د لاسرسۍ وړ لېنکونه

تازه خبر
یکشنبه ۴ لړم ۱۳۹۹ کابل ۱۰:۲۰

خبرونه

افغانستان او پاکستان د څلوراړخيزو غونډو پر بيا پيل موافقه وکړه

د افغانستان ولسمشر نن د پاکستان له صدراعظم سره په کتنه کې د ټروريزم په وړاندې د مبارزې لپاره د څلوراړخيزو غونډو پر بيا پيل موافقه وکړه.

دغه غونډې له څو مياشتو راهيسې ځنډېدلې دي.

محمد اشرف غني نن د قزاقستان په پلازمېنه استانه کې له نواز شريف سره خبرې وکړې.

ولسمشر غني د شانګهاى د همکارۍ سازمان په اوولسمه غونډه کې د ګډون لپاره قزاقستان ته تللى دى. دغه غونډه چې پرون پيل شوې، نن هم دوام کوي.

د ولسمشر مرستيال وياند نجيب ازاد، ازادۍ راډيو ته د دې کتنې د نتيجې په اړه وويل:

”د پاکستان صدراعظم او د افغانستان ولسمشر د افغانستان، پاکستان، امريکا او چين ترمنځ د څلور اړخيزو بحثونو او غونډو پر جوړولو موافقه وکړه“

بلخوا د شانګهاى د همکارۍ سازمان ته نن جمعه په وينا کې د روسيې ولسمشر ولاديمير پوتين د افغانستان امن د سيمې له امن سره تړلى وباله:

”د سيمه ييز ثبات د يقيني کولو لپاره د افغانستان وضعيت يو له کليدي فکټورونو دى. دا څرګنده ده، چې له پوځي لارې د افغانستان د داخلي ستونزې د حل پاليسي کار نه ورکوي. روسيې او د شانهګاى د همکارۍ سازمان ټولو همکارانو تل د افغانانو په رايه د سياسي حل ملاتړ کړى دى“

پاکستان او هندوستان د شانګهاى د همکارۍ په سازمان کې بشپړ غړيتوب ترلاسه کړ.

د ورځې تازه خبرونه دلته ولولئ

د رزمي لوبو مشهور لوبغاړي حبیب نورمحمدوف استعفا وکړه

د رزمي سیالیو مشهور لوبغاړی حبیب نورمحمدوف

د رزمي سیالیو مشهور لوبغاړي حبیب نورمحمدوف له دې لوبې سره خدای پاماني وکړه.

ده وروسته له دې په سیالیو کې له ګډونه استعفا وکړه چې خپل امریکايي سیال جاستن ګیچي ته‌یې ماتې ورکړه.

محمدوف پرون په دوبۍ کې ګیچي ته ماتې ورکړه او د ۲۹ ځل لپاره‌یې بې له کومې ماتې اتلولي وګټله.

مایک پومپیو له لوکاشینکا سره ټیلیفوني خبرې وکړې

مایک پومپیو او الکساندر لوکاشینکا

د امریکا د بهرنیو چارو وزیر مایک پومپیو له الکساندر لوکاشینکا سره ټیلیفوني خبرې وکړې.

دا خبرې په داسې حال کې وشوې چې پر نوموړي فشار په زیاتېدو دی او اپوزېسیون خبرداری ورکړی چې له واکه لاس واخلي کنې په ټول هېواد کې به اعتراضونه او اعتصابونه پراخ کړي.

د امریکا د بهرنیو چارو وزارت ازادي راډیو ته وویل چې پومپیو د هغه امریکايي-بلاروسي سیاسي ستراتېژیست ویتالي شکلیاروف د خلاصون غوښتنه وکړه چې د امریکا حکومت‌یې توقیف ناعادلانه بللی دی.

د امریکا د بهرنیو چارو وزارت ویاند وویل، د بهرنیو چارو وزیر مایک پومپیو د شکلیاروف د خوشې کېدو او له بلاروس څخه فوراً امریکا ته د لېږلو غوښتنه وکړه.

شکلیاروف چې د امریکا د پخواني ولسمشر بارک اوباما او سناتور برني سندرز په کمپاینونو کې کار کړی و، په جولای میاشت کې هغه مهال ونیول شو چې د خپلې کورنۍ د غړو د لیدو لپاره بلاروس ته لاړ.

د مایک پنس د دفتر رئيس په کرونا ویروس اخته شوی

د امریکا مرستیال ولسمشر مایک پنس

د امریکا د مرستیال ولسمشر مایک پنس د دفتر رئيس په کرونا ویروس اخته شوی دی.

د پنس مطبوعاتي رئيس پرون په یوه خبرپاڼه کې وویل چې د مرستیال ولسمشر مایک پنس او د هغه د مېرمنې د کرونا ټسټ منفي و.

د پنس د دفتر د رئیس ترڅنګ پرون د نوموړي د لوی سیاسي سلاکار کرونا هم تأیید شوه.

تر دې وړاندې ولسمشر ډونالد ترمپ هم په کرونا ویروس اخته شوی و، خو ښه شو او اوس په انتخاباتي کمپاینونو بوخت دی.

بلاروس کې پولیسو ۹ تنه مظاهره‌چیان ونیول

بلاروس کې مظاهره‌چیان

بلاروس کې پرون د اوونۍ د وروستیو ورځو مظاهرې ترسره شوې او پولیسو له دې ډلې نهه تنه ونیول.

دغه اعتراضونه د اګسټ د نهمې نېټې له ټاکنو وروسته پلازمېنه مېنسک او یو شمېر نورو ښارونو کې دوام لري.

اعتراض کوونکي پر الکساندر لوکاشینکا فشار راوړي چې له واکه لیرې شي یا بیا ځلي ټاکنې ترسره کړي.

پرون له باران سره مظاهره‌چیانو د اپوزېسیون سره او سپین رنګه بیرغونه له ځان سره لېږدول او څو ساعته‌یې مېنسک کې لاریون وکړ.

د بلاروس وروستیو ولسمشریزو ټاکنو کې د شپږم ځل لپاره الکساندر لوکاشینکا بریالی اعلان شو، خو مخالفان‌یې ټاکنې له درغلیو ډکې بولي.

د امریکا متحده ایالاتو او اروپایي ټولنې د لوکاشینکا بریا په رسمیت نه‌ده پېژندلې.

فرانسې یوه مسلمانه کورنۍ له خپلې لور سره د تاوتریخوالي په جرم اخراج کړه

د فرانسې بیرغ

د فرانسې د کورنیو چارور وزیر وایي، د هغې مسلمانې پېغلې د کورنۍ غړي یې له فرانسې اخراج کړي چې د دې نجلۍ سر یې په زور خېرلی و.

دغې بوسنیایۍ مسلمانې پېغلې غوښتل د صربستان له یوه عیسوي ځوان سره واده وکړي.

فرانسوي چارواکي وایي، د دغې ۱۷ کلنې نجلۍ د کورنۍ پنځه غړي پلار او مور، دوه خویندې او یو ورور پرون د بوسنیا هرزګوېنا پلازمېنې سارایوو ته ولېږدول شول.

د سارایوو پوله‌ساتو پولیسو له ازادې اروپا/ ازادي راډیو سره خبرو کې منلې چې د دغې کورنۍ غړي ور رسېدلي دي.

د فرانسې پولیسو ویلي، د دغې نجلۍ مور او پلار د اکټوبر په ۲۳مه ونیول شول او محکمې له دغې پېغلې سره په تاوتریخوالي مجرم وپېژندل.

د نجلۍ کاکا او ترور په زندان محکوم شوي.

ټرمپ له وخته مخکې رأی ورکونه کې رایه صندوق ته واچوله

ډونالد ټرمپ

د امریکا ولسمشر ډونالد ټرمپ پرون د ولسمشریزو ټاکنو له وخته مخکې رأی ورکونه کې خپله رایه صندوق ته واچوله.

ټرمپ د فلوریدا په یوه کتابتون کې چې د رأی اچونې د مرکز په توګه ترې استفاده کېږي ویلي، "ما د ټرمپ په نوم یوه کس ته رایه ورکړه."

ډونالد ټرمپ پخوا خپل پلرني ټاټوبي نیویارک کې رایه ورکوله، خو تېر کال‌یې د اوسېدو ځای فلوریدا ته بدل کړ.

اوس‌مهال شااوخوا ۵۵ میلیونه امریکایان له وخته مخکې رایه اچونه کې برخه اخلي.

ټرمپ د رأی اچونې پر مهال ماسک تړلی و، خو کله چې خبریالانو ته نږدې شو، ماسک‌یې لیرې کړ.

د رأی ورکونې له مرکزه بهر د ټرمپ یو شمېر پلویان راټول شوي و او د بیرغونو په ښورولو سره‌یې دا شعار ورکاوه چې "د څلورو نورو کلونو لپاره" ټرمپ د ولسمشر په توګه غواړي.

غزني کې هاوان مرمۍ یوه ښوونکې او ۲ زده‌کوونکې ټپيانې کړي

ارشیف، غزني ښار

د غزني په خواجه عمري ولسوالۍ کې یوه ښوونځي ته نږدې د هاوان مرمۍ یوه ښوونکې او دوه زده‌کوونکې ټپيانې کړې دي.

د والي ویاند واحدالله جمعه‌زاده ازادي راډیو ته ویلي چې د ټپیانو روغتیایي وضعیت نازک دی او تر درملنې لاندې دي.

هغه زیاته کړه: "شااوخوا درې بجې د غزني د خواجه عمري ولسوالۍ اړوندو کې د دولت وسله‌والو مخالفانو د هاوان یوه مرمۍ توغولې ده، مرمۍ د مکتب مخې ته لګېدلې ده، یوه استاده او دوه شاګردانې ټپيان شوې دي."

تر اوسه طالبانو په دې اړه څه نه‌دي ویلي.

په غزني کې پرون د ماین یوې چاودنې هم د څلورو مېرمنو په ګډون ۸ تنه ووژل.

ملي امنیت: غزني کې د القاعده شبکې یو مهم غړی وژل شوی

ارشیف

د افغانستان د ملي امنیت عمومي ریاست وایي، غزني کې یې د القاعده شبکې یو مهم غړی وژلی دی.

دغه ریاست تېر ماخوستن پر خپله ټویټرپاڼه ولیکل چې ابو محسن المصري د دوی د ځانګړو عملیاتو په پایله کې وژل شوی.

دوی د عملیاتو کره وخت او دقیق ځای نه‌دی مشخص کړی.

ملي امنیت المصري د هند نیمې لویې وچې لپاره د القاعده شبکې کلیدي غړی یاد کړی دی.

دشت برچي کې ځانمرګي برید لږترلږه ۲۴ تنه وژلي

په دشت برچي کې د برید له امله ۵۷ تنه ټپیان شوي

د افغانستان کورنیو چارو وزارت وایي، د کابل ښار دشت برچي سیمه کې پروني ځانمرګي برید لږترلږه ۲۴ تنه ووژل او ۵۷ نور یې ټپیان کړل.

د وزارت ویاند طارق ارین یکشنبه سهار مهال د مرګ‌ژوبلې دغه شمېرې له خبریالانو سره شریکې کړې.

چاودنه پرون مازدیګر د پل خشک سیمه کې د (کوثر دانش) په نوم یوه ښوونیز مرکز مخې ته وشوه.

د کابل په دغې شیعه مېشته سیمه کې له دې وړاندې داعش وسله‌والو پر ښوونیزو مرکزونو، غونډو او ورزشي کلپونو بریدونه کړي دي.

ارګ دغه برید غندلی او د اسلامي او انساني ارزښتونو خلاف کار یې بللی دی.

د ارګ په خبرپاڼه کې د ولسمشر محمد اشرف غني په حواله راغلي، د طالبانو د څه باندې شپږ زره زندانیانو له خلاصون او د جګړې د پای ته رسېدو لپاره د دولت، خلکو او نړیوالو له مکررو غوښتنو سره سره هم خلک د دوی په ټکو د "نا مشروع جګړې" شاهدان دي.

پر افغان چارواکو سربېره ناټو او د پاکستان د بهرنیو چارو وزارت دغه برید غندلی دی.

قرغزستان کې تر وخت مخکې د ولسمشرۍ ټاکنې کېږي

ارشیف

د قرغزستان د ټاکنو مرکزي کمېسیون وايي ټاکل شوې د ولسمشرۍ تر وخت مخکې ټاکنې د راروانې جنورۍ میاشتې پر لسمه وشي.

دغه کمېسیون په یوه اعلامیه کې ویلي، دا پرېکړه په پلازمېنه بشکېک کې د دوی په یوه بېړنۍ غونډه کې شوې ده.

د ولسمشرۍ تر وخت مخکې د ټاکنو خبر په داسې حال کې خپرېږي، چې په قرغزستان کې د څو اوونیو د ناکراریو په نتیجه کې حکومت نسکور او ولسمشر سورونبای جینبیکوف استعفی ته اړ شو.

دا ناکرارۍ او مظاهرې وروسته له هغې پیل شوې، د اکتوبر د څلورمې په پارلماني ټاکنو کې د پراخو درغلیو او سرغړونو ادعا وشوه.

پاکستان سږ کال سلګونه افغان محصلانو ته د لوړو زده کړو بورسونه ورکړي

آرشیف، پاکستان کې د سوات پوهنتون

پاکستان سږ کال تر ۸۰۰ زیاتو افغان محصلانو ته د لوړو زده کړو بورسونه ورکړل.

په کابل کې د پاکستان سفارت وایي هڅه کوي له افغان دولت سره د دوه اړخیزو اړیکو له لارې دغه بهیر لا پیاوړی کړي.

د دغه سفارت نن په کابل کې پر ۸۵۸ افغان محصلانو بورسونه ووېشل چې په طب، کمپیوټر ساینس، اقتصاد او ځينو نورو رشتو کې دي.

د دغه سفارت د معلوماتو له مخې، دا پرورګرام په ۲۰۰۹ کال کې پیل شوی او تر دې دمه یې په لړ کې له ۳۰۰۰ زیات افغان محصلانو په پاکستان کې په بشپړ سکالرشیپ زده کړې کړي دي.

پاکستان کې پولیسو د یوې ممنوعه ډلې ۴ غړي وژلي

ارشیف

د پاکستان په بلوچستان ایالت کې پولیس وايي، تېره شپه د پوځي عملیاتو په نتیجه کې د یوې ممنوعه ډلې ۴ غړي وژل شوي دي.

پولیسو وژل شوي کسان «تروریستان» بللي دي.

د بلوچستان د کورنیو چارو ایالتي وزیر میر ضیا لانګو وویل، په دغو عملیاتو کې چې پرون ناوخته شوي، د ټروریزم ضد ډیپارټمنټ دوه پولیس ټپیان شوي هم دي.

لانګو نن وویل، دا عملیات د بلوچستان ایالت د مستونګ په دشت سیمه کې وروسته له هغې وشول چې د مشکوکو کسانو په اړه استخباراتي اطلاعات ورورسېدل.

د ننګرهار لسګونو حق الزحمه ښوونکو لاریون وکړ

ننګرهار کې د لاریون کوونکو یو انځور

د ننګرهار لسګونو حق الزحمه ښوونکو نن په جلال اباد کې یو سوله ییز لاریون وکړ.

دوی پر مسئولینو تور پورې کړ چې ګوندې فساد ته لاره هواروي او پر رسمي بستونو د ګمارنې لپاره بیا ځلي ازموینې ورکولو ته اړایستل کېږي.

دوی وایي، درې کاله یې په ښوونیز ډګر کې خدمتونه ترسره کړي، خو په خبره یې، اوس چې د رسمي ښوونکو په توګه باید وګمارل شي، د دوی پرځای نوي ښوونکي جذبول کېږي.

یو تن لاریون کوونکي وویل: "نوم مې همایون حضرتي دی، دوی فقط دا غواړي چې ۱۵سوه ډالر وکړې نو رسمي کوي مو، مونږ هېڅ نه لرو، مونږ سره پیسې نشته، مونږ د دې هېواد د بچیانو لپاره شپه او ورځ یوه کړې، مونږ نتایج هم د خپل جیب په مصرف جوړ کړي، ولې دا خدمت نه دی؟ خو زمونږ خبرې څوک نه اوري."

خو د ننګرهار د پوهنې رئیس حسیب الله شینواری وایي، دوی په دې هڅه کې دي چې دغه ښوونکي په رسمي بستونو وګماري خو په خبره یې، اداري اصلاحاتو کمېسیون نه یې دغه غوښتنه کړې خو تر اوسه یې ځواب نه دی ترلاسه کړی.

اخوا د ننګرهار د اداري اصلاحاتو کمېسیون مشر هجرت الله اختیار وایي، له قراردادي ښوونکو ازموینه د پوهنې ریاست په چوکاټ کې اخیستل شوې او دوی په جریان کې شوي نه دي.

دی زیاتوي، د ښوونکو د رسمي کېدو لپاره باید بستونه لومړی اعلان او بیا د ازموینې له لارې وړ ښوونکي رسمي مقرر شي.

د یادونې وړ ده چې په ننګرهار کې ۱۱ سوه قراردادي ښوونکي دي چې له تېرو درې کالو راهیسې په مختلفو ښوونځیو کې په تدریس بوخت دي.

پکتیا کې د مڼو باغداران: حاصلات ډېر دي خو بازار او سړې خونې نه لرو

ارشیف

پکتیا کې د مڼو باغداران وايي، سږکال یې حاصلات ډېر او ښه دي خو نه بازار لري او نه سړې خونې چې ویې ساتي.

دلته د یو شمېر کورنیو د عوایدو یوازینۍ سرچینه همدا باغونه دي.

د پکتیا یو بڼوال حسن قادري د خپل سږني حاصل په اړه ازادي راډیو ته وویل: " نسبتاً د تېر کال په مقایسه سږ کال حاصلات ښه دي، په دې کې موږ درې قسمه مڼې لرو، مڼې څلور قسمه دي موږ درې قسمه لرو، بیروتۍ، مارلینګ او زیړه مڼه، جاپانۍ مڼه موږ نه ده کرلې، ځکه ځای ورته نه لرو".

هغه وايي، د خپل باغ رسېدلو مڼو ته چې ګوري سترګې یې پرې خوږې شي، خو کله چې د مڼو بازار ته ګوري نو بېرته نهیلی شي، ځکه په وینا یې د مڼو بازار ډېر سوړ دی او دا چې د ساتلو لپاره یې سړې خونې نه لري مجبور دی چې په همدې ساړه بازار کې یې وپلوري.

پکتیا کې د کرنې او مالدارۍ ریس محمد دین مومند وایي، سږ کال دې ولایت کې د مڼو حاصلات د تېر کال پرتله په سلو کې ۱۴ لوړ شوي دي.

هغه د سړو خونو د نشتوالي د ستونزې په اړه وویل:"موږ ۵۹ د مڼو سړې خونې جوړو، چې هره خونه ۲۵ میټریک ټنه ظرفیت لري."

د پکتیا د کرنې او مالدارۍ ریاست وايي، دا سړې خونې به د مرکز په ګډون په احمد ابا سید کرم، مېرزکه، زرمت او روحاني بابا ولسوالیو کې جوړېږي او ښايي کار یې نږدې دوه میاشتې نور وخت هم وغواړي چې چمتو شي.

نن بارسلونا او ریال ماډریډ د فوټبال سیالي کوي

د بارسلونا لوبډلې یو لوبغاړی

ټاکل شوې چې نن ماښام د نړۍ دوې مخکښې فوټبال لوبډلې بارسلونا او ریال ماډریډ یو د بل په وړاندې ولوبېږي.

دواړو لوبډلو نننۍ لوبې ته وار له مخې د پوره چمتوالي خبر ورکړی.

دا لوبه نن ماښام د افغانستان په وخت ۶:۳۰ بجې د بارسلونا په کوربه توب نیو کمپ فوټبال لوبغالي کې پیلېږي.

د دې دوو لوبډلو ترمنځ لوبه د ایلکلاسیکو په نوم یادېږي، چې تر دې دمه ۲۷۷ ځلې یو د بل پر وړاندې په خپل تاریخ کې لوبېدلې.

په دې ۲۷۷ لوبو کې ۱۰۰ځلې ریال ماډرید او ۱۱۵ ځلې بیا بارسلونا بریا خپله کړې ده، خو ۶۲ ځلې بیا د دې دوو لوبډلو ترمنځ لوبه مساوي پای ته رسېدلې ده.

نور راوښيه

XS
SM
MD
LG