د لاسرسۍ وړ لېنکونه

تازه خبر
چهارشنبه ۹ غبرګولی ۱۴۰۳ کابل ۰۱:۳۳

افغانستان

ځواک: د هلمند لښکرګاه کې یوه پولیس خپل ۱۱ ملګري وژلي

د هلمند ولایت په مرکز لښکرګاه کې د وسله‌والو مخالفینو یو نفوذي کس ۱۱ پولیس وژلي او خپله تښتېدلی دی.

د هلمند د والي ویاند عمر ځواک نن له ازادي راډيو سره په خبرو کې وویل چې دغه پېښه تېره شپه د لښکرګاه په دوهمه حوزه کې رامنځته شوې ده.

نوموړي وویل چې د پېښې په تړاو څېړنې پیل شوي چې دغه نفوذي کس مېلمه راغلی و او یا د پولیسو ملګری و.

خو وسله‌وال طالبان وایي چې په لښکرګاه کې له پولیسو سره‌یې نښته کړې، پوسته‌یې نیولې او دولس پولیس‌یې وژلي دي.

د ورځې تازه خبرونه دلته ولولئ

د طالبانو حکومت: د آمو سیند له حوزې استخراج شوي میلیونونه ټنه اومه تېل مو پلورلي

آمو سیند - ارشیف
آمو سیند - ارشیف

د طالبانو د حکومت د کانونو او پټرولیم وزارت د داوطلبۍ له لارې د افغانستان د آمو سیند له حوزې د اسختراج شویو میلیونونو ټنو اومه تېلو د پلورلو خبر ورکوي.

د دې وزارت ویاند همایون افغان نن سې شنبې په خپله ټویټرپاڼه لیکلي چې د قشقري له سیمې د استخراج شویو ۶۰ زره ټنه اومه تېلو د پلور په داوطلبۍ کې اتلسو کمپنیو ګډون کړی و چې د یما د پټرولیم شرکت د لوړې بیې په وړاندې کولو سره ګټونکی اعلان شو.

په دې اړه چې دغه تېل په څومره پیسو پلورل شوي څه نه دي ویل شوي، خو د ښاغلي افغان په خبره لومړنی قیمت یې شاوخوا ۳۳ ملیون ډالره ایښودل شوی و.

د شمال د تېلو په دغه حوزه کې یوې چینایي کمپنۍ پانګونه کړې ده.

د طالبانو حکومت د خپلې واکمنۍ په تېرو نږدې درېیو کلونو کې هڅې تېزې کړي چې خپل کورني عواید، کورنیو او نړیوالو شرکتونو ته د افغانستان د یو شمېر کانونونو د استخراج د قراردادونو او د ګمرکونو او مالیې راټولولو له لارې زیات کړي.

پوتین: د طالبانو تر واکمنۍ لاندې افغانستان سره اړیکې جوړوو

د روسیې ولسمشر ولادیمیر پوتین
د روسیې ولسمشر ولادیمیر پوتین

وروسته له دې چې د روسیې د بهرنیو چارو وزیر د روسیې له تور فهرست څخه د طالبانو ایستلو ته لېوالتیا وښوده ولسمشر ولادیمیر پوتین نن وویل، روسیه د طالبانو تر واکمنۍ لاندې افغانستان سره اړیکې جوړوي.

ښاغلي پوتین د یوه مشروع دولت په توګه طالبانو د حکومت د رسمیت پېژندنې او له تور فهرست څخه د طالبانو د ایستلو په اړه د یوې پوښتنې په ځواب کې وویل چې روسیه باید د افغانستان نظریات په پام کې ونیسي او له دې هېواد سره اړیکې جوړ کړي.

د روسیې د بهرنیو چارو وزیر سیرګي لاوروف پرون طالبان د افغانستان واقعي ځواک وبلل او ویې ویل، مسکو ښايي طالبان د هغو ډلو له لیسته وباسي چې مسکو بندیزونه پرې لګولي دي.

د تاس خبري آژانس د خبر له مخې، د روسیې د کابینې غړو ولسمشر ولادیمیر پوتین ته سپارښتنه کړې چې طالبان د بندیزونو له لسته وباسي.

روسیې له ۲۰۰۳م کال راهیسې طالبان د ترهګرو او ممنوعه ډلو په نوملړ کې شامل کړي دي.

د راپورنو له مخې، مسکو طالبانو ته بلنه ورکړې چې راتلونکې میاشت په سانت پیترزبورګ کې په یوه اقتصادي غونډه کې ګډون وکړي.

د طالبانو حکومت د ۲۰۲۱ کال په اګست کې د امریکایي ځواکونو تر وتلو او پر افغانستان له واکمنېدو وروسته تراوسه هم د نړۍ د هېڅ هېواد له خوا په رسمیت نه دی پېژندل شوی.

ملا هبت الله د عامې روغتیا نوی وزیر ا یو شمېر نور چارواکي ټاکلي

د طالبانو لوی مشر ملا هبت الله ته منسوب تصویر
د طالبانو لوی مشر ملا هبت الله ته منسوب تصویر

د طالبانو لوی مشر ملا هبت الله آخوندزاده د یولړ نویو تعییناتو په ترڅ کې د عامې روغتیا وزارت لپاره نوی سرپرست ټاکلی او د ځینو ولایتونو لپاره یې نوي والیان او مرستیالان ګومارلي دي.

په یوه بیان کې چې د طالبانو د حکومت ویاند ذبیح الله مجاهد پر خپله ایکس پاڼه خپور کړی راغلي چې د کورنیو چارو وزارت پخوانی اداري معین مولوي نورجلال د قلندر عباد پرځای د روغتیا سرپرست وزیر په توګه ګومارلی شوی.

همداراز د سمنګان پخوانی والي ملا عبدالاحد فضلي د فاریاب د والي پرځای او د فاریاب پخوانی والي محمدشعیب رسالت د سمنګان د والي پر دنده ګومارل شوي دي.

طالبانو په تېرو نژدې دریو کلونو کې چې پر افغانستان واکمن شوي ډېرشمېر والیان بدل کړي خو ډېری وزیران یې له لومړۍ سرپرستې کابینې پر خپلو دندو پاتې دي.

ډبلیو ایف پي: د ۳ میلیونه خوارځواکۍ ځپلو افغان ماشومانو یو میلیون سره مرسته کولای شوو

ارشیف
ارشیف

د خوړو نړیوال پروګرام WFP وايي، دا مهال درې میلیون افغان ماشومان په خوارځواکۍ اخته دي خو دوی له یوازې یو میلیون دې ماشومانو سره مرسته کولای شي.

د ملګرو ملتونو دې اړوندې ادارې نن پر خپله ایکس پاڼه ولیکل چې د افغانستان لپاره یې بودیجه تېرکال کمه شوه، خو په عین حال کې د دوی ۲۷۰۰ کلینیکونو ته د ماشومانو مراجعه هم زیاته شوې ده.

دا اداره په خپل بیان کې زیاتوي چې د دې مالي بحران ډېره برخه فشار د دې ماشومانو پر اوږد دی.

له بلې خوا د ماشومانو د ملاتړ اداره سېف دې چیلډرن وايي چې د افغانستان په هرو لسو ماشومانو کې درې یې سږکال له لوږې او سختۍ سره مخامخ دي چې ټول شمېر یې شپږنیم میلیون ته رسېږي.

یوشمېر نورو نړیوالو موسسو هم له دې مخکې په افغانستان کې د ماشومانو د وضعیت او په تېره د خوارځواکۍ د زیاتېدو له کبله اندېښنه ښودلې وه.

اوتونیایووا د دوحې د درېیمې غونډې یو شمېر بحث کیدونکي موضوعات روښانه کړي

روزا اوتونیایووا
روزا اوتونیایووا

باختر خبري آژانس چې طالبان یې اداره کوي د افغانستان لپاره د ملګرو ملتونو د ځانګړې استازې روزا اوتونیایووا له قوله خبر ورکوي چې نوموړې وايي، د دوحې په درېیمه غونډه کې به په افغانستان کې د خصوصي سکتور، بانکدارۍ او د مخدرو موادو پرضد د مبارزې پر مسایلو خبرې وشي.

په خبر کې راغلي دي چې مېرمن اوتونبایووا دا څرګندونې د طالبانو د حکومت د کرنې له سرپرست وزیر مولوي عطاالله عمري سره په کتنه کې کړې دي.

د باختر خبر زیاتوي چې ښاغلی عمري به په دوحه کې افغان بزګرانو ته د بدیل معیشت د برابرولو په چاره کې د نړیوالو موسسو د همکارۍ غوښتنه وکړي.

د افغانستان په اړه په دوحه کې راروانه غونډه په نژدې یوه میاشت کې جوړېږي.

طالبانو غور کې یوه ښځه او ۷ نارینه په دُرو ووهل

د افغانستان په نقشه کې غور ولایت
د افغانستان په نقشه کې غور ولایت

د طالبانو سترې محکمې ویلي په غور کې اته کسان چې یوه ښځه هم پکې شامله ده په دُرو وهل شوي او له ډلې یې ځینې په بند هم محکوم شوي.

دې محکمې پرون دوشنبه خبر ورکړ چې دا کسان د دوی په ټکو په زنا، لواطت او له کوره د تېښتې په جرمونو تورن وو چې د غور په مرکز فېروزه کوه ورزشي سټډیوم کې سزا ورکړل شوه.

د طالبانو سترې محکمې نه دي ویلي چې د تورونو د اثبات لپاره یې څه کړي او ایا تورنو کسانو د ځان د دفاع لپاره وخت او امکانات درلودل که څنګه؟

طالبان تورن دي چې له بیا واکمنېدو راهیسې یې لسګونو کسانو ته په بیلابیلو تورونو چې له ځینو یې په زور اقرار اخیستل شوی او مدافع وکیل ته له لاسرسي پرته په عام محضر کې سزاوې ورکړي.

طالبانو د فلسطین پر رفح ښار د اسراییل بریدونه وغندل

د افغانستان د بهرنیو چارو وزارت ودانۍ - ارشیف
د افغانستان د بهرنیو چارو وزارت ودانۍ - ارشیف

په رفح کې په ملکیانو د اسراییلو د مرګوني برید په اړه د نړیوالو غبرګونونو په دوام د طالبانو حکومت هم ویلي چې په ملکیانو د اسراییلو بریدونه په کلکه غندي.

د طالبانو د بهرنیو چارو وزارت پرون په یوه اعلامیه کې ویلي چې د اسراییلو رژيم د جګړې قوانینو ته ژمنتیا نه لري او ملګرو ملتونو او موثرو هېوادونو ته په کار ده چې مخه یې ونیسي.

په رفح باندې د اسراییلو د یکشنبې شپې په بریدونو کې لږ تر لږه ۴۵ کسان وژل شوي او د راپورونو له مخې سلګونه نور ټپيان دي.

ملګرو ملتونو، اروپايي ټولنې او عربي نړۍ دا بریدونه غندلي او له اسراییلو یې غوښتي چې په رفح کې عملیات ودروي.

د اسراییلو صدراعظم دا برید یوه غمجنه پېښه بللې او د څېړنو د پيل ژمنه یې کړې.

سیف دې چلډرن: له هرو ۱۰ افغان ماشومانو ۳ یې د ناورین د کچې لوږې سره مخ دي

بغلان کې یو شمېر سېلاب ځپلي ماشومان
بغلان کې یو شمېر سېلاب ځپلي ماشومان

د ماشومانو د ساتنې ادارې سیف دې چلډرن ویلي سږ کال په افغانستان کې له هرو لسو ماشومانو نژدې درې تنه یې د ناورین د کچې لوږې سره مخامخ دي.

دې ادارې دوشنبه په یوه اعلامیه کې ویلي د دغو ماشومانو ټول شمېر شپږنیم میلیونو ته رسیږي.

سیف دې چلډرن ویلي ماشومان د سېلونو، اوږدمهاله وچکالیو او له ګاونډیو هېوادونو د کډوالو د راستنېدو له امله سخت اغېزمن شوي.

د ماشومانو د ساتنې ادارې د بېلګې په توګه وروستیو سېلونو ته اشاره کړې چې لږ تر لږه ۴۰۰ کسان یې وژلي او یوه زیاته برخه ماشومان هم پکې شامل دي.

د روسیې د بهرنیو چارو وزیر طالبان د افغانستان "واقعي ځواک" بللی

د روسیې د بهرنیو چارو وزیر سیرګي لاوروف
د روسیې د بهرنیو چارو وزیر سیرګي لاوروف

د روسیې د بهرنیو چارو وزیر سیرګي لاوروف طالبان د افغانستان "واقعي ځواک" بللی دی.

رویټرز د روسیې د تاس خبري اژانس په حواله لیکلي، لاوروف نن دوشنبه دا هم ویلي چې مسکو ممکن طالبان د هغو سازمانونو له نوملړه لرې کړي چې د روسیې بندیزونه پرې لګېدلي دي.

د تاس په وینا، د روسیې وزیرانو ولسمشر ولادمیر پوتین ته سپارښتنه کړې چې طالبان د بندیزونو له نوملړه وباسي.

طالبان له ۲۰۰۳م میلادي کال راهیسې د روسیې له‌خوا د ترهګرو او ممنوعه ډلو په نوملړ کې دي.

د راپور له مخې مسکو طالبانو ته بلنه ورکړې چې راتلونکې میاشت په سن پیترسبورګ کې په یوه اقتصادي غونډه کې ګډون وکړي.

د ۲۰۲۱م کال په اوړي کې واک ته د طالبانو له بیا رسېدو او له افغانستانه د امریکایي ځواکونو له وتلو وروسته روسیې د طالبانو له حکومت سره د اړیکو جوړېدو هڅې کړې دي.

طالبانو د پاسپورټ ریاست د مشر عبدالکریم حسیب د توقیفېدو راپورونه رد کړي

په کابل کې د پاسپورټ ریاست یوه څنډه
په کابل کې د پاسپورټ ریاست یوه څنډه

د طالبانو د حکومت کورنیو چارو وزارت د پاسپورټ ریاست د مشر عبدالکریم حسیب د توقیفېدو راپورونه رد کړي دي.

له تېرو څو ورځو راهیسې د افغانستان ګڼو کورنیو رسنیو راپور ورکړی چې حسیب کندهار کې زنداني شوی دی.

د طالبانو کورنیو چارو وزارت نن دوشنبه رسنیو ته په لېږل شوې خبرپاڼه کې ویلي، د پاسپورټ ریاست مشر او د کورنیو او دفاع وزارتونو یو شمېر نور چارواکي کندهار ته غوښتل شوي چې د ننګرهار باریکاب کې د ځمکې پر سر د وروستیو لاریونونو په تړاو وضاحت ورکړي.

خبرپاڼه کې راغلي چې د پاسپورټ ریاست کې هیڅ کومه خبره نه‌شته او د پاسپورټ د وېش چارې عادي روانې دي.

واک ته د طالبانو له بیا رسېدو وروسته د افغانستان د پاسپورټونو وېش په یوې جنجالي او اوږدې پروسې بدل شوی او وخت نا وخت یې افغانان د پیچلي بهیر او په کې د شته ستونزو په تړاو شکایتونه کوي.

نور راوښيه

XS
SM
MD
LG