د لاسرسۍ وړ لېنکونه

تازه خبر
پنجشنبه ۹ وری ۱۴۰۳ کابل ۰۱:۵۵

ټیلګراف: افغانستان زموږ ویتنام دی


د غرب ډيرو ورځپاڼو بیا هم د سعودي عربستان د پخواني پاچا عبدالله بن عبدالعزیز ال سعود پر مړینه مقالې خپرې کړې دي.

د افغانستان ولسمشر او د نړۍ د نورو ډيرو هیوادونو مشران پرون او وړمه ورځ د غمشریکي لپاره ریاض ته ولاړل.

خلیج ټایمز

خلیج ټایمز په دې اړه په یوه مقاله کې لیکلي:

"د عبدالله بن عبدالعزیز ال سعود د واکمنۍ زیات وخت د سپټمبر د یوولسمې د حملې؛ په عراق او افغانستان کې د تروریزم ضد جګړې او په منځني ختیځ کې د سیاسي بې ثباتیو په جوش کې تیر شو."

د خلیج ټایمز په لیکنه، د پخواني پاچا عبدالله بن عبدالعزیز له نظره تروریزم او افراطیت یو ستر مصیبت و او د حل یوازنۍ لاره يې د دې مصیبت د ریښو ایستل ګڼله.

خلیج ټایمز لیکي، د زیاتو اسلامي او عربي هیوادو رهبران به د مشورې لپاره ورته راتلل.

خلیج ټایمز د سعودي عربستان پخوانی پاچا عبدالله بن عبدالعزیز ال سعود هغه محتاط اصلاح غوښتونکی بللی چې په اسلامي او عربي هیوادو کې پر خلکو ګران و او د ورځپاڼې په وینا؛ په ټوله اسلامي نړۍ کې د سولې لپاره هڅې یې نه هیردونکې دي.

فوکس سپورټس:

راتلونکې میاشت (فبروري) په اسټرلیا کې د کرکټ نړیوالې سیالۍ پيلیږي.

فوکس سپورټس خپرونې د افغانستان د کرکټ د ملي ټیم د روزونکي /کوچ له مرستیال پیتر اندرسن سره مرکه خپره کړې ده.

ښاغلي انډرسن تردې مخکې د اسټرالیا د کوینزلنډ ښار د کرکټ په ټيم کې لوبه کوله او فوکس سپورټس خپرونې ته یې ویلي: "په افغانستان کې څه باندې دېرش کاله جنګ شوی او د ملي ټيم هر غړی ځان ته کیسه لري. د دې ټيم غړي د جنګي هليکوپټرو او الوتکو تر غربا لاندې تمرین کوي او هره شیبه د جګړې تر سیورې لاندې وي؛ ځکه کابل یو خطرناک ښار دی."

د فوکس سپورټس خبریال له پيټر انډرسن څخه پوښتنه کړې چې په اسټرالیا کې د کرکټ په نړیوالو مسابقو کې ګډون افغانستان ته څه ارزښت لري؟ ښاغلي اندرسن یې په ځواب کې ویلي:

"ډير زیات. که چېرې د دې هیواد د ځوانانو له نظره ورته وکتل شي؛ دا ښايي تر ټولو لوی او مثبت پرمختګ وي."

ایا د افغانستان د کرکټ د ملي ټیم کوم غړی شته چې په نړیوالو سیالیو کې خلک حیران کړي؟

پیټر اندرسن د دې پوښتنې په ځواب کې ویلي:

"هو! موږ یو کرکټر لرو، نجیب نومیږي او د ایرلند پر وړاندې لوبه کې یې په پينځوسو بالونو اتیا رنزه وګټل.نجیب کیڼ لاسی او خطرناک دی."

د افغانستان د کړکټ د ملي ټیم د روزونکي اسټرالیايي مرستیال ویلي چې په دې هیواد کې د خپلو تجربو پر بنا یو کتاب لیکي.

ټیلګراف:

ټیلګراف ورځپاڼې د افغانستان په اړه په مقاله کې له ناول لیکونکی اندرو اوهاګڼ سره خبرې کړې دي.

اوهاګن په خپل ناول [The Illuminations ] کې د افغانستان د جګړې کیسه کړې او ټیلګراف ته یې ویلي: "افغانستان زموږ ویتنام دی."

دې لیکوال د کتاب د بشپړولو لپاره پينځه کاله کار وکړ او په ۲۰۱۳م کال کې کابل ته د خپل تګ په اړه وايي؛ د کابل په لیدو مې غوني والوتل.

افغانستان هغه هیواد دی چې د نامعقولو سیاستونو په منځ کې راګیر دی. اندرو اوهاګن ورځپاڼې ته ویلي؛ دا هغه جګړه ده چې ماتې په کې خورو او سم نه ورباندې پوهیږو.

XS
SM
MD
LG