افغانستان
ځاځی: په افغانستان کې روانه جګړه جهاد نه بلکې تپل شوې جګړه ده
د خوست دیني عالمانو، قومي مخورو او اوسېدونکو د کابل د چهارشنبې ورځې او په خوست کې د روژې د اولې ورځې مرګونې او خونړۍ پيښې وغندلې او په دې پېښو کې د وژل شویو له کورنیو او ټپیانو سرهيې خپله خواخوږي او همدردي څرګنده کړه.
نن د پنجشنبې په ورځ په خوست کې د یادو پېښو د غندنې او فاتحې په مراسمو کې دیني عالمانو او قومي مشرانو ازادي راډيو سره په خبرو کې وویل، په افغانستان کې روانه جګړه جهاد نه بلکې یوه سیاسي او تپل شوې جګړه ده.
دوی زیاتوي چې د مسلمانانو وژنه په هېڅ دین او ايين کې جواز نهلري او کبیره ګناه ده.
د مراسمو ګډونوالو ټینګار وکړ، که چېرې افغانان په خپلو کې متحد نهشي، نو دا ډول پېښې به روانې وي.
په خوست کې د مجاهدینو شورا مشر مولوي سردار ځدراڼ وايي، دا ډول پېښې د هغه چا لهخوا رامنځته کېږي چې په افغانستان کې اسلامي نظام او د امنیتي ځواکونو موجودیت نهشي زغملی.
مولوي سردار ځدراڼ زیاتوي:
"د افغانستان د اسلامي جمهوریت سره جنګ موږ جهاد نهبولو، دې ته عقیدوي او مذهبي رنګ نهشو ورکولای، بلکې دا موږ یو سیاسي او په افغانانو تپل شوی جنګ بولو، دا د هغو استخباراتي کړیو لهخوا پر افغانانو تپل شوی جنګ دی چې هغوی په افغانستان کې اسلامي نظام، د افغانانو تر منځ یووالی او اتحاد او دلته زموږ اردو او نظام نهشي برداشت کولای، د هغوی لهخوا دا جنګ پر موږ باندې تپل شوی دی."
د خوست د علماوو شورا رئيس مولوي شاه محمد محمدي په دا ډول د مسلمانو وژنه ناروا او کبیره ګناه بولي او زیاتوي چې دا پېښې په هېڅ دین او مذهب کې جواز نهلري.
دا په داسې حال کې ده چې تېره ورځ په کابل ښار کې موټر بم چاودنې لسګونه کسان ووژل او سلګونه نور یې ټپیان کړ.
د ورځې تازه خبرونه دلته ولولئ
له پاکستان او ایرانه، افغانستان ته ۶۱ کورنۍ ستنې شوې دي
له پاکستان او ایران څخه افغانستان ته د ۶۱ کورنیو د ستنېدو خبر ورکړل شوی دی.
باختر خبري اژانس چې د طالبانو په کنټرول کې دی، نن دوشنبه خبر ورکړی، چې پرون «د تورخم له لارې ۱۳ کورنۍ، د کندهار د سپین بولدک له لارې ۷، د نيمروز د ورېښمو پله له لارې ۳۱ او د هرات د اسلام کلا له لارې ۱۰ کورنۍ هېواد ته راستنې شوې دي.»
په دغه خبر کې نه دي ویل شوي، چې دغه کورنۍ په خپله خوښه که په جبر افغانستان ته ایستل شوي دي. پاکستان د ۲۰۲۳م کال د نومبر لومړۍ نېټې د بې اسناده افغان کډوالو ډله ییز اخراج پیل کړی، ورسره له ایرانه هم د افغان کډوالو اخراج روان دی.
سره میاشت ټولنه: د زړه د سوري ۴۳ نور ماشومان وړیا عملیات کیږي
افغان سرې میاشتې ټولنې خبر ورکړی، چې د زړه په سوري ۴۳ نور ماشومان د درملنې او عملیاتو لپاره په کابل کې شپږو روغتونونو ته ورپېژندل شوي دي.
دغې ټولنې پرون یکشنبه پر خپله ایکسپاڼه لیکلي، چې د دغو ماشومانو د درملنې او عملیاتو مالي لګښت د افغاني سرې میاشتې ټولنې له خوا ورکول کېږي.
هر کال لسګونه افغان ماشومان چې د زړه په سوري اخته هغه هم په کې شامل وي، د درملنې لپاره جرمني ته هم لېږل کېږي، چې هلته یې "د سولې کلي" په نوم بنسټ درملنه کوي.
د طالبانو مالیې وزارت له تقاعد شویو غوښتي چې د خپلو حقونو د اثبات لپاره ځانګړو محکمو ته عریضه وکړي
د طالبانو مالیې وزارت په افغانستان کې د دې ډلې تر حاکمیت مخکې تقاعدشویو کسانو غوښتنه کړې، چې د خپلو حقونو د اثبات لپاره د تقاعد ځانګړو محکمو ته عریضه وکړي.
دغه وزارت د یکشنبې په ورځ یوه اعلامیه کې ویلي، چې د تقاعد شویو غوښتنه د شرعي اصولو له مخې د مالیې وزارت او اړوندې ادارې د ګډو کړنلارو پر اساس څېړل کېږي. د طالبانو مشر ملا هبت اله اخندزاده په یوه اته ماده يي فرمان کې د تقاعد شویو د حقوقو معاشونو ورکړه د متقاعدینو اختصاصي محکمو ته سپارلې ده.
د طالبانو تر کنټرول لاندې باختر خبري اژانس د دغه فرمان متن د شنبې په ورځ خپور کړ. اخندزاده د سږکال په وري/ حمل میاشت کې سپارښتنه کړې وه، چې د دولتي کارکوونکو له معاش څخه دې د تقاعد پیسې نه ګرځول کېږي.
په افغانستان کې د دولتي کارکوونکو د تقاعد سن ۶۵ کاله دی، یا هم چې چا څلوېښت کاله په دولت کې کار کړی وي. څه باندې درې کاله مخکې پر افغانستان د طالبانو د ولکې له بیا ټینګولو وروسته د تقاعد شویو معاشونه نه دي ورکړل شوي، دوی وايي چې له سختو اقتصادي ستونزو سره مخامخ دي.
له پولیو پاک افغانستان بنسټ: خلک دې خپله ونډه تر سره کړي
له پولیو د پاک افغانستان بنسټ له خلکو غوښتنه کړې، چې له پوليو ناروغۍ څخه د افغانستان په خلاصولو کې خپله ونډه ترسره کړي.
د ماشومانو د ګوزڼ یا پولیو ضد واکسین ورکولو کمپاین نن دوشنبه د افغانستان په یوولسو ولایتونو کې پیل شو. د طالبانو روغتیا وزارت ویلي، چې دغه درې ورځنی کمپاین په کابل، کندهار، هلمند، ارزگان، زابل، ننگرهار، کونړ، لغمان، نورستان، هرات او کندوز کې تطبیقېږي، چې شا و خوا ۴ ملیونه او ۸۰۰زره ماشومان به چې عمرونه یې تر پنځو کلونو کم دي، واکسین شي. په افغانستان له څه مودې راهیسې د ګوزڼ ضد واکسین کمپاین کور پر کور نه عملي کېږي او ماشومان تر ډېره په جوماتونو کې واکسینېږي.
شا و خوا میاشت مخکې د ۵ ملیونو او ۳۰۰زره ماشومان د واکسین لپاره دغسې یو کمپاین د افغانستان په څو ولایتونو کې عملي شو.
د ملګرو ملتونو د شمېرو له مخې سږ میلادي کال په افغانستان کې د ګوزڼ ۲۵ او پاکستان کې ۶۴ مثبتې پېښې ثبت شوې دي. افغانستان او پاکستان د نړۍ هغه دوه هېوادونه دي، چې ګوزڼ یا پولیو لا هم په کې ختمه شوې نه ده.
پولیو یا ګوزڼ یوه وایروسي او ساري ناروغي ده، چې درملنه نه لري خو واکسین کولی شي ماشومان ترې خوندي کړي. دغه وایروس د ماشوم په ملا کې مهمه عصبي رشته په نښه کوي، چې د ماشوم د فلج کېدو سبب کېږي.
د طالبانو د بهرنیو چارو وزارت په کابل کې د سعودي عربستان د سفارت د بیاپرانیستلو هرکلی وکړ.
د طالبانو د بهرنیو چارو وزارت په کابل کې د سعودي عربستان د سفارت د بیاپرانیستلو هرکلی وکړ.
د دغه وزارت مرستیال ویاند حافظ ضیا احمد په دې اړه نن دوشنبه ملي راډیو ټلویزیون ته چې د طالبانو تر کنټرول لاندې دی، په یوه صوتي پیغام کې وویل: «موږ خوشبین یو چې د سفارت بیاپرانیستل به د افغانستان او سعودي عربستان ترمنځ اړیکې او همکارۍ پراخې کړي، دغه راز به وکړای شي په سعودي عربستان کې د مېشتو افغانانو ستونزو او غوښتنو پر وخت رسېدنه وشي او په ښه ډول ورته خدمات اماده شي.»
د کابل لپاره د سعودي عربستان سفارت پرون په یوه خبرپاڼه کې ویلي، "د سفارت د بیاپرانیستلو دا اقدام یې افغانانو ته د خدمتونو وړاندې کولو او د افغانستان او سعودي ترمنځ د دوه اړخیزو اړیکو د پراختیا په موخه کړی دی".
په خبرپاڼه کې ویل شوي، د دې سفارت خدمتونه له پرون یکشنبې راهيسې پیل شوې دي.
د کابل پیروزي ځوانانو ټیم د عدالت فراه ټیم مات کړ
د کابل پیروزي ځوانانو ټیم وتوانیده د عدالت فراه ټیم مات کړي.
د افغانستان د فوټبال د قهرمانانو په لیګ کې د یکشنبې په ورځ دوې لوبې ترسره شوې، چې د کابل پیروزي ځوانانو، د عدالت فراه ټیم ته دوه د یوه پر وړاندې ماتې ورکړه او په دویمه لوبه کې سرسبز یا شلرفاریاب ټیم د خدیم اف سی بلخ سره مساوي لوبه پای ته ورسوله.
په لومړی لوبه کې سید ذکریا سادات او محمد هارون نصیري ګولونه ووهل.
نن دوشنبه د دغه لیګ وروستۍ لوبې د فراه د ابومسلم او د کندهار د عینو مینې ټیمونو ترمنځ او دویمه لوبه کې د هرات صرافان د هرات د خوافي ټیم پر وړاندې د لوبې میدان ته ښکته کیږي.
یوناما: د ښځو په مشرۍ کاروبارونو کې يې ۹۰۰،۰۰۰ کسانو ته کاري فرصت برابر کړی دی
د ملګرو ملتونو پراختیايي پروګرام (UNDP) وايي، د ښځو په مشرۍ د ۸۰ زرو کوچنیو کاروبارونو او اقتصادي بوختتیاو په ملاتړ یې نهه سوه زره کسانو ته کاري فرصتونه برابر کړي دي.
دې پروګرام د یکشنبې په ورځ د (ډیسمبر۲۲مه) پر خپلې ایکس پاڼه/پخواني ټویټر لیکلي چې دغو کاري فرصتونو د څه باندې څلور نیم میلیونو کسانو ژوند ته ګټه رسولې ده.
وړاندې راغلي، دغه کاري فرصتونه د اروپايي ټولنې او جاپان د سفارت په ملاتړ رامنځته شوې دي.
د ملګرو ملتونو دې پروګرام په یو بل خبر کې ویلي، په بغلان ولایت کې یې وروستیو سیلاب ځپلو ۴۳۰۰ کورنیو سره مرسته کړې ده.
دا مرسته په داسې حال کې ده، چې د خوړو نړیوال پروګرام وړمه ورځ په یوه اعلامیه کې ویلي و، په روان ژمي کې څه باندې ۱۵ میلیونه افغانان بشري مرستو ته اړ دي.
سعودي عربستان په کابل کې بیرته خپل سفارت پرانیزي
سعودي عربستان په کابل کې د خپل سفارت د بیرته پرانېستو خبر ورکړی دی.
دغه سفارت د یکشنبې په ورځ د (ډیسمبر۲۲مه) په یوه خبرپاڼه کې ویلي، "دا اقدام یې افغانانو ته د خدمتونو وړاندې کولو او د افغانستان او سعودي ترمنځ د دوه اړخیزو اړیکو د پراختیا په موخه کړی دی".
په خبرپاڼه کې ویل شوي، د دې سفارت خدمتونه له پرون یکشنبې راهيسي پیل شوي دي.
د ۲۰۲۱ کال د اګست په ۱۵مه پر افغانستان د طالبانو له بیا واکمنیدو وروسته ډیر شمیر هیوادونو په کابل کې خپل سفارتونه او ډپلوماټیکې نمایندګۍ وتړلې.
خو په وروستیو کې د ایران، پاکستان او د افغانستان د یو شمیر نورو ګاونډیو هیوادونو تر څنګ، اوس سعودي عربستان هم په کابل کې د سفارت بیرته پرانیستلو خبر ورکړی.
آی او ام وايي راتلونکی کال له افغانانو سره د مرستې لپاره ۵۰۰ میلیون ډالرو ته اړتیا لري
د مهاجرت نړیواله اداره IOM وايي چې په ۲۰۲۵ کال کې د افغانانو د ملاتړ لپاره نژدې ۵۰۰ میلیون ډالره بسپنې ته اړتیا لري.
د ملګروملتونو دې اړوندې ادارې نن (د مرغومي ۲مه) د ۲۰۲۵ کال د بودیجې لپاره په خپله غوښتنه کې ویلي دي چې په راروان کال کې ټولټال ۸،۳ میلیارد ډالر بودیجې ته اړتیا لري چې په دې کې ۴۹۹ میلیون او ۸۰۰ زره به له افغانانو سره د مرستو پر چاره ولګول شي.
IOM وايي، د هغو خلکو ترڅنګ چې د سوریې او اوکراین له بحرانونو تښتي ډېر تمرکز به یې له هغو افغانانو سره په مرستو وي چې د منځنۍ آسیا او بالکان د هېوادونو له لارې په مهاجرت لاس پورې کوي.
دا په داسې حال کې ده چې د کډوالو لپاره د ملګروملتونو د لویې کمیشنرۍ د راپور له مخې څه کم یوولس میلیون افغانان د تېرو څو کلونو جګړو، تشدد او بېوزلۍ له کبله بېلابېلو هېوادونو ته کډوال شوي دي.
د راپورونو له مخې ډېره برخه دا کډوال په ګاونډیو هېوادونو او نوره سیمه کې له ډېرو ستونزو سره لاس ګرېوان دي.
چین د تخار د سرو زرو پر یوه کان ۳۵۰ میلیونه ډالره پانګونه کوي
د طالبانو د حکومت د کانونو او پټرولیم وزارت د تخار ولایت د چایاب ولسوالۍ په یوه کان کې د چین د شاوخوا ۳۵۰ میلیون ډالرو پانګونې خبر ورکوي.
د دې وزارت ویاند همایون افغان له ملي ټلویزیون سره چې طالبان یې اداره کوي، په مرکه کې ویلي دي چې د استخراج د چارو ټول لګښت به چینايي شرکت کوي او د ترلاسه شویو عوایدو ۵۶ سلنه به افغانستان ته ورکوي.
نوموړی زیاتوي چې د چایاب ولسوالۍ په سمتي سیمه کې د سروزرو دا کان لوی دی خو په تړون کې شاوخوا ۱۲ کیلومتر مربع ساحه له مزایدې وروسته د پنځو کلونو لپاره چینايي شرکت او افغان شریکانو ته یې ورکړل شوه.
د ښاغلي افغان په وینا د دې کان د استخراج ټولې چارې به په افغانستان کې دننه کېږي.
د کانونو او پټرولیم وزارت ویاند په نورو ولایتونو کې هم بېلابېلو شرکتونو ته د سروزرو د کانونو د استخراج د تړونونو د پلان خبر ورکړ.
د طالبانو پر حکومت له دې کبله چې د ډېرو کانونو تړونونه یې له چین سره کړي انتقادونه په زیاتېدو دي.
منتقدان د دې تړونونو د معیارونو او شفافیت له پلوه اندېښمن دي.