افغانستان
"د افغانستان جنوب ته د وارداتي بریښنا د مزي د غځولو کار به بشپړ شي"
![](https://gdb.rferl.org/63A70DF9-6CDD-4F2E-BB19-B99134A9D415_w250_r1_s.jpg)
د افغانستان برېښنا شرکت وایي، تر راتلونکي یو نیم کاله به د افغانستان جنوب ته د وارداتي بریښنا د مزي د غځولو کار بشپړ شي.
د بریښنا شرکت رییس قدرت الله دلاوري ازادي راډيو ته وویل چې دغه مزي به د ۵۰۰ کیلو ولټه بریښنا د لیږد وړتیا ولري:
"دا بريښنا له شماله د سالنګ له لارې راځي کابل ته. په کابل کې په دوو برخو ویشل کیږي چې یوه برخه یې کندهار او بله یې هم د لوګر له لارې پکتیا ته رسیږي."
ښاغلی دلاوري وایي، دغه بریښنا له ګاونډي ترکمنستانه واردیږي.
افغانستان دا مهال له خپلو څلورو ګاونډيو لکه تاجکستان، ازبکستان، ترکمنستان او ایران څخه بریښنا واردوي.
د ورځې تازه خبرونه دلته ولولئ
طالبان: اللهګل مجاهد به د پلټنو تر بشپړېدو په بند کې وي
![د افغانستان د ولسي جرګې پخوانی غړی](https://gdb.rferl.org/F127AA4A-B900-44B3-9176-ED2F8124AB64_w250_r1_s.jpg)
په کابل کې د طالبانو امنیه قومانداني وايي، د ولسي جرګې پخوانی غړی اللهګل مجاهد به تر هغو په توقیف کې وي چې د ده د تور په اړه پلټنې بشپړېږي.
د کابل امنیه قوماندانۍ ویندوی خالد ځدراڼ نن پر ایکسپاڼه لیکلي چې مجاهد د تېر کال په حوت میاشت کې د سعیدالله په نوم د یوه کس د وژل کېدو د قضیې په تړاو نیول شوی دی.
ده نه دي ویلي چې نوموړی کله نیول شوی او یا کله به یې د تورونو په اړه څېړنې بشپړې شي.
برېتانیا د افغانستان په سېلابونو خواشیني وښوده
![د بغلان یوه سېلاب ځپلې سیمه](https://gdb.rferl.org/01000000-0aff-0242-1aee-08dc7260da18_w250_r1_s.jpg)
د افغانستان لپاره د برېتانیا شارژدافېر وايي په افغانستان کې د سېلونو له کبله د انساني مرګ ژوبلو خبر ډېر خواشینوونکی دی.
ده پر خپله ایکسپاڼه لیکلي چې برېتانیا په افغانستان کې د طبیعي پېښو په شمول په بېلابېلو برخو کې د بشري مرستو لوی مرسته وال هېواد دی.
ده په دې اړه څه نه دي ویلي چې له سېل ځپلیو سره به یې هېواد څومره مرسته وکړي.
د وروستیو درېیو ورځو سېلونو په بغلان، غور، بدخشان، فاریاب او او تخار ولایتونو کې ډېر تاوانونه اړولي دي.
تر ټولو ډېر کسان په بغلان کې مړه شوي دي.
آی او ایم: افغان سېلاب ځپلو ته د مرستو رسولو په چمتووالي بوخت یوو
![د بغلان یوه سېلاب ځپلې سیمه](https://gdb.rferl.org/01000000-0aff-0242-8c72-08dc7260ec4b_w250_r1_s.jpg)
د مهاجرت نړیوال سازمان یا آی او ایم وايي، له خپلو شریکو موسسو سره په افغانستان کې د سیل ځپلیو لپاره د ژغورونکو مرستو په چمتو کولو بوخت دی.
د ملګرو ملتونو دې ادارې نن پر خپله ایکسپاڼه د مرستو رسولو په اړه د خپلو هلو ځلو خبر ورکړی دی.
آی ایم او وايي، اټکل کوي چې د سیلونو په نتیجه کې د مرګ ژوبلو شمېر زیات شي.
د ملګرو ملتونو له شمېرو سره سم، د ښځو او ماشومانو په شمول تر ۳۰۰ ډېر کسان د جمعې د ورځې د سیل له کبله په بغلان ولایت کې مړه شوي او تر دوه زره ډېر کورونه نړېدلي دي.
د طالبانو حکومت: ۲ کورنیو شرکتونو سره مو د کانونو تړونونه لاسلیک کړل
![د سروبي د جګدلک د یاقوتو کان - ارشیف](https://gdb.rferl.org/b02c8561-b7f4-46bc-aa8d-47857649a44c_w250_r1_s.jpg)
د طالبانو د کانونو او پټرولیم وزارت له دوو کورنیو شرکتونو سره په څه باندې ۳۳ میلیون ډالره د دوو کانونو د استخراج قراردادونه لاسلیک کړل.
دغه وزارت پرون (شنبې) وویل چې د کانونو او پیترولیم سرپرست وزیر شهاب الدین دلاور د اریانا هایلنډ او وحدت نیازي شرکتونو له مسوولانو سره د کابل ولایت د سروبي ولسوالي د جګدلک د یاقوتو او د هرات ولایت د باریت کان قراردادونه لاسلیک کړل.
ښاغلي دلاور ویلي چې د لاسلیک شویو قرادادونو پر اساس د دواړو کانونو استخراج کېدونکې تیږې به په هېواد کې دننه پروسیس کېږي او بیا به په بهر کې پلورل کېږي.
ملګري ملتونه او د اسلامي همکارۍ سازمان: د افغان سېلاب ځپلو بېړنی ملاتړ دې وشي
![افغان سېلاب ځپلي](https://gdb.rferl.org/01000000-c0a8-0242-4813-08dc718f9945_w250_r1_s.jpg)
د افغانستان لپاره د ملګرو ملتونو د بشري چارو ځانګړی همغږی کوونکی انډریکا راټواټ د وروستیو سېلابونو وروسته؛ د افغانانو په بېړني ملاتړ ټینګار کړی دی.
هغه پرون ناوخته په خپله ایکسپاڼه لیکلي، افغانستان د اقلیمي بدلون له امله د لسو اغېزمنو هېوادونو په کتار کې ولاړ دی.
ښاغلي راټواټ زیاته کړې، اقلیمي ټکانونه اغېزمنې ټولنې لهمنځه وړي او د اقلیمي بدلون سره د ځان برابرونې لپاره د افغانانو بېړنی ملاتړ مهم دی.
په همدې حال کې د اسلامي همکارۍ سازمان د افغانستان له سېلاب ځپلو سره د بېړنیو مرستو د راټولولو غوښتنه او غږ کړی.
دې سازمان تېره شپه ناوخته یوه اعلامیه کې له خپلو ټولو غړو هېوادونو، د نړۍ له نورو هېوادونو او مرستندویه سازمانونو غوښتي چې له سېلاب ځپلو افغانانو سره ژر تر ژره ژوند ژغورونکي مرستې وکړي.
سیف د چلډرن: د بغلان د ۶۰۰ زرو سېلاب ځپلو تر نیمایي زیات ماشومان دي
![بغلان کې یو شمېر سېلاب ځپلي ماشومان](https://gdb.rferl.org/01000000-0aff-0242-ea69-08dc71b7bc03_w250_r1_s.jpg)
د ماشومانو د خوندیتوب اداره وايي، په بغلان کې د وروستیو سېلابونو له امله ۶۰۰ زره کسان اغېزمن شوي چې له دې شمېر ۳لکه ۱۰ زره ماشومان دي.
دې ادارې پرون ناوخته یوه خبرپاڼه کې په افغانستان د "Save the children" د مشر ارشاد ملک له قوله لیکلي: "د سېلابونو له امله کلي او کورونه ویجاړ شوي، ماشومانو هر څه له لاسه ورکړي او ژوند یو مخ لهمنځه تللی."
د ماشومانو د خوندیتوب ادارې افغانستان په نړۍ کې یو له هغو هېوادونو بللی چې د اقلیمي بدلون له امله ډېر اغېزمن شوی، خو ورسره د مقابلې لپاره تر ټولو لږ چمتووالي لري.
سیف د چلډرن په نړیوالې ټولنې غږ کړی چې باید په افغانستان کې د اقلیمي بدلون د کړکېچ د سمدستي او اوږدمهاله اغېزو د لهمنځهوړو لپاره لپاره لا ډېرې مرستې متمرکزې کړي.
افغانستان په نړۍ کې یو له هغو هېوادونو څخه دی چې د اقلیم له پلوه ډېر اغېزمن شوي خو د اقلیم له کړکېچ سره د مقابلې لپاره تر ټولو لږ چمتووالی لري.
ملګري ملتونه: طالب چارواکو سره سېلاب ځپلو ته د بېړنیو مرستو پر همغږي کولو بوخت یوو
![افغان سېلاب ځپلي](https://gdb.rferl.org/01000000-c0a8-0242-4813-08dc718f9945_w250_r1_s.jpg)
د ملګرو ملتونو سرمنشي انټونیو ګوتریش په افغانستان کې د سېلابونو له امله په اوښتې مرګژوبلې خواشیني او سېلاب ځپلو سره همدردي ښودلې ده.
د هغه ویاند سټېفن دوجاریک د ښاغلي ګوتریش له قوله خپره کړې اعلامیه کې لیکلي، ملګري ملتونه او په افغانستان کې د دوی شریکان له طالب چارواکو سره سېلاب ځپلو ته د بېړنیو مرستو د رسولو په برخه کې په همغږۍ بوخت دي.
ښاغلي ګوتریش د قربانیانو کورنیو ته تسلیت ویلی او د ټپیانو د بېړنۍ روغتیا هیله یې کړې.
په افغانستان کې وروستیو سېلابونو سلګونه کسان مړه کړي او سلګونه نور ټپیان دي.
د یو شمېر کسانو د ورکېدو خبرونه هم ورکړل شوي دي.
نیمروز کې څه باندې ۱۰۰ کیلو ګرامه تریاک نیول شوي او له منځه وړل شوي
![ارشیف](https://gdb.rferl.org/4961EB29-FA43-435C-AD10-6267EA667BAD_cx22_cy24_cw42_w250_r1_s.jpg)
په نيمروز ولايت کې څه دپاسه سل کيلوګرامه ترياک کشف او هم څه باندې ٢٣٠٠ کيلوګرامه اومان له منځه یوړل شول.
اومان یو غرنی بوټی دی چې د راپورونو په اساس د مخدره موادو په جوړولو کې ترې کار اخیستل کېږي.
باختر اژانس د نيمروز ولايت دامنيې قوماندانۍ دپوليسو يو مسوول عبدالواسع په حواله وايي چې دوه تنه يې هم د ١٠٨ کيلوګرامو تریاکو د قاچاق په تور نيولي دي.
طالب چارواکو همداراز ویلي چې د فراه ولایت په پرچمن ولسوالۍ کې ۱۰۹ جریبه تریاک اړول شوي او ۲۳۰۰ کیلوګرامه اومان له منځه وړل شوي.
طالبان په داسې حال کې د افغانستان په لوېدیځ کې د نشه يي توکو د کشف او له منځه وړلو خبره کوي چې د ایران د مخدره موادو پر ضد د مبارزې چارواکو په دې وروستیو کې ادعا کړې چې په افغانستان کې د مخدره موادو د تولید په حجم کې کوم بدلون نه دی راغلی.
کابل نن د یوه ملي او نړیوال صنعتي نندارتون کوربه دی
![څه موده مخکې کابل کې د افغانستان - قزاقستان ګډ صنعتي نندارتون ترسره شو](https://gdb.rferl.org/01000000-0aff-0242-1c93-08dc652ecbaa_cx0_cy25_cw0_w250_r1_s.png)
د صنعت اونۍ په مناسبت نن (یکشنبه د مې ۱۲مه) په کابل کې یو ملي او نړیوال نندارتون جوړېږي.
د طالبانو د حکومت د صنایعو او سوداګرۍ وزارت پرون (مۍ ۱۱) په یوه خبرپاڼه کې وویل چې دغه نندارتون به د طالبانو د حکومت د لوړ پوړو چارواکو، سوداګرو او پانګوالو په حضور کې پرانیستل شي.
اعلامیې نه دي ویلي چې په دغه نندارتون کې کوم هېوادونه ګډون کوي او ایا افغان سوداګرې مېرمنې هم په دغه نندارتون کې د ګډون اجازه لري او که نه؟
وروسته له هغه چې طالبانو د ۲۰۲۱ کال په اګست میاشت کې پر افغانستان واک تر لاسه کړ، یو شمېر سوداګرو ښځو په پرله پسې ډول د دوی پر فعالیتونو او په نندارتونونو کې د ګډون د محدودیت په اړه اندېښنه څرګنده کړې ده.
جاپان افغان زده کړیالو ته د ماسټرۍ او دوکتورا بورسونه اعلان کړي
![د جاپان بیرغ](https://gdb.rferl.org/01000000-c0a8-0242-e15d-08dbe78fb594_cx3_cy8_cw34_w250_r1_s.jpg)
په کابل کې د جاپان سفارت د افغانانو لپاره د ماسټرۍ او دوکتورا د بورسونه اعلان کړي دي.
سفارت د شنبې په ورځ (مې ۱۱) په یوه خبرپاڼه کې ویلي دغه بورسونه د هغو افغانانو لپاره دي چې عمرونه یې تر ۳۵ کلونو کم وي او په ۲۰۲۵ کال کې په جاپان کې د زده کړو لېوالتیا ولري.
د اعلان له مخې، کومو کسانو ته چې د دې بورسیو له لارې جاپان ته استول کېږي د میاشتې ۱۴۰زره ینه یا ۱۰۰۰ ډالره ورکول کېږي.
د جاپان سفارت دا هم ویلي چې دا پروسه به د "آغا خان" بنسټ په همکارۍ ترسره شي او وروستۍ پایلې به یې د ۲۰۲۵ کال د جنورۍ په میاشت کې اعلان شي.