د لاسرسۍ وړ لېنکونه

تازه خبر
چهارشنبه ۲۶ غبرګولی ۱۴۰۰ کابل ۰۹:۴۵

نړۍ

فریډم هاوس: نړیواله ټولنه باید څینې مثبت بدلونونه تائید کړي

د بشري حقونو یوه څارونکې ډله چې په امریکا کې مېشته ده، وايي نړیواله ټولنه باید هغه مثبت بدلونونه تائید کړي چې په ازبکستان کې د ولسمشر شوکت میرضیایف له واک ته رسېدو وروسته راغلي دي.

واشنګټن مېشتې فریډم هاوس ډلې په یوه راپور کې چې پرون دوشنبه‌یې خپور کړ، ویلي چې میرضیایف په نېږدې یو کال کې د ازبکستان د ۳۰ میلیوني ملت د ازادیو لپاره ځیني ګامونه اخیستي دي.

میرضیایف د ۲۰۱۶ میلادي کال په سپټمبر کې د پخواني مستبد ولسمشر اسلام کریموف له مړینې وروسته واک ته ورسېد.

فریډم هاوس په عین حال کې ویلي چې ځینې ازادۍ لکه رسنیو ته د دې اجازه ورکول چې د کریموف د دورې پر چارو انتقادي راپورونه جوړ کړي، ممکن تر ډېره په دې خاطر نه‌وي چې رسنیو ته ازادي ورکړي بلکې ښايي د دې لپاره وي چې د میرضیایف واک نور هم ټینګ شي.

د ورځې تازه خبرونه دلته ولولئ

د ایران انتخابات؛ مهر علیزاده له کاندیداتورۍ لاس واخیست

پخوانی مرستیال ولسمشر ۶۴ کلن محسن مهر علیزاده

د ایران د ولسمشرۍ د انتخاباتو یوه اصلاح غوښتونکي نوماند له کاندیداتورۍ لاس واخیست.

ایراني رسنۍ وايي چې پخوانی مرستیال ولسمشر ۶۴ کلن محسن مهر علیزاده نن چهارشنبه (د غبرګولي ۲۶مه) د انتخاباتي کمپاین په وروستۍ ورځ له کاندیداتورۍ د تېرېدو اعلان وکړ.

نوموړی یو له دوو اصلاح غوښتونکو څخه دی چې د ایران د روان جون د ۱۸مې یعنې د راتلونکې جمعې د ورځې انتخاباتو ته د کاندید په توګه تأیید شوی و.

اوس پنځه کاندیدان پاتې دي او غالب ګومان دا دی چې د ایران د قضاییه قوې سخت دریځی مشر ابراهیم ريیسي به د حسن روحاني ځای ونیسي.

له بلې خوا د ایران ۱۱۰ تنو سیاسي او مدني فعالانو نن چهارشنبه له ایرانیانو څخه وغوښتل چې د جمعې د ورځې انتخابات بایکاټ کړي.

دوی په یوه ګډه لاسلیک کړې اعلامیه کې خلکو ته په خطاب کې ویلي چې په فرمایشي او نمایشي انتخاباتو کې چې د دوی په وینا د بد او بدتر ترمنځ انتخاب دی، ګډون ونه کړي.

په امریکا کې د 'الزایمر' واکسین د ازموینې پایلې بریالۍ وې

دا واکسین نیورو ساینس په نوم شرکت جوړ کړی

په امریکا کې د الزایمر یا هېرې د واکسین د کلنیکي ازموینې د دوهم پړاو پایلې بریالۍ وې.

دا واکسین نیورو ساینس په نوم شرکت چې د الزایمر یا هېرې د ناروغۍ د درملنې په برخه کې فعالیت کوي جوړ کړی دی.

نیور ساینس په وروستیو کې د دې ناروغۍ د مخنیوي لپاره خپل واکسین وازمایه چې نتیجه یې تر ډېره بریالۍ وه.

اوس دا واکسین په ۸ هېوادونو کې پر ۱۹۶ رضاکارانو ازمویل شوی دی.

لومړنۍ نتیجې ښيي چې واکسین منفي عوارض نه لري او د ناروغ په بدن کې داسې انټي باډي رامنځته کوي چې د یو ډول پروتین د جوړېدو سبب کېږي چې د الزایمر له ښه کېدو سره مرسته کوي.

بریتانیا: له ایران سره اټمي هوکړه کې د بریالیتوب تضمین نشته

د بریتانیا د بهرنیو چارو وزیر ډومینیک راب

د بریتانیا د بهرنیو چارو وزیر وايي، له ایران سره د اټمي موافقې په برخه کې له څرګندو پرمختګونو سره سره لا هم په خبرو کې د بریالیتوب تضمین نه شته.

ډومینیک راب پرون سې شنبه (د غبرګولي په ۲۵مه) د خپل هېواد پارلمان ته په خبرو کې وویل، د ایران اسلامي جمهوریت په منظم ډول د اټمي موافقې د ګډ اقدام جامع پروګرام ته ژمن نه دی.

نوموړی وايي، بریتانیا له خپلو اروپايي شریکانو، امریکا او روسیې سره همکاري کوي، خو په وینا یې اړتیا ده چې ایران په بشپړ ډول د اټمي هوکړې ټولې ژمنې پر ځان تطبیق کړي.

د اسراییل پوځ پر غزې هوایي بریدونه وکړل 

غزه

د اسراییل پوځ نن چهارشنبه (د غبرګولي ۲۶مه) سهار وختي پر غزې هوایي بریدونه وکړل.

د اسراییل پوځ ویلي، دا بریدونه وروسته تر دې وشول چې فلسطیني سخت دریځو د دوی خاورې ته اور شیندونکي بالونونه ولېږل.

دا د تېرې میاشتې له اوربند وروسته پر غزې د اسراییلو لومړنی برید دی چې د مرګ ژوبلې په اړه یې تراوسه څه نه دي ویل شوي.

له هغه اوربند سره د اسراییل او فلسطینیانو ۱۱ ورځنۍ جګړه پای ته ورسېده.

د اور شیندونکو بالونونو او هوایي بریدونو دا تبادله داسې مهال کېږي چې پرون په اشغال شوي ختیځ بیت المقدس کې سلګونه ملي پلوه کسانو چې د اسراییل بیرغونه یې لېږدول، لاریون وکړ.

کرونا؛ د امریکا په دوو ایالاتونو کې لګیدلي بندیزونه لېرې شول

کالیفورنیا

د امریکا دوو ګڼ مېشتو ایالاتونو کالیفورنیا او نیویارک کې د کرونا ویروس له کبله نږدې ټول لګول شوي بندیزونه لېرې کړل.

دا ګام وروسته تر دې اخېستل کېږي چې دغلته د واکسین شوېو کسانو کچه لوړه او په کرونا د اخته کېدو ورځنۍ پېښې په څو میاشتو کې تر ټولو ټیټې کچې ته راغلي.

کالیفورنیا پرون د جون په ۱۵مه دا بدلون ولمانځه او والي یې ګاوین نیوسوم وویل، دوی د وبا پاڼه واړوله.

والي وویل، نن له کورنیو، خپلوانو او نورو سره د ناستې پاستې او غېږې ورکولو ورځ ده.

کالیفورنیا او نیویارک کې بندیزونه وروسته تردې پای مومي چې چارواکو یې وویل، ۷۰ فیصده وګړو یې لږ تر لږه یو ډوز واکسین کړی دی.

د ترکیې ولسمشر اذربایجان ته په خپل سفر کې نګرنو-قره باغ ته ولاړ

د ترکیې ولسمشر رجب طیب اردوغان

د ترکیې ولسمشر رجب طیب اردوغان، اذربایجان ته په خپل سفر کې د نګرنو-قره باغ هغه سیمه هم وکتله چې ادارې یې له ارمنستان څخه اذربایجان ته سپارلې ده.

اردوغان باکو ته له رسېدو وروسته د نګرنو قره باغ په جنوب ختیځ کې فوزولي سیمې ته لاړ چې ۳۰ کاله وروسته اذربایجان ته سپارل شوې ده.

د ترکیې ولسمشر له خپل اذربایجاني سیال الهام علییف سره وکتل او دواړه سوسا سټراتیژیک ښار ته هم لاړل.

ارمنستان او اذربایجان پر بېلتون غوښتونکې سیمې نګرنو قره باغ د شپږو اوونیو تر جګړې وروسته په تېره نومبر میاشت کې د روسیې په منځګړیتوب پر اوربند موافقه وکړه.

د هغې جګړې له کبله ځینې سیمې چې له ۹۰یمو کلونو راهیسې د ارمنستان په کنټرول کې وې، اذربایجان ته وسپارل شوې.

ترکیه له اوږدې مودې راهیسې د ارمنستان رقیب دی، خو د اذربایجان له کلیدي ملاتړو ګڼل کېږي.

د سربیا او کاسوو د رهبرانو د خبرو لومړی پړاو ناکام شو

د سربیا او کاسوو رهبران

د سربیا او کاسوو د رهبرانو ترمنځ د خبرو لومړی پړاو ناکام شو.راپورونه وايي، دواړو رهبرانو پرون په بروکسل کې سره وکتل او د اړیکو د عادي کولو لپاره یې په خبرو کې کوم پرمختګ ونه شو.

د سربیا او کاسوو رهبرانو کال مخکې هم تر یوې لسیزې وروسته سره کتلي وو، خو د دوی په کتنه کې هغه وخت هم پرمختګ نه و شوی.

کاسوو په ۲۰۰۸میلادي کال کې له سربیا خپله خپلواکي اعلان کړه چې د امریکا په ګډون تر ۱۰۰ زیات هېوادونه یې په رسمیت پېژني.

د ناټو د غړیو هېوادونو مشران: چین دې پر نړیوالو ژمنو ودریږي 

د ناټو د غړیو هېوادونو مشران

د ناټو د غړیو هېوادونو مشرانو موافقه وکړه چې د چین تهاجمي چلند نړیوالو قوانینو او د اروپايي ټولنې او اتلانتیک امنیت ته په سیسټماټیک ډول ستونزې راولاړې کړي.

په هغه ګډه اعلامیه کې چې پرون دوشنبه (د غبرګولي ۲۴مه) په بروکسل کې د دې تړون د ۳۰ غړیو هېوادونو د سرمشریزې په پای کې خپره شوې، مشرانو د چین د فعالیتونو په اړه اندېښنه ښکاره کړې او ویلي یې دي چې د دې هېواد جبري سیاستونو، په زیاتیدونکي ډول د اټمي مهماتو زېرمه کولو، له روسیې سره پوځي همکاري او له ناسمو معلوماتو څخه تل استفادې د نړۍ امنیت ته ستر ګواښ متوجه کړی دی.

د ناټو د غړیو هېوادونو مشرانو له چین څخه غوښتي چې پر نړیوالو ژمنو ودریږي او په نړیوال سیسټم کې د یوه ستر قدرت په توګه په تېره بیا فضایي، سایبري او بحري برخو کې دې خپل مسوولیت پرځای کړي.

کاناډایي څارنوالان: نتانیل ویلتمن به د ترورېزم له تورونو سره مخ شي

هغه سیمه چې ویلتمن د یوې کورنۍ ۴ غړي وژلي وو.

کاناډایي څارنوالان وایي، هغه سړی به چې د یوې مسلمانې پاکستاني الاصله کاناډایي کورنۍ د څلورو غړیو په وژلو تورن دی، د ترورېزم له تورونو سره مخامخ شي.

شل کلن نتانیل ویلتمن په لومړۍ درجه د قتل په څلورو مواردو او د قتل د یوې هڅې په یوه مورد تورن دی.

دا پېښه د جون په شپږمه د کاناډا په لندن ښار کې هغه مهال رامنځته شوه چې تورن کس بار وړونکی موټر پر خلکو ور وست او څلور تنه یې ووژل.

نوموړی پرون دوشنبه(د غبرګولي ۲۴مه) په انلاین بڼه محاکمه کې راڅرګند او پرې دغه تورونو ولګول شول.

جو بایډن: ناټو د متحده ایالاتو د ګټو لپاره ډېره مهمه ده

د امریکا ولسمشر جو بایډن

د امریکا ولسمشر جو بایډن ویلي ناټو د متحده ایالاتو د ګټو لپاره ډېره مهمه ده.

ولسمشر بایډن همداراز ویلي چې د ناټو تړون پنځمه فقره چې د متقابلې دفاع په اړه ده یو سپېڅلی مکلفیت په ډاګه کوي.

د امریکا ولسمشر چې د بلجیم پلازمېنه بروکسل کې د ناټو سرمشریزې ته وینا کوله ټینګار وکړ اروپا دې پوه شي چې امریکا یې ترڅنګ ده.

بایډن اروپا ته ځکه سفر کړی چې هم د ناټو په سرمشریزه کې برخه واخلي او هم د واشنګټن له ملاتړه خپلو اروپايي ملګرو ته ډاډ ورکړي.

د امریکا د مخکېني ولسمشر ډونالد ټرمپ په دوره کې د امریکا او اروپا اړیکې سړې شوې وې.

تمه ده ولسمشر جو بایډن د چهارشنبې په ورځ د سویس په جنوا کې د روسیې له ولسمشر ولادیمیر پوتین سره وګوري.

چین د «جي-اووه» ګډه اعلامیه خپلو کورنیو چارو کې ښکاره لاسوهنه وبلله

د نړۍ د اووه لویو صنعتي هېوادونو مشران

په لندن کې د چین سفارت د «جي-اووه» یا د نړۍ د اووه لویو صنعتي هېوادونو ګډه اعلامیه د چین په کورنیو چارو کې ښکاره لاسوهنه بللې او دا ډله‌یې په سیاسي جعل‌کارۍ تورنه کړې ده.

دا وروسته له هغه چې «جي-اووه» هېوادونو په بیجنګ باندې په شینجن او هانګ کانګ کې د بشري حقونو د سرغړونو د ریکارډ د پرېښودلو انتقاد وکړ.

چین په شینجن کې د خپلو سیاستونو په خاطر ورځ تر بلې له نړیوالو نیوکو سره مخ کېږي.

اخوا له اویغور مسلمانانو سره د چین چلند د متحده ایالاتو له‌خوا نسل‌وژنه بلل شوې ده.

د «جي-اووه» په اعلامیه کې له چین غوښتل شوي چې بشري حقونو او اساسي ازادیو ته درناوی وکړي.

په لندن کې د چین سفارت نن په اعلامیه کې زیاته کړې چې «جي-اووه» هېوادونه دې د ګډوډۍ او تقابل د رامنځته کولو پر ځای نړیواله همکاري دود کړي.

د اسکار جایزې ګټونکی نېډ بېټي ومړ

ارشیف، د اسکار جایزه

د هالیووډ د سینما وتلی لوبغاړی نېډ بېټي په ۸۳ کلنۍ ومړ.

ده په څو فلمونو له هغې ډلې ډېلورېنس، سوپرمن او نېټورک کې د لوبېدو لپاره خورا شهرت ګټلی.

روېټرز خبري اژانس د اسکار جایزې د دې ګټونکي سینمايي لوبغاړي د لور بلوسوم بېټي په حواله لیکلي چې نېډ بېټي په لاس انجلس کې په خپل کور کې ساه ورکړې.

نېډ بېټي اته زامن او لورګانې درلودې او د امریکا د کینټاکي ایالت اصلي اوسېدونکی و.

دی یکشنبه سهار مړ شوی.

نېډ بېټي په څه باندې ۱۵۰ فلمونو او ټلوېزیوني ډرامو کې کار کړی.

د ناټو غړو هېوادونو مشران نن په بروکسل کې غونډه لري

بروکسل کې د ناټو مرکز کې د نننۍ غونډې لپاره چمتووالی

د ناټو غړو هېوادونو مشران نن په بروکسل کې غونډه لري، دا د شمالي اتلانتیک تړون/ناټو سازمان ۳۱ سرمشریزه ده چې د امریکا له ولسمشر جو بایډن نیولې د ناټو د ټولو غړو هېوادونو مشران، دفاع او بهرنیو چارو وزیران په‌کې برخه لري.

تمه ده دوی د ناټو اړوند مسئلو له هغې ډلې ټولیز امنیت، اوکراین او ځینو نورو موضوع‌ګانو سربېره په افغانستان کې د ناټو په مأموریت او له دغه هېواده د بهرنیو ځواکونو د وتلو په اړه بحث وکړي.

د ناټو د ۳۰ غړو هېوادونو د مشرانو لپاره به نننۍ سرمشریزه د دې یو فرصت رامنځته کړي چې له هغه مأموریت سره خدای پاماني وکړي چې د ناټو د تأسیس په تاریخ کې د دې تړون د سیاسي جغرافیې بهر لومړنی لوی او اوږد مأموریت و.

د ناټو ۳۰ غړي هېوادونه پر دې هم غور کوي چې په څه ډول کولای شي له افغانستانه بهر د افغان ځانګړو ځواکونو روزنې ته دوام ورکړي.

ناټو ژمنه کړې چې په خپل ملکي حضور سره به د افغانستان د دولت او خلکو ملاتړ ته دوام ورکړي.

د برما لیرې کړای شوې رهبره د خپلې محاکمې په لومړۍ جلسه کې راڅرګندېږي

د برما لیرې کړای شوې رهبره انګ سان سوچي

د برما لیرې کړای شوې رهبره انګ سان سوچي نن دوشنبه د خپلې محاکمې په لومړۍ جلسه کې راڅرګندېږي.

دا په داسې حال کې ده چې دوه میاشتې مخکې د پوځي کودتا له کبله د جنوب ختیځې اسیا د دغه هېواد د ډیموکراسۍ تجربه ختمه شوه.

د برما پخوانۍ ملکي رهبره سان سوچي د تېر کال په ټاکنو کې د سرغړونو په تور محاکمه کېږي.

په هغو ټاکنو کې د هغې په رهبرۍ د ډیموکراسۍ لپاره ملي لیګ په اکثریت رایو ګټونکی شوی و.

له پوځي کودتا راهیسې پوځ له وسله‌والو قومي ډلو سره له نوې شخړې سره مخامخ دی او هره ورځ په دغه هېواد کې د سان سوچي پلویان مظاهرې کوي چې په دې موده کې لږترلږه ۸۵۰ اعتراض کوونکي وژل شوي دي.

د ناټو سرمشریزه؛ جو بایډن بروکسل ته ورسېد

د امریکا ولسمشر جو بایډن

د امریکا متحده ایالاتو ولسمشر جو بایډن د ناټو په سرمشریزه کې د ګډون لپاره د بلجیم پلازمېنې بروکسل ته ورسېد.

دا د ولسمشر په توګه د بایډن تر ټاکل کېدو وروسته د هغه بهرنی لومړنی سفر دی.

بایډن د اوو سترو صنعتي هېوادونو یا «جي-اووه» ډلې په درې ورځنۍ سرمشریزه کې چې د بریتانیا جنوب د کورنوال ساحلي ښار یې کوربه و، له ګډون وروسته بروکسل ته رسېدلی دی.

بایډن به د ناټو په دوه ورځنۍ سرمشریزه کې چې نن دوشنبه پیلېږي له ګډون وروسته، د راتلونکې چهارشنبې په ورځ د روسیې له ولسمشر ولادیمیر پوتین سره د سویس په جنوا ښار کې وګوري.

بایډن په «جي-اووه» سرمشریزه کې همکاري ډېره عالي وبلله او ویې‌ویل چې د ده د ښکېلتیا لپاره یوه رښتینې لېوالتیا رامنځته شوې.

نوموړي په یوه خبري غونډه کې وویل چې امریکا بېرته د نړۍ د چارو مشري ته ورستنه شوې او له َټولو هغو هېوادونو سره به چې زموږ ژور ارزښتونه پالي، دغه مشري مخ ته یوسي.

نور راوښيه

XS
SM
MD
LG