د پاکستان حکومت خبر ورکړی چې د قرغیزستان له پلازمېنې بشکیک یې خپل یو شمېر محصلین په ځانګړې الوتکه کې راویستلي دي.

د پاکستان ملي راډیو تلوېزیون د راپور پر بنسټ، تېره شپه یوه الوتکه کې ۱۴۰ محصلان لاهور ته رسېدلي او د کورنیو چارو وزیر محسن نقوي یې هوايي ډګر کې هرکلی کړی.

دې تلوېزیون د چارواکو له قوله دا هم لیکلي چې نن یکشنبه به هم ډېر شمېر نور محصلان له بشکیک وویستل شي.

دا اقدام وروسته تر دې کېږي چې بشکیک کې یو شمېر کسانو له بهرنیو محصلانو او وګړو سره په تاوتریخوالي لاس پورې کړ او لږ تر لږه ۲۹ تنه یې ټپيان کړل.

په ټپیانو کې ډېر یې پاکستاني محصلان دي.

په همدې حال کې د قرغیزستان حکومت یوه اعلامیه کې ویلي چې وضعیت اوس ښه شوی او د حالاتو د سمون ډاډ یې ورکړی.

د قرغزستان په پلازمېنه بشکیک کې له تازه تاوتریخوالي وروسته چې لږ تر لږه د ۲۹ کسانو د ټپي کېدو سبب شو، پرون هم د بشکیک له دوو لیلیو بهر د خلکو د غونډېدو خبر ورکړل شوی دی.

د قرغزستان حکومت پرون وویل چې د دغو ناکراریو په تړاو یې څلور بهرنيان نیولي، خو نه یې دي ویلي چې دا د کومو هېوادونو وګړي دي.

پرون او وړمه ورځ پېښ شوی تاوتریخوالی د قرغزستان، پاکستان او هند ترمنځ د ډیپلوماتیک کړکېچ سبب شو.

په بشکیک کې د پاکستان سفارت ویلي چې په تېرو دوو ورځو کې ۱۴ پاکستانیان ټپیان شوي، خو د درېیو پاکستاني وګړو د وژل کېدو موضوع یې رد کړه.

د پاکستان د بهرنیو چارو وزارت په یوه اعلامیه کې وویل چې پرون په اسلام اباد کې د قرغزستان سفیر احضار کړای شو او د پاکستاني محصلانو خلاف د وړمې شپې د تحولاتو په باب یې خپله ژوره اندېښنه ورسره شریکه کړه.

د اوکراین ولسمشر وايي، د ده د اټکل له مخې روسیه به د کییف په شمال ختیځ کې خپل پوځي عملیات لا شدید کړي.

ولودمیر زیلینسکي د فرانسې له خبري اژانس سره په هغه ځانګړې مرکه کې چې پرون شنبه خپره شوه ویلي، کییف د لومړۍ کرښې د ساتنې لپاره یوازې یو پر څلورمه برخه هوايي دفاع لري.

د فرانسې خبري اژانس د خبر له مخې، روسي ځواکونو چې په وروستیو میاشتو کې څه ناڅه پرمختګونه کړي، د مې میاشتې پر لسمه یې پر خارکییف سیمه ناڅاپي حمله وکړه چې دا یې په یونیم کلن یرغل کې د سیمو د نیولو له اړخه روسیې ته پراخه لاسته راوړنه ګڼل کېږي.

ولودمیر زیلینسکي وايي، روسي ځواکونه په شمال ختیځ سرحد کې یوازې له پنځو تر لسو کیلومترو پورې ساحو کې مخکې تللي، خو وروسته د اوکراین ځواکونو یې مخه نیولې ده.

په میانمار کې د قومي اقلیت یوې وسله‌والې ډلې پرون شنبه ادعا وکړه چې وسله‌والو یې د لوېدیځ ایالت راخین پر یوه ښارګوټي ولکه ټینګه کړې ده.

په راخین ایالت کې شخړې وروسته له هغې زیاتې شوې چې د اراکان پوځ یا "اې‌اېAA" په نوم د اقلیت وسله‌والې ډلې په نومبر میاشت کې پر امنیتي ځواکونو حمله وکړه.

له دې سره هغه اوربند مات شو چې په ۲۰۲۱م کال کې تر پوځي کودتا وروسته نافذ شوی و.

اراکان پوځ په راخین کې یو ښارګوټی او د هند، دغه راز بنګله دېش پولې ته څېرمه ځینې ساحې نیولې دي.

له دې سره د میانمار پر پوځي حکومت فشار زیات شوی چې له څه مودې راهیسې د میانمار یا پخوانۍ برما په جنوب ختیځ او نورو ساحو کې د خپلو مخالفانو په وړاندې په مبارزه بوخت دی.

د حماس تر ولکې لاندې د غزې روغتیا وزارت پرون خبر ورکړ چې په دغه قلمرو کې د اسراییل او فلسطیني افراطي وسله‌والو ترمنځ د څه باندې اووه میاشتنۍ جګړې په نتیجه کې د وژل شویو فلسطینیانو شمېر ۳۵زره ۳۸۶ ته ورسېد.

د امریکا متحد ایالتونه او اروپايي ټولنه توندلارې ډله حماس، یو تروریستي سازمان ګڼي.

د غزې روغتیا وزارت پرون د مخکېنیو ۲۴ ساعتونو پر مهال هم د لږ تر لږه ۸۳ نورو کسانو د وژل کېدو خبر ورکړی دی.

د اکټوبر له اوومې په دې جګړه کې د ټپیانو شمېر ۷۹زره ۳۶۶ ته رسېدلی دی.

په همدې حال کې د غزې په جنوبي ښار رفح کې د اسراییل پوځي عملیات پرون هم په شدت روان وو.

اسراییل اعلان کړی چې د بشري مرستو لومړۍ جوپه دغه کلابند شوي ښار ته ورسېده.

د غزې تړانګې جنوبي ښار رفح نن د سختو نښتو او بمباریو ډګر و.

د فرانس پریس اژانس د راپور له مخې، د اسراییلو پوځ ویلي چې د دوی هوايي ځواکونو تېره ورځ او شپه په غزه کې ۷۰ هدفونه بمباري کړي او د اسراییلو ځمکنیو ځواکونو د رفح په ختیځ کې خپلو عملیاتو ته دوام ورکړی دی.

په غزه کې د کویټ روغتون ویلي چې تېره شپه په رفح ښار کې د بې ځایه شویو په یوه کمپ کې د اسراییلو په بریدونو کې دوه تنه وژل شوي دي.

د قرغیزستان چارواکو ویلي چې د دغه هېواد په پلازمېنه بشکیک کې یې د تاوتریخوالي په تړاو ۴ بهرني اتباع نیولي دي.

د ازادۍ راډيو د قرغیزي څانګې د راپور له مخې، قرغیزي چارواکو نه دي ويلي چې دغه کسان د کومو هېوادونو وګړي دي.

د چارواکو په وینا، نیول شوي څلور بهرنیان د بلوا او قومي، نژادي او مذهبي کرکې په پارولو تورن دي.

د قرغیزستان حکومت ویلي چې د دغه هېواد په پلازمینه بشکیک کې د مې د ۱۷ او ۱۸ نېټې په شپه د تاوتریخوالي په پایله کې د ۳ بهرنیانو په ګډون ۲۸ تنه ټپیان شوي دي.

په بشکیک کې د پاکستان سفارت اعلان کړی چې په دې پېښه کې ۱۴ پاکستاني اتباع ټپیان شوي دي.

د پاکستان د بهرنیو چارو وزارت په یوه خبرپاڼه کې ویلي چې په اسلام اباد کې د قرغیزستان سفیر احضار شوی دی.

په خبرپاڼه کې راغلي چې د قرغیزستان سفیر ته په بشکیک کې له پاکستاني محصلانو سره د شوي چلند په اړه د پاکستان د حکومت ژوره اندېښنه څرګنده شوې ده.

په بشکیک کې تاوتریخوالی وروسته له هغه پیل شو چې د قرغیز او مصري محصلانو د اخوډب ویدیو انلاین شوه.

د برېتانیا د سمندري سوداګرۍ د عملیاتو اداره وايي د یمن د حدیدې د شمال لوېدیځ په ۷۶ مایلۍ کې په سره سمندرګي کې یوه بیړۍ له نامعلوم شي سره ټکر شوې ده.

د برېتانیا د سمندري سوداګرۍ عملیاتي ادارې په یوه بیان کې اعلان وکړ چې د کښتۍ کپتان تایید کړه چې په پېښه کې بېړۍ ته لږ زیان رسېدلی دی.

په خبرپاڼه کې راغلي چې دا بېړۍ خپل سفر ته دوام ورکوي او عملې ته یې زیان نه دی اوښتی.

د برېتانيا د سمندري سوداګرۍ د عملياتو اداره وايي، د بريد په اړه يې پلټنې پيل کړې دي.

ایران پلوه حوثي ملېشې چې د یمن پلازمېنه او د هېواد ډېر ګڼ نفوسه سیمې یې تر ولکې لاندې دي، له څو میاشتو راهیسې په سور سمندرګي کې پر اسراییلي کښتیو بریدونه کوي او ادعا کوي چې دوی د اسراییلي بریدونو پر وړاندې د فلسطینيانو ملاتړ کوي.

د روسیې او اوکراین ولسمشرانو د ۲۰۲۴ کال د المپیک په سیالیو کې، چې په پاریس کې ترسره کېږي، د اوربند لپاره د فرانسې وړاندیز رد کړ.

د اوکراین ولسمشر ولادیمیر زیلینسکي له فرانس پریس خبري اژانس سره په مرکه کې وویل چې د لوبو په لړ کې اوربند "یوازې له روسیې سره د خپلو سرتیرو او تجهیزاتو په لیږدولو کې مرسته کوي."

د سږ کال دوبنۍ المپیک لوبې به د جولای له ۲۶ څخه د اګست تر ۱۱ د فرانسې په پلازمېنه پاریس کې ترسره شي.

د فرانسې ولسمشر ایمانویل مکرون څو میاشتې وړاندې ویلي و چې پلان لري چې له روسیې وغواړي چې د ۲۰۲۴ کال د اوړي د المپیک په لوبو کې په اوکراین کې اوربند اعلان کړي.

د روسیې ولسمشر ولادیمیر پوتین هم د جمعې په ورځ (د مې ۱۷ مې) اعلان وکړ چې مسکو به په پاریس کې د المپیک لوبو پر مهال د اوربند د مفکورې ملاتړ ونه کړي.

په جنوبي افریقا کې په یوه نړېدلې ودانۍ کې د بیارغونې د نږدې شلو تري تم شویو کارګرو د موندنې لپاره د پلټنې عملیات، چې له دوو اوونیو روان وو، پرون جمعه پای ته ورسېدل.

دا عملیات د چارواکو په غوښتنه پرون پای ته ورسول شول.

چارواکي وايي، د یوې پنځه پوړیزې ودانۍ د نړېدو په پېښه کې ۳۳ کسان مړه شول او د ۱۹ نورو کارګرو د برخلیک په باب معلومات نه وو.

چارواکي فکر کوي، دغه کسان به د مې میاشتې پر شپږمه د دې نیم کاره ودانۍ تر نړېدو وروسته تر کنډوالو لاندې شوې وي.

دغه ودانۍ چې د رغونې کارونه یې روان وو، د جنوبي افریقا په جنوبي ښار جورج کې ونړېده.