د لاسرسۍ وړ لېنکونه

تازه خبر
دوشنبه ۳ غویی ۱۴۰۳ کابل ۱۱:۵۰

افغانستان

دلیل: هره ورځ په افغانستان کې ۳۶ تنه د نري رنځ ناروغۍ له امله مري

د عامې روغتیا وزارت له توبرکلوز سره د مبارزې په برخه کې د روغتیا له نړیوال سازمان او جاپان سره د دولس میلیونه ډالرو په ارزښت یوه توافقنامه لاسلیک کړه.

د دغه وزارت سرپرستې ثریا دلیل د دې موافقتنامې د لاسلیک پر مهال وویل چې هره ورځ په افغانستان کې د توبرکلوز له امله ۳۶ کسان مري؛ خو له دې وروسته به هڅه وشي چې د دې ناروغۍ د مخنیوي او درملنې په برخه کې ښه پرمختګونه تر لاسه شي.

توبرکلوز یا نری رنځ د نړۍ په سطحه دویمه مرګونې ناروغۍ ده چې اکثر د بیوزلو هیوادونو اوسیدونکي پرې اخته دي.

د ورځې تازه خبرونه دلته ولولئ

فوټسال؛ افغانستان بحرین ته ماتې ورکړه او منځلوبو ته ووته

د افغانستان د فوټسال ملي لوبډله
د افغانستان د فوټسال ملي لوبډله

د فوټسال د اسیا ملتونو جام د ګروپي پړاو په وروستۍ لوبه کې افغانستان ۳-۲ بحرین ته ماتې ورکړه او منځلوبو یا کواټرفاینل ته یې ځان ورساوه.

یاده سیالي چې نن دوشنبه د کابل پر وخت ماښام ۶:۳۰ بجې پیل شوې وه، افغانستان د سنجر، رضا حسین پور او مهران غلامي د ګولونو پر مټ بحرین ته ماتې ورکړه.

افغان لوبډله به په منځلوبه کې د تاجکستان پر وړاندې سیالي کوي.

که افغانستان یاده سیالي وګټي نو د فوټسال نړیوال جام ته به هم لار پیدا کړي.

دا لومړی ځل دی چې افغانستان د فوټسال اسیایي سیالیو منځلوبو ته وځي.

د ویلو ده چې افغان لوبډلې په ګروپي پړاو کې له ایران ماتې خوړلې وه، کوېټ سره یې سیالي مساوي کړې وه او بحرین ته یې ماتې ورکړه.

فوټسال؛ افغانستان له بحرین سره سیالي لري

د افغانستان فوټسال ملي لوبډله
د افغانستان فوټسال ملي لوبډله

ټاکل شوې د افغانستان د فوټسال ملي لوبډله د اسیا د ملتونو جام سیالیو په لړ کې خپله درېیمه لوبه نن دوشنبه د بحرین پر وړاندې وکړي.

په ټایلنډ کې نننۍ لوبه د کابل پر وخت ماښام شپږنیمې بجې پیلېږي.

د شنبې په ورځ د افغانستان لوبه د کویټ په وړاندې درې د درېیو پر وړاندې مساوي ختمه شوه او افغانستان په خپله لومړۍ لوبه کې تېره پنجشنبه درې د یو پر وړاندې له ایرانه ماتې خوړلې وه.

د اسیا د ملتونو جام د ۲۰۲۴م کال د فوټسال سیالۍ د ټایلنډ په کوربه توب د ۱۶ لوبډلو په ګډون سره تېره چهارشنبه پیل شوې او تر راروانې یکشنبې دوام کوي.

افغانستان په دغو سیالیو کې له ایران، کویټ او بحرین سره په یوه ګروپ کې شامل دی.

ایران کې د یوه افغان په ګډون ۹ بندیان اعدام شوي

ارشیف
ارشیف

راپورونه وايي، پرون یکشنبه په ایران کې د یوه افغان په ګډون ۹ تنه بندیان اعدام شوي دي.

د "حال‌وش" په نوم ویبپاڼې چې د بشري حقونو مسایل تعقیبوي لیکلي چې د مخدره موادو په تړاو پر شپږو بلوڅ بندیانو او یوه کرد زنداني د اعدام دغه حکمونه د کرمان او چابهار په زندانونو کې عملي شول.

بل لوري ته د هرانا په نوم د ایران د بشري حقونو یوه اژانس خبر ورکړی چې دوه نور بندیان په ورته تورونو د کرج په قزلحصار زندان کې اعدام شول.

د راپور له مخې په دوی کې یو د افغانستان وګړی و.

تر دې مخکې راپور ورکړل شوی و چې د ایران حکومت د دوو وروڼو په ګډون څلور افغانان تېره پنج شنبه اعدام کړل.

د "حال‌وش" ویبپاڼې د راپور له مخې دغه کسان د مخدره موادو په تړاو په وکیل اباد زندان کې اعدام شول.

د هه­نګاو په نوم د ایران د بشري حقونو بل سازمان ویلي چې د ولي الله بختور په نوم بل افغان بیا د عمدي قتل په تور تېره چهارشنبه د تبرېز په مرکزي زندان کې اعدام شو.

طالبان: د افغانستان او قزاقستان ګډ نندارتون جوړېږي

ارشیف: په افغانستان کې د یوه مخکیني نندرتون انځور
ارشیف: په افغانستان کې د یوه مخکیني نندرتون انځور

د طالبانو د حکومت د صنعت او سوداګرۍ وزارت په کابل کې د افغانستان او قزاقستان د یوه ګډ نندارتون د جوړېدو خبر ورکړی.

دې وزارت پرون پر ایکس شبکې ولیکل چې دا نندارتون د روانې اوونۍ د پنجشنبې او جمعې په ورځو د غویي یا ثور په شپږمه او اوومه د پلازمېنې د حضوري چمن په سیمه کې جوړېږي او د افغانستان او قزاقستان محصولات او تولیدات په‌کې نندارې ته وړاندې کېږي.

د چارواکو په وینا، د افغانستان او قزاقستان ګډ نندارتون به د پنجشنبې ورځې د غرمې له دولسو بجو وروسته د لیدونکو پرمخ پرانیستی وي.

د داعش خراسان ډلې د کابل د تېر ماښام چاودنې مسوولیت ومانه

د افغانستان په نقشه کې کابل ښار
د افغانستان په نقشه کې کابل ښار

په کابل کې د تېر ماښام د چاودنې مسوولیت د اسلامي دولت ډلې د خراسان ولایت څانګې ومانه.

د فرانسې خبري اژانس نن راپور ورکړ چې داعش په ټلګرام کې لیکلي چې د هزاره وګړو پر موټر یې په دې چاودنه کې لږ تر لږه لسو کسانو ته مرګ ژوبله اړولې ده.

تر دې مخکې د کابل لپاره د طالبانو د امنیې قوماندانۍ ویاند خالد ځدراڼ ویلي وو چې په کوټه سنګي کې پر یوه مسافر وړونکي موټر د مقناطیسي ماین په چاودنه کې موټر چلوونکی وژل شوی او درې نور ملکیان ټپیان شوي دي.

تېره میاشت د داعش ډلې د خراسان ولایت څانګې په کندهار کې هم د ځانمرګي برید مسوولیت منلی و.

په هغه برید کې چې د نوي کابل بانک پر څانګه شوی و، لسګونو کسانو ته مرګ ژوبله اوښتې وه.

که څه هم طالبان ادعا کوي چې داعش ډله په افغانستان کې ختمه شوې، خو نږدې درې کاله مخکې پر افغانستان د طالبانو د ولکې له بیا ټینګولو وروسته داعش ډلې په افغانستان کې د ګڼو خونړیو حملو مسوولیت منلی دی.

له پاکستان او ایران څخه پرون ۸۳ کورنۍ افغانستان ته ستنې شوې

ارشیف
ارشیف

باختر دولتي اژانس چې د طالبانو په کنټرول کې دی، خبر ورکړی چې پرون شنبه له پاکستان او ایرانه ۸۳ کورنۍ افغانستان ته ستنې شوې دي.

دغه ژانس په خپله ایکس شبکه کې لیکلي چې دغه کورنۍ د کندهار د سپین بولدک، د پکتیکا د انګور اډې او د هرات د اسلام کلا له لارې افغانستان ته ستنې شوې دي.

نه دي ویل شوي چې دغه لسګونه کورنۍ په خپله خوښه که په زور افغانستان ته ستنې کړای شوي دي.

د اژانس په وینا، پرون ۳۵ کورنۍ خپلو سيمو ته لېږدول شوې هم دي.

له ایران او پاکستانه د بې اسناده افغان کډوالو د اخراج لړۍ ګړندۍ شوې ده.

په پاکستان کې د کډوالۍ نړیوال سازمان وايي، یوازې د روان کال د اپرېل له لومړۍ نېټې څخه تر ۱۵مې پورې څه باندې ۸۰۰۰ افغانان افغانستان ته ستانه کړای شوي چې اکثرو یې قانوني اسناد نه لرل.

د طالبانو د چارو ادارې مشر: د بیت المال له وسایلو دې ناسمه استفاده نه کیږي

د طالبانو د چارو ادارې مشر، مولوي نورالحق انور
د طالبانو د چارو ادارې مشر، مولوي نورالحق انور

د طالبانو یوه لوړرتبه چارواکي له خپلو کسانو غوښتنه کړې چې د بیت المال ساتنې ته پام وکړي.

د طالبانو حکومت د چارو ادارې پرون په یوه خبرپاڼه کې ویلي، د دوی د چارو ادارې مشر نورالحق انور دا خبره په اوونیزه غونډه کړې ده.

د اعلامیې له مخې ښاغلي انور غوښتنه کړې چې د بیت المال وسایل او وسایط دې د شخصي چارو لپاره نه کارول کېږي.

دا غوښتنه داسې وخت کېږي چې په ټولنیزو شبکو کې په خپرو شویو تصاویرو کې لیدل شوي چې دولتي موټرونه یا پاکستان ته په قاچاق روان دي، یا هم په افغانستان کې دننه د ځینو طالب چارواکو له خوا د شخصي کارونو لپاره کارول کېږي.

فرانسه کې د یو شمېر افغانانو لاریون؛ د ۳ افغانانو د مرموزې وژنې د څېړلو غوښتنه یې وکړه

پاریس - ارشیف
پاریس - ارشیف

په فرانسه کې ځینو افغان لاریونوالو په پاریس کې د درېیو افغانانو د مرموزې وژنې په اړه د څېړنو غوښتنه وکړه.

دغه درې کسان په یوه کور کې د اپرېل میاشتې پر اوومه وژل شوي چې تر اوسه یې د قاتلانو او د پېښې د څرنګوالي په باب بشپړ معلومات نه دي ورکړل شوي.

افغان خبریال او د کډوالو د چارو فعال حفیظ اله میاخېل له ازادي راډیو سره په خبرو کې وویل: «درې واړه، یعنې د کور خاوند او دوه نور افغانان په یوه اپارتمان کې وژل شوي دي، د پېښې څرنګوالی معلوم نه دی. لاریونوال له حکومته غواړي چې د پېښې جزییات معلوم کړي.»

په پاریس کې د افغانانو پرونی لاریون په تاوتریخوالي هم اوښتی دی.

متقي: د سره صلیب نړیوال فډراسیون دې افغان روغتونونو سره مرسته وکړي

د طالبانو د بهرنیو چارو سرپرست وزیر امیر خان متقي
د طالبانو د بهرنیو چارو سرپرست وزیر امیر خان متقي

د طالبانو د بهرنیو چارو سرپرست وزیر امیر خان متقي د افغانستان روغتونونو ته د سره صلیب او سرې میاشتې نړیوال فډراسیون د مرستو غوښتنه کړې ده.

متقي دغه غوښتنه د دغه فډراسیون د اسیاپسفیک څانګې له مشر الکساندر متیو سره په کتنه کې کړې ده.

د طالبانو د بهرنیو چارو وزارت مرستیال ویاند، حافظ ضیا احمد نن په خپله ایکس شبکه (پخواني ټویټر) کې د دې کتنې خبر ورکړی، خو نه یې دي ویلي دا کتنه کله شوې ده.

هغه د سره صلیب او سرې میاشتې نړیوال فډراسیون د دغه چارواکي په وینا لیکلي چې تېر کال سره صلیب په افغانستان کې پر روغتیا، اوبو رسولو او د طبیعي پېښو په وړاندې پر مبارزه ۲۸ ملیونه سویسي فرانکه لګولي دي.

د سره صلیب نړیوالې کمېټې په تېره اګست میاشت کې ویلي وو چې د افغانستان له ۲۵ روغتونونو سره به خپلې مالي مرستې بندې کړي.

د روغتیا نړیوال سازمان په تېره فبروري میاشت کې په یوه راپور کې ویلي وو چې ۲۰۲۴م کال به د افغانستان روغتیايي سکټور ته له چلنجونو ډک وي.

د اسلامي همکاریو سازمان استازي طالب چارواکو سره د نجونو د زده کړو او ښځو د حقونو په اړه خبرې کړي

د اسلامي همکاریو سازمان پلاوی
د اسلامي همکاریو سازمان پلاوی

د اسلامي همکارۍ سازمان وايي، د افغانستان لپاره د دې سازمان ځانګړي استازي طارق علي بخیت او ورسره مل پلاوي په کابل کې له طالب چارواکو سره په روان وضعیت او په ځانګړي ډول د افغان نجونو او ښځو د حقونو په اړه خبرې کړي دي.

دې سازمان په یوه خپره کړې اعلامیه کې لیکلي، دې پلاوي د اپریل په ۱۹مه کابل ته سفر کړی او د طالبانو حکومت د رییس الوزرا له اداري مرستیال عبدالسلام حنفي، د بهرنیو چارو وزارت سرپرست امیرخان متقي او د امرباالمعروف او نهی‌ عن‌المنکر وزارت سرپرست خالد حنفي سره یې کتلي دي.

په ورته وخت کې د طالبانو د بهرنیو چارو وزارت یوه اعلامیه کې لیکلي، د طارق علي بخیت په مشرۍ د اسلامي همکارۍ سازمان پلاوي له امیرخان متقي سره په لیدنه کې د دې سازمان د غړو هېوادونو ترمنځ پر مستقیم تعامل او تفاهم ټینګار کړی دی.

د اسلامي همکارۍ سازمان پلاوی داسې مهال بیا کابل ته راځي چې د طالبانو حکومت یې تر اوسه د افغان نجونو او ښځو په زده‌کړو او کار د محدودیت د لېرې کولو په برخه کې مطرح کړې غوښتنې نه‌دي منلي.

نور راوښيه

XS
SM
MD
LG