د لاسرسي لېنکونه

پنجشنبه ۲۹ وږی ۱۳۹۷ کابل ۱۰:۴۲

په غزني کې سلګونه کسانو لاریون وکړ


د غزني ولایت په قره باغ ولسوالۍ کې نن شنبه ناوخته سلګونه خلکو لاریون وکړ او د کابل- کندهار لویه لاره يې د ټرافیکو پرمخ تړلې.

دغو خلکو تر هغه وروسته لاریون وکړ او کابل ـ کندهار لویه لاره يې وتړله چې تېره شپه د دغه ولایت د قره باغ ولسوالۍ اړوند شېراباد سیمه کې د یوې کورنۍ ۳ غړي ناپېژاندو وسله والو په مرموز ډول ووژل او یوه ښځه یې ټپي کړه او ۲ تنه يې له ځان سره یووړل.

دغه لاریون کوونکي چې د وژل شویو کسانو جسدونه هم له ځانه سره لېږدوي، له دولته د دغو وژل شویو کسانو د قاتلیونو غوښتنه کوي.

د غزني د والي ویاند محمد عارف نوري هم مني چې خلکو لاریون کړی او د کابل ـ کندهار لویه لاره یې د ټرافیکو پرمخ تړلې ده.

نوموړی وايي چې دوی هم پلټنې پیل کړي چې د دغې کورنۍ غړي چا وژلي، څو قانوني چلند ورسره وکړي.

نوموړی وايي، لاریون کوونکو لاهم لاره تړلې، خو ولایت مقام د یادو لاریون کوونکو له یوشمېر مسؤلینو سره خبرې پيل کړي اوهڅه کوي چې دغه لاره خلاصه کړي.

XS
SM
MD
LG