د لاسرسي لېنکونه

دوشنبه ۱ لړم ۱۳۹۶ کابل ۰۱:۳۸

سرخط: چې هوا سړه شي، د سولې کیسه توده شي


کابل چاپ ورځپاڼو په خپلو نننیو ګڼو کې افغانستان ته د پاکستان د لوی درستیز د سفر په اړه، یو شمېر مطالب چاپ کړي دي.

سرخط:

سرخط خپلواکې ورځپاڼې د خپلې نننۍ ګڼې په سرمقاله کې لیکي چې هوا سړه شي، د سولې کیسه توده شي.

په سرمقاله کې راغلي، باجوه کابل ته د سولې ډول په غاړه راوړی دی او د ورستیو خبرو ډېره برخه یې دا وه چې پاکستان غواړي طالبان سولې ته کښېنوي.

سرمقاله لیکونکی لیکلي، هر کال چې په افغانستان کې هوا سړه شي، د سولې لپاره د پاکستان په رګونو کې وینه توده شي.

د ده په باور، که موږ په اوسنیو حالاتو کې د هند یا امریکا سره د اړیکو کمزوري کولو په بدل کې د سرګودې د پهلوان خیال پلونه اخلو، دا به مو د سرو زرو په قیمت ایرې پېرلې وي.

پاکستان که ډېر مجبوره شي، توره به ماته کړي، خو دا زمه واري نشته چې له وسپنې به ځنځیر نه جوړوي.

هېواد:

هېواد دولتي ورځپاڼې بیا په خپله سرمقاله کې لیکلي، باجوه او ورسره ملګري پلاوي یې بیا هم ژمنه وکړه چې د اسلام اباد حکومت له ترهګرۍ سره د مبارزې په برخه کې هر ډول همکارۍ ته چمتو دی او د افغانانو په مالکیت او مشرۍ یې د سولې د میکانیزم ملاتړ وکړ.

دنیا:

خو دنیا خپلواکې ورځپاڼې بیا په دې اړه لیکلي چې کابل ته د پاکستان د لوی درستیز په سفر کې نور ډېر مهم موضوعات هم مطرح شوي چې د افغان حکومت چارواکو یې له شریکولو ډډه کړې ده.

ملي ارمان:

ملي ارمان خپلواکې ورځپاڼې بیا په خپله سرمقاله کې لیکلي، ښايی پاکستان بیا خپلو پخوانیو لوبو ته دوام ورکړي او د دې لپاره چې پر ځان فشار را کم کړي، ځينې وعدې یې وکړي او نړیوالو ته دا وښيي چې د دولتونو تر منځ خبرې پیل شوې دي.

خو د سرمقاله لیکونکي په باور، افغان چارواکي باید له پاکستاني لوري سره په اصلي موضوع چې له ترهګرو نه د هغه هېواد ملاتړ ختمول دي، خبرې وکړي او پرې نږدي چې هغه هېواد له فرصت نه په استفادې سره، خپلې غولونکي لوبې جاري وساتي.

XS
SM
MD
LG