د ارزګان د مرکز ترینکوټ څخه ټول زندانیان د دغه ولایت هوایي ډګر ته انتقال شوي دي.

یو شمېر امنیتي سرچینې د نوم نه ښودلو په شرط ازادي راډيوته وویل چې دا اقدام وروسته له هغې وشو چې د مرکز ترینکوټ ښار په شاوخوا سېمو کې یو شمېرامنیتي پوستو سقوط وکړ او وسله‎وال ښار ته ننوتل.

د ارزګان د امنیت امرحاجي عبدالقوي هم له ازادي راډيو سره په خبرو کې ویلي چې وسله‎وال ښار ته داخل شوي او افغان ځواکونه ورسره مقامت کوي.

نوموړي د تلفاتو په اړه جزئیات ورنه‎کړل خو خبرداری یې وکړ که افغان ځواکونو ته مهمات ونه رسېږي نو د ولایت مرکز به سقوط وکړي.

خو د دغه ولایت امنیه قومندان محمد ویس صمیمي ازادي راډيو سره په خبرو کې ډاډ ورکوي چې د ښار او ولسوالیو کنټرول د دوی په لاس کې دی او وسله‎والو ته تر پنځوسو ډېره مرګ ژوبله اوښتې ده.

د ارزګان په مرکز ترینکوټ ښار کې له تیرو دوو ورځو راهیسې جګړه روانه ده.

وسله‎والو طالبانو هم په یوه تازه خپره شوې خبرپاڼه کې ادعا کړې چې ترینکوټ ته ننوتي دي.

ټاکل شوې چې د افغانستان او آیرلنډ د کرکټ ملي لوبډلو ترمنځ دریمه لوبه د دوشنبې په ورځ په بلفاست کې ترسره شي.

دا لوبه به د کابل په وخت د ماسپښین په دوو بجو او ۱۵ د قیقو پیل شي.

د دواړو ټیمونو ترمنځ لومړنۍ لوبه د باران له امله لغوه شوې او دوهمه لوبه یې د جمعې په ورځ ترسره شوه.

افغانستان دا لوبه د ۹۲ منډو په توپیر وګتله. ابراهیم ځدراڼ او راشدخان په دې لوبه کې ښه وځلیدل. ابراهم ځدراڼ ۸۲ منډې وکړې او راشد خان شپږ ویکټې واخیستې.

د افغانستان او آیرلنډ ترمنځ د پنځو یو ورځنیو لوبو لړۍ به د اګسټ تر۱۵ دوام وکړي.

ایران د شنبې په ورځ وویل، له عمان سره د هرمز تنګي له لارې د کشتیو د تګ راتګ د تنظیم لپاره د یوه نوي میکانیزم پر سر هوکړه، لازماً په دې معنا نه ده چې دغه لاره به بېرته پرانیستل کیږي.

د ایران سپاه پاسدران انقلاب ځواکونو یوه ویاند وویل، مخکې له دې چې هرمزتنګی پرانستل شي متحده ایالات باید د ایران غوښتنې ومني.

هغه له واشنګټن څخه وغوښتل چې له عمان سره له روانو خبرو ځان لرې وساتي. د امریکا ولسمشر ډونالډ ټرمپ په وار وار ادعا کړې چې واشنګټن په دغو خبرو اترو کې ښکېل دی.

د ایران د بهرنیو چارو وزیر عباس عراقچي وویل چې تهران او مسقط د یوې هوکړې لاسلیک کولو ته نږدې شوي دي.

عراقچي وویل، د خبرو هدف دادی چې له هرمز تنګي څخه د کشتیو د تېرېدو یوه نوې، لنډمهاله لاره رامنځته شي.

د افغاني سرې میاشتې ټولنه وایي، له کله چې د زړه ناروغیو روغتون په کابل کې پرانستل شوی، تراوسه د زړه سوري لرونکو ۲۸ ماشومانو د زړه جراحي عملیات د کورنیو او بهرنیو متخصصینو او روغتیا پالانو له لوري ترسره شوي دي. افغاني سرې میاشتې ټولنې د شنبې په ورځ په خپله ایکسپاڼه کې لیکلي چې ۹ ماشومان له بریالۍ درملنې وروسته له روغتون څخه رخصت شوي دي. د دې ټولنې په خبره په دې روغتون کې هره ورځ له څلورو نه ترشپږو پورې د زړه سوري لرونکو ماشومانو د جراحي عملیات په وړیا توګه ترسره کیږي. په کابل کې د سرې میاشتې اړوند دا روغتون په دې وروستیو کې د زړه سوري ناروغانو د تخصصي درملنې په موخه پرانیستل شوی، څو اړمن ناروغان په هېواد کې دننه له وړیا تخصصي روغتیايي خدمتونو برخمن شي.

تردې مخکې د افغاني سرې میاشتې له خوا ډیر په زړه سوري ناروغ ماشومان د کابل څوروغتونونو ته د درملنې لپاره ورپیژندل شوي او درملنه یې شوې ده. د دې ترڅنګ ډیرماشومان چې په دې او نورو ناروغیو اخته وو، بهر ته، په ځانګړي توګه جرمني ته لیږل شوې چې د جرمني «د سولې کلي» بنسټ یې وړیا درملنه کړې ده.

د طالبانو د ریاست الوزرا اقتصادي مرستیالۍ وایي چې د افغانستان په خاوره کې د تاپي پروژې ۱۱۶ کیلومتره نل لیکه غځول شوې او ۱۳۵ کیلومتره مسیر د نل لیکي د غځولو لپاره چمتو شوی دی. په هغه ویډیویي پیغام کې چې د شنبې په ورځ د اقتصادي مرستیالۍ په ایکسپاڼه کې خپره شوې، دغه راز ویل شوي چې د دې پروژې ۳۸ کیلومتره نل لیکه ترځمکې لاندې غځول شوې ده. د راپورله مخې د تاپي پروژې چې ټولټال ۱۸۱۴ کیلومتره اوږدوالي لیرې او د ترکمنستان ګاز د افغانستان له لارې پاکستان او هند ته لیږدوي، د جوړولو چارې یې د روان ۲۰۲۶ کال ترپای پورې بشپړې شي. د دې پروژې ۸۱۶ کیلومتره نل لیکه د افغانستان په خاوره کې غځول کیږي. د دې مرستیالۍ په خبره په نژدې راتلونکې به په هرات کې د ګازو د تاسیساتو او توزیع سروې هم پیل شي. دغه ستره پروژه چې ښکیلو هیوادونو څولسیزې مخکې پرې سلاکړې وه، تطبیق یې په افغانستان کې د نا امنیو او ځینو نورو دلایلو له کلونه کلونه له ځنډ سره مخ شوی و.

د امریکا سنا جرګې پر ایران او روسیې د تازه بندیزونه طرحه تصویب کړه.

دغه طرحه پرون جمعه د امریکا په سنا جرګه کې په ۸۶ مثبتو رایو تصویب شوه.

د طرحې له مخې پر ایران او روسیې تازه بندیزونه ولګول شول.

د طرحې له مخې، د امریکا ولسمشر ډونالډ ټرمپ کولی شي پر هغو هېوادونو سل سلنه تعرفه ولګوي چې له ایران او روسیې تیل او ګاز اخلي.

د دې طرحې د تصویب موخه د ایران او روسیې د عایداتو د سرچینو وچول دي، څو دغه هېوادونه ونه شي کولی د جګړې لګښتونه برابر کړي.

دغه طرحه د امریکا د ګانکرس د استازو جرګې ته هم د تصویب لپاره استول شوې ده.

قانون جوړونکي اندېښمن دي چې ښايي دا طرحه به په امریکا کې د توکو بیې لا پسې لوړې کړي.

په واشنګټن کې د اوکراین سفارت د دې طرحې د تصویب هرکلی کړی دی.

په هرات ولایت کې د طالبانو د امینه قوماندانۍ ویاند وايي، په دې ولایت کې یوه ښځه د یوې ماشومې د قتل په تور نیول شوی دی.

د طالبانو تر واک لاندې باختر خبري اژانس نن شنبې د دې قومندانۍ د ویاند سید مسعود حسیني په حواله راپور ورکړی چې نیول شوې ښځه د یو نیم کلنې ماشومې پر قتل تورنه ده.

د امنیې قومندانۍ په ټکو، دې ښځې د څیړنو پرمهال پر خپل جرم اعتراف کړی دی.

له دې مخکې په ټولنیزو رسنیو کې د یونیم کلنې ماشومې عکس خپور شوی و او ادعا کېده چې هغه د یوه کور د خدمتګارې له خوا د کور له پنځم منزله لاندې غورځول شوې ده.

د راپورونو له مخې دا پېښه د تیرې پنجشنبې په ورځ د هرات ولایت د فامیلو د قول اردو په سیمه کې شوې ده.

د حسیني په وینا، نیول شوې ښځه د کور خدمتګاره وه او د لومړنیو څیړنو له مخې د کور له خاوند سره يې پر ځینو مسایلو اختلافات رامنځته شوی وو.

د هرات ولایت امینه مندانۍ ویلي چې په دې اړه څیړنې روانې دي.

پر اوکراین د روسیې په تازه بریدونو کې درې کسان وژل شوي او درې نور ټپیان دي.

اوکرایني چارواکي وايي، دا بریدونه پلازمینې کیف ته نژدې شوي چې د یو ماشوم په ګډون درې تنه په کې وژل شوي دي.

د نن سهار په دې بریدونو کې د کیېف ختیځې سیمې په نښه شوې وې.

رویترز خبري اژانس د عیني شاهدانو په حواله لیکي چې په سیمه کې د څو درنو چاودنو غږ اوریدل شوی دی.

له دې مخکې د اوکراین پر بېلابېلو سیمو د روسیې په بریدونو کې ۲۱ کسان وژلي وو.

میټا شرکت د ماشومانو د خوندیتوب په قضیه کې څه باندې پنځه میلیونه ډالره جریمه شو.

د امریکا د نیو میکسیکو یوې ایالتي محکمې د فیسبوک او انسټاګرام مالک میټا شرکت د ماشومانو د خوندیتوب په قضیه کې ۵۶۷میلیونه ډالره جریمه کړ او د ۱۸ کم عمره کاروونکو لپاره د دې شبکو پر ځینو ځانګرتیاو محدودیتونه ولګول شول.

د اړونده قضیه یو قاضي ویلي،"میټا شرکت ماشومان او تنکي ځوانان د "عامه ځورونې" له خطر سره مخ کړي دي".

محکمې میټا شرکت ته امر کړی چې د ۱۸کلونو کم عمره کاروونکو لپاره دې د ښوونځیو په وخت د ځینو اعلانونو او په ټوله کې دې د لایکونو د ښودلو شمیر بند کړي.

وړاندې په حکم کې راغلي، میټا شرکت دې په میاشت کې د ۹۰ ساعتونو لپاره چې په ورځیني ډول درې ساعته راځي ماشومانو ته حق ورکړي د انسټا او فیسبوک اکونټونه وکاروي.

دا پریکړه وروسته له هغې کیږي چې میټا شرکت په خپلو پلیټ فرامونو کې له ځوانانو څخه د ناوړه ګټې اخیستي مسولیت ومنه.

میټا شرکت ویلي چې له دې پریکړې سره موافق نه دي او د بیا کتنې غوښتنه به وکړي.

د بښنې نړیوال سازمان په افغانستان کې د یوه حقوقي سازمان د شپږو کارکوونکو د ژر تر ژر خوشي کیدو غوښتنه کړې ده.

دغه سازمان پرون جمعه پر خپلې ایکسپاڼې له طالبانو غوښتي چې د ښځو او ماشومانو د حقونو د څیړنو د یو سازمان نیول شوي کارکوونکي ازاد کړي.

د بښنې د نړیوال سازمان وړاندې ویلي، دغه کسان د جولای له ۱۸مې راهیسې په خپل سري توګه نیول شوي او په توقیف کې دي.

له دې مخکې د افغانستان د بشري حقونو لپاره د ملګرو ملتونو ځانګړي راپور ورکوونکي ریچارډ بېنیټ هم د دغو شپږو کسانو د خوشي کیدو غوښتنه کړې وه.

طالبانو تراوسه د دې کسانو د نیولو په اړه څه نه دي ویلي.

سعودي عربستان، ترکیې او پاکستان په مکه ښار کې ګډ دفاعي ټرون لاسلیک کړی.

دغه تړون د جمعې په ورځ د (اګست۷مه) د سعودي د ولیعهد محمد بن سلمان، د ترکیې ولسمشر رجب طیب اردوغان او د پاکستان د لومړي وزیر شهباز شریف له خوا لاسلیک شو.

د دغو هېوادونو په ګډ بیان راغلي،" د تړون له مخې له دې درېیو هېوادونو پر هر یو يې برید، پر درې واړو برید ګڼل کیږي".

تراوسه د دې دفاعي تړون ټول جزیات رسنیز شوي نه دي.

یو ترکې چارواکي ویلي،" دا تړون یوازې دفاعي موخې لري او نور هېوادونو کولی شي چې غړیتوب يې ترلاسه کړي".

دا درې هېوادونه په داسې حال کې دفاعي تړون لاسلیکوي چې په منځني خیتځ کې پر ایران د امریکا او اسراییلو د بریدونو له کبله وضعیت ترینګلی دی.