د کابل چاپ د نن ورځې ورځپاڼو تر ډېره د اسیا زړه د شپږمې ناستې او په دغه ناسته کې د ولسمشرغني د هغه څرګندونو په اړه مطالب خپاره کړي چې ګواکې پاکستان باید له افغانستان سره د مالي مرستې پرځای په خپله خاوره کې ترهګر وځپي.
د وېسا ورځپاڼې پاکستان د سیمې بد لوبغاړی دی خو تر ده ډېر بد لوبغاړي نور دي ترعنوان لاندې په خپلې سرمقالې کې کښلي چې ولسمشرغني پرون په هند کې د اسیا زړه کنفراس ته د پاکستان د سیاستونو په اړه توندې خبرې وکړي.
ولسمشر د پاکستان د صدراعظم د ملي امنیت سلاکار ته په خطاب کې له افغانستان سره د پاکستان ۵۰۰ میلیونه ډالرو اعلان شوې مرستې رد کړې او ویې ویل چې پر دې پیسو د افغانستان هېڅ ستونزه نه هوارېږي خو پاکستان په دې پیسو د ترهګرۍ خلاف اغېزمن اقدمات کولای شي.
سرخط:
د سرخط ورځپاڼې د سرګردانه پاچا له عشق اباد تر امرتسره تر عنوان لاندې په خپلې مقالې کې کښلي هغه بیله زمانه وه چې خوار به په هندوستان کې هم خوار وو، اوس د ګلوبل ویلج نړۍ ده که په وطن کې خوار یې خو په هندوستان کې به داسې دوستان پیدا کړې چې د وطن په نامه دې د اسیا زړه کنفراس جوړ کړي.
سرمقاله لیکونکی وايي، د اسیا زړه کنفراس کې چې د پاکستان د صدراعظم د ملي امنیت سلاکارسرتاج عزیز هم ناست و نریندرا یو ځل نه بلکې په کراتو ولسمشرغني یوازې دوست نه بلکې د شریک خطاب هم ورته وکړچې دا کلمه له سیاسته نیولې ترسوداګرۍ پورې خپلې ځانګړې معناوې لري.
د سرخط ورځپاڼې هم د یوازې سیمه ییز فشار پاکستان له ورانکارۍ راګرځولی شي ترعنوان لاندې په خپلې مقاله کې د اسیا زړه کنفراس مهم اغېزته اشاره کړې ده.
سرمقاله لیکونکی وايي، په سیمه ییزه کچه د پاکستان منزوي کول مهم دی او دا چاره پاکستان ته ستونزې جوړوي او له فشارونو سره یې مخ کولای شي.
سرمقاله لیکونکی همدا راز وايي چې د سیمې د هېوادونو کار نهده فشار پاکستان اړ کولای شي چې په افغانستان خپل ورانکاره رول راکم کړي خو پوښتنه یې کړي چې ایا رښتیا پر پاکستان سیمه ییز فشار راتلای شي؟
او د هېواد دولتي ورځپاڼې لیکلي چې د اسیا زړه کنفراس د پاکستان په ملامتیدو پای ته ورسېد.
هېواد ورځپاڼه وايي چې د اسیا زړه په ناسته کې د هند صدراعظم نریندرا مودي د پاکستان د صدراعظم د ملي امنیت سلاکار سرتاج عزیزڅخه په زغرده دا وغوښتل چې په افغانستان او سیمه کې ترهګري پای ته ورسوي.
محمد حدیث پردېس