د لاسرسۍ وړ لېنکونه

تازه خبر
جمعه ۷ سلواغه ۱۴۰۱ کابل ۰۵:۱۰

افغانستان

بدخشان: د افغان ځواکونو او وسله والو ترمنځ په نښته کې ۸ تنه ټپیان شوي دي

د بدخشان په وردوج ولسوالۍ کي د افغان امنیتي ځواکونو او وسله والو مخالفینو ترمنځ نښته کي د دوو ښځو په ګډون شپږ ملکي کسان ټپیان شوي دی.

د وردوج ولسوال دولت محمد ازادۍ راډیو ته وویل؛ چې تېره ورځ د مخالفینو له لوري د درنو وسلو په ډزو کې له شلو ډیر کورونه ویجاړي شوي او په لسګونو کورنۍ د خپلو کورونو پریښودو ته اړشوي دی.

د راپورونو له مخې د بدخشان وردوج ولسوالۍ په دی وروستۍ یوه میاشت کې د افغان ځواکونو او طالبانو ترمنځ د نښتو شاهده ده.

تیره ورځ افغان چارواکو ادعا وکړه چې، په دې سیمه کې یې شاوخوا پنځوس وسله وال طالبان وژلي دي. طالبانو دغه ادعا رد کړې ده.

د ورځې تازه خبرونه دلته ولولئ

ميدان ورګ کې د سړې هوا له امله يو تن مړ شوی دی

د افغانستان په عمومي نقشه کې د ميدان وردګ موقعيت

د دغه ولايت د پېښو پر وړاندې د چمتووالي ادارې ويلي، په سيد اباد ولسوالۍ کې يو تن د سړې هوا له امله مړ شوی دی.

د يادې ادارې له لوري په خپره شوې خبرپاڼه کې راغلي دي، تېره شپه د سيد اباد ولسوالۍ سلطان خېلو سيمې يو تن اوسېدونکی زربت چې ۴۰کلن دی د يخنۍ له امله مړ شوی دی.

خبرپاڼه کې راغلي، ياد کس غزني ولايت ته په سفر و چې خپل ژوند يې له لاسه ورکړی.

د افغانستان په بېلابېلو ولايتونو کې د سړې هوا له امله تر ۱۲۰ د ډېرو کسانو د مړينې راپورونه ورکول شوي دي.

د افغانستان پخوانی لوی څارنوال عبدالجبار ثابت وفات شوی دی

عبدالجبار ثابت

د راپورونو له‌مخې د افغانستان پخوانی لوی څارنوال عبدالجبار ثابت وفات شوی دی.

یو شمېر کورنیو رسنیو له هغې ډلې پژواک اژانس د ښاغلي ثابت د نږدې همکارانو په حواله تایید کړې چې هغه نن د پېښور په نارټ ویسټ روغتون کې ساه ورکړې.

عبدالجبار ثابت له ۲۰۰۵ تر ۲۰۰۹ کاله د افغانستان لوی څارنوال و.

ښاغلي ثابت په دې موده کې د یو شمېر لوړپوړو چارواکو پر ضد د فساد دوسیې په جدیت تعقیبولې او له همدې امله په یوه لانجمه څېره مشهوره و.

حنا رباني کهر د ضمير کابلوف سره د افغانستان پر وضعيت خبرې کړي

حنا رباني کهر، انځور - ارشيف

په بهرنیو چارو کې د پاکستان د دولت وزیرې حنارباني کهر د افغانستان لپاره د روسیې له ځانګړي استازي ضمیرکابلوف سره لیدلي.

په دې لیدنه کې پرون د افغانستان په شمول د سیمې د سولې او ثبات اړوند مسایل تر بحث لاندې نیول شوي.

د پاکستان د بهرنیو چارو وزارت د حنارباني کهر په حواله ویلي، چې یو باثباته افغانستان تل ورته مهم دی.

هغې زیاته کړې چې افغانستان د منځنۍ او جَنوبي اسیا تر منځ د یوه اقتصادي پله حیثیت لري او پاکستان هڅه کوي چې د سیمې د نورو هېوادونو په ملتیا دغه هدف ته ورسیږي.

د امريکا خاورې ته د ننوتلو پر مهال نيول شوی افغان پوځي ازاد شوی دی

يو افغان پوځي، انځور - ارشيف

هغه پخوانی افغان پوځي چې له مکسیکو د امریکا د متحدو ایالتونو خاورې ته د ننوتلو پر مهال نیول شوی او له امریکا یې د پناه غوښتنه کړې، ازاد شوی او له خپل ورور سره یو ځای شوی دی.

د اسوشیتید پريس اژانس د راپور له‌مخې عبدالواسع صافی چې څو میاشتې یې د امریکا د مهاجرت ادارې په توقیف کې تېرې کړي، د تکزاس د اډین له توقیف ځای څخه وروسته له هغې ازاد شو چې یوه قاضي د فدرالي څارنوالانو په غوښتنه پر هغه د مهاجرت جنايي تور لیرې کړ.

صافی چې د تېر جمهوري نظام د امنیتي ځواکونو د استخباراتو یو افسر و، د تېر۲۰۲۱ کال په اګسټ میاشت کې له افغانستانه د امریکایي ځواکونو له وتلو وروسته له دې ویرې له افغانستانه وتښتېد چې ګومان یې کاوه چې طالبان به ورڅخه غچ واخلي ځکه ده د ترهګرو په اړه امریکایي ځواکونو ته معلومات ورکول.

هغه د تېر۲۰۲۲ کال په دوبي کې له برازیله د مکسیکو ـ امریکا د پولې په نیت سفر پیل کړ چې د همدې کال په سپټمبر کې د امریکا د تکزاس ایالت ایګل بندرته نژدې ونیول شو.

هغه هیله درلوده چې له خپل ورور سره چې په هوسټن کې اوسي، یو ځای شي.

د عبدالواسع صافي ورور سمیع‌الله صافی چې څو کاله یې په افغانستان کې د امریکا د پوځ لپاره د ژباړونکي په توګه دنده ترسره کړې ویلي، چې خوښ دی چې د ورور پر ضد یې جنایي دوسیه لغوه شوه.

صالح: دولت مو هيڅکله د سولې خنډ نه و

امرالله صالح

د افغانستان د پرځول شوي جمهوري نظام لومړی مرستیال امرالله صالح وایي، د دوی دولت هیڅکله د سولې خنډ نه و.

ښاغلي صالح د چهارشنبې په ورځ پر خپله ټویټرپاڼه ولیکل، د امریکا د بهرنیو چارو د پخواني وزیر مایک پامپیو کتاب " له دروغو ډک دی."

پامپیو په خپل تازه چاپ شوي کتاب کې لیکلي، محمد اشرف غني فکر کاوه چې د طالبانو او امریکا هر ډول هوکړه له هغه نه واک اخلي.

په کتاب کې دغه راز راغلي چې پخواني ولسمشر محمد اشرف غني ټولې هڅې وکړې چې د امریکا او طالبانو خبرې کمزورې کړي.

د سولې لپاره د امریکا پخواني استازي زلمي خلیلزاد هم تېره شپه پر خپله ټویټرپاڼه ولیکل، غني د ده، مایک پامپیو او نورو امریکایي چارواکو خبرې له پامه غورځولې.

د افغانستان بانک پر سوداګريزو بانکونو د سل مليونه بانک‌نوټونو د وېشلو خبر ورکړ

د افغانستان بانک

د طالبانو تر کنټرول لاندې د افغانستان بانک وایي، سل ملیونه نوي بانک‌نوټونه یې سوداګریزو بانکونو ته وېشلي دي.

دغه بانک د چهارشنبې په ورځ (د جنورۍ په ۲۵مه) یوه خبرپاڼه کې ویلي، چې دغه شمېر نویو افغانیو کې د لسو، شلو، پنځوسو او سلو افغانیو بانک‌نوټونه شامل دي.

د افغانستان بانک په خبره، د نویو بانک‌نوټونو په بدل کې سل ملیونه زاړه بانک‌نوټونه له سوداګریزو بانکونو څخه ټول شوي دي.

په افغانستان کې په ځانګړې توګه د طالبانو له بیا واکمنۍ را وروسته د زړو بانک‌نوټونو په اړه تل شکایتونه کېږي.

افغانستان بانک د تېرې نومبر میاشتې په نهمه نېټه اعلان کړی و چې د یوه پولنډي شرکت له‌خوا د چاپ شویو لس ملیارده نویو افغانیو لومړنۍ جوپه کابل ته ور رسېدلې ده.

د طالبانو حکومت د سعودي له زندانونو د ۳۱۴ افغانانو د خوشې کېدو خبر ورکړی

سعودي کې خوشې شوي افغان بنديان، انځور - ارشيف

د طالبانو حکومت وایي، د سعودي په جدې ښار کې د دوی د جنرال کونسلګرۍ په هلو ځلو ۳۱۴ افغانان د سعودي له زندانونو ازاد شوي دي.

د طالبانو د بهرنیو چارو وزارت مرستیال ویاند حافظ ضیا احمد د چهارشنبې په ورځ پر خپله ټویټرپاڼه ولیکل، چې دغه افغانان د سعودي په عسیر، جیزان، الباحه، ابها، طائف تبوک او یو شمېر نورو زندانونو کې بندیان وو.

ضیا احمد زیاته کړې چې دوی هېواد ته د دغه شمېر افغانانو د راتګ زمینه هم برابره کړې ده، خو دا جزیات یې نه‌دي ورکړي چې څه وخت به خپلو کورنیو ته سپارل کېږي.

خبر کې دا هم نه‌دي ویل شوي چې، د بندي افغانانو جرمونه څه و، خو پخوا تر دې ګڼ شمېر افغانان په سعودي او نورو هېوادونو کې د سفر د قانوني اسنادو د نه درلودو له کبله بندیان شوي دي.

مجاهد د اوچا هغه راپور رد کړ چې د طالبانو حکومت به د اقتصادي ستونزو له امله سقوط شي

ذبيح‌الله مجاهد

د طالبانو حکومت د ملګرو ملتونو د بشري مرستو د همغږۍ ادارې یا (اوچا) هغه خبره رد کړې چې ګواکې د دوی حکومت د اقتصادي ستونزو له کبله سقوط کوي.

طالبانو په یوه اعلامیه کې ادعا کړې چې حکومت یې په ولس کې ژورې ریښې لري او دا د دوی په ټکو په بهرنیو مرستو متکي نظام نه‌دی.

په اعلامیه کې چې د طالبانو ویاند ذبیح‌الله مجاهد د چهارشنبې په ورځ رسنیو ته لېږلې راغلي، افغانستان کې به د اوږدې جګړې له کبله تر یوه وخته اقتصادي ستونزې وي، خو دوی ډاډه دي چې اقتصادي سرچینې به بېرته ژوندۍ کوي.

اوچا د جنورۍ په ۲۳مه نېټه خپل یوه راپور کې ویلي، چې افغانستان له یوه بې‌ساري بشري ناورین او په ورته وخت کې د سیستماتیک سقوط او انساني فاجعې له لوی واقعي خطر سره مخامخ دی.

د احصايي او معلوماتو ملي اداره: څه باندې نهه مليونه کسانو برښنايي تذکرې ترلاسه کړي دي

انځور - ارشيف

د طالبانو د حکومت د احصایې او معلوماتو ملي اداره وایي، په ټول افغانستان کې څه باندې نهه ملیونه کسانو برښنایي تذکرې ترلاسه کړي دي.

په دې ډله کې شپږ ملیونه د پخواني جمهوري نظام او شاوخوا درې ملیونه نورې یې د طالبانو له بیا واکمنۍ وروسته وېشل شوي دي.

د احصایې او معلوماتو د ملي ادارې ویاند محمد حلیم رفیع ازادي راډیو ته وویل: "زموږ پروسه چې ده، د افغانستان په ۳۴ ولایتونو کې ډېره په عادي شکل روانه ده، په ټول هېواد کې د الکترونیکي تذکرو د وېش ۶۹ مرکزونه فعال دي، کابل کې دیارلس فعال مرکزونه لرو او دې سره څنګ کې درې سیار مرکزونه هم لرو."

دغه تذکرې چې په بایومتریک ډول د شخص ټولې ځانګړنې په‌کې ثبتیږي، درې سوه افغانۍ بیه لري.

ازادي راډیو ته له یو شمېر جنوبي ولایتونو خلکو شکایت کړی چې ولایتونو کې يې برښنایي تذکرې نه‌شته یا په اسانه نه ورکول کېږي.

د احصایې ملي اداره دغه شکایت مني، خو وایي هغو سیمو کې دغه شکایتونه کېږي چې تر اوسه د دوی مرکزونه په‌کې نه‌دي فعال شوي.

امريکا له افغان – امريکايي پوهنتون سره ۲۷مليون ډالره مرسته کړې

د افغان امريکايي پوهنتون لوګو

د امریکا د نړیوالې پراختیا اداره، USAID وایي، له خپل اوږدمهاله شریک، د افغانستان له امریکایي پوهنتون سره یې د څلورو کلونو لپاره د ۲۷ ملیون ډالرو مرسته کړې ترڅو محصلان وکولای شي په افغانستان کې لوړو زده‌کړو ته لاس‌رسی ولري.

د افغانستان لپاره د USAID د دفتر مشر شان کالهان پرون سې‌شنبې په یوه ټویټ کې ویلي چېUSAID په ویاړ سره د افغان ښځينه او نارینه محصلینو ترڅنګ یو شان ولاړه ده ترڅو هغوی د خپلو زده کړو هیلې پوره کړي او زیاتوي، زده‌کړه یو حق دی.

یو شمېر افغانانو د امریکا د نړیوالې پراختیا ادارې د دغو مرستو هرکلی کړی خو ویلي یې دي، چې دا پوهنتون دې د ۱۵۰ زیاتو هغو محصلانو په ایستلو کې مرسته وکړي چې د ۲۰۲۱ کال په دوبي کې پر افغانستان د طالبانو له بیا واکمنېدو مخکې یې په افغانستان کې له دې پوهنتون سره انلاین زده‌کړې پیل کړې او اوس په دې هېواد کې پاتې دي.

د افغانستان د امریکایي پوهنتون یو شمېر محصلانو ته د قرغزستان په ګډون د یو شمېر نورو هېوادونو په امریکایي پوهنتونو کې د زده‌کړې امکانات برابر شوي دي.

نور راوښيه

XS
SM
MD
LG