په کندز کې د پامیر د ۲۰مې فرقې چارواکي د دغه ولایت په خان‌اباد ولسوالۍ کې د وسله‌والو مخالفينو د ځپلو په هدف، د افغان ګډو ځواکونو له‌خوا د "پامیر ۱۶" په نوم د تصفیوي عملیاتو د پیلېدو خبر ورکوي.

د پامیر د شلمې فرقې د لومړۍ پلې لوا قوماندان زمري فیضي له ازادي راډیو سره د خبرو پر مهال وویل چې د "پامیر ۱۶" په نوم چاڼیز عملیات د یکشنبې له ورځې د کندز د خان‌اباد ولسوالۍ په اړوند سیمو کې روان دي چې په خبره‌یې، په دغو عملیاتو کې تر اوسه ۱۰ وسله‌وال مخالفين وژل شوي او ۴ ټپیان شوي دي.

د نوموړي د خبرو پر بنسټ، په روانو عملیاتو کې ملکي وګړو او دولتي ځواکونو ته کوم زیان نه‌دی رسېدلی.

د ښاغلي فیضي په وینا چې په کندز کې د ژمنیو عملیاتو د پیلېدو تر څنګ، دوی خپل پوځي تمرینات هم پیل کړي، څو په راتلونکي کال کې د ملي اردو منسوبین د پوځي عملیاتو د پيلېدو لپاره پوره چمتووالی ولري.

خو وسله‌والو مخالفانو تر دې دمه په دې اړه څه نه‌دي ویلي.

خان‌اباد د ۱۷ کېلو متره واټن په درلودو سره د کندز مرکز ختیځ لوري ته موقعیت لري او د دغه ولایت له نا امنو ولسوالیو څخه شمېرل کېږي، خو په دې ولسوالۍ کې د وسله‌والو مخالفينو د شتون برسېره زیات شمېر غیر مسؤل وسله‌وال هم فزیکي حضور لري چې د نوموړې ولسوالۍ د عامو خلکو ژوند یې له بېلابېلو ننګونو او ستونزو سره مخ کړی دی.

د ایران او امریکا ترمنځ خبرې د شنبې په ورځ په اسلام‌اباد کې پیلېږي

مخکې ویل شوي و چې د ایران او امریکا ترمنځ خبرې به د جمعې په ورځ په اسلام اباد کې پیلېږي، خو پرون څو لوېدیځو رسنیو راپور ورکړ چې دا خبرې به د شنبې په ورځ (۲۲ حمل) ترسره شي.

د فرانس پریس خبري اژانس د راپور له مخې، دا خبرې به غیرمستقیمې وي؛ یعنې دواړه لوري به په جلا خونو کې کښېني او پاکستاني چارواکي به د دواړو خونو ترمنځ پیغامونه لېږدوي.

د دې خبرو له پیل مخکې، پاکستان خپل پوځ سړکونو ته راایستلی څو په هېواد کې امنیت ټینګ کړي.

د ایران او امریکا ترمنځ د دوه اوونیز اوربند هوکړه چې د پاکستان په منځګړیتوب شوې، یوازې څو ساعته مخکې له هغه اعلان شوه چې د ډونالد ټرمپ له لوري د ټاکل شوي ضرب‌الاجل پای ته رسېدو ته یوازې دوه ساعته پاتې و؛ هغه ضرب‌الاجل چې ورسره دا ګواښ هم مل و چې «د ایران ټول تمدن به له منځه ولاړ شي».

اتحاد هوايي شرکت اعلان کړی چې د مسافرو د غوښتنې د زیاتوالي او د نړیوالو اړیکو د ښه کېدو لپاره د روان میلادي کال د مې له لومړۍ نېټې څخه به د کابل او ابوظهبي ترمنځ خپلې الوتنې ورځنۍ کړي.

په هغه خبرپاڼه کې چې دې هوايي شرکت د پنجشنبې په ورځ خپره کړې، ویل شوي چې دا پرېکړه د بازار له قوي غبرګون او د تمې څخه د زیات بوکینګ وروسته شوې.

اتحاد هوايي شرکت دا پرېکړه یوازې څو اوونۍ وروسته له هغې وکړه چې کابل ته یې الوتنې پیل کړې.

د خوست ولایت اوسېدونکي وايي، وروستیو سېلونو په دغه ولایت کې د ۱۵ کلیو ترمنځ لارې یو مخ به منځه وړي دي.

ځايي اوسېدونکو پرون کورنیو رسنیو ته وویل چې د تېرو دوو اوونیو د سېلونو له امله د خوست ولایت د شمل دوه مند ولسوالي د بورګي د سیمې او ګڼو نورو سیمو لارې داسي ویجاړې کړي چې نور پرې تګ راتګ نه کېږي.

دوی وايي چې له دې کبله د روغتیايي اسانتیاوو په شمول له لومړنیو اړتیا وړ شیانو بې برخې شوي دي.

د طبیعي پېښو پر وړاندې د چمتووالي ادارې ویلي چې د وري یا حمل له ۶ راهیسې د شدیدو بارانونو، سېلونو او د غرونو د ښویېدو له امله لږ تر لږه ۱۵۷ کسان مړه شوي او ۲۲۹ نور ټپیان دي.

د هرات په انجیل ولسوالۍ کې د ډزو پیښه کې لږ تر لږه لس تنه وژل شوي او ۱۲ نور ټپیان دي.
دا خبره د طالبانو د حکومت یوې باخبره سرچینې، چې د موضوع د حساسیت له کبله یې خپل نوم یاد نه کړ، ازادي راډیو ته وکړه.

د سرچینې په وینا، نا معلومه وسله والو نن جمعه ( د حمل ۲۱مه) پر هغو کسانو ډزې کړي چې د تفریح لپاره یوه میله ځای ته تللي وو.

پیښه د انجیل ولسوالۍ په ده مهري سیمه کې شوې ده او د مرګ ژوبلې شمیر هم ډیر لومړنی دی.

تراوسه د پیښې مسولیت کومې ډلې نه دی منلی او د ډزو انګیزه هم نه ده معلومه.

د هوا پېژندنې ادارې خبرداری ورکړی چې د افغانستان په ۲۶ ولایتونو کې د شدید باران د اورېدو او ناڅاپي سېلونو د راوتلو د احتمال اټکل کړی دی.

د دې ادارې د وړاندوینې له مخې، فاریاب، سرپل، بادغیس، هرات، فراه، غور، هلمند، کندهار، زابل، اروزګان، دایکنډي، بامیان، غزني، میدان وردک، لوګر، پکتیا، خوست، پکتیکا، ننګرهار، لغمان، پنجشېر، کاپیسا، پروان، بغلان، سمنګان او تخار به د جمعې په ورځ (۲۱ حمل) د شدیدو بارانونو، تندر او برېښنا، نسبي تېزو بادونو او ناڅاپي سېلونو شاهدان وي.

د باران اندازه په بېلابېلو سیمو کې له ۱۰ تر ۴۰ ملي‌متره پورې اټکل شوې ده. د هوا پېژندنې ادارې په وینا، په لوړو او سړو سیمو کې د واورې ورېدو احتمال هم شته.

په همدې حال کې، د طبیعي پېښو پر وړاندې د چمتووالي ادارې ویلي چې د وري یا حمل له ۶ راهیسې د شدیدو بارانونو، سېلونو او د غرونو د ښویېدو له امله لږ تر لږه ۱۵۷ کسان مړه شوي او ۲۲۹ نور ټپیان دي.

له پولو پاک افغانستان ادارې اعلان کړی چې د پولیو یا د ماشومانو د ګوزڼ ضد واکسین نوی کمپاین به د دوشنبې په ورځ (حمل۲۴) په ۳۲ ولایتونو کې پیل شي. دغه بنسټ د پنجشنبې په ورځ (وري ۲۰) په یوه پیغام کې ویلي چې دا کمپاین په بامیان او دایکنډي ولایتونو کې د سړې هوا له امله ځنډېدلی دی.

ویل شوي چې د کمپاین په ترڅ کې به ماشومانو ته ویټامین اې هم ورکړل شي.

دې بنسټ له کورنیو غوښتي چې خپل ماشومان واکسین کړي.

د دې دورې د واکسین کېدونکو ماشومانو شمېر نه دی ښودل شوی.

تر اوسه د روان میلادي کال په ترڅ کې په افغانستان کې د پولیو کومه مثبته پېښه نه ده ثبت شوې، خو د نړیوال روغتیا سازمان د راپور له مخې، په ۲۰۲۵ کال کې لږ تر لږه ۹ مثبتې پېښې ثبت شوې وې.

افغانستان او پاکستان یوازیني هېوادونه دي چې لا هم پکې د پولیو ویروس په بشپړه توګه له منځه نه دی تللی. پولیو یوه ساري ویروسي ناروغي ده چې درملنه نه لري او یوازې واکسین کولای شي ماشومان ترې وساتي.

دا ویروس د ملا تیر مهم عصبي رګونه زیانمنوي او د بدن د فلج سبب کېږي.

له پېښو سره د مبارزې ملي ادارې نن اعلان وکړ چې د افغانستان په وروستیو سېلونو کې ۱۵۷ تنه مړه شوي ۱۲۹ ژوبل شوي او ۹ تنه بې درکه دي.

د وروستیو دوو اوونیو د سېلونو د مرګ ژوبلو د شمېر په اړه له پېښو سره د مبارزې د ادارې له اعلان سره هممهاله سېف دي چلډرن ویلي چې وروستیو شدیدو سېلونو او ورښتونو ماشومان سخت اغیزمن کړی دي.

له بلې خوا د ملګرو ملتونو د بشري مېشتېدنې پروګرام (یو این هبیتات) هم د چهارشنبې په ورځ پر خپله ایکسپاڼه لیکلي چې په ۲۰۲۶ کال کې ۴،۲ میلیونه خلک په افغانستان کې بیړنۍ سرپناه او غیر خوراکي توکو ته اړتیا لري او وروستي سیلونه دا اړتیاوې نورې هم زیاتوي.

متحده عربي اماراتو افغانستان ته۹۶ ټنه بشري مرسته، چې درمل او طبي وسایل پکې شامل دي، کابل ته ولېږله.

د متحده عربي اماراتو رسنیو نن راپور ورکړ چې د دغه هیواد د مرستیال دولتمشر شیخ محمد بن راشد آل مکتوم په لارښوونه دا مرسته له دوبۍ څخه په الوتکه کې کابل ته واستول شوه.

تمه کېږي چې دا مرستې به په درې میاشتو کې تر ۲۵۰ زره زیاتو کسانو سره مرسته وکړي، او هغوی ته به د لومړنیو روغتیايي خدمتونو د برابرولو زمینه برابره کړي.

متحده عربي اماراتو دا مرسته په داسي حال کې افغانستان ته استولې چې د دې هیواد ګڼې سیمې وروستیو سېلونو خپلي دي. په دې سېلونو کې نژدې یونیم سل تنه مړه شوي او سلګونه کورونه او زرګونه جریبه کګرنیزه مځکه ویجاړه شوې ده.

د افغانستان د باډي بلډرۍ لوبغاړي محمد علي عظیمي د مستر المپيا سیالیو ته لار پيدا کړه.

عظیمي چې اتریش میشته افغان دی، د هالنډ په ( بنفلکس) سیالیو کې له بریا وروسته مستر المپیا ته لاره ومونده.

عظیمي د ( کلاسلیک فزیک) په برخه کې ښه وځلېد او د هالنډ لوبو کې یې لومړۍ درجه ترلاسه کړه.

له دې سره تر علي بلال وروسته عظیمي دویم افغان لوبغاړی شو چې مسترالمپيا ته لاره پیدا کوي.

دا د نړۍ په کچه د مسلکي باډي بلډنګ تر ټولو د لوړې کچې سیالۍ دي.

د ملګرو ملتونو د بشري میشتیدنې پروګرام ( یو.ان. هبیتات) وایي، هره افغان کورنۍ د ژوند لپاره د یوه خوندي ځای مستحقه ده.

دغه پروګرام د چهارشنبې په ورځ ( د حمل ۱۹مه) وویل چې په ۲۰۲۶ میلادي کال کې څلور اعشاریه دوه میلیونه خلک په افغانستان کې بیړنۍ سرپنا او غیر خوراکي توکو ته اړتیا لري.

د دوی په ټکو وروستیو سیلابونو سرپنا او نورو اساسي خدمتونو ته د افغانانو اړتیا ډېره کړې ده.

دغه سازمان په دې وروستیو کې ویلي چې شاوخوا ۱۴ میلیونه افغانان روغتیایي خدمتونو ته د لاسرسي په برخه کې مرستې ته اړتیا لري.

د ملګرو ملتونو له دې ډول څرګندونو ښکاري چې د طالبانو تر واکمنۍ لاندې افغانستان کې بشري وضعیت د اندیښنې وړ دی.