د لاسرسۍ وړ لېنکونه

تازه خبر
یکشنبه ۳ سلواغه ۱۴۰۰ کابل ۰۷:۴۵

په غزه کې د اوربند سره سره د اسراییلو عملیات روان دي


په غزه د اسراییل له لوري د اعلان شوي اوربند سره سره د دې هېواد د پوځ عملیات دوام لري.

اسراییل ویلي، دغه اوربند چې د بشري مرستو په خاطرنن سهار د څو ساعتونو لپاره لګول شوی، په هغو سیمو پورې نه دی مربوط چې اوس په کې د دې هېواد پوځي عملیات دوام لري.

اسراییل د غزې په اکثرو برخو کې نن د څو ساعتونو لپاره یو اړخیز اوربند اعلان کړی.

دا په داسې حال کې ده چې په سیمه کې د ملګرو ملتونو پر یوه ښوونځي د اسراییل وروستۍ خونړۍ حمله نړېوالو غندلې ده.

حماس ویلي، اوه ساعته اوربند ته چې په سیمه ییزو خت د سهار له اتو بجو ټینګ شوی غاړه نه ږدي، هغه یې غولونکی بللی او اوسیدونکو ته یې خبرداری ورکړی چې له کورونو بهر ته د وتلو په وخت کې ډیر احتیاط وکړي.

د اوربند له جاري کیدو څو دقیقي نه وې تیرې شوې چې د فلسطین روغتیایي چارواکو وویل، چې د غزې د تړانګې په شاتي ساحلي سیمه کې د مهاجرینو پر یوه کمپ د اسراییل د هوایي بمبارۍ په ترڅ کې یو ماشوم ووژل شو او دیرش تنه نور ژوبل شول.

دغه راز د غزې په شمالي برخه کې نن پر یوه کور د اسراییل په هوایي برید کې د اسلامي جهاد د ډلې یو قومندان د انیل منصور هم ووژل شو.

اسلامي جهاد ډله د حماس نژدې متحده ده.

اسراییل ویلي، اعلان شوی اوربند د غزې د جنوبي رفح ښارګوټی په ګډون د هغو سیمو لپاره ندی چې پکې اسراییلي ځواکونه عملیات مخ ته وړي.

د اسراییل ځواکونو ته دغه رازامرشوی چې هرې حملې ته پوځي ځواب ووایي.

په غزه کې د حماس او اسراییل ترمنځ د جګړې په ترڅ کې چې له پیله یې اته ویشت ورځې وځي، له ۱۷۷۰ څخه زیات فلسطینیان چې اکثره یې ملکي وګړي دي، وژل شوي دي.

د اسراییل پوځ ته په جګړه کې د اوښتو تلفاتو شمیر۶۴ پوځیانو ته رسیږي. دغه راز درې ملکي وګړي هم وژل شوي دي.

اسراییل د بشري مرستو رسولو لپاره دغه اوربند په داسې حال کې اعلانوي چې پردې هیواد په غزه کې د ملګروملتونو پریوه ښوونځي د پرونۍ خونړۍ حملې په خاطرغندنې مخ په زیاتیدو دي.

په دغه ښوونځي کې شاوخوا درې زرو هغو فلسطینیانو پناه اخیستې وه چې د جګړو له سیمو له خپلو کورونو تښیدلي دي.

د ملګروملتونو عمومي منشي بانکي مون وویل، دغه حمله چې لس تنه پکې ووژل شول، له اخلاقي پلوه د کرکې وړ، یو جنایت کارانه عمل او له نړیوال قانون څخه کلکه سرغړونه ده.

بانکي مون وویل، دغه لیونتوب باید پای ته ورسول شي.

د امریکا د بهرنیو چارو د وزارت ویاندې جین ساکي وویل، متحده ایالات دغې شرمونکې حملې ډیرمایوسه کړی دی.

هغې له اسراییل څخه وغوښتل چې د خپلو نورمونو د پرځای کولو لپاره زیات څه ترسره کړي او ملکي وګړو ته د مرګ ژوبلو مخه ونیسي.

اسراییل ویلي چې دغه ښونځي ته نژدې د اسلامي جهاد درې وسله وال چې په موټرسایکل سپاره و، په نښه کړي و.

د اسراییل د حکومت ویاند مارک ریګیو ویلي دي چې وسله وال ښونځیو ته نژدې سیمې د جګړې د ډګرپرسیمو بدلوي او دوی باید ګرم وبلل شي.

ویل کیږي په غزه کې د جګړې له امله ۲۷۰ زره ملکي وګړو د ملګروملتونو امن ځایونو ته پناه وروړې.

XS
SM
MD
LG