د لاسرسي لېنکونه

چهارشنبه ۲ لړم ۱۳۹۷ کابل ۰۳:۰۰

سوریه وايي اسرائیلو په دمشق کې پوځي تأسیسات ویشتلي


د سوریې پوځ وایي، اسرائیلي جنګي الوتکو د لبنان له هوایي حریم څخه په استفادې راکټونه ویشتلي او دمشق ته څېرمه په یوه لیرې پرته سیمه کې یې یو پوځي هدف په نښه کړی دی.

د سوریې دولتي ټلوېزیون کې په دې اړه نور جزئیات نه‌دي ورکړل شوي، خو دا یې د اسرائیلو یو نوی یرغل بللی دی.

اسرائیلو تر اوسه په دې اړه څه نه‌دي ویلي.

دا تر یوې میاشتې په کمه موده کې د سوریې د ولسمشر بشاراسد د پوځ له لوري پر اسرائیلو دوهم تور دی چې لګوي یې.

اسرائیلو د سوریې په اووه کلنۍ کورنۍ جګړه کې څو ځلې په سوریه کې دننه هوایي حملې کړې دي او ویلي یې دي چې په دغو بریدونو کې یې د وسلو هغه مشکوک کاروانونه په نښه کړي چې په سوریه کې د لبنان د حزب‌الله ځواکونو د تجهیز لپاره لېږدول کېدلې.

د نن ورځې برید یوه ورځ وروسته له هغه شوی چې د ملګرو ملتونو د جنګي جنایاتو څېړونکو ویلي دوی د هغو راپورونو په اړه پلټني کوي چې ادعا کوي په سوریه کې د یاغیانو تر کنټرول لاندې سیمو کې د ملکي وګړو پر وړاندې د کیمیاوي وسلې بریدونه شوي دي.

XS
SM
MD
LG