د لاسرسي لېنکونه

دوشنبه ۱۹ لیندۍ ۱۳۹۷ کابل ۰۸:۱۴

د جنوبي کوریا یو پلاوی روانه اوونۍ شمالي کوریا ته ځي


د جنوبي کوریا ولسمشر به د خپل ملې امنیت د سلاکار په مشرۍ یو پلاوی په روانه اوونۍ کی، شمالي کوریا ته واستوي.

دا پلاوی به د دواړو کوریاګانو ترمنځ د شخړې د کمولو او د پیونګ یونګ او واشنګټن ترمنځ د خبرو د پیلولو په اړه مذاکرات وکړي.

ټاکل شوې ده چې د جنوبي کوریا ۱۰ کسیزه پلاوی سباته پیونګ یونګ ته لاړ شي او د شمالي کوریا له لوړ رتبه چارواکو سره دوه ورځنۍ خبرې پیل کړي.

په دې خبرو کې به د کوریا په ټاپو وزمه کې د سولې د راوستلو، د دواړو کوریاګانو ترمنځ د اړیکو د ښه کولو او د واشنګټن او پیونګ یونګ ترمنځ د خبرو لپاره، د فضا د برابرولو په اړه بحثونه او مشورې کېږي.

شمالي کوریا ته تر سفر وروسته به، د جنوبي کوریا پلاوی متحده ایالاتو ته لاړ شي.

د متحده ایالاتو ولسمشر ډونالد ټرمپ تېره میاشت وویل چې له شمالي کوریا سره خبرې یوازې د ښو شرطونو پر اساس ممکن دي.

XS
SM
MD
LG