د کابل چاپ ورځپاڼو نن تر ډېره له طالبانو سره د روسیې پر پوځي مرستو او همداراز د ډیورند کرښې بلې غاړی نه د توغندیو او هاوانونو د حملو پر دوام پراخ بحثونه کړي دي.
- ملي ارمان
ملي ارمان ورځپاڼې په یو مطلب کې لیکلي دي چې طالبانو د روسیي په مرسته په شپه کې د لیدو لپاره ځانګړي دوربینونه ترلاسه کړي دي.
ورځپاڼې لیکلي دي چې پر دغو دوربینونو د روسیې حک شوی نښان لیدل کېږي او په فراه کې مېشت طالبانیې په خپلو اکثرو حملو کې کاروي.
- نننی افغانستان
ننني افغانستان ورځپاڼې بیا په یو مطلب کې له طالبانو سره د روسیې اړیکې څېړلي او لیکلي یې دي چې په افغانستان کې روانه جګړه تر ډېره د زبر ځواکونو ترمنځ د سیالۍ زېږنده ده چې پر افغانستان د پخواني شوروي اتحاد له پوځي یرغل سره سم پیل شو.
ورځپاڼه لیکي:
د افغانستان په جګړه کې ښکېل نړیوال ځواکونه له ترورېستي ډلو سره اړیکې لري او ان د هغوی فعالیتونه تنظیموي.
ورځپاڼه لیکي چې په جګړه کې ښکېل ځواکمن هېوادونه تر ډېره خپلې ډلې لري چې په پټه ورسره اړیکې پالي، خو کله بیا د روسیې او طالبانو ترمنځ د اړیکو په څېر څرګندې هم شي.
- ویسا
ویسا ورځپاڼې بیا په یو مطلب کې لیکلي دي، تر هغو چې ګاونډي او د سیمې هېوادونه په افغانستان کې د سولې په ټینګښټ کې همکاري ونهکړي، په افغانستان کې جګړه پای ته نهرسېږي او نه هم امریکا او د لوېدیځ نور هېوادونه په دې برخه کې څه کولای شي.
د ورځپاڼو پاتې مطالب تر ډېره د ډیورنډ له کرښې بلې غاړې نه د درنو وسلو حملو ته ځانګړي شوي دي.
- هېواد
هېواد دولتي ورځپاڼې په دې اړه لیکلي دي چې افغان ځواکونه د پاکستان په خلاف د تیارسی په حال کې دي.
د افغانستان په جګړه کې ښکېل نړیوال ځواکونه له ترورېستي ډلو سره اړیکې لري.
ورځپاڼې په کونړ کې د ځایي چارواکو په حواله لیکلي دي چې د ډیورند د کرښې بلې غاړې نه د حملو سلسله همدا شان روانه ده چې دې غاړې تهیې د کونړ په څو ولسوالیو کې زیات شمېر خلک بېځایه کړي دي.
ورځپاڼې وړاندې د دغو حملو او د ډیورند په کرښه د پاکستان د پوځ لهخوا د خنډونو جوړول پاروونکې هڅې بللي او لیکلي یې دي چې د ډیورند د کرښې دواړو خواو ته خلک دا هر څه غندي.
- ویسا
ویسا ورځپاڼې بیا د پاکستاني پوځیانو د حملو په اړه د افغانستان د دفاع وزارت د ویاند جنرال دولت وزیري غبرګون راخیستی او لیکلي یې دي چې دا حملې نور د زغم وړ نهدي.
ورځپاڼه لیکي چې د افغانستان دفاع وزارت وایي، دا مسئلهیې له اسلاماباد او نړیوالې ټولنې سره شریکه کړې چې جدي غور ته اړتیا لري.