د لاسرسۍ وړ لېنکونه

تازه خبر
چهارشنبه ۲۶ غبرګولی ۱۴۰۰ کابل ۰۵:۲۹

افغانستان

ترکيه: د ټکر په پېښه کې افغان پناه غوښتونکي هم مړه شوي

ترکي چارواکو او رسنيو نن جمعه راپور ورکړى چې د ترکيې په ختيځ کې د ټرافيکي پېښې په نتيجه کې د وژل شويو کسانو په ډله کې د افغانستان، پاکستان او ايران پناه غوښتونکي شامل دي.

په ټرافيکي پېښه کې چې پرون پنجشنبه ناوخته په ايګدير ولايت کې شوې، ٣٦ نور کسان ټپيان شوي دي.

د ايګدير والي انور اونلو نن وويل، يو موټر چې پناه غوښتونکي په کې سپاره وو، د سړک د غاړې څراغ له پايې سره ټکر شوى او اور يې اخيستى دى.

ځيني نور کسان هغه وخت مړه شول چې يو بل موټر چې په هغه کې هم پناه غوښتونکي سپاره وو، پر دوى وربرابر شو.

دولتي خبري اژانس انادولو ويلي چې دغه پناه غوښتونکي د افغانستان، پاکستان او ايران وګړي دي او موټرونه يې په غيرقانوني ډول له ايران څخه ترکيې ته اوښتي وو.

د ورځې تازه خبرونه دلته ولولئ

افغانستان او ازبیکستان پر سوداګرۍ او اقتصادي پراختیا غږیدلي

د افغانستان د بهرنیو چارو وزیر محمد حنیف اتمر د ازبکستان د ولسمشر له ځانګړي استازي عصمت الله ایرګاشیف سره وکتل

افغانستان او ازبیکستان د سوداګرۍ او اقتصاد په برخو کې د دوه اړخیزو همکاریو د پراختیا په اړه خبرې کړي دي.

د ازبیکستان د بهرنیو چارو وزارت له خبرپاڼې سره سم، په دې اړه د افغانستان لپاره د ازبیکستان د ولسمشر ځانګړي استازي عصمت الله ایرګاشیف پرون سې شنبه ( د غبرګولي په ۲۵مه) د افغانستان له بهرنیو چارو وزیر محمدحنیف اتمر سره ولیدل.

د خبرپاڼې له مخې، دوی د افغانستان د سولې پر پروسې، د منځنۍ او جنوبي اسیا نړیوال کنفرانس ته د تیارۍ پر بهېر او دغه راز د افغانستان او ازبیکستان ترمنځ پر اقتصادي او تجارتي اړیکو خبرې وکړې.

د هرات کروندګر: ایراني زعفرانو د افغاني زعفرانو بیه راټېټه کړې

زعفران

د هرات ولایت د زعفرانو کاروباریان او کروندګر وايي، د افغانستان له لارې د ایران د زعفرانو صادراتو د افغاني زعفرانو بیه نیمايي ته راټیټه کړې ده.

دوی وايي، د افغانستان د ولسمشر له فرمان سره-سره چې هېواد ته یې له بهره د زعفرانو او د هغو د پیازو واردات منع کړي، بیا هم له ایرانه زعفران واردېږي.

د هرات د کرنې اوبو لګولو او مالدارۍ ریاست وايي چې تېر کال دغه ولایت کې له ۸ زره هکتاره ځمکې د ۲۱ ټنه زعفرانو حاصل ټول شوي او څه باندې ۲۰ زره کورنۍ په دې برخه کې په کار بوختې دي.

چارواکي: د فاریاب دولت اباد او د کندز خان اباد له طالبانو پاک شول

افغان امنیتي ځواکونه د عملیاتو پر مهال

د افغانستان په شمال کې شاهین قول اردو نن چهارشنبه (د غبرګولي ۲۶مه) اعلان وکړ چې د لومړي کنډک ځواکونو یې د کومانډو په مرسته نن چهارشنبه سهار د فاریاب ولایت دولت اباد ولسوالۍ د دولت له وسله والو مخالفانو تصفیه کړه.

د شاهین قول اردو له خبرپاڼې سره سم، د دولت اباد ولسوالۍ تصفیوي عملیات د سهار په ۳ بجو پیل او تر ۶ بجو او ۲۰ دقیقو پورې یې دوام وکړ.

شاهین قول اردو د عملیاتو په ترڅ کې د دواړو خواوو د احتمالي مرګ ژوبلې په اړه څه نه دي ویلي.

له بلې خوا په کندز کې چارواکي وايي چې د خان اباد ولسوالۍ یې هم بېرته نیولې ده.

دا ولسوالۍ په وروستیو څو ورځو کې لږ تر لږه دوه ځلي لاس په لاس شوې ده.

وسله والو طالبانو په دې اړه څه نه دي ویلي.

په کندهار کې د ۲۹ میلیونه افغانیو په لګښت یو کانال بشپړ شو

کندهار کې لوی کانال

په کندهار کې د څه باندې ۲۹ میلیونه افغانیو په لګښت د اوبو لګولو د یو لوی کانال پروژه بشپړه شوه.

د کلیو د بیا رغونې او پراختیا وزارت ویاند محمد رفیق جنبش نن چهارشنبه (د غبرګولي په ۲۶مه) ازادي راډیو ته وویل چې دغه پروژه د اسیا پراختیايي بانک او 'IFAD' له لوري تمویل شوې ده.

د دغه کانال کار د نږدې یو کال په موده کې د ٣٠ میلیونه افغانیو په لګښت د اوبو لګولو د کانال د پروژې له خوا بشپړ شوی دی.

نوموړي وویل چې د دغې پروژې په ترڅ کې سلګونو کسانو ته کاري زمینې برابرې شوي او د سیمې ۲۳۸۰۰ اوسیدونکي به ترې ګټه پورته کړي.

د یاد ولایت د ارغنداب ولسوالۍ په حاجیانو کلي کې د ۵۱۶۷ مترو په اوږدوالي د اوبو لګولو د دې پوخ کانال کارونه نن بشپړ شول.

د یادونې وړ ده چې دغه پروژه به د سیمې ۵۷۰۰ جریبه کرنیزه ځمکه او باغونه د اوبو لګولو تر منظم پوښښ لاندې راولي.

افغان چارواکي: ۳۳ سلنه افغانان د خوړو له نشتونه کړیږي

ارشیف، په یوه پنډغالي کې افغان کډوال

د افغانستان د کرنې، اوبو لګولو او مالدارۍ وزارت وایي، دا مهال ۳۳ سلنه افغانان د خوړو له نشتونه کړېږي.

دا خبرې د کرنې، اوبو لګولو او مالدارۍ وزارت مرستیال شېرشاه امیري، نن چهارشنبه (د غبرګولي په ۲۶مه) د ملګرو ملتونو د خوړو او کرنې ادارې 'FAO' او مرستندویو هېوادونو په ۴۲ مه غونډه کې د ویډیو کنفرانس له لارې وکړې.

نوموړي وویل چې له پنځو کلونو ښکته ۴۰ سلنه ماشومان د خوارځواکۍ په ستونزه اخته دي او ۵۵ سلنه هم د بې وزلۍ تر کرښې لاندې ژوند کوي.

ښاغلي امیري وویل، دوی د بې وزلۍ او خوار ځواکۍ سره د مبارزې په پار د افغانستان د اوبو لګولو د سیسټمونو او د بڼوالۍ او مالدارۍ محصولاتو د پیاوړتیا او د طبي بوټو د مرکزونو جوړولو په پار د ملګرو ملتونو د خوړو او کرنې ادارې مرستې او همکاریو ته اړتیا لري.

د افغانستان د کرنې په برخه کې د ملګرو ملتونو د خوړو او کرنې ادارې 'FAO' هم له افغانستان سره د مرستو د دوام ډاډ ورکړی.

د هرات په انجیل کې د یوې کورنۍ پر غړو ډزې شوي، ۲ مېرمنې یې وژلي

د افغانستان په نقشه کې د هرات ولایت

د هرات په انجیل ولسوالۍ کې وسله والو د یوې کورنۍ پر غړو هغه مهال ډزې کړي چې د یوه پارک دننه د شپې ډوډۍ ته ناست وو.

کورنیو چارو وزارت په یوه خبرپاڼه کې ویلي چې پېښه کې دوه مېرمنې او یو ماشوم وژل شوی دی او د همدې کورنۍ ۱۱ نور غړي چې ښځې او ماشومان هم په کې دي، ټپیان شوي دي.

خبرپاڼه کې راغلي، پېښه تېره شپه په نوبادام سیمه کې شوې، خو لا معلومه نه ده چې انګېزه یې څه وه او د چا له خوا ډزې شوي دي؟

د تاوتریخوالي اړوند بل خبر دا دی چې بدخشان کې د سیمه ییزو پاڅونوالو یو قوماندان له شپږو ساتونکو سره وژل شوی دی.

والي زکریا سودا ازادي راډیو ته ویلي چې دا کسان تېره شپه په کشم ولسوالۍ کې هغه مهال ووژل شول چې طالبانو یې له څو لورویو پر پوستې برید وکړ.

طالبانو تراوسه په دې اړه څه نه دي ویلي.

د فراه چارواکي: موټر سایکل سپرو وسله والو یو ملکي ډاکټر وژلی

ډاکټر امید حبیبي

د فراه ولایت امنیې قومانداني، د دغه ولایت په مرکز کې د یوه ملکي ډاکټر د وژل کېدو خبر ورکړ.

د دې قوماندانۍ ویاند، فاروق حضرتي، پرون سې شنبه (د غبرګولي ۲۵مه) ناوخته ازادي راډیو ته وویل، په دې اړه څېړنې پیل شوي دي: "ډاکټر امید حبیبي د فراه په یوه شخصي کلنیک کې دنده درلوده، موټرسایکل سپرو وسله والو دی پرون غرمه ۱۲ بجې او ۳۰ دقیقې د فراه ښار په لومړۍ ناحیه کې د خپل کور مخې ته په ډزو شهید کړی دی."

لا د دې وژنې انګېزه معلومه نه ده او چا د پېښې مسوولیت هم نه دی منلی.

د افغانستان په جنوب لوېدیځ کې د ازادي راډیو خبریال وايي، ډاکټر امید حبیبي کومه دولتي وظیفه نه درلوده، په خپل شخصي کتنځي کې د کار تر څنګ یې په ټولنیزو شبکو کې فعالیت کاوه.

د طالبانو له لوري د فراه د اناردرې ودانۍ نړیدل عکس العملونه پارولي

د افغانستان په نقشه کې د فره ولایت

د وسله والو طالبانو له خوا د فراه ولایت د اناردرې ولسوالۍ د ودانۍ نړول کېدو عکس العملونه پارولي دي.

د فراه ولایت یوه امنیتي سرچینه د نوم نه ښوولو په شرط تاییدوي چې د اناردرې ولسوالۍ ودانۍ د طالبانو له خوا نړول شوې ده.

په هغه ویډیو کې چې په ټولنیزو شبکو کې خبریالانو خپره کړې، ښکاري چې طالبان دغه څو پوړیزه ودانۍ په بمونو نړوي.

د افغانستان د بشري حقونو خپلواک کمېسیون مشرې شهرزاد اکبر پرون په ټویټر کې لیکلي، طالبان د چا او څه شي استازیتوب کوي؟

مېرمن اکبر پوښتنه کړې چې په یوه لېرې پرته او نېستمنه سیمه کې د یوې ودانۍ نړول د طالبان کوم پیغام په ډاګه کوي؟

طالبانو په وار- وار په خپلو اختریزو پیغامونو کې عام المنفعه تاسیساتو ته د زیان نه اړولو ژمنې کړې دي.

د مخابراتو او معلوماتي ټکنالوژۍ وزارت: ۵۱ پایې تخریب شوي

د مخابراتي شبکو پایې

د مخابراتو او معلوماتي ټکنالوژۍ وزارت وايي، د روان لمریز کال په لومړیو درېیو میاشتو کې د مخابراتي شبکو ۵۱ پایې په بشپړ یا نسبي ډول تخریب شوي دي.

په دغه وزارت کې د مخابراتي خدماتو د تنظیم ادارې ویاند، سعید شینواري پرون سې شنبه (د غبرګولي ۲۵مه) ازادي راډیو ته وویل: "د روان مالي کال په لومړۍ ربع کې د ټول هېواد په سطحه، د جګړو، ناامنیو او امنیتي تهدیدونو له امله ۵۱ مخابراتي ټاورونه په بشپړ یا نسبي ډول تخریب شوي دي. په دې کې هغه سایټونه هم راځي چې د اترا ادارې په مالي لګښت جوړ شوي دي."

اترا وايي، تېر لمریز کال ۳۰۸ مخابراتي ټاورونه په بشپړ یا نسبي ډول له منځه وړل شوي او دغه سکټور ته یې تر ۱۷ میلیون ډالرو پورې زیان اړولی دی.

د افغانستان او هندوستان د فوټبال سیالۍ؛ یو د یو پر وړاندې مساوي شوه

د افغانستان د فوټبال ملي لوبډله

تېره شپه د افغانستان او هندوستان د فوټبال ملي لوبډلو مسابقه یو د یو پر وړاندې مساوي پای ته ورسېده.

دغه مسابقه د قطر د پلازمېنې دوحې په جاسم بن حمدسټوډیوم کې وشوه.

افغانستان په قطر کې د فوټبال د ۲۰۲۲میلادي کال نړیوال جام او په ۲۰۲۳میلادي کال کې د اسیایي هېوادونو جام ته د لار موندنې لپاره یو وار په ۲۰۱۹میلادي کال کې د بنګله دېش په وړاندې مسابقه ګټلې ده.

درې وارې یې مسابقې مساوي شوي او څلور وارې یې لوبې بایللي دي.

افغانستان کې په تېرو ۲۴ ساعتونو کې ۷۸ تنه د کرونا له امله مړه شوي

د کابل افغان جاپان روغتون کې په کرونا ویروس یو اخته ناروغ

د افغانستان عامې روغتيا وزارت په تېرو ۲۴ ساعتونو کې په کرونا ويروس د اخته شويو او له دې ویروسه د مړو شويو شمېر اعلان کړ.

له دغه وزارت د خپرو شويو معلوماتو پر بنسټ په تېرو ۲۴ ساعتونو کې د ۳،۸۷۵ کسانو کرونا ټسټ شوې چې ۱،۶۴۷ کسان په دغه ویروس اخته پېژندل شوي.

دغه‌شان په همدې موده کې ۷۸ کسان ترې مړه شوي او ۲۳۲ ترې روغ شوي دي.

په دې سره په دغه هېواد کې د کرونا ویروس له خپرېدو تر اوسه ۹۴،۹۱۹ کسان په دې وبا اخته شوي او ۳،۷۶۱ کسان ترې مړه شوي دي.

افغانستان د ناټو سرمشریزې د اعلامیې هرکلی وکړ

د ناټو سرمشریزې څنډه کې د ناټو غړو هېوادونو مشران

د افغانستان د بهرنیو چارو وزارت د ناټو د سرمشریزې د اعلامیې هرکلی وکړ.

د ناټو مشرانو پرون په بروکسل کې تر غوندې وروسته په خپله اعلامیه کې وویل چې په افغانستان کې د تېرو دوو لسیزو په ترڅ کې د لاسته راوړنو د ساتنې په خاطر د افغانستان د خلکو او حکومت ملاتړ کوي، همداراز د افغانستان په مشرۍ او مالکیت د سولې د خبرو او د افغانستان د ملي دفاعي او امنیتي ځواکونو حمایت کوي.

د افغانستان د بهرنیو چارو وزارت په اعلامیه کې راغلي دي چې ترهګري لا هم د افغانستان او د ناټو د غړو هېوادونو د امنیت لپاره یوه ګواښ دی چې له دې سره مبارزه، د افغانستان او ناټو ترمنځ دوامداره او ستراتېژیکو همکاریو ته اړتیا لري.

ارزګان والي: چوره او خاص ارزګان کې د طالبانو پلانونه شنډ شول

د ارزګان ولایت والي محمد عمر شېرزاد

د ارزګان والي وايي، په چوره او خاص ارزګان ولسوالیو کې د طالبانو هغه پلانونه شنډ شوي چې غوښتل يې یادې ولسوالیو ته سقوط ورکړي.

والي محمد عمر شېرزاد وايي، تېره شپه وسله والو طالبانو د ارزګان په خاص ارزګان او چوره ولسوالۍ کې بریدونه کړي چې په وینا یې افعان پوځيانو يې بریدونه په شا تمبولي دي.

ښاغلي شېرزاد رسنیو ته په لیږلي ویډیويي پیغام کې ویلي: "تېره ورځ طالبانو د ماسپښین پر دريېو بجو پر چورې ولسوالۍ برید وکړ چې د شپې تر ۱۲ بجو پورې یې دوام درلود، دې جګړه کې ۲۰ وسله وال طالبان وژل شوي او تر ۳۰ پورې نور بیا ټپیان دي، په ټپیانو کې د خاص ارزګان ولسوالۍ لپاره د طالبانو نظامي قوماندان چې چورې ولسوالۍ ته د جګړې لپاره ورغلی و، شامل دی."

والي په چوره ولسوالۍ کې د افغان سرتیرو په اړه څه ونه ویل چې مرګ ژوبله ورته اوښتې او که نه؟ خو نوموړي زیاته کړه، یاده ولسوالۍ ته تېره شپه اضافي کمانډو ځواکونو رسیدلي دي.

ښاغلي شېرزاد د خاص ارزګان ولسوالۍ د سقوط اوازې رد کړې او په وینا یې یوازې یو شمیر امنیتي پوستې له ځايه بې ځایه شوي دي.

هاخوا بیا د خاص ارزګان ولسوالۍ ځايي چارواکې وايي چې له ولسوالۍ څخه یې تکتیکي شاتګ کړی دی.

د وسله والو طالبانو ویاند قاري یوسف احمدي بیا رسنیو ته په استولي پیغام کې ویلي چې د خاص ارزګان د ولسوالۍ مرکز، د امنیه قوماندانۍ او څلور امینتي پوستې یې نیولي او پولیس د ملي اردو کمپ ته تللي دي.

قاري یوسف احمدي په چوره ولسوالۍ کې د دوی لورته د اوښتې مرګ ژوبلې خبرې هم رد کړې.

د چک جمهوریت: افغانستان سره به مو مرستې جاري وي

د چک جمهوریت د بهرنیو چارو وزیر یاکوب کولهانیک

د چک جمهوریت د بهرنیو چارو وزیر یاکوب کولهانیک نن سې شنبه (د غبرګولي ۲۵مه) په پراګ کې د افغانستان د سفارت په نوښت جوړ شوي د افغان – چک – سلواک د سوداګرۍ او پانګونې فورم ته په وینا کې وویل چې هېواد یې له افغانستان څخه خپل عسکر راباسي، خو د دې معنی دا نه ده چې دوی افغانستان پرېږدي.

ښاغلي کولهانیک زیاته کړه چې چک جمهوریت به له افغانستان سره په تخنیکي،‌ مالي، اقتصادي،‌ تعلیمي او تجارتي برخو کې مرستو ته دوام ورکړي.‌

هغه د افغانستان د اسلامي جمهوریت او چک جمهوریت ترمنځ د سوداګرۍ د شتو فرصتونو په هکله خبرې وکړې او ویې ویل، دواړه هېوادونه لېوال دي چې په خپلو کې اړیکې پراخې کړي او د دوی حکومت ژمن دی چې له خپل لورې هر راز ممکنه همکاري وکړي.

عبدالصبور قانع د هرات والي وټاکل شو

عبدالصبور قانع

ستر پاسوال عبدالصبور قانع د هرات والي وټاکل شو.

د سیمه ییزو ارګانونو خپلواکه اداره وايي دده مقرریدل ددې ادارې وړاندیز او د جمهوري ریاست حکم وو.

د سیمه ییزو ارګانونو خپلواکه اداره زیاتوي، د ښاغلي قانع پوځي رتبه به خوندې وي.

تر ده مخکې عبدالوحید قتالي د هرات والي و.

دا په داسې حال کې ده چې ددې ولایت په څو ولسوالیو کې د افغان ځواکونو او طالبانو ترمنځ جګړې روانې دي.

نور راوښيه

XS
SM
MD
LG