کابل چاپ ورځپاڼو په خپلو نننیو ګڼو کې له اسلامي حزب سره د افغان حکومت د سولې د بې نتیجې پای ته رسېدلو د راپورونو او په حکومت کې د ولسمشر د لومړي مرستیال د دریځ د څرنګوالي په تړاو د جنرال عبدالرشید دوستم د وروستیو څرګندونو په اړه یو شمېر مطلب خپاره کړي دي.
سرنوشت:
سرنوشت خپلواکې ورځپاڼې په خپله نننۍ ګڼه کې د ګلبدین حکمتیار په مشرۍ د اسلامي حزب سره د افغان حکومت د سولې د خبرو په اړه تر دې عنوان لاندې یو مطلب لیکلی دی، د سولې دښمنان بریالي شول.
په مطلب کې راغلي چې د افغان حکومت او اسلامي حزب تر منځ د تفاهم لیک په وروستۍ شوې مسوده کې د دولت له لوري تر شل ځلي زیات تعدیلات غوښتل شوي او نوي شرایط وړاندې شوي دي.
د مطلب لیکوال لیکلي چې د حزب اسلامي پلاوي تل انعطاف ښودلی او دا ټول د دې لپاره چې د نوموړي حزب په نوښت پیل شوي بین الافغاني مذاکرات بې نتیجې پای ته ونه رسېږي او خلک ناهیلي نه شي.
هېواد:
خو هېواد دولتي ورځپاڼې بیا په دې اړه به خپله سر مقاله کې لیکلي، په دې وروستیو کې له حزب اسلامي سره د سولې خبرې پیل شوې، ډېره تمه وه چې د دغو خبرو پایلې به مثبتې وي خو د سر مقاله لیکونکې په خبره داسې ښکاري چې هلې ځلې مخلصانه نه وې.
په سر مقاله کې راغلي چې راپورونه وايي، د ګلبدین حکمتیار اسلامي حزب سولې ته ژمن نه دی.
په سر مقاله کې وړاندې راغلي چې د دې ډلې مشر په خپله یو مقاله کې ویلي چې دغه بهیرله ماتې سره مخامخ دی.
د سر مقاله لیکونکې په وینا، حکمتیار د سولې لپاره ډېر سخت تازه شرایط ټاکلي دي او دا وروسته تر هغې کېږي چې چې ددې ګوند غړو یې کابل ته له ځانه سره د سولې د تړون د وروستي کېدو په هدف تازه او سختې غوښتنې راوړې وې.
کابل پوسټ:
کابل پوسټ خپلواکې ورځپاڼې بیا په خپل لومړي مخ کې د ولسمشرغني د لومړي مرستیال جنرال عبدالرشید دوستم دا څرګندونې راخېستې دي.
"ولسمشر او اجراییه ریس واک پنځوس – پنځوس سره ویشلی دی، زما برخه د حکومت په کوم ځای کې ده؟ د واک ویش عادلانه نه دی، د حکومت مشران تورې پیسې په خپلو کې نیم په نیمه ویشي."
کابل پوسټ په خپل دغه مطلب کې د جنرال دوستم د وروستیو څرګندونو په اړه وړاندې لیکلي، دوستم چې اوس مهال په فاریاب کې د جګړې په لومړۍ کرښه کې دی ویلي یې دي چې اراګ هڅه کوي د خلکو تر منځ د ده دریځ کمزوری وښيي.
کابل پوسټ لیکلي جنرال دوستم دغه څرګندونې د ولسمشر د نه شتون په صورت کې د سرپرست په توګه د ده د نه ټاکلو په غبرګون کړې دي.
دوستم ویلي، کله چې ولسمشر د شانګهای د سازمان په غونډه کې د ګډون لپاره ازبکستان ته ولاړ د ځان پرځای یې سرپرست ونه ټاکو او ویاند یې خبریالانو ته وویل چې ولسمشر له ارتباطي تکنالوزۍ نه په ګټې اخېستنې سره له بهر هم هېواد اداره کولای شي.
سرخط:
سرخط خپلواکې ورځپاڼې په خپله سر مقاله کې په دې اړه لیکلي چې دا دوهم ځل دی چې جنرال دوستم د نیوکې لپاره شونډې پرانیزي، لومړی ځل یې په غېر مستقیم ډول او دا ځل یې په واضح او څرګند ډول د دوو اصلي خواوو تر منځ د واک د پنځوس ـ پنځوس ویش او خپلې برخې په اړه څرګندونې کړي دي.
د سر مقاله لیکونکې په باور ولسمشر خپل صلاحیتونه لري او مرستیالان یې خپل او د لومړي مرستیال په ګډون که څوک وغواړي چې د چارواکو په مقرریو او لېرې کولو کې د ولسمشر په صلاحیتونو کې مداخله وکړي نتیجه به یې د ستونزو رامنځته کول او نظام ته زیان رسول وي.