د لاسرسي لېنکونه

دوشنبه ۷ غبرګولی ۱۳۹۷ کابل ۱۲:۲۸

ارګ: وسله‌والو طالبانو د سولې د خبرو فرصت له لاسه ورکړ


وروسته له هغې چې د امریکا ولسمشر تېره ورځ وویل چې په افغانستان کې وروستیو خونړيو بریدونو ته په پام سره متحده ایالات نه‌غواړي له وسله‎والو طالبانو سره د سولې خبرې وکړي، د افغانستان جمهوري ریاست نن ورته خبره وکړه او ویې‌ویل، طالبانو ته د سولې د خبرو فرصت ورکړل شوی چې هغه‌یې له لاسه ورکړ.

د ولسمشرۍ ماڼۍ د ویاند دفتر سرپرست شاه‌حسین مرتضوي نن ازادي راډیو ته وویل، افغان ولسمشر ډېر ځلې هڅه وکړه چې له وسله‎والو طالبانو سره د سولې خبرو ته زمینې برابرې شي، خو هغوی په وروستیو مرګونو بریدونو سره له سرې کرښې تېر شول او له دې وروسته به یوازې له پوځي لارې ورسره چلند کېږي.

د کابل په ګډون په یو شمېر ولایتونو کې د وروستیو څو مرګونو حملو چې شااوخوا ۱۳۰ تنه په‎کې وژل شوي او په لسګونه نور ژوبل شوي، مسؤلیت وسله‎والو طالبانو او داعش په غاړه اخیستی.

د دغو پېښو اکثره قربانیان ملکي افغانان دي.

ولسمشر ټرمپ په واشنګټن کې د ملګرو ملتونو د امنیت شورا له استازو سره د تېرې ورځې په غونډه کې وویل، له طالبانو سره په نږدې راتلونکي کې خبرې ځکه ممکنې نه‎دي چې هغوی په ډېره بې‌رحمۍ د ښځو او ماشومانو په ګډون بې‌ګناه خلک وژني.

خو د افغانستان د جمهوري ریاست د ویاند د دفتر سرپرست ښاغلي مرتضوي دا هم وویل چې د دولت د سولې ور به یوازې د هغو وسله‎والو پر مخ پرانیستی وي چې وسله پر ځمکه ږدي.

XS
SM
MD
LG