د هلمند نظامي شورا د دې ولایت بزګرو ته ګواښ کړی دی، که کوکنار وکري نو کښت بهیې لهمنځه يوسي.
د دې ولایت والي حیاتالله حیات د پنجشنبې په ورځ «۱۳۹۶ کال د لیندۍ ۳۰» ازادي راډیو ته وویل چې تېر کال وسلهوالو طالبانو تر خپل واک لاندې سیمو کې بزګر مجبور کړي وو چې کوکنار وکري، خو په روان کال کې د کوکنارو د فصل له پیل سره سم د حکومت تر واک لاندې او ناامنو سیمو کې د کوکنارو د اړولو لپارهیې ځانګړي پلانونه جوړ کړي دي.
دی وايي:
"روان کال پلان لرو، هغه سیمې چې د دولت تر واک لاندې دي، هلته باید کوکنار ونهکرل شي. د ناامنو سیمو لپاره هم پلان لرو. یو پلان دا دی چې د هیروئینو د تولید پر کارخانو او قاچاق کوونکو مو هوايي عملیات پیل کړي او دا عملیات به دوام کوي، موږ نهغواړو چې بزګرو ته زیان ورسېږي. زموږ اصلي هدف د مخدره موادو قاچاق کوونکي دي."
ښاغلی حیات وايي، د دولت تر واک لاندې سیمې او ناوې ولسوالۍ چې تېر کال د وسلهوالو طالبانو تر واک لاندې وې او زیات کوکنار پهکې کرل شوي و، سږ کاليې خلکو ژمنه راسره کړې چې کوکنار نهکري.
په ورته وخت کې د افغانستان د مخدره موادو پر وړاندې د مبارزې وزارت هم له دې پرېکړې هرکلی کوي.
د دې وزارت د پالېسۍ او ستراتېژۍ مرستیال جاوید احمد قایم وايي، دوی هم له دفاع وزارته غوښتي چې له مخدره موادو سره مبارزه په خپلو عملیاتي پلانونو کې شامله کړي.
دی وايي:
"موږ له دفاع وزارت سره په اړیکه کې یو. کله چې هغوی د طالبانو پر وړاندې ځمکني عملیات کوي، نو د مخدره موادو پر وړاندې مبارزه دې هم پهکې شامله کړي. دا پلان تر اوسه پورې بشپړ شوی نهدی، خو موږ له امنیت شورا سره په اړیکه کې یو، دا یو پېچلی پلان دی، خو بله لاره نهلرو."
د افغانستان د مخدره موادو پر وړاندې د مبارزې وزارت په داسې حال کې د دفاع وزارت په عملیاتي پلان کې د مخدره موادو پر وړاندې د مبارزې شاملېدو غوښتنه کوي چې له نږدې یوې میاشتې راهیسې په هلمند ولایت کې د هیروئینو د تولید پر کارخانو د افغان او ناټو ځواکونو ګډ هوايي عملیات دوام لري.
خو د مشرانو جرګې د مخدره موادو پر وړاندې د مبارزې کمېسیون مشر هاشم الکوزی وایي چې بزګر له مجوریته د کوکنارو کښت ته مخه کوي.
ښاغلی الکوزی وايي، که دولت بزګرو ته د کوکنارو بدیل کښت ورکړي او د حلالو محصولاتو لپارهیې بازار پیدا کړي، بزګر به ان دا چې د طالبانو تر واک لاندې سیمو کې هم کوکنار ونهکري.
دی وايي:
"د هلمند ډېره برخه سیمې د طالبانو تر واک لاندې دي. که بزګرو ته بدیل کښت ورکړل شي هغوی د طالبانو غوښتنې نهمني، ځکه بزګر له مجبوريته کوکنار کري. که د اقتصادي ستونزو لپارهیې حللاره وموندل شي خپله بزګر کوکنار نهکري، هغه سیمې که د دولت په واک کې وي او يا د طالبانو په واک کې."
ښاغلی الکوزی په ۲۰۱۷ میلادي کال کې د کوکنارو د کښت او هیروئینو د تولید په اړه د افغانستان د مخدره موادو پر وړاندې د مبارزې وزارت او "یو. اېن. او. ډي. سي" راپور ته په کتو سره چې د ټول افغانستان ۵۰ سلنه کوکنار په هلمند کې کرل کېږي، افغان حکومت ته وړاندیز کوي چې په هلمند کې د امن راوستلو او بديل کښت ته پاملرنه وکړي، ځکه د هلمند ډېره برخه کوکنار په ناامنه سیمو کې کرل کېږي.
راپور: مرسلین ارسلا
