پښتون ژغورنې غورځنګ یا "پي‌ټي‌ایم" وايي چې د خیبر ضلعې په رېګي للمه کې د "پولیسو او ایف‌سي ځواک په مستقیمو ډزو کې" یې درې غړي وژل شوي دي.

غورځنګ د اکټوبر پر نهمه پر خپله رسمي ایکس‌پاڼه یا پخواني ټوېټر په بیان کې په ډزو کې د مرګ‌ژوبلې د زیاتېدو وېره ښودلې ده.

دا تر هغې وروسته ده چې غورځنګ پر ایکس په دوو نورو بیانونو کې وویل چې د "پولیسو په ډزو کې" یې "ډېری غړي" ژوبل شوي چې د پېښور روغتون ته انتقال شول.

تر دې مخکې یو عیني شاهد، چې د موضوع د حساسیت له وجې یې د نوم له ښودلو ډډه وکړه، مشال راډیو ته وویل چې فعالانو یې نن د جرګې د کمپ پر لوري د تګ هڅه کوله چې "پولیسو ورباندې ډزې" وکړې.

د خیبر انتظامیې او پولیسو لا د "پي‌ټي‌ایم" او د عیني شاهد د دعوو په غبرګون کې څه نه دي ویلي.

د ژغورنې او مرستندویه چارو ادارې یو چارواکي چې له رسنیو سره یې د خبرو اجازه نه لرله، د نوم نه خپرولو په شرط مشال راډیو ته وویل چې په پېښه کې پنځه تنه ژوبل شوي چې د جمرود په روغتون کې یې تر لومړنۍ طبي مرستې وروسته د نورې درملنې لپاره د پېښور حیات‌اباد کمپلېکس روغتون ته انتقال کړل.

ده وویل چې په ژوبلو کې د دوو روغتیايي وضعیت نازک دی.

دا په داسې حال کې ده چې پښتون ژغورنې غورځنګ ویلي چې پوليسو یې يوځل بيا د جمرود په رېګي للمه کې د جرګې پر انتظامي کمپ چاپه وهلې او د جرګې ميدان يې نیولی دی.

د غورځنګ مشر منظور پشتين د اکټوبر پر نهمه سهار پر خپله رسمي ایکس‌پاڼه ليکلي چې "زورواکي د غټې مشينرۍ په وسيله د جرګې په ميدان کې خندقونه کيندي."

د پښتون ژغورنې غورځنګ د اکټوبر پر ۱۱مه د خيبر په جمرود کې "د پښتنو قامي عدالت" په نوم درې ورځنۍ جرګه وربللې چې د غورځنګ د مشر منظور پشتين په وينا، لسګونه زره کسان به ګډون په‌کې کوي.

د ښځو ترمنځ د پيل شوي شل اوریز نړیوال جام په ترڅ کې نن چهارشنبه د اکټوبر په نهمه نېټه دوه سیالۍ ترسره کېږي چې لومړۍ لوبه به د سکاټلنډ او سویلي افریقا ترمنځ وي او په دویمې سیالۍ کې به هندوستان له سریلانکا سره مخامخ شي.

لومړۍ سیالي به د کابل پر وخت ماسپښین ۲:۳۰ بجې د دوبۍ په نړیوال لوبغالي کې پیل شي.

دوهمه لوبه به د کابل پر وخت ماښام پيل شي.

تر دې دمه د ښځو شل اوریز نړیوال جام په سیالیو کې استرالیا او پاکستان په الف او انګلستان او وېسټ اینډیز په ب ګروپ کې مخکې دي.

د ښځو شل اوریز نړیوال جام د لسو هېوادونو ترمنځ د عربي متحده اماراتو په کوربتوب پیل شوی چې د اکټوبر میاشتې تر ۲۰مې نېټې به دوام ولري.

ټاکل شوې چې د امریکا ولسمشر جوبایډن نن د اسراییل له صدر اعظم بنیامین نتنیاهو سره خبرې وکړي.

د ازادي راډيو د خبر مرکزي څانګې لیکلي چې د دغو خبرو یوه برخه ممکن د اسراییل له‌خوا پر ایران د تېرې اوونۍ د برید د ځواب پر پلان راوڅرخېږي.

دا خبرې اترې داسې مهال کېږي چې اسراییل د لبنان په جنوب کې د ایران له ملاتړه د برخمنې حزب‌الله ډلې پر اهدافو بریدونه ډېر کړي دي.

حزب‌الله چې یوه سیاسي او پوځي ډله ده، امریکا یې د ترهګرو په توګه پېژني، خو اروپایي ټولنې یې یوازې پوځي څانګه په تور لېست کې شامله کړې ده.

حزب‌الله د لبنان په پارلمان کې غړي لري او د لبنان په جنوبي برخه واکمنان دي.

ایران تېره اوونۍ د حزب‌الله په دفاع او په تېره بیا د دغې ډلې د مشر حسن نصرالله د وژنې په غچ کې پر اسراییلو د توغندیو یوه پراخه حمله وکړه.

اسراییل همغه مهال ایران ته د غچ اخیستنې ګواښ وکړ.

د اوکراین د هوایي‌ دفاع سیستم نن چهارشنبه وختي د روسیې د توغول شویو ۲۲ بې‌پيلوټه الوتکو له ډلې ۲۱ شنډې او نسکورې کړي دي.

دغه بې‌پيلوټه الوتکې پر پلازمېنه کییف، اودیسې او فینیتسایا سیمو کې رالوېدلي دي.

سملاسي له‌دې کبله د احتمالي مرګ‌ژوبلې او زیان خبره نه‌‌ده شوې.

بل لور ته د روسیې دفاع وزارت هم ویلي چې خپل فضایي حریم کې یې د اوکراین ۴۷ بې‌پيلوټه الوتکې ویجاړې کړي دي.

د ازادي راډیو د خبر مرکزي څانګې لیکلي چې د اوکراین دغه الوتکې د روسیې په بریانسک، بیلګورود، کورسک، روستوف او کرسنودار سیمو او ازوف سمندر کې له‌منځه تللي دي.

روسي چارواکو ویلي، د الوتکو پارچو مرګ‌ژوبله نه‌ده اړولې.

خپلواکو سرچینو په‌دې اړه څه نه‌دي ویلي.

د پاکستان پولیسو د دې هېواد پخوانی صداعظم عمران خان نن د اکټوبر نهمه د هغه افسر پولیس په وژلو تورن کړ چې تېره اوونۍ له تاوتریخوالي سره مله لاریونونو کې ووژل شو.

پولیسو عمران خان تورن کړی چې عام خلک د حکومت پر ضد لاریونونو ته هڅوي.

عمران خان له ۲۰۲۳م کال را په‌دې خوا په زندان کې دی.

پولیسو ادعا کړې، خان خپل پلویان هڅوي څو د هغه د خلاصون لپاره لاریونونه وکړي، خو دی په حقیقت کې خپل پلویان هغه څه ته هڅولي چې د افسر عبدالحیمد د وژلو کېدو سبب شول.

د پولیسو په خبره، حمید په یو لاریون کې د عمران خان له پلویانو سره په اخ و ډب کې ټپي او وروسته يې په روغتون کې ساه ورکړه.

عمران خان تر اوسه په ۱۵۰ قضیو کې تورن پېژندل شوی او په څو نورو قضیو کې په حبس هم محکوم شوی دی.

د پښتون ژغورنې غورځنګ مشر منظور پښتین وايي، په خیبر کې پر راټولو شویو کسانو د پاکستان د پوځ له‌خوا د تېرې شپې راهیسې ډزې او بریدونه پیل شوي دي.

پښتین دا خبره نن د اکټوبر نهمه پر خپلې ایکس‌پاڼې یا پخواني ټویټر کړې او زیاته کړې يې ده چې په سیمه کې انټرنېټ بند دی شوی چې له کبله يې د جرګې له تنظیموونکو سره اړیکې پرې شوې دي.

هغه یوځل بیا ټینګار کړی چې: "د جرګې مخنیوی ناشوني دی او د پاکستان د پوځ د زور زیاتي سره سره به دا جرګه ترسره کېږي."

د پښتون ژغورنې غورځنګ راتلونکې جمعه د اکټوبر ۱۱مه د "پښتنو قومي عدالت" په نوم لویه جرګه رابللې او وروستۍ چمتووالی ورته نیسي.

له‌دې وړاندې منظور پښتین ویلي، د پاکستان حکومت د پښتون ژغورنې غورځنګ د مشرانو او تنظیموونکو په ګډون له ۲۰۰ ډېر کسان نیولي دي.

د پاکستان حکومت د تېرې یک‌شنبې په ورځ په یوه رسمي اعلان کې پر پښتون ژغورنې غورځنګ بندیز ولګاوه او د دې غورځنګ فعالیتونه يې د پاکستان د امنیت لپاره ګواښ وبلل.

د امریکا عدلیې وزارت وايي، پولیسو هغه افغان نیولی چې غوښتل يې د امریکا په اوکلاهوما ایالت کې د راروانو ټاکنو په ورځ برید وکړي.

د عدلیې وزارت پرون د اکټوبر اتمه ویلي، ۲۷کلن نصیر احمد توحیدي د امریکا د پلټنو فدرالي ادارې یا ایف‌بي‌آی پولیسو سره په بیان کې منلي چې د اسلامي دولت ډلې یا داعش څخه يې الهام اخیستی او د دغې ډلې په ملاتړ يې د ټاکنو په ورځ پلان درلود چې په اوکلاهوما ښار کې په ګڼه ګوڼه کې خلک په نښه کړي.

د پولیسو په خبره، توحیدي يې وروسته له هغه ونیوه چې اوتومات وسلې يې اخیستې وې او افغانستان ته يې د خپلو ماشومانو او مېرمنې د سفر لپاره یو اړخیز ټکټونه کړي وو.

که څه هم د عدلیې وزارت امریکا ته د دغې افغان د ور تګ په اړه جزییات خپاره کړي نه‌دي، خو د راپورونو پر بنسټ توحیدي په ۲۰۲۱م کال کې د کډوالو په ځانګړې ویزه امریکا ته تللی و.

دا ویزه د امریکا له‌خوا هغوو افغانانو ته ور کول کېږي چې په افغانستان کې يې د امریکا لپاره کار کړی وي.

ټاکل شوې د امریکا ولسمشریزې ټاکنې په راتلونکې نومبر میاشت کې ترسره شي.

د هنګري صدراعظم ویکتور اوربان وایي، اوکراین نه‌شي کولای چې له روسیې جګړه وګټي.

نوموړی چې د لوېدیځ له‌خوا اکثراً د روسیې په ملاتړ دریځ تورن شوی، یوځل بیا د دغې جګړې د پای ته رسولو لپاره پر خبرو ټینګار وکړ.

اوربان چې ټاکل شوې هېواد یې د راروان ۲۰۲۵م کال د جنوري له میاشتې د شپږو میاشتو په مخه د اروپایي ټولنې دوره‌يي مشري ترلاسه کړي، دغه څرګندونې پرون سه‌شنبې په اروپایي پارلمان کې په یوه خبرې غونډه کې وکړې چې د هنګري د یوې مخالفې څېرې له‌خوا هم هغه مختل شوې.

ښاغلي اوربان وویل، دوی نه‌غواړي چې د هرڅه مخه ونیسي، خو یوازې غواړي اروپایي مشرانو ته دا پیغام ورسوي چې د اوکراین اړوند خپله اوسنۍ ستراتیژي بدله کړي، ځکه د ده په خبره هغه کار نه ورکوي.

د اوربان په خبره کله چې یوه جګړه نه‌شئ ګټلئ، نو باید خبرې وکړئ او یو اوربند ترلاسه کړئ.

تر دې مخکې د اوکراین ولسمشر ولودمیر زیلینسکي په‌دې وروستیو کې د روسیې په وړاندې د جګړې د ګټلو لپاره د خپل پلان د ملاتړ ترلاسه کولو په موخه د امریکا په ګډون له خپلو لوېدیځو متحدینو غوښتي چې د روسیې د بریدونو په وړاندې د ځان د دفاع لپاره لازم پوځي وسایل او وسلې ورکړي.

د بخښنې نړیوال سازمان د پښتون ژغورنې پرغورځنګ یا پي‌ټي‌ایم د پاکستان د حکومت له لوري بندیز، اساسي حقوقو او د سازمانونو او سوله‌ییزو غونډو ازادیو ته سپکاوی بللی دی.

دې سازمان پرون سه‌شنبې په خپل ایکس‌پاڼه یا پخواني ټویټر کې ولیکل چې د پښتون ژغورنې غورځنګ منع اعلانول او د تروریزم ضد قوانینو څخه په استفادې په‌دې هېواد کې د لږکیو اړوند سوله‌ییزو فعالانو او معترضینو په نښه کول، د ټولنو او سوله‌ییزو غونډو ازادیو او حقوقو ته سپکاوی دی.

د پاکستان حکومت د تېرې یک‌شنبې په ورځ د پښتون ژغورنې غورځنګ د یوه غیرقانوني سازمان په توګه اعلان کړ او فعالیت یې منع کړ.

دغه اقدام داسې مهال شوی چې دغه غورځنګ د غیرقانوني نیونو، د پښتنو د جبري ورکېدو او په خیبرپښتونخوا او بلوچستان ایالتونو کې د نورو ستونزو پر وړاندې د یوې لویې جرګې د جوړېدو لپاره تیاری نیولی.

د پاکستان د مالیې وزیر محمد اورنګزیب پرون سه‌شنبه وویل چې هغه دوه چینایي اتباع چې د یک‌شنبې په ورځ د پاکستان په کراچۍ کې نړیوال هوايي ډګر ته نژدې په یوه چاودنه کې ووژل شول، د برښنا د یوې فابریکې انجینران وو.

د رویترز خبري اژانس د راپور له‌مخې، نوموړي په یوه ویډیویي بیان کې چې د محلي تلوېزیوني خبري چینلونو له‌خوا خپور شوی، ویلي چې له دغو چینایي انجینرانو سره چې دوی د تعرفې پر بیا کتنې خبرې کولې، د آی‌پي‌پي IPP یا د خپلواکه برښنا تولیدونکو په توګه یې کار کاوه.

په اسلام‌اباد کې د چین سفارت وویل، هوایي ډګر ته نژدې په برید کې چې مسوولیت یې د بلوڅانو بیلتون غوښتونکې ډلې با بي‌ایل‌اې BLA اخیستی، Port Qasim Electric Power Company د کمپنۍ د موټرو یو کاروان په نښه شوی و.

د پاکستاني رسنیو د راپورونو له‌‌مخې، په‌دې چاودنه کې شاوخوا دېرش تنه ټپیان شوي دي.

په اسلام‌اباد کې یوه جګپوړي امنیتي چارواکي د نوم نه ښودلو په شرط رویټرز ته ویلي، وروستی برید امنیتي ناکامي وه او په کراچۍ کې د چینایانو د امنیت لپاره ګومارل شوي ټول لوړپوړي چارواکي له دندو ګوښه شوي دي.

دا په پاکستان کې پر چینايي اتباعو د مارچ د میاشتې له ځانمرګي برید وروسته تر ټولو خونړی برید دی.

په هغه برید کې پنځه چینایي انجینران چې د اوبو د برښنا په پروژه کې یې کار کاوه ووژل شول چې له امله یې پېکېنګ له اسلام‌اباد څخه وغوښتل چې د چینایي وګړو لپاره امنیتي تدابیرسخت کړي.