نیویارک ټایمز:
نیویارک ټایمز په زابل کې د وسلهوالو طالبانو د ډله ییزې حملې په اړه لیکي، طالبانو د دې ولایت پرمرکز کلات او نېژدې ولسوالیو د شنبې په شپه ناوخته ډله ییزه حمله وکړه چې افغان پولیسو ته یې ډېره مرګ ژوبله واړوله.
ورځپاڼه د زابل د والي بسمالله افغانمل له قوله لیکي چې ویلي یې دي، وسلهوالو طالبانوچې شمېر یې د ده په وینا له زرو اوښت، په شاهجوی او دایچوپان ولسوالیو کې له مختلفو لورو د پولیسو پرپوستو بریدونه وکړل او هم یې له دغو بریدونو سره په یوه وخت پر کلات په لسګونو توغندي وویشتل.
د افغانمل په وینا څو توغندي د ولایت پر میلمستون او امنیې قوماندانۍ ته نېژدې ولګیدل چې له مالي زیانونو پرته یې ځاني تلفات وانه ړول خو په شاهجوی کې یې پولیسو ته درنه مرګ ژوبله واړوله.
د دې ولسوالۍ د پولیسو پرپوستو د طالبانو په بریدونو کې د چارواکو په وینا لږ تر لږه شل پولیس وژل شوي او یو شمېر نور ټپیان شوي دي.
د زابل والي ازادي راډیو ته وویل چې دا د وسلهوالو طالبانو یو لوی پلان وو چې غوښتل یې کلات، شاهجوی او شاوخوا ولسوالیو ته سقوط ورکړي چې زموږ امنیتي ځواکونویې مخه ونیوله.
نیویارک ټایمز وړاندې د زابل د والي دا خبره هم راخېستې چې ویلي يې دي، د دې ولایت د ۱۱ ولسوالیو شپږ يې د طالبانو له ګواښ سره مخامخ دي چې افغان پولیس یې د له منځه وړلو لپاره هڅې کوي.
نیویارک ټایمز په ګردیز او کابل کې هم د ناامنیو وروستیو پېښو یادونه کړې او وایي چې دا د وسلهوالو طالبانو د هغو پسرلنیو عملیاتو یوه برخه ده چې څه موده وړاندې یې د پیلېدو اعلان کړی و.
واشنګټن پوسټ:
واشنګټن پوسټ ورځپاڼه بیا په کابل کې د نا امنۍ وروستې پېښې ته په اشاره لیکي چې یوه جرمنۍ مېرمن او د هغې افغان ساتونکی د شنبې په شپه ناوخته ووژل شول او یوه فنلنډۍ مېرمن لادرکه شوې چې په غالب ګومان یرغمل شوې ده.
د ورځپاڼې په وینا دغه پېښه د کابل په دارالمان سیمه کې په یوه میلمستون کې چې بهرانیان پهکې اوسې رامنځ ته شوې ده.
واشنګټن پوسټ لیکي:
امنیتي چارواکو او بهرنیو سفارتونو خبردارۍ ورکړی وچې طالبان او د اسلامي دولت له سخت دریځي ډلې سره تړلي وسلهوال ښایي د روژې د میاشتې له پیلیدو سره په کابل کې مهم اهداف د حملو لپاره په نښه کړي.
واشنګټن پوست لیکي:
د راپورونو له مخې د افغان ساتونکي سرپرې شوی او دا هغه بې رحمانه بڼه ده چې د اسلامي دولت ډله یا داعش معمولاً ترې کار اخلي، نه طالبان.
د واشنګټن پوست په لیکنه د دغو دوو بهرنیانو په اړه نور جزئیات نهدي ورکړل شوي خو هغه په وروستو څو میاشتو کې په کابل کې لومړۍ پېښه ده.
د ورځپاڼې په وینا له دې مخکې کلونو کې دا ډول ډیرې پیښې تکرار شوي چې یوه یې هم په تېر اګسټ کې د کابل په همدې سیمه کې د امریکایي پوهنتون د دوو بهرنیو استادانو د تښتولو پیښه ده چې تراوسه یې نه برخلیک او نه هم ځای معلوم دی.