د لاسرسي لېنکونه

یکشنبه ۲ غویی ۱۳۹۷ کابل ۱۱:۱۶

د جګړې او سولې انسټټیوټ: د نورستان تاریخي ځایونه له ویجاړېدو سره مخ دي


  • د جګړې او سولې انسټټیوټ

د جګړې او سولې انسټټیوټ د نورستان د تاریخي ځایونو په اړه لیکنه خپره کړې ده.

د مقالې په پیل کې د نورستان د چارواکو په وینا راغلي چې حکومت باید د تاریخي ځایونو د ژغورنې لپاره هڅې زیاتې کړي.

چارواکو خبرداری ورکړی چې په‎دې ولایت کې د یوه زاړه عبادت‎ځاي او یوه باغ په ګډون چې یو وخت به شاهي کورنۍ په چکر ورته راتله، لرغوني ځایونه له ویجاړېدو سره مخامخ دي.

نورستان ته‌یې یو وخت کافرستان ویل.

د دغه ولایت خلک په ۱۹مه پېړۍ کې مسلمانان شول.

د جګړې او سولې د انسټټیوټ په لیکنه کې راغلي دي چې تر مسلمانېدو مخکې نورستانیان بُت‎پرستان وو او هلته ګڼ عبادت‎ځایونه او بُتان جوړ شوي دي چې اکثر یې بیا وروسته نړېدلي دي.

د خپرونې په باور نن سبا هم ځیني دغه لرغوني اثار پاتې دي او د یوه عبادت‎ځاي یوه برخه په مرکز پارون کې هم شته.

خپرونه د پارلمان د یوه پخواني غړي په وینا لیکي چې په ۸۰مه لسیزه کې د شوروي اتحاد د ځواکونو د یرغل پر مهال د نورستان تاریخي ځایونو ته سخت زیان واوښت، بیا د کورنۍ جګړې پر مهال دغه ځایونه تباه شول او اوس دا ځایونه په ډېر بد حالت کې دي، که پاملرنه ورته ونه‎شي له پنځو تر ۱۰ کلونو پورې به بېخي له‎منځه ولاړ شي.

د جګړې او سولې انسټټیوټ دا موضوع د نورستان له حکومتي چارواکو سره هم شریکه کړې ده، هغوی ویلي دي چې دوی په واما ولسوالۍ او مرکز پارون کې د تاریخي ځایونو شااوخوا د کورونو د جوړېدو مخه نیولې ده.

  • ګارډین

یوې بلې چاپي خپرونې، ګارډین بیا په جرمني کې د یوه افغان د ژوند په اړه لیکنه خپره کړې ده.

دغه افغان پولیس دی، اوس د جرمني په براندنبورګ ښار کې ژوند کوي او د زړو خلکو په یوه مرکز کې په کار بوخت دی.

د ګارډین په وینا ضیا حیافي دا اندېښنه لري چې د جرمني حکومت‌یې د مهاجر په توګه ونه‎مني.

دی سربېره پر دې چې په مینه کار کوي او روزل کېږي په‎دې نه‌پوهېږي چې د روزنې دوره به بشپړه کړي که به له جرمني وایستل شي.

ګارډین لیکي:

د ضیا د ایستلو امکان هره شېبه شته، خو د محکمې له تېرې پرېکړې وروسته ده استېناف ته مخه کړې ده.

په ۲۰۱۶ میلادي کال کې په اروپا کې د کډوالو د بحران له پیل سره یوازې جرمني ته ۱۲ لکه خلک ورغلي دي.

د اوس لپاره په جرمني کې ۴۰۰ زره کمپنۍ کډوالو ته لنډمهاله کارونه ورکوي، خو د ګارډین په وینا دغه لنډمهاله کارونه نه‎شي کولای چې په اروپا کې د پناه غوښتونکو لپاره یوه ښه راتلونکې ولري.

XS
SM
MD
LG