د ایټالیا او مالتا سمندري ځواکونه وایي چې؛ د شنبې په شپه یې د غیر قانوني کډوالو یوه بیړۍ چې "لمپيډوسا" ټاپو ته نږدې دوبه شوې وه، موندلې ده.
د ژغورنې مامورینو ویلي، لږترلږه اتلس جسدونه یې موندلي او یو تن چې غالباً د بیړۍ د ماشین په ګاز مسموم شوی و؛ د ژغورنې د عملیاتو په وخت کې مړ شوی دی.
چارواکو ویلي، د لرګي دا بیړۍ تقریباً ۲۵ متره اوږده وه او نږدې ۶ سوه غیر قانوني کډوال په کې سپاره وو.
دې کسانو غوښتل چې د ایټالیا لمپيډوسا ټاپو ته ورسیږي.
د بیړۍ د ډوبیدو یو اساسي علت دا ښودل شوی چې؛ تر اندازې زیات خلک په کې بار شوي وو چې؛ د شنبې په شپه، د لیبیا او مالتا ترمنځ اوبو کې د ډوبیدو پر مهال، یوې ډنمارکۍ بیړۍ پيدا کړه.
فرانس پرس اژآنس وايي، د ايټالیا سمندري ساتونکو د ډوبو شویو کسانو د موندلو او ژغورلو لپاره د مالتا له پوځه مرسته غوښتې ده.
ژوندي موندل شوي کډوال د درملنې لپاره د ايټالیا "سیسیلي ټاپو" ته لیږدول شوي او د مړو جسدونه به نن (یک شنبه) مالتا ته واستول شي.
د فرانس پرس په حواله، لږترلږه ۶۱ غیر قانوني کډوال چې په یوه بله بیړۍ کې له لیبیا روان شوي او په لاره کې یې بیړۍ ډوبه شوې وه؛ د پنج شنبې په ورځ ایټالیا ته ورسیدل.
داسې انګیرل کیږي چې، د بیړۍ ۴۱ مسافر په اوبو کې مړه شوي دي.
ژغورل شوي کسان د ګانا، ګامبیا او مالي دي.
ایټالوي چارواي وايي، په لیبیا کې د ګډوډۍ د زیاتیدو او په دوبي کې د سمندر د اوبو د نسبي ارامۍ په خاطر، د هغو پناه غوښتونکو شمیر زیات شوی؛ چې د قاچاقبرانو په بیړیو کې د ایټالیا خاورې ته د رسیدو هڅې کوي.
دوی وايي، د روان کال په شپږو میاشتو کې لږترلږه ۸۰ زره غیر قانوني پناه غوښتونکي د ایټالیا خاورې ته رسیدلي دي.
په ایټالیا کې د ملګرو ملتو د کډوالو د ادارې یوې ویاندې "کارلوتا سامي" فرانس پرس ته ویلي؛ د هغو پناه غوښتونکو شمېر زیات شوی چې؛ د سمندر له لارې ایټالیا او له هغه ځایه د اروپا نورو هیوادو ته د تګ هڅې کوي. سامي ویلي، لس ګونو کسان په دې لاره کې مري.
فرانس پرس وايي، زیات غیرقانونی کډوال چې د سمندر له لارې اروپا ته د رسیدو هڅه کوي زیات د افغانستان، پاکستان، سوریې، ایریتریا، سومالیا او یو شمیر نورو افریقايي هیوادو دي.
هرکال ګڼ شمیر پناه غوښتونکي په سمندر کې د ډوبیدو؛ د خوراکي موادو او د څښاک د پاکو اوبو د نشتوالي او په زهرجن ګاز د مسمومیدو له امله مړه شوي دي.
د ایټالیا سمندري ځواکونو د روانې میاشتې په پیل کې هم د غیرقانوني کډوالو لږترلږه پينځه څلویښت جسدونه وموندل چې؛ د کب نیونکو په جال کې نښتي وو.
داسې ګڼل کیږي چې دا کسان قاچاقبرانو په یوه تنګ ځای کې اچولي وو او د هوا د نشتوالي په خاطر مړه شوي وو.