د امريکا متحده ايالاتو چارواکو له عراقي او کُرد ځواکونو غوښتنه وکړه چې د يو بل په وړاندې له نورو پاروونکو اقداماتو ډډه وکړي.

تر دې مخکې راپورونه خپاره شوي وو چې د عراق دولتي ځواکونو په تېلو غني ښار کرکوک ته نږدې له کُرد جنګياليو سره د توپونو ډزې تبادله کړې دي.

دا شخړه وروسته له هغې شوې چې عراقي ځواکونه د سترو عملياتو په لړ کې د کُردانو د سنګرونو په وړاندې مخکې لاړل.

د امريکا دفاع وزارت پرون ناوخته وويل په سيمه کې ټول اړخونه بايد د داعش سخت دريځې ډلې له درکه پر پېښ ګډ خطر تمرکز وکړي او د عراق د خلکو ترمنځ دې د کړکېچ له زياتولو ډډه وشي.

دغه وزارت ويلي چې د يوه واحد عراق ملاتړ ته ادامه ورکوي، دغه‌راز د عراق د فډرال حکومت او د عراق په شمال کې د کُردانو د کورواکې سيمې د رهبرانو ترمنځ د شخړو د مخنيوي لپاره خبرې اترې بهترينه لار ده.

امريکا دا څرګندونې د فرانسې خبري اژانس تر يوه نا تائيد شوي راپور وروسته کوي چې په‌کې ويل شوي، عراق او کُرد ځواکونو د کرکوک په جنوب کې چې پر مالکيت‌يې بغداد او کُرد رهبران دعوه لري، د يو بل په وړاندې د توپونو ډزې تبادله کړې دي.

د امريکا د دغو دوو متحدانو ترمنځ د ممکنه شخړو راپورونه په داسې حال کې خپرېږي چې درې اوونۍ مخکې د کُردانو مشرانو په خپله کورواکې سيمه او شااوخوا ساحو کې د خپلواکۍ په اړه ټولپوښتنه وکړه.

عراق پر دغې ټولپوښتنې سخت انتقاد کړى او غير قانوني يې بللې ده.

د ایران د بهرنیو چارو وزارت نن وویل، هغه ۵۵ تنه اتباع یې چې د امریکا د ولسمشر ډونالډ ټرمپ ادارې اخراج کړي، ایران ته ستانه شوي دي.

د دغه وزارت د قونسلي چارو مشر مجتبی شصتي کریمي ویلي ( له اخراج شویو سره د غیر انساني چلند راپورونه ترلاسه شوي) دي.

دا دویمه ډله ایرانیان دي چې امریکا یې اخراجوي.

لومړنۍ ډله په میزان میاشته کې ایران ته استول شوې وه.

روسي ځواکونو تېره شپه د اوکراین پر کریمینچوک ښار د بې پیلوټه الوتکو او توغندیو په وسیله بریدونه وکړل چې په نتیجه کې یې په ښار کې د اوبو او برښنا جریان وځنډېد.

د کریمینچوک ښاروال ویټالي مالیڅکي نن پر ټولنیزو شبکو په یوه بیان کې وویل چې د دې حملې د احتمالي زیانونو په اړه جزییات به له څېړنو وروسته خپاره شي.

نوموړي زیاته کړه چې د عامه خدماتو کارکوونکي د اوبو او بریښنا د شبکو د بیا فعالولو هڅه کوي.

په عین حال کې د اوکراین پوځ پرون پر روسیې د بې پیلوټه الوتکو د یوه بل برید خبر ورکړ او ویې ویل چې د مسکو د جنوب ختیځ په ۲۰۰ کیلومتري واټن کې یې د ریازان د تېلو تاسیسات په نښه کړي دي.

د ریازان والي پاول مالکوف پرون پر خپله ټلګرام پاڼه ولیکل چې په یوه صنعتي ساحه کې د ډرونونو چرې راپرېوتي خو زیان یې نه دی اړولی.

ترکیه وايي، د غزې د ثبات ساتونکي ځواک د ماموریت په اړه خبرې روانې دي.

د ترکیې د بهرنیوچارو وزیر هاکان فیدان نن (د ډسمبر ۶مه) وویل چې په غزه کې د ثبات ساتونکي ځواک د ماموریت او د عملیاتو د اصولو په ګډون بحثونه دوام لري. ښاغلي فیدان د دوحې د کلنې ناستې پرمهال په خپلو څرګندونو کې زیاته کړه چې د دې خبرو اصلي هدف باید دا وي چې اسراییليان او فلسطینیان د سرحد په اوږدو کې سره جلا وساتي.

په عین حال کې د قطر صدراعظم ویلي دي چې په غزه کې نژدې دوه میاشتنی اوربند به تر هغه مهال په بشپړ ډول عملي نه شي اسراییلي ځواکونه د واشنګټن په ملاتړ د سولې د پلان په اساس د فلسطینیانو له قلمرو څخه ونه وځي.

شیخ محمد بن عبدالرحمان آل ثاني زیاته کړه چې اوس وخت خورا حساس دی او کله چې اسراییلي ځواکونه د فلسطینیانو له قلمرو څخه ووځي نو روانو هڅو ته هغه مهال اوربند ویل کېدای شي.

مټا شرکت اعلان کړی چې د سترو نړیوالو رسنیو خبري محتوا به د خپلې مصنوعي ځیرکتیا په مرستیال (Meta AI) کې مدغم کړي، څو د انسټاګرام، وټس‌اپ او فېسبوک کاروونکي وکولای شي له تازه او باوري معلوماتو څخه ګټه واخلي.

د دې ټولنیزو شبکو ستر شرکت د جمعې په ورځ د لیندۍ ۱۴مه (۵ ډسمبر) په خپره کړې خبرپاڼه کې ویلي چې د «مټا اې‌آی» مرستیال به د خبرونو اړوندو پوښتنو ته د ځواب پر مهال تر ټولو تازه راپورونه، د تفریح او د ژوند د سبک مطالب د سي‌این‌این، فاکس‌نیوز، لوموند، پیپل او یوایس‌اې ټوډې په ګډون له ګڼو رسنیو سره د همکارۍ له لارې وړاندې کړي.

د مټا په وینا، دغه نوې اسانتیا کاروونکو ته دا امکان برابروي چې «د محتوا له لا متنوع سرچینو» څخه استفاده وکړي او د مطالبو د تفصیل لپاره د ورکړل شویو لینکونو د کلیک کولو له لارې همکارو خبري ویبپاڼو ته لاړ شي.

نېټفلیکس اعلان کړی چې د هالیووډ یو‍ تر ټولو مشهور فلمي شرکت، «وارنر برادرز» او د دې انلاین څانګې، په ځانګړي ډول «اېچ‌بي‌او» او «اېچ‌بي‌او مکس» اخلي.

د انلاین تولید او نندارې دې ستر شرکت دا پرېکړه د جمعې په ورځ، د لېندۍ په ۱۴ مه اعلان کړه.

د وارنر برادرز د بشپړ پېرود او ادغام پروسه به له ۱۲ تر ۱۸ میاشتو پورې وخت ونیسي او دا معامله به د نغدو پیسو او د سهمونو د ارزښت د تبادلې په ګډه بڼه ترسره شي.

د معاملې د نغدي برخې ارزښت ۷۲ میلیارده ډالره اعلان شوی، خو که د سهمونو ارزښت هم ورسره حساب شي، د معاملې ټولیز ارزښت شاوخوا ۸۳ میلیارد ډالرو ته رسېږي.

دا معامله یوازې د وارنر برادرز فلمي او تلویزیوني سټوډیوګانې نه، بلکې د دې شرکت مشهورې انلاین څانګې، یعنې HBO او HBO Max هم رانغاړي.

په دې توګه به د وارنر برادرز نژدې ۱۳۰ میلیون مشترکان د نېټفلیکس له شاوخوا ۳۰۰ میلیون مشترکانو سره یوځای شي.

د فوټبال د ۲۰۲۶ نړیوال جام سیالیو د ګروپونو د ټاکلو مراسم پرون (جمعه) په واشنګټن ډي سي کې د درو هیوادونو د مشرانو په ګډون په یو لړ مراسمو کې ترسره شول.

په دې مراسمو کې د متحدوایالتونو ولسمشر ډونالډ ټرمپ، د مکیسیکو ولسمشره کلودیا شاینباوم او د کاناډا صدراعظم مارک کارني ګډون درلود چې هیوادونه یې په ګډه د ۲۰۲۶ کال د فوټبال د اتلولیو کوربانه دي.

دا لوبې د اته څلویښت هیوادونو د ملي لوبډلو ترمنځ د راتلونکي کال د جون په یوولسمه پیلیږي او د جولای په نولسمه به یې پایلوبه ترسره شي.

د یادونې ده چې تر اوسه دوه څلویښت لوبډلې توانیدلي دي چې دې جام ته لاره ومومي او پاتې شپږ ټیمونه به د مارچ په میاشت کې د غوراوي سیالیو په ترڅ کې معلومې شي.

دا مسابقې به د مکسیکو په مکسیکوسیټي، ګوادا لاخارا او مونټري کې ترسره شي.

په کاناډا کې تورنتو او ونکوور ښارونه د ۲۰۲۶ د فوټبال نړیوال جام سیالیو ته غوره شوي دي.

په همدې حال کې فیفا یا د فوټیال نړیوال فدراسیون ویلي چې سر له اوسه د سیالیو تر ۲ میلیونه ډېر ټکټونه پلورل شوي دي.

د روسیې ولسمشر یو ځل بیا د اوکراین په ختیځ کې د دونباس سیمې په اړه خپله پخوانۍ ادعا تکرار کړه او ویې ویل، که د اوکراین ځواکونه له دې سیمې څخه شاتګ ونه کړي، نو روسیه به هغه په زور ونیسي.

ولادیمیر پوتین له «انډیا ټوډې» ورځپاڼې سره په یوه مرکه کې وویل:

«یا به موږ دا سیمه د خپل پوځ په زور آزادوو، او یا به اوکرایني ځواکونه په خپله ترې وځي.»

د پوتین اشاره د دونباس سیمې ته وه چې د دونیڅک او لوهانسک له دوو ولایتونو جوړه ده.

د پوتین د مرکې ځینې برخې د پنجشنبې په ورځ (د لیندۍ په ۱۳مه دسمبر ۴) هند ته د ده تر روانېدو مخکې خپرې شوې.

د روسیې تر بشپړ پوځي یرغل مخکې، د مسکو له ملاتړه برخمنو بېلتون‌پالو ځواکونو په دې سیمه کې نژدې اته کاله جګړه وکړه، خو هغوی ونه توانېدل چې ټول دونباس ونیسي.

د اوکراین ولسمشر ولودیمیر زیلنسکي ویلي، هغه خاوره چې روسیې په خپله په زور نه ده نیولې، هېڅکله به یې روسیې ته د ډالۍ په ډول ور نه کړي.

د رویټرز خبري اژانس د راپور له مخې، روسیه دا مهال د اوکراین شاوخوا ۱۹.۲ سلنه خاوره اشغال کړې ده.

ټاکل شوې ده چې نن) د ډسمبر ۵ مه) په واشنګتن ډي سي کې د یو لړ مراسمو په ترڅ کې د دوه زره شپږ ویشتم کال د فوټبال د نړیوال جام د لوبډلو ګروپونه مشخص شي.

تمه ده چې په دې مراسمو کې د امریکا د متحد ایالتونو ولسمشر ډونالډ ټرمپ، د مکسیکو ولسمشره ګلاودیو شینباوم او د کاناډا صدراعظم مارک کارني هم برخه واخلي.

د امریکا متحد ایالتونه، کاناډا او مکسیکو د دغو سیالیو ګډ کوربانه دي.

دا لوبې د اته څلویښت هیوادونو د ملي لوبډلو ترمنځ د راتلونکی کال د جون په یولسمه پیلیږي او د جولای په نولسمه به یې پایلوبه ترسره شي.

د یادونې ده چې تر اوسه دوه څلویښت لوبډلې توانیدلي دي چې دې جام ته لاره پيدا کړي او پاتې شپږ ټیمونه به د مارچ په میاشت کې د غوراوي سیالیو په ترڅ کې معلومې شي.

فلسطنیانو نن د غزې په خان یونس کې د خپلو وژل شویو عزیزانو ویر وکړ.

دا کسان یوه ورځ مخکې د اسراییلي ځواکونو د هوایي برید په ترڅ کې ووژل شول.

د خان یونس په کویتي روغتون کې ډاکټرانو وویل چې له دې برید وروسته دوی د پنځو فلسطنیانو جسدونه ترلاسه کړې دي چې دوه یې ماشومان دي.

د اسراییل پوځ بیا ویلي دي چې په خان یونس کې یې د حماس ترهګر په نښه کړي دي.

حماس د امریکا متحد ایالتونه او اروپایي ټولنه د ترهګرې ډلې په توګه پيژني.

حماس د اسراییل برید له اوربند څخه سرغړونه وبلله او د اسراییل پوځ وویل چې دا حمله په رفح کې د چهارشنبې په سهار پر اسراییلي پوځیانو د شوي برید په ځواب کې شوې ده چې له امله یې پنځه اسراییلي سرتیرې ټپيان شول.

عراق ویلي دي چې د ایران ملاتړیو وسله والو ډلو، حزب اله او حوثیانو پیسې به کنګل کړي.

رویټرز اژانس په یوه راپور کې لیکلي دي چې دا اعلان د عراق په رسمي جریده کې شوی دی او ښایي واشنګتن یې هرکلی وکړي، ځکه چې له اوږدې مودې راهیسې د امریکا متحد ایالتونه په عراق او د منځني ختیځ په نورو هیوادونو کې د ایران د نفوذ د کمولو هڅه کوي.

ایران په عراق کې د شیعه وسلو والو او سیاسي ډلو په مټ پوځي، سیاسي او اقتصادي نفوذ لري خو په تیر یوه کال کې د متحد ایالتونو د فشاونو او په سیمه کې د اسراییلي ځواکونو له لورې د ایران د نیابتي ډلو له کمزوري کیدو سره د ایران اغیزې کمې شوې دي.