مېرور زیاتوي، ولسمشر اشرف غني د خپلو لوېدیځو متحدانو لهخوا تر فشار لاندې دی چې د دې انتخاباتو له لارې د ۲۰۱۹ میلادي کال د ولسمشرۍ انتخاباتو ته لاره هواره کړي، خو مېرور انلاین لیکي، د ولسمشرۍ د انتخاباتو په برخه کې شکونه شته ځکه چې که د رأی ورکوونکو نوم لیکنه د ژمي له رارسېدو مخکې بشپړه نهشي، نو د ولسمشرۍ انتخابات هم ښايي وځنډېږي.
مېرور لیکي:
د څو میلیون رأی ورکوونکو ډېره برخه د هویت تذکرې نهلري چې د ۱۸ کلنۍ تر څنګ د رأی ورکولو له اساسي شرطونو څخه دی.
- اینډیپنډنټ
بلې انګلیسي ورځپاڼې اینډیپنډنټ هم د دشت برچي د چاودنې په اړه یو مطلب خپور کړی او لیکي، چاودنه ډېره درنه وه او ګڼ شمېر خلکیې مړه او ټپیان کړل.
ورځپاڼه لیکي:
له اوږدې مودې نسبي کرارۍ وروسته د کابل ښار یو شمېر اوسېدونکي یو ځل بیا د اېمرجنسي روغتون مخې ته چې د ډېری انتحاري حملو قربانیان هلته راوړل کېږي، راټول شوي وو.
اینډیپنډنټ لیکي:
په افغانستان کې له یوې خوا وسلهوال طالبان او له بلېخوا اسلامي دولت ډله یا داعش پر دولتي تأسیساتو او پوځي مرکزونو پرلهپسې حملې کوي.
- ډیپلومات
امریکایي انلاین خپرونه ډیپلومات، له وسلهوالو طالبانو سره د حکومت د سولې د پروګرام په رڼا کې د راروانو انتخاباتو په اړه په یو تحلیلي مطلب کې لیکي، افغان حکومت ته ښه فرصت په لاس ورغلی چې یو شمېر منځلاري طالبان د دې انتخاباتو له لارې په نظام کې شامل کړي او د دایمي سولې لپاره پر مخ ګام واخلي.
خپرونه لیکي:
افغانستان په تېرو ۱۰ کلونو کې تر بل هر وخت زیات اوس د سولې حقیقي خبرو ته نږدې شوی، خو زیاتوي چې په یوه وخت کې هم د سولې خبرې او هم انتخاباتو ته چمتووالی ځینې مهمې پوښتنې رابرسېره کولای شي، مثلاً دا چې ایا طالبان پهدې انتخاباتو کې ګډون ته لېوال دي کنه؟ او ایا د دوی ګډون به نړیوالې ټولنې ته د منلو وړ وي؟
خپرونه لیکي چې دې پوښتنو ته د سم ځواب موندل افغانستان سولې ته نږدې کولای شي، خو دا امکان هم شته چې په تېرو څو کلونو کې شوي پرمختګونه له خطر سره مخامخ کړي.
ډيپلومات انلاین د مطلب په دوام لیکي، داسې انتخابات چې د افغانستان د رنګینې ټولنې د ټولو برخو استازي ګډون پهکې ولري، ځوان نسل ته هم لاره پرانیزي چې د سیاسي مشرتابه ډګر ته راوړاندې شي.
خپرونه زیاتوي، د نړیوالې ټولنې دا ژمنه چې یوازې د شفافو انتخاباتو مالي ملاتړ به وکړي، دې ته امکان برابرولای شي چې ټول سیاسي اړخونه په انتخاباتو کې ګډون وکړي.
ډیپلومات لیکي چې د افغانستان اکثر سیاسي مشران لنډمهالی سیاست کوي او د هېواد د اوږدمهالو ګټو لپاره د پانګونې پر ځای د خپلو موقفونو د ساتلو لپاره هلې ځلې کوي.