د لاسرسي لېنکونه

ویسا: کای ایډې ترخه حقایق په ډیپلوماټیکه ژبه ویلي، خو حقایق یې ویلي


کابل چاپ ورځپاڼو په خپلو نننیو ګڼو کې د افغانستان د سولې په اړه د وروستیو، هڅو، بېلابېلو غبرګونونو او مخالفتونو په اړه یو شمېر مطالب لیکلي دي.

  • ویسا

ویسا خپلواکې ورځپاڼې په خپله سرمقاله کې لیکلي، په افغانستان کې د ملګرو ملتونو د سرمنشي پخواني ځانګړي استازي کای ایډه ویلي چې د طالبانو دغه نظر منطق لري چې دوی د افغان حکومت پرځای غواړي له امریکا سره د سولې خبرې وکړي، ځکه چې د افغانستان پوځي ستراتېژي په واشنګټن کې جوړه شوې ده.

په سرمقاله کې راغلي نوموړي ترخه حقایق په ډیپلوماټیکه ژبه ویلي، خو حقایق یې ویلي دي.

د سرمقاله لیکونکي په باور، بین الافغاني خبرې زموږ د هېواد د ستونزو د حل معقوله لار ده، خو په داسې حال کې چې د نړۍ یو لوی ځواک په خپلې جنګي ستراتېژۍ کې په افغانستان او سیمه کې د بمباریو، پوځونو زیاتولو او جګړه ییزو فعالیتونو په زیاتولو ټینګار کوي او د جګړې او اوربند واک د دوی په لاس کې وي، د افغان حکومت د سولې وړاندیز شوې طرحه به څومره اعتبار او وزن ولري؟

  • هېواد

هېواد دولتي ورځپاڼې بیا په خپل لومړي مخ کې په یو مطلب کې لیکلي چې، د امریکا متحده ایلاتونو په طالبانو غږ کړی چې را وړاندې شي او د افغان حکومت سره د سولې د خبرو په پیلولو په دې هېواد کې روانه جګړه پای ته ورسوي.

په مطلب کې راغلي، په جنوبي او د منځنۍ اسیا په چارو کې د امریکا د بهرنیو چارو وزارت سرپرست مرستیالې الیس ویلز تازه یوې غونډې ته ویلي چې د امریکا متحده ایالتونه په افغانستان کې د پخلاینې لپاره د ولسمشر غني د وروستي وړاندیز ملاتړ کوي.

په مطلب کې د نوموړې امریکایې چارواکي په حواله دا هم راغلي چې طالبان باید له بهرنیو نړیوالو ترورېستي شبکو سره خپل هر ډول اړیکې وشلوي.

  • ملي ارمان

ملي ارمان خپلواکې ورځپاڼې بیا په خپل یو مطلب کې په اندونیزیا کې د افغانستان د سولې په اړه له کېدونکې کنفرانس سره د طالبانو د مخالفت په اړه لیکلي دي.

په مطلب کې راغلي، طالبانو د یوې اعلامیې په خپرولو سره ویلي چې که څه هم د افغانستان قضیه ډېره پیچلې او له پوهاوي لوړه ده، خو د اسلامي امت له لویو قضیو شمېرل کېږي.

په مطلب له اعلامیې دا کرښې هم رانقل شوي چې افغان حکومت غواړي ځان ته د مشروعیت ورکولو لپاره د اسلامي نړۍ د هېوادونو عالمان وغولوي او په اندونیزیا یا کوم بل هېواد کې د عالمانو ناسته جوړه کړي.

د ملي ارمان په حواله په اعلامیه کې له اسلامي هېودادونو غوښتل شوي چې دا شان کنفرانسونو ته زمینه برابره نه کړي او نه دې هم په کې ګډون کوي.

XS
SM
MD
LG