د لاسرسي لېنکونه

دوشنبه ۲ تله ۱۳۹۷ کابل ۰۳:۳۳

مون: د دوو کوریاوو ترمنځ خبرې به سولې ته د رسېدو لپاره کافي نه‌وي


د جنوبي کوریا ولسمشر مون جه-اېن ویلي، اوس تر وخت دمخه ده چې له متحده ایالاتو سره د اټمي وسلو د له‌منځه وړلو په تړاو د بحث لپاره د شمالي کوریا وړاندیز ته خوشبیني وښودل شي.

ښاغلي مون نن چهارشنبه د سیاسي ګوندونو مشرانو ته وروسته له هغه دا خبره وکړه چې د جنوبي کوریا پلاوي له پیونګ یانګ څخه تر تاریخي سفر وروسته، د هغه هېواد د مشر کېم جونګ اون دا وړاندیز په ډاګه کړ.

ښاغلی مون وایي، موږ اوس په لومړنیو کرښو کې یوو.

د جنوبي کوریا ولسمشر دغه‌راز د مذاکراتو مېز ته د راتګ په بدل کې له پیونګ یانګ سره د پټو موافقو ادعاوې هم رد کړې.

هغه وایي شمالي کوریا ته به داسې ډالۍ نه‌وي.

د جنوبي کوریا مشر له متحده ایالاتو سره د نږدې همکاریو پر اهمیت بیا ټینګار وکړ او هغه‌یې د خپل امنیت تضمین وباله او زیاته‌یې کړه:

"زه فکر کوم، د اټمي وسلې د له‌منځه وړلو په اړه خبرې به یوازې هغه وخت وشي چې جنوبي کوریا او د امریکا متحده ایالات پر دې موضوع یو ګډ دریځ غوره کړي."

مون همداراز وویل چې د دوو کوریاوو ترمنځ خبرې به سولې ته د رسېدو لپاره کافي نه‌وي.

XS
SM
MD
LG