د هند په امرتسر ښار کې د افغانستان په اړه د آسیا زړه کنفرانس ته چې پرون پای ته ورسېد تر ډېره د سیمې د هېوادونو ورځپاڼو پام اړولی نه لویدیځو ورځپاڼو خو بریتانوی انټرنېشنل بیزنیس ټایمز ورځپانې د افغان ولسمشر اشرف غنې د وینا هغې پر برخې ډېر تمرکز کړی چې د کنفرانس ګډونوالو ته یې کړی او یو ځل بیا یې پر پاکستان د ترورېزم د ملاتړ په خاطر انتقاد کړی دی.
د ورځپاڼې په وینا غني وویل، پاکستان دې هغه پنځه سوه میلیون ډالره مرسته چې له افغانستان سره یې د کولو ژمنه کړې په خپله د ترورېزم په له منځه وړلو ولګوي او ټینګاریې وکړ، تر هغو چې اسلام اباد د ترورېزم ملاتړ ته دوام ورکوي که له هېواد سره یې هرڅومره مالي مرسته وشي، کوم درد نهشي دوا کولای.
کاناډایي ګلوبل انډمیل ورځپاڼې هم دې کنفرانس ته په اشاره لیکلي چې افغان او هندي مشرانو د ترورېزم د ملاتړ د پای ته رسېدو غوښتنه وکړه.
د ورځپاڼې په وینا د هند صدراعظم نرندرا مودي او افغان ولسمشر اشرف غني پرته له دې چې د پاکستان نوم واخلي ټینګار وکړ چې ګاونډي هېوادونه دې د هغو سخت دریځو ډلو له ملاتړه لاس واخلي او په خپله خاوره کې دې ځای نه ورکوي چې په سیمه کې شخړې مخ ته وړي.
پاکستانۍ ډیلي ټایمز ورځپاڼې هم د پاکستان د میلیونونو ډالرو مرستې د ردولو په اړه د ولسمشر غني پر څرګندونو ډېر تمرکز کړی او لیکلي یې دي چې افغان ولسمشر اشرف غني په بشپړه توګه د پاکستان همکاري له پامه وغورځوله او نن یې د اسیا زړه کنفرانس کې د هند د صدراعظم نرندرا مودي د خبرو لحن غوره کړی و.
غني په امرتسر ښار کې د اسيا زړه شپږم کنفرانس ته په وینا کې له دې ډډه وکړه چې د پاکستان پنځه سوه میلیون ډالره مرسته چې د افغانستان د بیارغونې او پرمختګ لپاره یې له دې هېواد سره ژمنه کړې وه، ومني او ویې ویل چې دوی د پاکستان مرسته نه غواړي بلکه موږ ته پکار ده چې له پولي بهر د ترورېزم ریښې او مالي سرچینې وپېژنو او په وړاندې یې مبارزه وکړو.
هندو:
هندو ورځپاڼه تردې سرلیک لاندې چې هند او افغانستان د ترورېزم په خاطر پر پاکستان انتقاد وکړ، لیکي:
د هند صدراعظم نرندرا مودي او د افغانستان ولسمشر اشرف غني دواړو د ترورېزم یادونه وکړه او پاکستان یې تورن کړ چې په خپله خاوره کې یې هغو تروریستي ډلو ته ځای ورکړی چې د جنوبي اسیا سیمه یې بې ثباته کړې ده.
د ورځپاڼې په وینا مودي وویل، ترورېزم او د بې ثباتۍ لپاره بهرنۍ هڅې د افغانستان سولې، ثبات او سوکالي له جدي خطر سره مخامخ کړي دي.
د هغه په وینا د تروریستي شخړو پراختیا ټوله سیمه له خطر سره مخامخ کړې ده.
په افغانستان کې د سولې لپاره یوازې د غږ اوچتول کافي نهدي بلکه باید هغه له کلک اقدام سره مل وي.
پاک ټریبیون ورځپاڼې د هند او افغانستان ترمنځ د سوداګري اړیکو پراختیا ته کتنه کړې او لیکي:
هند او افغانستان په خپلو کې د کارګو هوایي خدمات پیلوي.
ورځپاڼه لیکي:
هند او افغانستان له دې لارې په خپلو کې سوداګري ځکه پراخوي چې د دواړو هېوادونو سیاسي اړیکې له پاکستان سره کړکېچنې دي.