د جرمني صدراعظم له ازبکستان سره یو تړون لاسلیک کړ، چې له‌مخې به یې د جرمني د اقتصادي ملاتړ لپاره د منځنۍ اسیا له هېوادونو څخه جرمني ته د مسلکي کارګرانو د تګ او له جرمني د ځینو کډوالو د ایستلو زمینه برابره شي.

رویټرز خبري اژانس راپور ورکړی چې د جرمني صدراعظم اولاف شولڅ پرون د ازبکستان له ولسمشر شوکت میرضایف سره په سرقند کې له کتنې وروسته ویلي، دوی د جرمني د اقتصادي ودې لپاره د خورا با استعداده کارګرانو مهاجرت ته اړتیا لري.

شولڅ د نورو جزیاتو له ورکولو پرته ویلي، دواړو هېوادونو د هغو کسانو په باب پر ساده او بې طرازلعملو چلندونو موافقه کړې، چې باید د هغوی اصلي هېوادونو ته ستانه کړای شي.

هغه د خبریالانو پوښتنو ته ځواب ور نه‌کړ چې ایا له ازبکستان سره تړون د هغو افغانانو له شړلو سره ارتباط لري که نه، چې په جرمونو تورن دي؟

جرمني د اګست میاشتې پر ۳۰مه په جرمنو د تورنو افغان کډوالو د اخراج لړۍ بیا پیل کړه او د لومړي ځل لپاره یې ۲۸ افغان کډوال چې په بېلابېلو جرمونو تورن وو، کابل ته ستانه کړل.

د جرمني د کورنیو چارو وزیرې نانسي فایزر، چې له شولڅ سره ملګرې وه او په سمرقند کې یې تړون لاسلیک کړ، ویلي چې افغانستان ته د نورو الوتنو په پلان بوخته ده، څو هغه افغانان چې په جدي جرمونو تورن دي، بېرته افغانستان ته اخراج کړي.

د افغانستان کرکټ بورډ ادارې د کورني کرکټ په چوکاټ کې دا ځل څلور ورځنۍ (فرسټ کلاس) سیالۍ پیل شوې.

د کرکټ بورډ په خبر کې ویل شوي دي چې، یادې سیالۍ نن دوشنبه د سپټمبر په ۱۶مه نېټه د ننګرهار په دوو لوبغالو کې د ګڼو ملي، الف، نوولس کلنو او کورني کرکټ لوبغاړو په ګډون پيل شوي دي.

په‌دې سیالیو کې څلور لوبډلې ګډون لري، چې هندوکش سټرایکرز، ماهیپر ستوري، میوند اتلان او پامیر لیجینډز نومیږي.

یادې سیالۍ به د اکټوبر میاشتې تر ۲۲مې نېټې پورې روانې وي.

د افغانستان د خبریالانو د ملاتړ سازمان په پاکستان کې پر یوه پخواني خبریال د وسله‌والې حملې په باب سخته اندېښنه وښوده.

دغه سازمان پرون یک‌شنبه په یوه اعلامیه کې ویلي: "دوی په پاکستان کې د مېشتو افغان خبریالانو د وضعیت په تړاو ژوره اندېښنه څرګندوي."

په راپورونو کې ویل شوي، په پاکستان کې ناپېژاندو وسله‌والو د اریانانیوز خصوصي ټلوېزیون مخکېنی خبریال عبدالعزیز سخي‌زاده په یوه حمله کې ټپي کړی دی.

د افغانستان د خبریالانو د ملاتړ سازمان لیکلي: "هغه افغان خبریالان چې درېیمو هېوادونو ته د خپل ژوند د خوندیتوب په موخه تللي؛ خو له بده‌مرغه په‌دې وروستیو کې ان هلته هم د ژوند له خوندیتوبه هم نه‌دي برخمن."

تر دې مخکې د اګست پر ۲۵مه پر یوه بل پخواني خبریال نصیر احمد بهروز هم په اسلام‌اباد کې حمله شوې وه او ازادي راډیو خبریال احمد هنایش هم د اپرېل پر درېیمه په اسلام‌اباد کې د نامعلومو وسله‌والو په حمله کې ټپي شوی و.

د اسلامي دولت افراطي ډلې یا داعش نن د هغې بمي حملې مسوولیت ومانه چې، په نتیجه کې یې د پاکستان په بلوچستان ایالت کې دوه پولیس چارواکي وژل شوي دي.

تېره شنبه د بلوچستان ایالت مرکز کوټې ته نږدې په کچلاغ کې د پولیسو پر یوه موټر د منفجره وسیلې په چاودنه کې د پولیسو دوه چارواکي ووژل شول.

پاکستاني چارواکي وايي، په حمله کې دوه نور افسران ټپیان شوي دي.

شنونکي وايي، په بلوچستان کې چې په تېلو او ګازو غني ایالت دی، د اسلامي دولت ډلې او هغو بېلتون‌پالو ترمنځ چې له کلونو پر امنیتي ځواکونو او ملکیانو حملې کوي، همغږي زیاته شوې ده.

یو راپور وايي، د روان میلادي کال په لومړۍ نیمايي کې د تېر کال د همدې مودې پر تله په اروپايي ټولنه، ناروې او سویس کې د پناه غوښتونکو شمېر یو څه راکم شوی دی.

د هغو شمېرو له‌مخې چې نن دوشنبه خپرې شوي، د روان میلادي کال په لومړیو شپږو میاشتو کې بیا هم د پناه غوښتونکو شمېر پنځه سوه زره او ۱۳زرو ته رسېږي.

د پناه غوښتنې لپاره د اروپايي ټولنې بنسټ چې په مالتا کې دی، ویلي د روان ۲۰۲۴م کال په لومړۍ نیمايي کې د تېر ۲۰۲۳م کال د همدې مودې پرتله په اروپايي ټولنه، ناروې او سویس کې، چې د اروپايي ټولنې غړي هېوادونه نه‌دي، د پناه غوښتونکو شمېر ۶۰۰۰ کم و.

د پناه غوښتونکې زیات اسناد په جرمني کې ثبت شوي، چې زیات پناه غوښتونکي د افغانستان په ګډون د ۲۹ هېوادونو دي.

د کډوالو په چارو کې د ملګروملتونو لویه کمېشنري وايي، دوی افغانستان کې ګڼو ښځو ته د غالۍ اوبدلو مهارت ورښوولی چې دغه مېرمنې اوس کولی شي د خپلو کورنیو نفقه برابره کړي.

دغې ادارې نن پر خپله ايکس‌پاڼه لیکلي، یوه له دغو لسو مېرمنو عاقله ده، چې د ځینو همکارو بنسټونو په همکارۍ یې د غالۍ اوبدلو په ۶ میاشتنۍ پروژه کې برخه اخیستې وه او په‌دې پروژه کې دوی ته د تجارت پیل ور وښوول شو.

په تېرو درېیو کلونو کې پر افغانستان د ولکې له بیا ټینګولو وروسته طالبانو په اکثرو دولتي ادارو، په ملي او نړیوالو مؤسسو او د ملګروملتونو په ادارو کې د ښځو کار منع کړ، چې دې کار هغه کورنۍ سختې اغېزمنې کړې، چې سرپرستي یې د ښځو له‌خوا کېږي.

د هواپېژندنې ریاست نن هم د افغانستان په ۱۷ولایتونونو کې د تېز باران او تالندې برېښنا اټکل کړی دی.

د طالبانو د ټرانسپورټ او هوايي چلن وزارت د هواپېژندنې ریاست نن په یوه خبرداري کې ویلي، د سالنګونو په ګډون به په بدخشان، تخار، نورستان، کونړ، لغمان، کاپیسا، پنجشېر، بغلان، پروان، ننګرهار، کابل، لوګر، پکتیا، خوست، میدان وردګ، بامیان او غور ولایتونو کې د باران اندازه له ۱۵ تر ۳۰ ملي مترو پورې وي.

وړاندې په خبرداري کې ویل شوي، چې په شمال ختیځو، شمالي، لوېدیځو، جنوبي، ختیځو او مرکزي ولایتونو کې بیا د تېزو بادونو، خاورو او دوړو د پېښېدو اټکل هم شوی، چې د سالنګونو په ګډون به په بېلابېلو سیمو کې د بادونو سرعت په یوه ساعت کې له ۵۰ تر ۷۰ کیلومترو پورې وي.

د نجونو د تعلیم فعاله او د نوبل د سولې جایزې ګټونکې ملاله یوسفزۍ وایي، د افغان نجونو د تعلیم د حق غوښتنې ته دوام ورکوي.

نوموړې تېره شپه پر خپله ایکس پاڼه/ پخواني ټویټر یوه ویډیویي پيغام کې ویلي چې، دا او نورې فعالانې به د افغان نجونو غږ بدرګه کوي او طالبانو سره به دا حساب کتاب کوي چې ولې يې د نجونو ښونځي تړلي دي.

ملالې یوسفزۍ دغه پيغام د افغان نجونو د ښونځیو د بندېدو د درېیمې کلیزې په مناسبت خپور کړی دی.

طالبانو د ۲۰۲۱ کال د اګست په پنځلسمه واک ته له رسېدو وروسته تر شپږم ټولګي پورته د نجونو ښونځي تر دویم اعلان پورې بند کړل، خو د درې کلونو په تېرېدو لا هم بند پاتې دي.

پر ښونځیو سربېره د نجونو پوهنتونونه هم په افغانستان کې بند شوي، چې له کبله یې د طالبانو حکومت تر کلکو نیوکو لاندې دی.

د امریکا د فدرالي‌ څېړنو اداره وایي، مخکېنی ولسمشر او راتلونکو ټاکنو ته د جمهوري غوښتونکو نوماند ډونالډ ټرمپ د ترور له یوې هڅې روغ وتلی دی.

رویټرز خبري اژانس د دغې ادارې په حواله لیکلي، د نوموړي د ترور دغه هڅه پرون د سپتمبر په پنځلسمه په فلوریدا کې د ټرمپ د ګلف کورس نه بهر شوې ده.

که څه هم خبر کې د ټرمپ د وژلو د هڅې نور جزیات نه‌شته، خو رویټرز د پولیسو د سرچینو په حواله ویلي چې، له کورسه بهر ډزې شوې دي.

د ډونالډ ټرمپ د ټاکنیز کمپاین مسوولينو هم ویلي، نوموړی هغه ته نژدې له شویو ډزو روغ وتلی، خو جزیات یې نه‌دي ورکړي.

سي‌ان‌ان ټلوېزیون د فلوریدا د ځایي چارواکو په حواله ویلي، مشکوک برید کوونکی نیول شوی دی.

د تېرې جولای میاشتې په نیمایي کې پر ښاغلي ټرمپ په پنسلوانیا کې د یوه ټاکنیز کمپاین پر مهال ډزې وشوې، چې پایله کې يې د هغه غوږ ټپي شو.

د اسراییل پوځ تایید کړې چې، په غزه باندې تېر ډسمبر د دوی په یوه هوایي حمله کې په ډېر احتمال درې تنه اسراییلي یرغمل وژل شوي دي.

د اسراییلو د پوځ استخباراتو د درې وژل شویو یرغملو په اړه د خپلو لس میاشتنیو څېړنو پایلې خپرې کړې.

نیک بایرز، رون شرمن او الیا تولدانو هغه دری اسرایلیان دي چې د اسراییل په هوايي برید کې وژل شوي.

د اسراییل پوځ ویلي په غزه کې یې د حماس د پوځي ډلې د یوه مشر احمد غندور د وژنې په هدف هوايي برید کړی وو، خو د درې یرغملو اسرایلیانو له ځایه نه وو خبر.