له طالبانو سره د سولې پټې خبرې او د داعش د حضور په اړه اندیښنې د کابل چاپ د نننیو ورځپاڼو مهم مطالب او تبصرې دي.
ویسا ورځپاڼې په لومړي مخ کې په غټو ټکو لیکلي چې افغان حکومت او امریکا د ملا عبدالقیوم ذاکر له ډلې سره د سولې خبرې پیل کړي دي.
په مطلب کې راغلي، دغه خبرې د هلمند په خانشین، دیشو او یو شمېر نورو سیمو کې د طالبانو د پوځي کمېټې له مسئول او پوځي قومندانانو سره پيل شوي دي.
د مطلب لیکوال ویلي، افغان حکومت یو شمېر سیمې وار د مخه د عبدالقیوم ذاکر ډلې ته د تکتکیي شاتګ په پلمه پريښي او نورې سیمې به هم ورپریږدي.
په مطلب کې د چارو د کتوونکو په حواله لیکل شوي، طالبانو ته د سیمو ورکول د سولې بهیر ته ګټه نه رسوي، بلکې د جګړې لپاره طالبان ځآنته جغرافیه پيدا کوي او خپلې لیکې پياوړې کوي.
له ښکاره جګړې، د سولې تر پټو خبرو دا د سرخط ورځپاڼې د یوه تحلیلي مطلب سرلیک دی.
په مطلب کې راغلي، په دې وروستیو کې په طالبانو کې دریمه جنګي ډله هم رامنځ ته شوې او افغان حکومت او امریکایانو د ملا قیوم ذاکر په مشرۍ د همدغې دریمې ډلې له طالبانو سره خبرې پیل کړي دي.
ورځپانې د طالبانو د سرچینو په حواله لیکلي چې د ملا عبدلقیوم ذاکر په څیر یوشمیر طالبان غواړي چې له پاکستان ځان ګوښه او له افغان حکومت سره سوله وکړي، خو یوشمیر بهرنۍ کړۍ د دغو خبرو مخالفت کوي.
په مطلب کې د ولسي جرګې غړي خالد پښتون هم د ملاقیوم ذاکر له ډلې سره د افغان حکومت خبرې تائید کړي او ویلې یې دي چې دغه ډله حکومت ته یو لړ پیشنهادونه هم لري.
کابل پوسټ بیا له حزب اسلامي سره د سولې روانو خبرو ته اشاره کړې او لیکلي دي چې له دغې ډلې سره د افغان حکومت ل خبرو نه د امریکا نه ملاتړ ممکن ستونزې پیدا کړي.
جامعه باز ورځپاڼې خپله سرمقاله په افغانستان کې د داعش ډلې د حضور په اړه اندیښنو ته ځانګړې کړې او د روسیې د بهرنیو چارو وزارت د مرستیال په حواله یې لیکلي چې د افغانستان په پنځه ویشتو ولایتونو کې د داعش شااوخوا شپږ زره خواخوږي موجود دي.
په سرمقاله کې راغلي، له طالبانو سره جګړه او یا هم د سولې خبرې باید افغان حکومت د داعش په وړاندې مبارزه کې غافله نه کړي.
د سرمقالې لیکوال ویلي، داعش په ننګرهار کې سخته ضربه لیدلې، خو کافي نه ده او په نورو ولایتونو کې یې هم په وړاندې جدي پوځي عملیات وشي.