د لاسرسۍ وړ لېنکونه

تازه خبر
شنبه ۲۳ لیندۍ ۱۳۹۸ کابل ۱۱:۲۱

نړۍ

پاکستان: امریکا د ډاکټر شکیل اپریدې په اړه زموږ د پریکړې درناوې وکړي

پاکستان له امریکا وغوښتل چې د هغه ډاکتر په اړه د دغه هېواد پرېکړې ته درناوی وکړي چې له سي ای اې سره یې د بن لادن په موندلو کې مرسته کړې وه.

پاکستان ډاکتر شکیل اپریدی په دېرش کاله بند محکوم کړ، د پاکستان د باندنیو چارو وزارت ویندوې معظم خان نن وویل:

(تر کومه ځایه چې د ښاغلي اپریدي له قضیې سره ارتباط لري، په دې اړه به د پاکستان له قوانینو سره سم او د پاکستان په محکمو کې پرېکړه کېږي.

فکر کوم موږ ته پکار ده، چې د یو بل قضايي سیستم او عدلي پروسو ته درناوی وکړو.»

د امریکا دفاع وزارت شکیل افریدي ته د ۳۳ کاله قید سزا غندلې، ویلي یې دي چې شکیل اپریدي د القاعده پرضد کار کاوه.

د ورځې تازه خبرونه دلته ولولئ

شمالي کوریا د سوهي اوږد واټن ویشتونکي توغندي ساحه کې بله ازموینه کړې

شمالي کوریا د شنبې په ورځ وویل، دوی د سوهې د اوږده واټن ویشتونکیو توغندیو په ساحه کې یوه بله "مهمه ازموینه" په "بریالیتوب" ترسره کړې چې ورسره به ددې هېواد "باوري ستراتیژیکه اټمي دفاع" نوره هم پیاوړې شي.

د شمالي کوریا رهبر کیم جانګ اون تېر کال د جنوبي کوریا له ولسمشر مون جې این سره په غونډه کې منلې وه چې پیونګ یانګ کې د سوهي د ازموینو تاسیسات د اعتماد د رامنځ ته کولو په خاطر بندوي.

د شمالي کوریا د دفاعي علومو د ملي اکاډمۍ ویاند ویلي، د جمعې په ورځ یې د سوهې د سټلایټ توغولو له ډګر یو بله مهمه بریالۍ ازموینه ترسره کړې.

په دې اعلان کې دا نه ده روښانه شوې چې د جمعې په ورځ دا ازموینه د څه شي وه.

څو ورځې مخکې شمالي کوریا ویلي و یو "ډیره مهمه ازموینه" یې په دې سیمه کې ترسره کړې. هغه مهال داسې شکونه وو چې په دې ازموینه کې به فضا ته توغیدونکو سپوږمکۍ یا د لرې واټن ویشتونکیو توغندیو لپاره له نوي انجن کار اخیستل شوی وي.

شمالي کوریا چې د ټرمپ سره د درې غونډو وروسته پر دې هېواد د بندیزونو له نه لرې کیدو نهیلې شوې، خبرداری یې ورکړی چې واشنګټن دې د کال تر پای ته رسېدو مخکې د بندیزونو په برخه کې له جوړجاړي سره رامخې ته شي.

پامپیو: که تهران عراق کې د واشنګټن ګټو ته زیان ورسوي قاطع ځواب به ورکړو

د امريکا متحدو ايالتونو د بهرنيو چارو وزير ايران ته خبردارى ورکړ، که په عراق کې د امريکا ګټو ته زيان واړوي، واشنګټن به يې په وړاندې”قاطع“ ځوابي اقدام وکړي.

مايک پامپيو وروسته له هغې دا خبره وکړه چې د عراقي او بهرنيو ځواکونو پوځي اډو ته څېرمه راکټي حملې وشوې.

پامپيو پرون په يوه اعلاميه کې د ايران نيابتي وسله وال تورن کړي چې پر هغو پوځي اډو يې ګڼې حمل کړي چې د عراق امنيتي ځواکونه له امريکايي او د نړيوال ايتلاف له پرسونل په ګډه سره دېره دي.

دوى د اسلامي دولت افراطي ډلې يا داعش په وړاندې په مبارزه کې ښکېل دي.

اعلاميه وايي د بغداد نړيوال هوايي ډګر په انګړ کې د عراق پر يوې ودانۍ د تېرې دوشنبې په حمله کې ٥ عراقي سرتېري ټپيان شول چې د دوو روغتيايي وضعيت نازک دى.

اعلاميه زياتوي، تېره چهارشنبه پر دغه هوايي ډګر بله راکټي حمله وشوه، په دې اړه نور جزئيات نه دي ورکړل شوي.

مايک پامپيو د ايران رهبرانو ته خبردارى ورکړى چې د دوى او د دوى د نيابتي وسله والو له خوا هر ډول حمله که امريکايانو يا د دوى متحدانو يا د امريکا ګټو ته زيان ورسوي، د امريکا له خوا به سخت ځواب ورکړل شي.

"د اوکراین او امریکا اړیکې به همداسې پیاوړې وي"

د اوکراين د صدراعظم مرستيال دیميترو کوليبا

د اروپا او اروپا-اتلانتيک لپاره او د اوکراين د صدراعظم مرستيال دیميترو کوليبا ویلي چې د کيف او واشنګټن ترمنځ اړيکې به هغسې پياوړې وي.

کوليبا پرون په واشنګټن کې يوه کنفرانس ته وويل، دا اړيکې به له دې سره سره پياوړي وي چې د ولسمشر ټرمپ د استيضاح په څېړنه کې اوکراين عمده رول لوبولى دى.

د اوکراين دغه چارواکي تېره اوونۍ د امريکا د کانګرس له غړو، د بهرنيو چارو وزارت او سپينې ماڼۍ له چارواکو سره هم کتلي دي.

هغه ويلي، په واشنګټن کې يې مهم لومړيتوب د "نورد سټريم ۲" په نوم د روسيې د طبيعي ګازو پر نل ليکه د امريکا له خوا د بنديزونو هڅول وو.

دیميترو کوليبا ويلي، "موږ له ناټو غواړو چې د اوکراين په وړاندې نوره لېوالتيا هم ولري."

د هغه په خبره اوکراين نه غواړي له دغه پوځي تړون څخه ملاتړ ترلاسه کړي، خو غواړي په دغه ماموريت کې برخه ولري.

واشنګټن او پیکنګ د تجارتي موافقې پر لومړۍ برخې موافقه وکړه

د امريکا متحده ايالتونه او چين وايي دوى د تجارتي موافقې پر "لومړۍ برخې" موافقه وکړه. د دوى په خبره په دې موافقه کې پر چينايي مالونو د امريکا د ګمرکي تعرفې کمېدل هم شامل دي.

د امريکا ولسمشر ډونالد ټرمپ پرون په يوه ټويټ کې ويلي چې له چين سره د موافقې پر لومړۍ لويې برخې موافقه وشوه.

دا په داسې حال کې ده چې د نړۍ د دغو دوو لويو اقتصاد لرونکو هېوادونو ترمنځ تجارتي کړکېچ شته.

بلخوا چينايي چارواکو ويلي چې دواړو هېوادونو لوى پرمختګونه کړي او د تجارت د موافقې پر ابتدايي متن سلا شوي دي.

ولسمشر ټرمپ ويلي چې امريکا تاييد کړې، سر له سبا يکشنبې به د چين پر هغو مالونو چې ارزښت يې ١٦٠ مليارد ډالرو ته رسېږي تعرفه ځنډوي او موجوده تعرفه به ٧ اعشاريه ٥ فيصدو ته راکموي.

ده ويلي امريکا به د چين پر هغو وارداتو چې ارزښت يې ٢٥٠ مليارد ډالرو ته رسېږي، اوسنۍ ٢٥ فيصده تعرفې برحاله ساتي، خو پر وارداتو به چې ارزښت يې ١٢٠ مليارد ډالرو ته رسېږي تعرفې نيمايي، يعنې ٧ اعشاريه پنځو ته راکموي.

د ترکیې بهرنیو چارو وزارت انقره کې د امریکا سفیر احضار کړ

د ترکیې د بهرنیو چارو وزارت په انقره کې د امریکا متحده ایالتونو سفیر د هغه پرېکړه لیک په تړاو احضار کړ چې تېره اوونۍ د امریکا په سنا مجلس کې تصویب شو.

په دغه پرېکړه لیک يوه پېړۍ مخکې د عثماني امپراتورۍ پر مهال د ارمنيانو ډله ييزه وژنه، نسل وژنه بلل شوې ده.

د ترکيې د بهرنيو چارو وزارت پرون وويل، د دغه وزارت مرستیال سيدات اونال د امريکا سفير ډېوېډ ساترفيلډ ته د ترکيې نارضايتي څرګنده کړه.

د امريکا مشرانو جرګې تېره پنج شنبه وړاندې شوى پرېکړه ليک د رايو په اتفاق تصويب کړ.

د امريکا د کانګرس استازو جرګې په اکتوبر مياشت کې دغه پرېکړه ليک ته ورته يو غيرواجب الاجرا سند په لوى اکثريت تاييد کړى و.

د ارمنستان صدراعظم نيکول پاشينيان دا يوه مهمه او تاريخي پرېکړه ګڼلې او د ارمنستان د نيمايي وګړو په استازيتوب يې خپله قدرداني ښوولې ده.

پاکستان کې د موټرو ټکر کې ۱۵ کسان وژل شوي

په پاکستان کې د تېلو له یوه ټانکر سره د یوه مسافروړونکي بس د ټکر په پېښه کې ۱۵ کسان مړه شوي دي.

چارواکي وايي چې پېښه د بلوچستان ایالت په قلعه سیف الله ولسوالۍ کې شوې ده.

د قلعه سیف الله ولسوال عتیق الرحمن د آزادۍ راډیو مشال څانګې ته وویل چې دا ډیزل وړونکی ټانکر په کان مهترزي سیمه کې له مسافروړونکي بس سره ټکر شو، چې په نتیجه کې یې اور واخیست.

ښاغلي عتیق الرحمن وویل، ډېر مړي تراوسه هم نه دي پېژندل شوي. د ملېشه پولیسو یوه چارواکي وویل چې په مړو کسانو کې ښځې او ماشومان هم شته.

چارواکي وايي، یوازې یوه مسافر د ټکر پرمهال ځان له بس څخه لاندې غورځولی او ژوندی پاتې شوی.

د امریکا سنا هغه پرېکړه تصویب کړ چې د ارمنانو ډله ییز وژنه جینوسایډ بولي

د امریکا سنا هغه پرېکړه لیک د رایو په اکثریت تصویب کړ چې یوه پېړۍ مخکې د عثماني امپراتورۍ له خوا د ارمنانو ډله ییزه وژنه پکې جینوسایډ یا قتل عام بلل شوې ده.

د نیوجرسي ديموکرات سناتور باب مینیندیس پرون پنجشنبې د دې پریکړه لیک له تصویبېدو وروسته وویل چې د دوی کار سم و او د امریکا سنا په دې کار سره وښوده چې د تاریخ د سمې تګلارې ملاتړ یې کړی دی.

د ارمنستان صدراعظم نیکول پاشینیان دا اقدام ستایلی دی او دا یې د حقیقت او عدالت بریا بللې ده. ښاغلي پاشینیان پر ټویټر لیکلي دي چې د نړۍ د ټولو ارمنانو په استازیتوب د امریکا د سنا مننه او ستاینه کوي.

د کانګرس سلاکارانو ویلي چې سپینې ماڼۍ نه غوښتل دا پرېکړه لیک تصویب شي، ځکه د سوریې په شمال کې د ترکیې د پوځ د عملیاتو، له روسیې څخه د اس ۴۰۰ توغندیو د پېرلو چې ښايي د امریکا د بندیزونو باعث شي او یو لړ نورو حساسو مسایلو په اړه د واشنګټن او انقرې ترمنځ خبرې روانې دي.

د امریکا د کانګرس د استازو جرګې چې ډیموکراتان پکې اکثریت دي د اکتوبر میاشتې په وروستیو کې د ۱۱ مخالفو رایو پروړاندې په ۴۰۵ موافقو رایو دا پرېکړه لیک تصویب کړی و.

ارمنان وايي له لومړۍ نړیوالې جګړې سمدستي وروسته عثماني ترکیې د یونیم میلیون په شاوخوا کې عیسوي مذهبي ارمنان یا ووژل یا یې تبعید کړل خو د ناټو غړې ترکیه د قتل عام له اصطلاح سره مخالفت کوي.

انقره وايي چې دا خلک د ارمنانو د ډله ییزې وژنې لپاره د عثماني امپراتورۍ د اقدام په ترڅ کې، نه بلکې د کورنیو اختلافونو په نتیجه کې وژل شوي دي. ترکیه د وژل شويو کسانو شمېر هم له شوې ادعا څخه ډېر کم بولي.

عراق کې دوو ځانمرګو بریدونو د شیعه مشر مقتدی صدر ۱۱ وسله وال ووژل

د عراق د شیعه مشر مقتدی صدر پر یوه قرارګاه په دوو انتحاري حملو کې د نوموړي یوولس وسله وال ووژل شول.

د عراق پوځ په یوه خبرپاڼه کې چې تېره شپه خپره شوه ویلي چې لومړۍ حمله د سمارا ښار په سل کیلومترۍ کې، ثرثار سمندرګي ته نژدې په هغه سیمه کې وشوه چې د اوږدې مودې لپاره د سني جهادي ډلې داعش مرکز پکې و.

د عراق پوځ وايي په دې انتحاري حمله کې د مقتدی صدر اوه تنه وسله وال وژل شوي او ۳ تنه نور ټپیان دي.

د عراق د پوځ خبرپاڼه وايي چې دوهم برید هم تېر ماښام ناوخته د لومړي برید په ځای کې وشو چې د مقتدی صدر د وسله والې ډلې څلور کسان پکې ووژل شول. د دې حملو مسوولیت تراوسه کومې ډلې نه دی منلی.

عراق په ۲۰۱۷ کال کې اعلان وکړ چې اسلامي دولت ډلې په دې هېواد کې ماتې خوړلې او له منځه تللې ده خو د دې ډلې وسله وال لا هم په بېلابېلو سیمو کې حملو ته دوام ورکوي.

لیبیا کې د حکومت مخالف جنرال د طرابلس نیولو لپاره د جګړې خبره کړې

د لیبیا د ملي پوځ په نوم د وسله والې ډلې مشر اعلان کړی چې د دې هېواد د پلازمېنې طرابلس د نیولو لپاره به قاطعانه جګړه پیل کړي.

طرابلس اوس مهال د هغه حکومت په لاس کې دی چې نړیوالې ټولنې په رسمیت پېژندلی دی، خو جنرال خلیفه هفتر ویلي دي چې غواړي تر خپلې ولکې لاندې یې راولي.

خلیفه هفتر په تېره اپریل میاشت کې خپل ځواکونه د طرابلس د نیولو لپاره چمتو کړل، خو یوازې ښار یې محاصره کړ او په دې ونه توانېد چې د فایز السراج په مشرۍ د ملګرو ملتونو له خوا په رسمیت پېژندل شوی حکومت نسکور کړي.

د هغه مهال په جګړو کې شاوخوا ۱۰۰۰ کسان چې اکثره جنګیالی وو، ووژل شول.

هفتر له اپریل وروسته څو ځلې اعلان وکړ چې د طرابلس د نیولو په مقصد پوځي عملیات پیلوي خو هېڅ پرمختګ یې نه دی کړی.

لیبیا له ۲۰۱۵ کال راهیسې د دوو حکومتونو ترمنځ وېشل شوې چې یو یې د هېواد په ختیځ او بل په لویدیځ کې دی. د هفتر په مشرۍ د لیبیا له ملي پوځ سره روسیه، فرانسه، مصر، متحده عربي امارات سعودي عربستان او یوشمیر عربي هېوادونه مرسته کوي خو ترکیه، قطر او ایټالیا د سراج د حکومت ملاتړ کوي.

د بریتانیا انتخابات: حاکم محافظه کار ګوند د پارلمان اکثریت ګټلی

دا به ددې هېواد صدراعظم بوریس جانسن ته ددې قوي واک ورکړي چې له اروپايي ټولنې د وتلو برخه کې خپله ژمنه عملي کړي.

په بریتانیا کې د پارلماني انتخاباتو رسمي پایلې ښيي چې له اروپايي ټولنې څخه د بریتاینا د وتلو پلوي محافظه کار ګوند د دې هېواد په پارلمان کې د پام وړ څوکۍ ګټلي دي.

دا به ددې هېواد صدراعظم بوریس جانسن ته ددې قوي واک ورکړي چې له اروپايي ټولنې د وتلو برخه کې خپله ژمنه عملي کړي.

د بوریس جانسن ګوند تر اوسه پورې د بریتانیا د پارلمان له ۶۵۰ څوکیو څخه ۳۴۶ ګټلې دي چې نوموړي ته په پارلمان کې اکثریت ورکوي.

دا چې د رایو شمېرل دوام لري ددې خبر د لیکلو ترمهاله د ۲۵ څوکیو برخلیک نه دی اعلان شوی چې کېدای شي ورسره دا تفاوت نور هم زیات شي.

د انګلستان کارګر ګوند چې له اروپايي ټولنې څخه د بریتانیا د وتلو پر اصولو د بیا خبرو او بیا ځلي ټولپوښتنې پلوي دی، تر اوسه یې ۲۰۲ څوکۍ خپلې کړي دي.

د سکاټلند ملي ګوند ته تر اوسه په دې انتخاباتو کې ۴۶ څوکۍ حساب شوي او لیبرال ډیموکراټانو ۹ څوکۍ ګټلي دی.

د لندن پخوانی ښاروال بوریس جانسن چې نیویارک کې زیږیدلی او د تریزا می حکومت کې د بهرنیو چارو وزیر هم پاتې شوی، په دې ژمنه کمپاین کاوه چې له اروپايې ټولنې د بریتانیا وتل یا بریګزیت به عملي کوي.

له اروپايي ټولنې د بریتانیا د وتلو لپاره د جنورۍ ۳۱ مه ضرب الاجل ټاکل شوی دی.

روسیې په متقابل اقدام کې د جرمني دوو ډیپلوماتانو ته د وتلو امر کړی

د روسیې د بهرنیو چارو وزارت د جرمني سفیر ګیزا اندریاس وان ګیر احضار کړی و.

روسیې په یوه متقابل اقدام سره اعلان وکړ چې دوه جرمني ډیپلوماتان به وباسي.

د روسیې د بهرنیو چارو وزارت د جرمني سفیر ګیزا اندریاس وان ګیر احضار کړی او ورته یې ویلي چې دا دوه ډیپلوماتان اووه ورځې وخت لري چې له دغه هېواده ووځي.

جرمني تېره اوونۍ دوه روسي ډیپلوماتان وروسته له هغه وایستل چې د ډسمبر په څلورمه د فدرال څارنوال دفتر وویل، کافي دلایل شته چې په برلین کې د یوه ۴۰ کلن سړي زلیم خان خانګوشویلي د وژلو امر یا د روسیې حکومت او یا هم د چیچنیا جمهوریت ادارې ورکړی دی.

دا کس د اګست میاشتې په پای کې په برلین کې په یوه پارک کې په ډزو ویشتل شوی وو.

دی پخوا د چچنیايي جلاغوښتونکو په لیکو کې جنګېدلی وو او وروسته يې په ګرجستان کې پناه اخیستې وه. ښاغلی خانګوشويلي څو کاله وروسته له خپلې کورنۍ سره جرمني ته د پناه غوښتلو لپاره تللی وو.

ایران پر خپلې یوې دولتي ادارې انټرنټي حمله شنډه کړې

ایراني رسنیو دا خبر د دې هېواد د مخابراتو وزیر محمد جواد آذري جهرمي له قوله ورکړی دی.

ایران وایي، پر یوې دولتي الکترونیکي ادارې یې سایبري یا انټرنټي حمله شنډه کړې ده.

ایراني رسنیو دا خبر د دې هېواد د مخابراتو وزیر محمد جواد آذري جهرمي له قوله ورکړی دی.

هغه ویلي، دغه سایبري حمله په لوړه کچه تنظیم شوې وه، خو بیا هم چارواکي په دې اړه پلټنه کوي چې دقیقه اندازه‌یې معلومه کړي.

ښاغلي جهرمي هغه دولتي اداره نه‌ده په ډاګه کړې چې دغه حمله پرې شوې او نه‌یې هم د دې حملې تور په کوم هېواد پورې کړی، خو ژمنه‌یې کړې چې په دې اړه به وروسته یو راپور خپور کړي.

دا نه‌ده روښانه چې ایا دغه وروستۍ پېښه د متحده ایالاتو او ایران ترمنځ د سایبري حملو د روانې لړۍ یوه برخه ده او که څنګه؟

تهران له دې مخکې د جون په ۲۴مه هم د ایران پر ځینو اهدافو د سایبري حملو د شنډولو ادعا کړې وه.

فرانسې او نیجر د "جي پنځه" سرمشریزه د راتلونکي کال لومړیو ته وځنډوله

د فرانسې او نیجر مشرانو نن موافقه وکړه چې د "جي پنځه" په نوم ډلې سرمشریزه به د ۲۰۲۰ کال لومړیو ته وځنډوي.

ټاکل شوې وه د افریقا د وچې د ساحل سیمې پنځو هېوادونو بورکینافاسو، موریتانیا، مالي، چاد او نیجر د مشرانو دغه سرمشریزه روانه میاشت په فرانسه کې جوړه شي.

د فرانسې د ولسمشر امانوئل مکرون دفتر وویل، دغه وړاندیز د نیجر له ولسمشر سره په ګډه شوی دی.

په دې اړه پرېکړه وروسته له هغې کېږي چې پرون له مالي پولې سره نږدې د نیجر پر یوې پوځي اډې په حمله کې شااوخوا ۷۱ سرتېري ووژل شول.

د نیجر دفاع وزارت په یوه بیان کې ویلي چې په دغه حمله کې یو زیات شمېر ترورېستان له‌منځه وړل شوي او د پوځ ۱۲ تنه هم ټپیان شوي او یو شمېر نور لادرکه دي.

د دغې حملې مسئولیت تر اوسه کومې ډلې نه‌دی اخیستی، خو له اسلامي دولت ډلې (داعش) او نورو سخت دریځو ډلو سره تړلي وسله‌وال اکثره وختونه د دا ډول حملو مسئولیت اخلي.

فرانسې وروسته له هغې چې په ۲۰۱۲ کال قومي توریګ یاغیانو او جهادیانو د مالي د شمال دوه درېیمه برخه خاوره لاندې کړه، جنوب پلو ته د دې ډلو د پراختیا د مخنیوي لپاره په سیمه کې مداخله وکړه.

نن بریتانیا کې خلک په عمومي انتخاباتو کې ګډون کوي

په لندن کې د رأی ورکونې یو مرکز

نن بریتانویان په عمومي انتخاباتو کې ګډون کوي چې نتیجه به‌یې د برېکزېټ یا له اروپایي ټولنې د بریتانیا وتلو لپاره برخلیک ټاکونکې وي.

د رأی ورکولو مرکزونه د سهار په اوو بجو پرانیستل کېږي او د شپې تر ۱۰ بجو به د رأی ورکوونکو پر مخ پرانیستي وي.

کاندیدان په بریتانیا کې د ۶۵۰ انتخاباتي حوزو له لارې هڅه کوي چې مرکزي پارلمان ته لاره ومومي.

په بریتانیا کې د نظرپوښتنې شپږو مؤسسو روانه میاشت وموندله چې خلک تر ډېره د صدراعظم بورېس جانسون محافظه‌کار ګوند چې غواړي له اروپایي ټولنې بریتانیا وباسي، له نورو غوره بولي.

په دوهم ځای کې د جرمي کوربین په مشرۍ کارګر ګوند دی چې تر اوسه‌یې له اروپایي ټولنې د بریتانیا د وتلو لپاره د شرطونو موافقه څو ځلې ځنډولې ده.

خو د دغو نظر شمېرنو له مخې ښایي دغه دواړه لوی ګوندونه ونه‌شي کولای چې د پارلمان لږ تر لږه ۳۲۶ څوکۍ چې په یوازې سر د حکومت جوړولو لپاره ورته اړتیا ده، خپلې کړي.

خو په هر صورت هر هغه ګوند چې ډېرې رأیې ګټي هغه به دې ته اړوي چې له کوچنیو ګوندونو سره یو ائتلافي حکومت جوړ کړي.

د ترسره شویو نظرپوښتنو له مخې پر برېکزېټ سربېره د رأی ورکوونکو لپاره د روغتیایي خدمتونو، جنایي جرمونو، اقتصاد او د مهاجرت موضوعات هم مهم دي.

د ادبیاتو نوبل جایزې پر ګټونکي اتریشي لیکوال انتقادونه

د بالکان په سیمه کې زیات وګړي په دې باور دي چې ۷۷ کلن هندکې د هغو جنګي جنایتونو په اړه چې صربانو په سیمه کې د کورنۍ جګړې پر مهال کړي وو، د عفوې دريځ غوره کړی و.

د نوبل د ادبیاتو د جایزې د ګټونکي اتریشي لیکوال، پیتر هندکې په وړاندې د اعتراض په ترڅ کې بوسنیا او هرزګوېنا او کوسوو ویلي چې نه‌غواړي هغه دې هېوادونو ته ورشي.

د بالکان په سیمه کې زیات وګړي په دې باور دي چې ۷۷ کلن هندکې د هغو جنګي جنایتونو په اړه چې صربانو په سیمه کې د کورنۍ جګړې پر مهال کړي وو، د عفوې دريځ غوره کړی و.

د سرایوو کورني پارلمان پرون یوه لایحه تصویب کړه چې پر اساس‌یې هندکې غیر مطلوب وګړی معرفي شوی.

د بوسنیا د پارلمان غړو همداراز د سویډن د نوبل اکاډمي غندلې چې سږ کال‌یې د ادبیاتو جایزه هندکې ته چې په بوسنیا کې د مسلمانانو له ډله‌ییزې وژنې انکار کوي، ورکړې ده.

نور راوښيه

XS
SM
MD
LG