د کونړ ولایتي مسؤلین وايي، د څوکۍ ولسوالۍ د دیوه ګل په سیمه کې په روانه جګړه کې د اسلامي دولت یا داعش او افغان ځواکونو ته مرګ ژوبله اوښتې ده.

د کونړ د والي ویاند عبدالغني مصمم نن یکشنبه ازادي راډیو ته وویل، داعش وسله والو د څوکۍ ولسوالۍ په یوه ګل کې د یکشنبې د ورځې د سهار پهشپږنیمې بجې هلته د پاڅون کوونکو په پوستو برید کړی چې پکې برید کوونکو ته درنه مرګ ژوبله اوښتې ده.

ښاغلي مصمم وویل:

"نن سهار د پاڅون کوونکو او محلي پولیسو په پوستو برید شوی و چې اوس هم جګړه شته، برید په شا تمبول شوی، لومړني معلومات ښيي چې د داعش ۱ تنه وژل شوی او ۲۲ تنه يي ټپیان دي، کېدای شي دغه اندازه نوره هم زیاته شي."

مصمم وايي، په یاده جګړه کې درې افغان سرتېري وژل شوي او ۱۳ تنه ټپیان دي چې ټپیان روغتون ته رسول شوي دي.

مصمم زیاتوي، سیمې ته ملي اردو، ملې پولیس، د عامه نظم پولیس او د چټګ غبرګون ځواکونه رسېدلي، د وسله والو په مورچو د ملي دفاع وزارت هليکوپټرو بمباري کړې چې تراوسه یې د تلفاتو په اړه معلومات نشته.

دا په کونړ کې د داعش وسله والو له خوا لومړنۍ لویه حمله ده چې د خلکو په وینا، پکې زیاتو کسانو برخه اخيستې او جګړه اوس هم دوام لري .

تراوسه داعش ډلې د روانې جګړې په اړه څه نه دي ویلي.

به دیوه ګل دره کې وروسته له هغه د چمبېل خلکو د داعش خلاف پاڅون وکړ چې د خلکو په وینا، یادې ډلې داستېناف څارنوالۍ یو کارکوونکی ګل شیرین وواژه او د ګل شیرین قومیانو بیا د داعش ډلې یو کس له منځه یوړو.

پخواني معلومات:

د کونړ ولايت په څوکۍ ولسوالۍ کې د جګړې له کبله د ځينو کسانو د وژل کېدو او د ځينو نورو د ټپي کېدو راپور ورکړل شوى دى.

د کونړ د روغتيا رئيس ډاکټر عزيز الرحمن ساپي یکشنبه ازادي راډيو ته وويل چې له دې جګړې تر اوسه درې مړي او ٩ تنه ټپيان وروړل شوي دي.

هغه وويل چې وژل شوي او ټپيان ټول سرتېري دي.

د ازادۍ راډيو خبريال وايي، جګړه نن سهار پيل شوې چې اوس هم په ديوه ګل دره کې روانه ده.

د کونړ د امنيې قوماندانۍ مطبوعاتي مسؤل شېر ولي خان ويلي، جګړه هغه وخت پيل شوه چې د داعش ډلې وسله والو د پاڅونوالو پر ځينو پوستو حمله وکړه.

د دولت کومې مخالفې ډلې په دې اړه تبصره نه ده کړې.

څه باندې ۱۸۰۰ افغان کډوال په یوه ورځ کې له پاکستانه اخراج شوي.

د طالبانو د حکومت ویاند حمدالله فطرت پر خپلې ایکس پاڼې لیکي،" د جمعې په ورځ ۱۸۲۶افغان کډوال د تورخم له لارې بیرته افغانستان ته ستانه شوي دي".

د پاکستان د کورنیو چارو وزارت اعلان کړی چې د روانې جولای میاشتې له لسمې وروسته د هغوو افغانانو نیول پیلوي چې ویزې خلاصې شوي وي.

پاکستان له مودو راهیسې افغانانو ته د ویزو ورکول بند کړي دي.

سپین‌غر پرانګانو د بست ساتونکو لوبډلې ته د ۵۹ منډو په توپیر ماتې ورکړه.

د شپږیزې لیګ په روان یولسم پړاو کې سپین‌غر لوبډله وتوانیده د راشدخان پر مټ خپله دویمه لوبه وګټي.

سپین‌غر پرانګانو په نننۍ لوبه کې د شپږو ویکټو په زیان بست ساتونکو ۲۲۰ منډې هدف وټاکه.

که څه هم د بست ساتونکو لوبډلمشر ابراهیم ځدران ۵۹ منډې وکړې او نیمه سلیزه يې جوړه کړه خو په لوی توپیر يې سپین‌غر پرانګانو ته لوبه وبایلله.

دغه لوبه د خوست ولایت په رحمت ولي مسرور کریکټ لوبغالي کې ترسره شوه.

بله لوبه د امو نهنګانو او مېس عینک اتلانو لوبډلو ترمنځ ده چې له غرمې وروسته ۲بجې پیلږي.

د افغانستان د کرېکټ وتلی ستوری راشد خان کابل ته ستون شو.

راشد خان د جمعې په ورځ کابل ته ورسید او تمه ده په شپږیزه لیګ کې د سپين‌غر زمریان لوبډلې لپاره ولوبېږي.

سپين‌غر زمریان له بست ساتونکي لوبډلې سره لوبه لري.

راشد خان شاوخوا دوه کاله وروسته کابل ته ستنېږي.

د راشد خان په ګډون د ملي لوبډلې ګڼ نور لوبغاړي له نړیوالو سیالیو وروسته اوس په کورني کرېکټ لوبو کې د ګډون لپاره په افغانستان کې دي.

د شپږیزې سږني لیګ پنځمه لوبه د مېس عینک اتلان او د بند امیر ښاماران لوبډلو ترمنځ وشوه چې د بند امیر ښارمارانو د اتو ویکټو په توپیر له مېس عینک اتلانو ماتې وخوړه.

افغان او ایراني سوداګرو په کابل کې د سوداګرۍ درې ټرونونه لاسلیک کړي.

دغه خبره په کابل د ایران سفارت د جمعې په ورځ پر خپلې ایکس پاڼې لیکې وه.

وړاندې راغلي،" په کابل کې د ایران سفارت په بلنه له ۲۰۰ ډیرو افغان او ایراني سوداګرو، اقتصادي فعالانو، صنعتکارانو او پانګوالو په یوه غونډه کې برخه اخیستې وه".

د سفارت په ټکو، په غونډه د دواړو لوړو ترمنځ د اقتصادي او سوداګریزو اړیکو د پراختیا په موخه درې هوکړه لیکونه لاسلیک شول.

د افغان او ایراني سوداګرو ترمنځ د دې هوکړه لیکونو لاسلیک په داسې حال کې دی چې له میاشتو راهیسې د تورخم دروازه د هر ډول تګ راتګ پر مخ تړلې ده.

د کابل- جلال اباد په لویه لاره ترافیکي پیښه کې لږترلږه ۴ کسه مړه او ۸ تنه نورټپیان شوي او لس کسه نور لادرکه دي.

له پاکستان څخه د ستنو شویو کډوالو موټر سیند ته لویدلی دی.

د لغمان امنیه قومانداني وايي موټر کې ۲۲ کسه ستانه شوي کډوال سپاره وو او تیره شپه د سرخکانو ولسوالۍ مربوطاتو کې سیند ته لویدلی دی.

چارواکي زیاتوي چې د لادرکه شویو کسانو د میندلواو ژغورنې لپاره عملیات روان دي.

د پیښې علت سملاسي نه دی معلوم شوی. خو افغانستان کې اکثر ترافیکي پیښې د لارو د خرابوالي ، د موتر چلوونکو بې احتیاطي او د ترافیکي قوانینو نه رعایت کولو څخه رامینځ ته کیږي.

د اروپايي اتحادیې د بشري مرستو څانګه (ECHO)افغانستان کې دمیندو وضعیت بحراني او د اندیښنې وړ بولي.

دغه اداره خبرداری ورکوي چې د نجونو او ښځو په طبي زدکړو بندیز او روغتیايي خدماتو ته د ښځو دلاسرسي محدودیت وضعیت نورهم خراب کړی او د زیږون په مهال د میندو او ماشومانو ژوند له خطر سره مخ کوي.

تردې مخکې د ملګرو ملتونو دبشري مرستو د همغږۍ دفتر (اوچا) هم ویلي چې افغانستان د هغو هیوادونو څخه دی چې د میندو د مړینې کچه په کې لوړه ده او په هرو ۱۰۰ زرو ولادتونو کې ۶۰۰ میندې خپل ژوند له لاسه ورکوي.

واک ته د طالبانو له ستنیدو وروسته افغانستان کې له شپږم ټولګي پورته د نجونو او ښځو په زده کړو او تحصیلاتو بندیز لګول شوی دی.

د کورنیو او بهرنیو فشارونو سره سره د طالبانو د حکومت په دغې پالیسۍ کې د بدلون نښې نه ترسترګو کیږي.

دشپږیزې ليګ په نننۍ لوبه کې مس عینک بند امیر ته ماته ورکړه.

مس عینک په دې شل اوریزه سیالۍ کې پیاوړې لوبه وکړه او مقابل ټیم ته یې په اتو ویکټو ماته ور کړ.

په دې لوبه کې د مس عینک لپاره خالد تڼیوال ۵۳ او رحمان الله ګربز ۵۲ منډې وکړې.

پرونیو لوبو کې آمو نهنګانو د بُست ساتونکو، او سپین‌غر پړانګانو بند امیر ته ماتې ورکړه.

د شپږیزې لیګ په سیالیو کې چې د چهارشنبې په ورځ خوست کې پیل شوي او ۱۴ ورځې دوام کوي پنځه ټیمونه برخه لري.

د پنجشنبې په ورځ د شپږیزې کرکټ لیګ په دویمه ورځ، چې په خوست کې روان دی، آمو نهنګانو د بُست ساتونکو او سپین‌غر پړانګانو ،بند امیر ته ماتې ورکړه.

دا د آمو نهنګانو دویمه او د سپین‌غر پړانګانو لومړنۍ بریا وه.

د شپږیزې سیالۍ چې د چهارشنبې په ورځ پیل شوې، ۱۴ ورځې دوام کوي، او په ترڅ کې به یې ۲۱ شل اوریزې لوبې ترسره شي.

په دغه لیګ کې د افغانستان د کرکټ بورډ په وینا، د سپین‌غر، بند امیر، مس عینک، آمو او بُست لوبډلې د اتلولۍ لپاره سیالي کوي.

د شپږیزې لیګ په یوولسم پړاو کې د افغانستان د ملي لوبډلې ګڼ مشهور لوبغاړي د ځوانو او کورنیو استعدادونو ترڅنګ برخه لري.

د روان کال په سیالیو کې:

• راشد خان د سپین‌غر لوبډلې لوبډلمشر دی.
• عظمت‌الله عمرزی د آمو لوبډلې لوبډلمشر دی.
• رحمان‌الله ګربز د مس عینک لوبډلې لوبډلمشر دی.
• ابراهیم ځدراڼ د بُست لوبډلې لوبډلمشر دی.
• حشمت‌الله شهیدي د بند امیر لوبډلې لوبډلمشر ټاکل شوی دی.

د افغانستان د بدن جوړونې او فټنس ملي لوبډله د جنوبي اسیا سیالیو کې وځلیده او دوه د سرو زرو ، درې د سپینو زرو او یو د برونزو مډال یې ترلاسه کړ.

د افغانستان د بدن جوړونې او فټنس فدراسیون وایي میوند بابکرخېل او نصیب الله عظیمي د سرو زرو مډالونه، او ریاض رحمان، احمد حبیبي او خواجه رفیع صدیقي د سپینو زرو مډالونه وګټل او بلال جلیلي د برونزو مډال خپل کړ.

دا سیالۍ د تېرې سې‌شنبې په ورځ د بوتان پلازمینه تیمفو ښار کې پیل شوې او له افغانستان څخه پکې ۱۵ ورزشکاران ګډون لري.

د ملګرو ملتونو د بشري چارو د همغږۍ دفتر (اوچا) وایي، د روان ۲۰۲۶ کال په تیرو شپږو میاشتو کې یې د افغانستان دبشري مرستو لپاره د اړتیا وړ بودیجې یوازې ۱۷ سلنه ترلاسه کړې ده.

اوچا وایي، افغانستان ته د بشري مرستو لپاره ټولټال ۱.۷۱ میلیارده ډالرو ته اړتیا ده، خو تر اوسه یوازې ۲۹۲ میلیونه ډالر برابر شوي دي.

د دې ادارې په وینا، په افغانستان کې ډېری اړمن خلک هره ورځ له داسې سخت وضعیت سره مخ وي چې فکر کوي چې خواړه واخلي که درمل، او یا د نن ورځې خواړه برابر کړي که د سبا .

په دې وروستیو کې د خوړو نړیوال پروګرام (WFP) هم خبرداری ورکړ چې دا مهال ۱۳.۸ میلیونه افغانان له شدیدې یا بېړنۍ خوراکي ناامنۍ سره مخ دي.