د لاسرسي لېنکونه

یکشنبه ۳ چنګاښ ۱۳۹۷ کابل ۱۰:۰۲

په واشنګټن کې د قرغزستان د پخوانۍ سفيرې زوی د قاچاق په تور نيول شوی


امریکا، واشنګټن ته د پخوانۍ قرغز سفيرې زوی د وسلو د قاچاق په تور نيولی دی.

په امریکا کې د قرغزستان پخوانۍ سفیرې ضميره صديقووا نن ويلي چې د دې پر زوی تنګيز سیدیکوف ناسم تورونه پورې شوي دي.

پر تنګيز تور دی چې د روسيې د شمالي قفقاز سيمې چچنيا ته‌يې د وسلو د قاچاق کولو هڅه کړې ده.

صديقووا چې په امریکا کې له ۲۰۰۵ میلادي کال څخه تر ۲۰۱۰ میلادي کال پورې د قرغزستان سفيره وه، په خپل هېواد قرغزستان کې د یوې مشهورې خبريالې په توګه پېژندل کېږي.

د امریکا د ورجنيا ايالت په ختيځې ولسوالۍ کې د لويې څارنوالۍ دفتر ويلي چې د دې زوی او يو بل تورن کس ايلدار رضوانوف د تېرې سې شنبې په ورځ د فبرورۍ په ۲۷مه نېټه ونيول شول.

د دې دفتر اعلاميه وايي چې دواړو تورنو کسانو تر ۱۰۰ زياتې وسلې پېرلي، پرزې يې سره جلا کړي او غوښتل‌يې پرته له جوازه‌يې چچنيا ته ولېږي.

د قرغزستان د بهرنیو چارو وزارت نن وويل چې د تورنو کسانو د هویت په اړه پلټنې کوي.

د جرم ثابتېدو په صورت کې هر يو تورن کس په ۲۰ کاله بند محکومېدای شي.

XS
SM
MD
LG