د لاسرسۍ وړ لېنکونه

تازه خبر
شنبه ۱۸ لیندۍ ۱۴۰۲ کابل ۱۱:۵۳

افغانستان

په بامیانو کې له شلو زیاتې زده کوونکې نجونې مسمومې شوي

د بامیانو د پوهنې ریاست د له شلو زیاتو نجونو زده کونکو د مسموم کیدو خبر ورکوي.

د بامیانو د پوهنې ریس محمد رضا ادا وویل چې ۲۶ نجونې پرون د دې ولایت په پنجاب ولسوالۍ کې مسموم شوې.

ښاغلي ادا زیاته کړه چې دغه زده کونکې روغتون ته انتقال شوې خو د مسموم کیدوعلت یې تر اوسه نه دی مشخص.

د ازادي راډیو د سیمه ییزخبریال د راپور له مخې درې ورځې وړاندې هم په دې ولایت کې له ۶۵ زیاتې زده کونکې مسموم شوې وې.

د ورځې تازه خبرونه دلته ولولئ

رینا امیري: طالبان دې د ښځینه حقونو فعالانې له زندانونو خوشې کړي

د افغان ښځو، نجونو او بشري حقونو لپاره د امریکا ځانګړې استازې رینا امیري
د افغان ښځو، نجونو او بشري حقونو لپاره د امریکا ځانګړې استازې رینا امیري

د افغان ښځو، نجونو او بشري حقونو لپاره د امریکا ځانګړې استازې رینا امیري هر څه ژر د طالبانو په بند کې د بشري حقونو د زنداني فعالانو د ازادېدو غوښتنه کړې.

اغلې امیري نن سهار په خپله ایکس‌پاڼه د بشري حقونو د نړیوالې ورځې په مناسبت په طالبانو غږ کړی چې ژولیا پارسي، منیژه صدیقي، ندا پرواني، پریسا ازاده او د بشري حقونو ټول هغه مدافعین چې یوازې د افغانانو د حقونو لپاره د مبارزې په خاطر نیول شوي دي، له بنده خوشې کړي.

رینا امیري زیاته کړې، نیول شوي کسان د ستایلو دي او نه باید مجازات شي.

د طالبانو حکومت تر اوسه د ښځو او بشري حقونو په برخه کې د دې فعالانو د نیول کېدو په اړه هیڅ هم نه‌دي ویلي.

خو د نیولو شویو کسانو کورنیو څو ځل تایید کړې ده چې دوی د طالبانو د حکومت له‌خوا نیول شوې دي.

د افغانستان لپاره د امریکا ځانګړي استازي له پاکستاني چارواکو سره لیدلي

توماس ویسټ او پاکستاني چارواکي
توماس ویسټ او پاکستاني چارواکي

د افغانستان لپاره د امریکا ځانګړی استازی توماس ویسټ وايي، په اسلام‌اباد کې یې له چارواکو سره د تحریک طالبان پاکستان په اړه د را پورته شویو اندېښنو او د افغان کډوالو لپاره په اسانتیاوو خبرې کړي دي

ښاغلي ویسټ نن سهار له پاکستانه د روانېدو پر مهال په خپله ایکس‌پاڼه لیکلي، هغه د دې هېواد د پوځ له لوی درستیز جنرال عاصم منیر، د بهرنیو چارو سرپرست وزیر عباس جیلاني او د افغانستان لپاره د پاکستاني له ځانګړي استازي اصف دراني سره کتلي دي.

ویسټ زیاته کړې ده، امریکا په سیمه کې له ترهګرۍ سره د مبارزې په برخه کې له پاکستان سره ولاړه ده.

هغه له افغان کډوالو او له نړیوالو سازمانونو سره د پاکستان له چلند هم مننه کړې ده.

د افغانستان لپاره د امریکا متحده‌ایالاتو ځانګړی استازی توماس ویسټ ویسټ د ډسمبر په اوومه پاکستان ته تللی و.

طالبان: پاکستان نه ستنو شویو کډوالو ته ۲ لکه نومرې ځمکې وېشلو ته چمتو شوې دي

له پاکستانه ستنې شوې یو شمېر افغان کورنۍ په خېمو کې ژوند تېروي
له پاکستانه ستنې شوې یو شمېر افغان کورنۍ په خېمو کې ژوند تېروي

د طالبانو حکومت یو چارواکی ادعا کوي چې دوی له پاکستانه د راستنېدونکو کډوالو د استوګنې لپاره د ځمکو دوه لکه نومرې چمتو کړې دي.

د کرنې سرپرست وزیر عطاالله عمري په یوه ویډیو کې چې د طالبانو تر ادارې لاندې باختر اژانس خپره کړې، وايي چې د راستنېدونکو افغان کډوالو لپاره دا ځمکې د هېواد په ټولو ولایتونو کې د ښارګوټو په چوکاټ کې چمتو شوې دي او هغو کسانو ته ورکول کېږي چې خپلې ځمکې نه لري.

د ښاغلي عمري په وینا، د هغو کورنیو لپاره چې تر ۱۰ پورې غړي لري ۱۰ بسوې او د هغو لپاره چې له ۱۰ غړو زیات لري، ۱۵ بسوې نومرې ځانګړې شوې دي چې حکومت یې راستنېدونکو ته په نیمه بیه یا پنځوس سلنه تخفیف ورکوي او په لومړي کال به هېڅ پیسې هم نه ترې اخیستل کېږي.

دا څرګندونې په داسې حال کې کېږي چې په تېرو دوو میاشتو کې له څلورنیم لکو ډېر افغانان، څه په جبري ډول او څه په خپله خوښه له پاکستانه افغانستان ته ستانه شوي دي.

دا کډوال شکایت کوي چې د حکومت او مرستندویو ټولنو له خوا له دوی سره شوې مرستې کافي نه دي.

قطر نن د افغان ښځینه وو د زده کړو د ننګونو په اړه د یوې غونډې کوربه دی

له ارشیفه یو سمبولیک انځور چې له زده کړو د افغان نجونو محرومیت څرګندوي
له ارشیفه یو سمبولیک انځور چې له زده کړو د افغان نجونو محرومیت څرګندوي

د کړکېچونو او بشري څېړنو مرکز وايي چې په افغانستان کې د ښځو د زده کړو پر وړاندې د پرتو ننګونو په اړه نن د قطر په پلازمېنه دوحه کې په یوه غونډه کې خبرې په پام کې دي.

دې مرکز پر خپله وېبپاڼه په یوه خبرپاڼه کې ویلي چې د قطر او اندونېزیا د بهرنیو چارو د وزارتونو په کوربه توب د افغان ښځو د زده کړو په اړه نړیوال کنفرانس نن د ډسمبر په نهمه نېټه جوړېږي.

په خبرپاڼه کې راغلي دي چې په دې غونډه کې مخکښ کارپوهان، نړیوال سازمانونه او نور اړوند چارواکي راټولېږي او د افغان ښځو د زده کړو پر وړاندې د خنډونو په اړه بحث کوي.

د کړکېچونو او بشري څېړنو مرکز ویلي چې د دې کنفرانس د څېړنو نتاېج به د یکشنبې په ورځ د دوحه فورم په نوم د پالیسي جوړوونکو او نورو ګډونوالو هغې غونډې ته وړاندې شي چې سږکال د ګډو برخلیکونو د جوړولو تر سرلیک لاندې جوړېږي.

طالبانو د افغانانو او نړیوالو له پرله پسې غوښتنو سره سره تراوسه د نجونو پرمخ د منځنیو ښوونځیو، لیسو او پوهنتونونو دروازې بندې ساتلې دي.

بګټي: پاکستان په سياسي فعاليتونو کې ښکېل د قانوني اسنادو لرونکي لس افغانان ايستلي

د پاکستان د کورنيو چارو سرپرست وزير سرراز بګټي
د پاکستان د کورنيو چارو سرپرست وزير سرراز بګټي

د پاکستان د کورنیو چارو سرپرست وزیر سرفراز بګټي وايي، لس هغه د قانوني اسنادو لرونکي افغانان يې له دې هېواده ايستلي چې د ده په خبره په سیاسې فعالیتونو کې يې لاس درلود.

خو هغه د دې افغانانو د سیاسي فعالیتونو په اړه ډېر جزيیات ورنه کړل.

بګټي چې نن جمعه په اسلام اباد کې يې یوه خبرې کنفراس کې خبرې کولې وویل، بهرني اتباع نه شي کولی د پاکستان په سیاسي چارو کې مداخله وکړي.

بګټي زیاته کړه، دوی اوسمهال د بې اسناده افغان کډوالو د ايستلو په لومړی مرحله کې دي.

د هغه په خبره، په تېرو دوه نیمو میاشتو کې نږدې نیم میلیون هغه افغانان چې په پاکستان کې د پاتې کېدو قانوني اسناد يې نه درلودل له دې هېواده ايستل شوي دي.

پاکستان په رسمي ډول د بې اسنادو افغان کډوالو د ایستل بهیر د روان کال د نومبر په لومړۍ نېټه پیل کړ.

طالبانو د ټولشموله حکومت د جوړېدو د غوښتنې په تړاو د حکمتیار څرګندونې رد کړې

د طالبانو د حکومت ویاند ذبیح‌الله مجاهد
د طالبانو د حکومت ویاند ذبیح‌الله مجاهد

د طالبانو د حکومت ویاند ذبیح‌الله مجاهد د حزب اسلامي د مشر ګلبدین حکمتیار هغه ادعاوې رد کړې چې ویلي وو، امریکا له طالبانو د ټولشموله حکومت د جوړیدو غوښتنې چټکې کړي او د دوی حکومت ته يې یو فهرست هم سپارلی دی.

مجاهد نن پر خپلې ایکسپاڼې یا پخواني ټویټر لیکلي، د حکمتیار خبرې حقیقت نه لري او د دوی حکومت له هیچا سره د ټولشموله حکومت د جوړېدو ژمنه نه ده کړې.

تر دې مخکې د افغانستان ځینو کورنیو رسنیو د افغانستان د اسلامي حزب د مشر ګلبدین حکمتیار له قوله راپور ورکړی و چې امریکا له طالبانو د ټولشموله حکومت د جوړولو غوښتنې چټکې کړي او یو فهرست يې هم ورته سپارلی دی.

د حکمتیار له خولې همدارنګه ویل شوي چې امریکا د طالبانو حکومت ته خبرداری ورکړی، که یې شرایط ونه منل شي د دوی د مخالفانو ملاتړ به پیل کړي.

دا څرګندونې داسې وخت کېږي چې په وروستیو کې په روسیه، تاجکستان، اتریش او نورو هېوادونو کې د طالبانو د سیاسي مخالفانو غونډې جوړې شوي دي.

خپله امریکايي چارواکو د ګلبدین حکمتیار د دې ادعا په اړه تبصره نه ده کړې، خو تر دې مخکې امریکايي چارواکو په افغانستان کې د افغانانو ترمنځ په خبرو ټینګار کړی، خو ویلي یې دي د طالبانو د حکومت پر وړاندې د کوم وسله‌وال مخالفت ننګه نه کوي.

اسیاجام؛ هند افغانستان ته ماتې ورکړه

په افغان توپ اچونکو کې بشیراحمد، خلیل احمد او وحید الله ځدراڼ یوه یوه وېکټ واخیسته.
په افغان توپ اچونکو کې بشیراحمد، خلیل احمد او وحید الله ځدراڼ یوه یوه وېکټ واخیسته.

تر نولسو کلونو د کم عمره ځوانانو د اسیا جام په لومړنۍ سیالۍ کې هندوستان د ۷ وېکټو په توپیر افغانستان ته ماتې ورکړه.

د لوبې پچه هندوستان ګټلې وه او افغان لوبډلې ته یې د توپوهنې بلنه ورکړې وه.

افغان لوبډلې د ۵۰ اورونو په لوبولو سره ټول لوبغاړي له لاسه ورکړل او ۱۷۳ منډې یې وکړې.

په افغان توپوهونکو کې جمشیدځدراڼ ۴۳، محمدیونس ۲۶ او نعمان شاه ۲۵ منډې وکړې.

هندي توپ اچونکو کې ارشین کولکرني او راج لیمباني درې درې لوبغاړي وسوځول.

هند ورکړل شوی هدف یوازې د ۳ لوبغاړو په سوځېدو سره په ۳۸م اور کې پوره کړ.

د یادې لوبډلې لپاره ارشین کولکرني ۷۰ او موشیرخان ۴۸ منډې وکړې.

په افغان توپ اچونکو کې بشیراحمد، خلیل احمد او وحید الله ځدراڼ یوه یوه وېکټ واخیسته.

د ویلو ده چې د نن ورځې په دویمې سیالۍ کې بیا پاکستان نیپال ته ماتې ورکړې ده.

افغانستان به خپله دویمه سیالي د ډسمبر په ۱۰مه نېټه له نیپال سره ترسره کوي.

حکمتیار: امریکا له طالبانو د ټولشموله حکومت د جوړولو غوښتنې چټکې کړي

د حزب اسلامي افغانستان مشر ګلبدین حکمتیار
د حزب اسلامي افغانستان مشر ګلبدین حکمتیار

د افغانستان ځینو محلي رسنیو راپور ورکړی چې د حزب اسلامي افغانستان مشر ادعا کړې چې د امریکا متحد ایالتونو د طالبانو له حکومته د ټولشموله حکومت جوړولو غوښتنې چټکې کړي دي.

ګلبدین حکمتیار ظاهراً د خپل ګوند غړو ته په یوه انلاین غونډه کې ویلي چې واشنګټن د طالبانو حکومت ته یو فهرست هم سپارلی دی.

د طالبانو حکومت د دې موضوع په باب تبصره نه ده کړې.

د محلي رسنیو د راپورونو له مخې حکمتیار ویلي، د امریکا متحدو ایالتونو د طالبانو حکومت ته خبرداری ورکړی، که یې شرایط ونه منل شي د دوی د مخالفانو ملاتړ به پیل کړي.

دا څرګندونې داسې وخت کېږي چې په وروستیو کې په روسیه، تاجکستان، اتریش او نورو هېوادونو کې د طالبانو د سیاسي مخالفانو غونډې جوړې شوې دي.

اسیاجام؛ افغانستان هندوستان ته د ۱۷۴ منډو هدف ورکړ

تر نولس کلونو کم عمره افغان لوبډلې لوبغاړي د توپوهنې پر مهال
تر نولس کلونو کم عمره افغان لوبډلې لوبغاړي د توپوهنې پر مهال

تر نولسو کلونو د کم عمره ځوانانو د اسیا جام سیالیو لومړنۍ لوبه د افغانستان او هندوستان ترمنځ پیل شوې ده.

د لوبې پچه هندوستان وګټله او افغان لوبډلې ته یې د توپوهنې بلنه ورکړه.

افغان لوبډلې د ۵۰ اورونو په لوبولو سره ټول لوبغاړي له لاسه ورکړل او ۱۷۳ منډې یې وکړې.

په افغان توپوهونکو کې جمشیدځدراڼ ۴۳، محمدیونس ۲۶ او نعمان شاه ۲۵ منډې وکړې.

هندي توپ اچونکو کې ارشین کولکرني او راج لیمباني درې درې لوبغاړي وسوځول.

هند به په څو شېبو کې خپله توپوهنه پیل کړي.

د الف ګروپ دویمه سیالي د پاکستان او نیپال لوبډلو ترمنځ روانه ده.

پاکستان د افغانانو د سوکالۍ او پرمختیا د ملاتړ لپاره د ګډو چلندونو پر اهمیت ټینګار وکړ

د عکس ښي لور ته د پاکستان د بهرنیو چارو سرپرست وزیر جلیل عباس جیلاني او چپ لور ته د افغانستان لپاره د واشنګټن ځانګړي استازي ټام وېسټ
د عکس ښي لور ته د پاکستان د بهرنیو چارو سرپرست وزیر جلیل عباس جیلاني او چپ لور ته د افغانستان لپاره د واشنګټن ځانګړي استازي ټام وېسټ

د پاکستان د بهرنیو چارو وزارت وايي، د دغه هېواد د بهرنیو چارو سرپرست وزیر جلیل عباس جیلاني د افغانستان لپاره د واشنګټن ځانګړي استازي ټام وېسټ سره د افغانستان پر موضوع خبرې وکړې.

د پاکستان د بهرنیو چارو وزارت نن په یوه اعلامیه کې ویلي، په دې کتنه کې جيلاني د افغانانو د سوکالۍ او پرمختیا د ملاتړ لپاره د ګډو چلندونو پر اهمیت ټینګار وکړ.

د افغانستان لپاره د امریکا ځانګړی استازی ټام وېسټ چې د سیمې څلورو هېوادونو ته یې سفر پیل کړی، پرون په اسلام اباد کې د افغانستان لپاره د پاکستان له ځانګړي استازي اصف دراني سره هم کتلي وو.

اصف دراني پر خپله ایکسپاڼه له ټام وېسټ سره د کتنې خبر ورکړی او لیکلي یې وو چې دواړو خواوو د افغانستان پر بېلابېلو مسئلو خبرې کړي دي.

وېسټ پر خپله ایکسپاڼه لیکلي چې سیمې ته یې د دوشنبې په ورځ سفر پيل کړی او د دې لس ورځني سفر په لړ کې به پاکستان، متحده عرب اماراتو، قطر او سعودي عربستان ته لاړ شي.

نور راوښيه

XS
SM
MD
LG