ګڼو نړیوالو رسنیو په ځانګړي توګه هندي خپرونو هندوستان ته د ولسمشر غني د سفر او د دې هېواد په امرتسر ښار کې د اسیا د زړه په هغه کنفرانس چې د افغانستان د ثبات په اړه په کې خبرې کېږي لیکنې او راپورونه خپاره کړي دي.
هندو:
د هندو ورځپاڼې لیکلي:
ولسمشرغني او صدراعظم مودي به په ګډه د اسیا د زړه کنفرانس پرانېزي چې په کې د نېږدې ۴۰ هېوادونو او د اروپايي ټولنې په څېر د نړیوالو سازمانونو وزیران او لوړ پوړي استازي برخه لري.
دا هندي ورځپاڼه زیاتوي، بهرنۍ پالیسۍ کې د پاکستان صدراعظم سلاکار سرتاج عزیز به د یکشنبې په ورځ د وزیرانو په کچه دې غونډې کې د ګډون لپاره امرتسر ته ورشي او په همدې ورځ به بېرته پاکستان ته ستون شي.
هندو ورځپاڼه زیاتوي، په دې کنفرانس کې د هند د مالیې وزیر ارون جیټلي د هندوستان استازیتوب کوي.
نیو اینډین ایکسپرېس:
نیو اینډین ایکسپرېس خپرونې هم په امرتسر کې د اسیا د زړه د کنفرانس په اړه لیکنه کړې او ویلي یې دي، د چین، روسیې، ایران، متحده عربي اماراتو، امریکا، کاناډا، او فرانسې په شمول د نړۍ د ۴۰ هېوادونو وزیران او لوړ پوړي استازي د افغانستان په اړه د اسیا زړه په نوم دې کنفرانس کې ګډون لري.
انټرنېشنل بېزنېس ټایمز:
انټرنېشنل بېزنېس ټایمز خپرونې د طالبانو لهخوا میدان وردګو کې د یو افغان محصل د اعدام په اړه لیکلي:
فیض الرحمن رحماني په یوه داسې سیمه کې اعدام شوی دی چې د کابله یوازې ۳۷ میله لرې پرته ده.
خپرونه وايي، دا محصل په چک ولسوالۍکې د خپلې کورنۍ لیدلو ته روان و چې په لاره کې د طالبانو لهخوا نیول شوی او وروسته په عامه محضر کې په دار ځړول شوی دی.
خپرونه د میدان وردګو د والي د ویاند عبدالرحمن منګل له خولې وايي، دې محصل غوښتل چې رخصتي له کورنۍ سره تېره کړي، خو د پنجشنبې په ورځ د سیمه ییزو طالبانو لهخوا ونیول شو او اعدام یې کړ.
خپرونه د والي له خولې وايي، موږ هڅه وکړه چې له دې محصل سره مرسته وکړو خو طالبانو نوموړی ډېر ژر اعدام کړی.
خپرونې د دې اعدام هغه تصویرونو ته اشاره کوي چې په ټولنیزو رسنیو کې خپاره شوي دي او زیاتوي، دا اعدام یوازینی پېښه نهده، بلکې وسلهوال طالبان ډېر کله په لویو لارو کې ولسي خلک له موټرو ښکته کوي او پخوا یې هم په بېلابېلو نومونو عام خلک وژلي دي.