د لاسرسي لېنکونه

جمعه ۶ غویی ۱۳۹۸ کابل ۰۶:۰۹

ډیپلوماټ انلاین: د داعش او طالبانو ترمنځ د سیالۍ زیان افغانستان ته رسېږي


په توکیو کې خپریدونکې ډیپلوماټ انلاین مجلې په خپله وروستۍ ګڼه کې د سردار محمد داود خان روغتون برید ته د اشارې په ترڅ کې لیکي چې د داعش ډلې او طالبانو ترمنځ د سیالۍ زیان افغانستان ته رسېږي.

د دې حملې مسؤلیت د داعش د خراسان ولایت څانګې منلی.

خپرونه لیکي، څیړونکي لاهم د دې ډلې له خوا د پیښو ګواښ سم اټکل نشي کولای او ځینې په افغانستان کې د دې ډلې د وسله والو ظرفیتونه له پامه غورځوي.

ډیپلومات لیکي، افغانان د داعش د افراطي اسلام بڼې ته په ښه سترګه نه ګوري او اوس دا ډله غواړي چې خپله د نفوذ ساحه له ننګرهار ولایت څخه بهر وغځوي.

خو خپرونه زیاتوي، له دې سره سره په افغانستان کې د داعش ډلې ظهور ښيي چې له ۲۰۰۱ کال راهیسې د لومړي ځل لپاره د حکومت یوه مخالفه ډله له طالبانو سره د یوې متممې خو سیالې ډلې په توګه فعالیت کوي.

ډیپلومات خپرونه وړاندې لیکي چې دا دوه ډلې به اوس د وسله والو کسانو د استخدام، د امکاناتو د ترلاسه کولو او ځان ته د اعتبار د ګټلو په برخو کې سیالي سره کوي او حتی که په دې بهیر کې طالبان د یوازینۍ ځواکمنې ډلې په توګه تثبیت هم شي داعش به په سیمه کې د تشدد او بې ثباتۍ د پراخولو لپاره هڅو ته زور ورکړي.

سټارز انډ سټرایپس:

د امریکا چاپ سټارز انډ سټرایپس Stars and Stripes خپرونې په خپله وروستۍ ګڼه کې د امریکا د پوځ د یوه وروستي راپور په حواله لیکلي چې په ۲۰۱۶ کال کې د لومړي ځل لپاره د امریکايي پوځیانو د وجود غړي د جګړو له کبله نه دي غوڅ شوي.

له ۲۰۰۱ کال وروسته چې د افغانستان او عراق جګړې پیل شوې نو د نېږدې ۱۶۵۰ امریکايي سرتېرو لاسونه او پښې له افراطي وسله والو سره د جګړو په ډګر کې غوڅ شول.

د دې سرتېرو شمېره د سټارز انډ سټرایپس د راپور له مخې کله سلګونو ته هم لوړېده خو خپرونه وړاندې لیکي چې په تېر ۲۰۱۶ کال کې د دې سرتېرو شمېره صفر وه.

سټارز انډ سټرایپس، دا ارقام د پوځي صحي ادارې د روغتیايي څارنې د میاشتني راپور پربنسټ خپاره کړي.

خپرونه زیاتوي، افغانستان پر پلیو ځواکونو د هغو پېچلو بمي چاودنو له کبله ډېر مشهور دی چې په ترڅ کې یې د سرتېرو دواړه پښې، مټ یا لاسونه او نور غړي له منځه ځي.

خپرونه د امریکا د پوځ د یوه راپور په حواله لیکي چې په ۲۰۱۰ کال کې له سلو زیات سرتېري له ټپي کېدو وروسته مړه شوي خو یو شمېر نور لاهم ژوندي دي.

د سټارز انډ سټرایپس د راپور له مخې په دې ډله کې هغه پنځه سرتېري هم شامل دي چې دوه پښې یې له ورنونو یا زنګنونو او یا یې دواړه مټې پرې شوې دي.

XS
SM
MD
LG