د لاسرسي لېنکونه

پنجشنبه ۲۹ وږی ۱۳۹۷ کابل ۰۹:۱۷

دفاع وزارت: کمانډو د جوزجان په درزاب کې خپل اهداف ترلاسه کړي


دفاع وزارت وايي، کمانډو ځواکونو د جوزجان ولایت په درزاب ولسوالۍ کې خپل اهداف ترلاسه کړي او د اړتیا په وخت کې به د هېواد په هره سیمه کې عملیات وکړي.

تر دې مخکې راپورونو کې ویل شوي وو چې له ۲۰ تر ۲۵ کمانډو سرتېري چې د درزاب د محاصرې د ماتولو لپاره استول شوي وو، پرته له کوم پرمختګه بېرته خپلې اډې ته ستانه شوي دي.

د دفاع وزارت د ویاند دفتر سرپرست جنرال محمد رادمنش تېره ورځ ازادي راډیو ته وویل، دا سرتېري د پوځي پلان له مخې بېرته بلل شوي دي.

نوموړي وویل:

"موږ د دښمن یوې ډلې ته ضربه ورکړه، بله ډله چې د تېښتې په حال کې وه، د هوايي ځواک له‌خوا په نښه شوه، موږ په همدې ډول عملیات پلانوو او د وسله‌والو په ځانګړي ډول، د داعش ډلې پر ضد مبارزه کې مو ښه نتیجه ترلاسه کړې ده."

امریکايي ځواکونو د پنجشنبې په ورځ وویل چې د ګاونډي فاریاب ولایت په بل‌چراغ ولسوالۍ کې يې د داعش یو قوماندان قاري حکمت‌الله او د هغه دوه ساتونکي په هوايي برید کې وژلي دي.

بل‌چراغ ولسوالۍ د جوزجان له درزاب ولسوالۍ سره پر پوله پرته ده.

XS
SM
MD
LG