افغانستان
عبدالله: د نظام او ادارې د کمزورۍ یو لامل اداري فساد دی
د افغان حکومت اجرائیه رئیس وايي د افغان امنیتي ځواکونو په لیکو کې د اداري فساد موجودیت د دې لامل شوی چې له شته ظرفیتونو مناسبه ګټه وانهخیستل شي.
عبدالله عبدالله نن د وزیرانو شورا له غونډې مخکي رسنیو ته وویل چې په دې برخه کې د اصلاحاتو لپاره د امریکا د ولسمشر د ملي امنیت سلاکار ته ډاډ ورکړل شوی.
ښاغلی عبدالله زیاتوي:
"موږ ټول په دې پوهېږو د نظام او ادارې د کمزوري کېدو یو لامل چې موږ ونهشوی کړای چې له ټولو وړتیاوو او هغه ظرفیت څخه چې موجود دی استفاده وکړو هغه زموږ په لیکو کې د اداري فساد موجودیت دی."
ښاغلي عبدالله د امریکا ولسمشر د ملي امنیت له سلاکار «اچ، ار» مکمسټر سره د تېرې ورځې کتنه یو مهم ګام یاد کړ او هغهيې له افغانستان سره د امریکا د همکاریو د دوام لپاره مهم وګڼه.
مکمسټر له افغان چارواکو سره په کتنه کې له افغانستان سره د امریکا د همکاریو د دوام ډاډ ورکړی.
د ورځې تازه خبرونه دلته ولولئ
طالبانو ننګرهار کې رسنيو ته د عکس او ويډيو د نه خپرولو خبر ورکړی
د افغانستان د خبریالانو مرکز پرون خبر ورکړ چې په ننګرهار کې طالبانو دولتي ادارو ته امر کړی دی چې، نه به عکس اخلي نه به تصویر خپروي.
په ننګرهار کې یوشمېر رسنیو د افغانستان د خبریالانو مرکز ته ویلي دي، د ننګرهار اطلاعات او کلتور ریاست دوی ته د تصویرونو او ویډیوګانو د نه اخیستو او خپرېدو خبر ورکړی دی.
په ننګرهار کې د طالبانو د والي مرستیال مولوي عزیزالله مصطفی دولتي ادارو او ولسوالانو ته ویلي دي، د ملاهبتالله اخندزاده د فرمان لهمخې د ژونديسرو د عکس اخیستل او خپرېدل منع دي.
تر اوسه پورې د ملاهبتالله اخندزاده دغه فرمان چې د زمري میاشتې په یو دېرشمه صادر شوی دی په کندهار، تخار، بادغیس او هلمند کې عملي شوی دی او په دغو ولایتونو کې دولتي او خصوصي تلوېزیونه تړل شوې دي.
فرانسې افغانستان کې د خوړو له نړيوال پروګرام سره مرسته کړې
فرانسې په افغانستان کې د خوړو له نړیوال پرګرام سره د درې میلیونه یورو مرسته وکړه.
د خوړو نړیوال پروګرام په خپله ایکسپاڼه (پخواني ټویټر) کې پرون د دې مرستې خبر ورکړ.
د راپور لهمخې پهدې مرسته به د افغانستان په لومړنیو ښوونځیو کې له پنځلس زرو څخه زیاتو هلکانو او نجونو ته هره ورځ یوه اندازه صحي خواړه چمتو شي او له پنځهدېرش زرو څخه زیات کسان به د خپلې ټولې کورنۍ د تغذیې د ښه کولو لپاره نباتي غوړي ترلاسه کړي.
د خوړو نړیوال پروګرام وایي، سږکال د مالي بحران له امله نهدی توانېدلی چې دوه میليونه ښځو او ماشومانو ته د خوارځواکۍ د مخنیوي لپاره خواړه برابر کړي.
له خوست څخه سعودي عربستان ته الوتنې پيل شوې
د طالبانو د ترانسپورت او هوایي چلند وزارت پرون په خپله ايکسپاڼه (پخواني ټویټر) کې د دې الوتنو خبر ورکړ او څرګنده یې کړه چې د کام ایر هوایي شرکت الوتنې به لهدې وروسته په اوونۍ کې یو ځل د خوست له نړیوال هوایي ډګره د سعودي عربستان جدې ته ترسره شي.
ازادي راډیو نژدې دوې میاشتې مخکې دا خبر ترلاسه کړی و چې د خوست له هوایي ډګره به د جدې ترڅنګ د سعودي عربستان پلازمېنې ریاض ته هم الوتنې پیل شي.
د خوست نړیوال هوایي ډګر د دوه زره یو ویشتم کال د جولای په میاشت کې د هغه وخت ولسمشر اشرف غني پرانیست.
نن د افغانستان په ۱۸ولايتونو کې د سختو ورښتونو اټکل شوی
اټکل شوی دی چې نن د افغانستان په اتلس ولایتونو کې سخت ورښتونه وشي او سېلونه وبهیږي.
د طالبانو د هواپېژندنې ادارې د اټکل لهمخې د افغانستان په ختیځ، شمال ختیځ، مرکزي او یوشمېر لوېدیځو ولایتونو کې به نن له پنځلسو تر پنځهدېرش ملي مترو پورې ورښتونه وشي.
په افغانستان کې سږکال د ورښتونو له امله د بهېدلو سېلونو په ترڅ کې تر درې سوه ډېرو کسانو خپل ژوند له لاسه ورکړی دی او دې سېلونو ګڼ مالي زیانونه هم اړولي دي.
د کندهار-هرات د لارې په اوږدو کې د دوو جوماتونو جوړېدو چارې پيل شوې
د طالبانو د حکومت د ټولګټو وزارت د کندهار-هرات لارې په اوږدو کې د دوو جوماتونو د جوړېدو د چارو د پیلېدو خبر ورکوي.
دې وزارت نن چهارشنبې په خپله ایکسپاڼه یا پخواني ټویټر کې لیکلي چې، د دې لارې په اوږدو کې یو جومات د هلمند په نادعلي ولسوالۍ کې او بل د همدې ولایت په واشیر ولسوالۍ کې جوړیږي.
دواړه جوماتونه هر یو د څه کم ۳۴ميلیونه افغانیو په لګښت د دوو خصوصي ودانیزو شرکتونو لهخوا جوړیږي، چې چارې به یې په یوه کال کې بشپړې شي.
د طالبانو د حکومت د ټولګټو وزارت په خبره، د خپل مشر ملاهبتالله اخندزاده لهخوا دې وزارت ته دنده سپارل شوې چې، په افغانستان کې د لویو لارو په اوږدو کې ۷۵ محرابه جوماتونه ورغوي چې، په یوه وخت کې به د درې سوه لمونځ کونکو، ۱۷۰ نارینهو او ۱۳۰ ښځینهو ظرفیت لري او ټول تاسیسات به یې هم پر سولري برېښنا سمبال وي.
د طالبانو د مخابراتو وزارت د مکالمو او انټرنيټي خدمتونو نوې بيې اعلان کړې
د طالبانو د حکومت د مخابراتو او معلوماتي ټکنالوژۍ وزارت پهدغه هېواد کې د مکالمو او انټرنیټي خدمتونو لپاره نوې بیې اعلان کړي دي.
د دغو بیو د نوملړ لهمخې د یوې واحدې شبکې د سیمکارتونو ترمنځ خبرې دقیقه په (یو اعشاریه دېرش) افغانۍ او له یوې شبکې بلې ته (یو اعشاریه څلوېښت) افغانۍ ټاکل شوی.
د مکالمې په دغې بیه کې د تېر پرتله دېرش-تر شپږ دېرش فیصدو پورې کموالی راغلی دی.
د مخابراتو او معلوماتي تکنالوژۍ وزیر نجیبالله حیات حقاني نن چهارشنبه رسنیو ته ویلي چې د یوه جي بي میاشتني انټرنیټ بیه ۹۵ افغانۍ ټاکل شوې چې د پخوا پرتله ۱۴ فیصده کموالی ښيي.
له یوې شبکې بلې ته د لیکلي پيغام یا اسایماس بیه هم یوه نیمه افغانۍ ټاکل شوې چې پخوا ته په کتو اته شپیته په سلو کې کموالی راغلی دی.
ټاکل شوې دغه بیې د نوي ۲۰۲۵ کال له پيله عملي شي.
تر دې وړاندې بیا ګڼو افغانانو د انټرنیټ او مخابراتي شبکو له کمزوري فعالیته شکایتونه کړي او ویلې يې دي، بیې یې هم د ګاونډیو هېوادونو پرتله لوړې دي.
په پکتیا ولایت کې په عام محضر کې د یوه کس اعدامولو غبرګونه پارولي دي
په افغانستان کې د ملګروملتونو مرستندوی ماموریت (یوناما) ویلي چې، په عام محضر کې اعدامونه، د بشري حقونو په برخه کې د افغانستان د نړیوالو ژمنو خلاف کار دی.
یوناما نن چهارشنبه پر خپله ایکسپاڼه/پخواني ټویټر لیکلي چې دا اعدامونه باید پای ومومي.
د افغانستان د بشري حقونو لپاره د ملګروملتونو ځانګړي راپورتر ریچارد بېنيټ هم دغه اعدام "زړه بوږنونکی" بللی او غندلی یې دی.
بېنیټ هم، چې افغانستان ته یې پر تګ بندیز لګېدلی، پر طالبانو غږ کړی چې دا ډول سزاوې ودروي.
طالبانو نن چهارشنبه د پکتیا د مرکز ګردیز په ورزشي سټډیوم کې یو کس په عام محضر کې اعدام کړ.
د طالبانو سترې محکمې په یوه خبرپاڼه کې ویلي چې، د محمد ایاز اسد په نوم یو کس نن چهارشنبه د قتل په جرم "قصاص" شوی دی.
فرانس پریس خبري اژانس لیکلي چې، نوموړی د مقتول د کورنۍ لهخوا درې ډزه پر ټټر ویشتل شوی دی.
د قصاص په دغو مراسمو کې د طالبانو د کابینې مهمو غړو له هغې ډلې د کورنیو چارو سرپرست وزیر سراجالدین حقاني ګډون کړی دی.
د راپورونو لهمخې دا د طالبانو له بیا واکمنۍ راهیسې د قصاص شپږم حکم دی چې عملي کېږي.
د طالبانو د اترا ادارې مشر د جنوبي اسيا په يوه غونډه کې د ګډون په موخه هند ته لاړ
د طالبانو د حکومت د مخابراتي خدمتونو د تنظیم ادارې یا (اترا) مشر سید برات شاآغا ندیم د جنوبي اسیا د یوشمېر ادارو په غونډه کې د ګډون په هدف نن هند ته روان شوی دی.
د طالبانو ویاند ذبیحالله مجاهد ویلي چې، د اترا د دغه چارواکي په مشرۍ افغان پلاوی به په هند کې د جنوبي اسیا د "مقرراتي ادارو" په غونډه کې ګډون وکړي.
ښاغلي مجاهد پر خپله ایکسپاڼه یا پخواني ټویټر د دغه خبر نور جزیات نهدي ورکړي.
دا سفر داسې مهال کېږي چې تېره اوونۍ د افغانستان لپاره د هند د بهرنیو چارو وزارت ځانګړی استازی جې پي سینګ کابل ته تللی و او د طالبانو د کابینې له مهمو غړو، له هغې ډلې د دفاع او بهرنیو چارو له سرپرست وزیرانو، ملا محمد یعقوب مجاهد او امیرخان متقي سره یې د کابل او نوي ډیلي پر اړیکو خبرې کړې وې.
پرون سهشنبه د طالبانو حکومت د هند په ممبي ښار کې د افغانستان جنرال قونسلګرۍ ته حافظ اکرامالدین کامل د خپل سرپرست استازي په توګه وګماره، چې د راپورونو لهمخې هند دغه استازی تایید کړی دی.
د افغانستان کرکټ ملي لوبډله نن د اتلولۍ له جام سره کابل ته ستنه شوه
دغه لوبډله له بنګلهدېش سره د درېیو پنځوس اوره لوبو د لړۍ لپاره متحده عربي اماراتو ته تللې وه، چې هلته یې د دغې لړۍ دوه لوبې او اتلولي وګټله.
دا په تېرو څو میاشتو کې درېیم ځل دی چې افغانستان د کرکټ په برخه کې ورته بریاوې لري.
د کرکټ ملي لوبډلې د تېرې میزان یا تلې میاشتې په لومړیو کې له جنوبي افریقا څخه هم یوه لوبلړۍ ګټلې وه.
د کرکټ الف لوبډله د تېرې اکتوبر میاشتې په وروستیو کې د اسیایي لوبو اتله شوه.
تاجکستان کې نن د فوټبال يوه درې اړخيزه لوبلړۍ پيليږي
د افغانستان، تاجکستان او نیپال د فوټبال د ملي لوبډلو ترمنځ یوه درې اړخیزه لوبلړۍ نن چهارشنبې په تاجکستان کې پیلېږي.
دا ټورنمنټ به د کابل په وخت د مازیګر په پنځهنیمو بجو د پلازمېنې دوشنبې په مرکزي سټوډیوم کې د نیپال او تاجکستان په لوبه پیل شي.
افغان لوبډله به خپله لومړۍ لوبه په همدې سټوډیوم کې د شنبې ورځې د مازیګر په پنځهنیمو بجو د نیپال د لوبډلې پر وړاندې وکړي.
د افغانستان د فوټبال د ملي لوبډلې دوهمه لوبه به د سهشنبې په ورځ د کوربه تاجکستان له لوبډلې سره وي.
افغان لوبډله له څه باندې پنځهنیمو میاشتو وروسته د لومړي ځل لپاره له خپل ازبکستاني روزونکي عثمان توشیف سره د لوبو ډګر ته ننوځي.