د امریکا د کانګریس ځینوغړیو له ولسمشراوباما څخه غوښتي چې دونیڅک بېلتون غوښتونکې ډله، چې ځان یې د دونیڅک جمهوریت اعلان کړی دی، تروریستان ونوموي.
دوی له ولسمشراوباما همدا راز غواړي چې د روسیې پرضد نور بندیزونه ولګوي.
د اوکراین په ختیځ کې د مالیزیا د هوايي شرکت د مسافر وړونکې الوتکې له ویشتل کېدو وروسته له روسیې او په اوکرایین کې د مسکو له پلوي بېلتون غوښتونکو سره د امریکا اړیکې خرابې شوي دي.
نن د ماليزيا د هوايي شرکت د مسافروړونکې الوتکې د ويشتل کېدو پوره يوه اوونۍ تېرېږي.
تېره پنجشنبه دا الوتکه، چې له هالنډه ماليزيا ته روانه وه، په داسې حال کې چې د اوکرايين په ختيځ کې له مځکې ۱۰ زره متره لوړه وه، په راکټ وويشتل شوه او ټوله ۲۹۸ سپرلي يې ووژل شوه.
د دې پېښې مسووليت په دونيڅک کې د اوکرايين د روسي پلوه بېلتون غوښتونکو په غاړه اچول کېږي.
له همدې کبله د کانګريس د مشرانو جرګې يو شمېر غړي له خپل ولسمشره غواړي چې د دونيڅک بېلتون غوښتونکي د نړېوالو تروريستي ډلو په کتارکې راولي.
د ديموکرات ګوند سناتورانو ديان فاينسټاين، رابرت ميناندز او کارل ليوين ولسمشر اوباما ته په يوه ليک کې همدا رازغوښتنه کړې چې پر روسيې دې د دفاع، انرژۍ او اقتصادي صنايعو په برخو کې فوري او زيات بنديزونه ولګول شي.
سناتور ليوين په همدې اړه ازادي راډيو ته وويل:
«د اوکرايين په هغه برخه کې د هر ډول مرستو د درېدو په خاطر زيات فشارونه به ګټور وي.»
له بلې خوا سناتور جان مک کين ويلي، چې د ديموکرات سناتورانو د دې ډول هڅو ملاتړ کوي.
ده له ازادي راديو سره په خبرو کې وويل، څوک چې الوتکې ولي، د داسي نوم مستحق دي:
«دا هسي خيال دي چې دوي نور کسان دي. داسي نه ده، دوي روسان دي.»
تر دې مخکې د اوکرايين حکومت د دونيڅک او لوهانسک له ځانه اعلان کړي جمهوريتونه د تروريستي ډلو په توګه معرفي کړي وو.
د دونيڅک اداره د ماليزيايي الوتکې په غورځولو کې لاس لرل ردوي خو ځيني شواهد شته چې ښيي ماليزيايي الوتکه په روسي بک توغندي ويشتل شوې ده.