د افغانستان کرکټ بورډ ادارې هم د راتلونکي شل اوریز نړیوال جام لپاره د افغانستان کرکټ ملي لوبډله اعلان کړه.

د سې شنبې په ورځ د اپرېل په ۳۰مه نېټه کرکټ بورډ په یوه خبر کې ویلي، دا ځل به افغانستان د راشدخان په لوبډلمشرۍ په شل اوریز نړیوال جام کې چې په امریکا او ویسټ اینډیز کې به ترسره شي ګډون وکړي.

په دې ۱۵ کسیزه لوبډله کې رحمن الله ګربز، ابراهیم ځدراڼ، نجیب الله ځدراڼ، محمداسحاق، عظمت الله عمرزی، محمدنبي، ګلبدین نایب، کریم جنت، راشدخان، ننګیالی خروټی، مجیب الرحمن، نوراحمد، نوین الحق، فضل حق فاروقي او فریداحمد ملک ځای پر ځای شوي دي.

صدیق اتل، حضرت الله ځاځی او سلیم ساپی د احتیاطي لوبغاړو په ډله کې اخیستل شوي دي.

ویلو ده چې د شل اوریز نړیوال جام به د راتلونکې جون میاشتې په ۲یمه نېټه پیل شي او د افغانستان ټولې سیالۍ په ویسټ اینډیز کې ترسره کېږي.

افغان لوبډله په درېیمه نېټه د یوګاندا له لوبډلې سره سیالي لري.

په امریکا کې د پاوربال په نوم د لاترۍ د یو میلیارد او ۳۲۰ میلیون ډالرو د ټکټ ګټونکي پرون دوشنبې رسماً معرفي شول.

چینګ او دوان پن سایفن چې ښځه او مېړه دي او د هغوی یو دوست لایزا چاو د امریکا په اوریګان ایالت کې د پاوربال لاترۍ په مرکزي دفتر کې د دغې لاترۍ ګټونکي اعلان شول.

چینګ سایفن چې له لاوس څخه امریکا ته کډوال شوی او د اوریګان ایالت په بندري ښار پورټلند کې اوسي، د سرطان په ناروغۍ اخته دي.

هغه چې له اتو کالو راهیسې له دغې ناروغۍ سره مبارزه کوي، وایي چې دغه جایزه به یې ژوند بدل کړي.

هغه د خپلې کورنۍ لپاره د خوښۍ هیله کړې او ویلې یې دي چې په دغې لاترۍ سره به یې ژوند ښه شي.

نوموړي نه‌دي ویلي چې دومره ډېرې پیسې به په څه ډول لګوي، خو ویلي یې دي چې د خپلې درملنې لپاره به په یوه ښه ډاکتر ومومي او له خپلې مېرمنې سره په پام کې لري چې یو کور وپېري.

په ایران کې دیني عالمه او مدني فعاله صدیقه وسمقي د ضمانت په بدل کې له زندانه خوشې شوه.

دا وروسته له هغه خوشې شوه چې د روانې میاشتې په لومړیو کې یې د روغتیايي وضعیت په اړه یې اندېښنې زیاتې شوې او د تهران له خطرناک ایوین زندان څخه روغتون ته انتقال شوه.

د مېرمن وسمقي د خوشې کېدو خبر پرون د اپرېل په ۲۹مه د امتداد په نوم د ټلګرام چینل ورکړ.

په خبر کې راغلي چې د نوموړې روغتیايي وضعیت په زندان کې په خرابېدو وو.

د آزادۍ راډیو د ایران څانګې راډیو فردا د وسمقي د خوشې کېدو خبر تایید کړی دی.

مېرمن وسمقي چې لیکواله هم ده، د تېر ۱۴۰۲ کال په کب میاشت کې په خپل کور کې ونیول شوه او وروسته بیا ایوین زندان ته ولېږل شوه.

صدیقه وسمقي د ایران د رژیم له منتقدانو وه.

هغې همداراز د ایران پر لوی مذهبي مشر آیت‌الله علي خامنه‌یي هم انتقادونه کول او نوموړی یې یو دکتاتور باله.

ملګرو ملتونو، په افغانستان کې د بشري حقونو لپاره د ملګرو ملتونو ځانګړي استازي او په افغانستان کې د اروپايي ټولنې استازولۍ په هرات ولایت کې د شیعه‌ګانو پر یوه جومات بېګانۍ حمله غندلې ده.

د افغانستان لپاره د ملګرو ملتونو مرستندوی ماموریت یا یوناما په یو بیان کې ویلي چې د هرات د ګذرې ولسوالۍ د شهرک سیمې په جومات کې پر لمونځ کوونکو د ډزو په پېښه کې لږترلږه اوه کسان وژل شوي دي.

یوناما د دې پېښې د عاملانو د پېژندنې لپاره د سمدستي څېړنو غوښتنه کړې.

د طالبانو د حکومت د کورنیوچارو وزارت ویاند عبدالمتین قانع پر خپله ایکس‌پاڼه لیکلي چې په پېښه کې شپږ تنه وژل شوي او یوبل ټپي دی، خو نور جزییات یې نه دي ورکړي.

ځینو سیمه‌ییزو رسنیو راپور ورکړی چې برید د امام زمان په نوم د شیعه‌ګانو په یوه جومات کې شوی دی.

ویل شوي چې په وژل شویو کې یو ماشوم او یو ملا امام هم شامل دي.

د دې برید پړه تراوسه کومې ډلې نه ده منلې، خو داعش ډلې دې ته د ورته پخوانیو حملو پړه منلې ده.

د اوکراین په ساحلي ښار اودیسې کې د هري پاټر د کلا په نوم پر یوه ودانۍ د روسيې توغندويي برید لږترلږه پنځه کسان وژلي او ګڼ نور یې ټپیان کړي دي.

ویل کېږي په ټپیانو کې د سیرهي کیوالوف په نوم د یوه روس پلوه ګوند پخوانی وکیل چې په یاده یوه ودانۍ کې یې د حقوقو یو پوهنځي جوړ کړی و، هم شامل دی.

د اودیسې والي اولیه کیپر بیګا پر خپله ټلګرام پاڼه خبر ورکړی و چې په دې برید کې درې مېرمنې او یو نارینه وژل شوي، خو وروسته یې وویل چې د دې حملې له کبله یو بل سړی هم د مغزي سکتې په نتیجه کې مړ شوی دی.

کیپر زیاته کړه چې د ۳۲ تنه ټپيانو له ډلې ۲۵ تنه په روغتون کې دي چې په ډله کې یې دوه ماشومان هم شامل دي.

له دې برید وروسته په خپرو شویو ویډیويي تصاویرو کې د تور سمندرګي پر غاړه پرته د اروپا د ګوتیکې معمارۍ په سبک جوړه دا ودانۍ په داسې حال کې چې د اور په لمبو کې سوځي، لیدل کېده.

د افغانستان لپاره د امریکا سفارت، د مطبوعاتو د آزادۍ د ورځې په درشل کې د افغان ژورنالیستانو د زړورتیا ستاینه کړې ده.

د مې ۳مه د مطبوعاتو د آزادۍ د ورځې په توګه په ټوله نړۍ کې نمانځل کېږي.

د امریکا سفارت چې په قطر کې فعالیت کوي، پر خپله ایکس‌پاڼه په یوه بیان کې ویلي چې په افغانستان کې ژورنالیستان د اطلاعاتو او حقایقو په لتون پسې له پراخو ننګونو سره مخامخ دي.

په بیان کې یادونه شوې چې په روان ناورین کې د افغان ژورنالیستانو زړورتیا او انعطاف وستایل شي.

ملګرو ملتونو سږکال د مطبوعاتو د آزادۍ ورځ داسې مهال چې افغانستان او ټوله نړۍ جګړو په سر اخیستې ده، د ژورنالیزم او د بیان د آزادۍ اهمیت ته ځانګړې کړې او د دې ورځې په درشل کې یې ویلي چې د نړیوالو بحرانونو او د هغو د عواقبو د ټولو اړخونو په اړه پوهاوی د ډیموکراتیکو ټولنو د جوړولو لپاره مهم دي.

د رسنیو او خبریالانو د ملاتړ نړیوالو ټولنو په افغانستان کې د مطبوعاتو او بیان د ازادۍ د وضعیت له کبله د طالبانو پر حکومت انتقاد کړی او ترې غواړي چې پر رسنیو او خبریالانو لګېدلي بندیزونه پای ته ورسوي.

د امریکا د عدلیې وزارت وايي د سایبر یو متخصص چې د لنډې مودې لپاره یې د متحدو ایالتونو د ملي امنیت په اداره کې کار کړی و، روسیې ته د جاسوسۍ د هڅې په تور پرون په څه باندې ۲۱ کاله بند محکوم شو.

د عدلیې وزارت په یوه بیان کې ویلي دي چې تورن جارح سیباستیان دالکې نومېږي، ۳۲ کلن دی او د ۲۰۲۲ کال تر جون میاشتې پورې یې د څه کم څلورو اوونیو لپاره د امریکا د ملي امنیت په اداره NSA کې کار وکړ، خو بیا یې ناڅاپه کار پرېښود.

محکمې ته د وړاندې شویو اسنادو له مخې دالکې هلته د کار پرمهال د امریکا د ملي امنیت اړوند محرم اسناد پرینټ کړي وو او وروسته یې یوه کس ته چې ده ته یې ځان د روسیې اجنټ معرفي کړی و، خو اصلا د امریکا د تحقیقاتو د فدرال ادارې یا FBI پټ مامور و، د ۸۵ زره ډالرو په بدل کې د دې اسنادو پلورل منلي وو.

د افغانستان لپاره د ملګرو ملتونو مرستندوی دفتر یا یوناما د هرات ولایت پر یوه جومات برید چې اوه تنه یې وژلي، غندلی دی.

یوناما په یو بیان کې د پېښې د عاملانو د پېژندنې لپاره د ژر تر ژره څېړنو غوښتنه کړې.

د طالبانو د حکومت د کورنیو چارو وزارت ویاند عبدالمتین قانع پر خپله ایکس پانه لیکلي چې پېښه تېر ماخوستن د ګذرې ولسوالۍ په شهرک سیمه کې شوې.

ښاغلي قانع لیکلي دي چې په پېښه کې شپږ تنه وژل شوي او یو تن ټپي دی، خو نور جزییات یې نه دي ورکړي.

ځینو سیمه ییزو رسنیو راپور ورکړی چې برید د امام زمان په نوم د شیعه ګانو په یوه جومات کې شوی دی.

ویل شوي چې په وژل شویو کې یو ماشوم او یو ملا امام هم شامل دي.

د دې برید پړه تراوسه کومې ډلې نه ده منلې خو داعش ډلې دې ته د ورته پخوانیو حملو پړه منلې ده.

فلسطینۍ حماس ډله وايي، د لسګونه برمته وو د خوشې کېدو په بدل کې په غزه کې د ۴۰ ورځني اوربند لپاره د اسراییل د طرحې په اړه غور کوي.

دې ډلې چې امریکا او اروپايي ټولنه یې د تروریستي ډلې په توګه پېژني، دا کسان د تېرکال د اکتوبر پر اوومه پر اسراییلو د برید پرمهال برمته کړي وو.

د حماس یوې سرچینې په قاهره کې له خبرو وروسته قطر ته د ستنېدو پرمهال د خپل نوم د نه ښودلو په شرط فرانسپرس خبري آژانس ته ویلي چې د اسراییلو د وړاندیز په اړه به په خپلو کې بحثونه وکړي او سمدستي به یې ځواب ورکړي.

د امریکا د بهرنیوچارو وزیر انتوني بلېنکین ویلي دي چې د اسراییلو په طرح کې د اوربند شرایط خورا زیات سخاوتمندانه دي.

دا په داسې حال کې ده چې بېګا د غزې په رفح ښار کې د اسراییلو په حملو کې د فلسطیني چارواکو په وینا شاوخوا ۴۰ تنه فلسطینیان ووژل شول.

د غزې د ۲،۳ میلیونه وګړو نژدې نیمایي د جګړو له وېرې په رفح ښار کې پناه اخیستې ده.

د متحدو ایالتونو، برېتانیا، فرانسې، جرمني او یو شمېر نورو هېوادونو استازو په افغانستان کې د بشري حقونو د وضعیت په اړه اندېښنه څرګنده کړې.

دې استازو د طالبانو تر واکمنۍ لاندې افغانستان کې د بشري حقونو او په تېره د ښځو د حقونو د وضعیت پر ترینګلتیا انتقاد کړی.

د دې هېوادونو استازو په ژنیو کې د ملګرو ملتونو د بشري حقونو د شورا له خوا د افغانستان د بشري حقونو د وضعیت د ارزونې په غونډه کې په دې اړه څرګندونې کړې دي.

په دې غونډه کې چې پرون دوشنبې پیل شوه او د مې تر لسمې پورې به دوام وکړي، د افغانستان د بشري حقونو د وضعیت په اړه درې راپورونه چې ملګرو ملتونو او نورو ادارو برابر کړي دي، ارزول کېږي.