د لاسرسۍ وړ لېنکونه

تازه خبر
جمعه ۱۳ چنګاښ ۱۳۹۹ کابل ۰۹:۵۵

خبرونه

د نړۍ مشرانو له سوريې وغوښتل چې د اوربند په ټينګښت کې مرسته وکړي

د نړۍ مشرانو له سوريې وغوښتل چې د ملګرو ملتو په ملاتړ د سولې پلان بشپړ تطبیق کړي او سر له پنجشنبې پیل شوی اوربند مات نه کړي.

د امریکا ولسمشر بارک اوباما او د فرانسې ولسمشر نیکولاس سارکوزي په ټیلفون خبرې وکړې او له سوریې یې وغوښتل چې د کوفي انان د سولې شپږ مادو ته باید غاړه کیږدي.

په ملګرو ملتو کې د روسیې سفیر ویتالي چورکین وویل، ماسکو هم غواړي چې اوربند ټینګ شي. په ملګرو ملتو کې د چین استازي لي باودونګ هم په سوریې کې د سولې د پلان بشپړ ملاتړ وکړ او ویې ویل، د مشق باید له ګڼ میشتو ښارونو خپل ځواکونه وباسي.

بل لوري ته د امریکا د بهرنیو چارو وزیرې هیلري کلنټن په سوریې کې اوربند لومړی ګام یاد کړ او ویې ویل چې د بشار الاسد رژیم باید سیاسي انتقال ته مخه کړي.

په جینوا کې د ملګرو ملتو سرمنشي بان کي مون له اوربنده وروسته وویل، داسې ښکارې چې اوربند روان دی خو ده د سوریې پر حکومت غږ وکړ چې خپله ژمنه د اوربند په برخه کې پرځای کړي:

« تر دې شیبې پورې، داسې ښکارې چې وضعیت ارامه دی. موږ حالات له ډير نژدې څارو. نړۍ یې ویني، همداراز شکمنې سترګې یې څارې، ځکه چې مخکې ډيرې ژمنې د سوریې حکومت کړې وې چې لاهم نه دې پرځای شوې»

دمشق وویل چې د سولې د پلان بشپړ ملاتړ کوي خو مخالف یاغیان یې تورن کړل چې له اوربنده سرغړونه کوي.

د ورځې تازه خبرونه دلته ولولئ

ترکیه کې د جمال خاشقجي د وژنې په تور د ۲۰ کسانو محاکمه پیل شوه

جمال خاشقجي

نن (د جولای درېیمه) د سعودي عربستان د شلو چارواکو چې ویل کېږي د خبریال جمال خاشقجي په وژلو کې يې لاس درلود، محاکمه په ترکیه کې پیل شوه.

خاشقجي له واشنګټن پوسټ سره کار کاوه او د سعودي عربستان د حکومت منتقد و.

خاشقجي د سعودي عربستان د ولیعهد محمد بن سلمان له جدي منتقدینو څخه و چې د ۲۰۱۸ میلادي کال په اکټوبر میاشت کې په استانبول کې د سعودي عربستان په کونسلګرۍ کې ووژل شو.

د سعودي عربستان چارواکو ادعا وکړه چې یوې ډلې پر خپل سر خاشقجي وژلی او دولت ورته اجازه نه ده ورکړې.

د استانبول څارنوالۍ د سعودي عربستان د استخباراتي ادارې پخوانی رئیس احمد العسیري او د سلطنتي محکمې یو پخوانی سلاکار سعود القحطاني د دې قتل په پلانولو تورن کړي دي.

د څارنوالي په وینا د خاشقجي په خفه کولو کې ۱۸ نورو کسانو هم لاس درلود.

خاشقجي وروستی ځل هغه مهال ولیدل شو چې په استانبول کې د اسنادو لپاره د سعودي عربستان کونسلګرۍ ته ننوتی و.

ترکي چارواکي وايي، د ده مړی ټوټه شوی او له ودانۍ دباندې وړل شوی و خو پاتې شوني يې هېڅ ځای ونه موندل شول.

د پاکستان د بهرنیو چارو وزیر په کرونا ویروس اخته شوی

شاه محمود قریشي

د پاکستان د بهرنیو چارو وزیر په کرونا ویروس اخته شوی دی.

شاه محمود قریشي پر خپله ټويټر پاڼه لیکلي چې نن غرمه یې تبه شوه او ځان یې په کور کې قرنطین کړ.

ده زیاته کړې د کوویډ۱۹ لپاره معاینات وکړل چې نتیجه یې مثبته وه.

قریشي زیاته کړې چې ضعیفه احساس نه کوي او له کوره به خپلې دندې ته دوام ورکړي.

په پاکستان کې تر دوه لکه او یووشت زره زیات کسان په کوویډ ۱۹ اخته شوي دي او څلور زره پنځه سوه او یوپنځوس کسان په دې ناروغي مړه شوي دي.

دا په داسي حال کې ده چې شاه محمود قریشي پرون د جولای په دوهمه نېټه د افغانستان د سولې لپاره د امریکا له ځانګړي استازي زلمي خلیلزاد سره په اسلام اباد کې د افغانستان د سولې پر بهیر ولیدل.

د امریکا بهرنیو چارو وزارت د جون پر ۲۸مه په یوه خپاره کړي بیان کې ویلي وو چې خلیلزاد د جون پر ۲۸مه د دوحې، تاشکند او اسلام اباد سفر پېل کړ.

امنیتي چارواکي: بغلان کې ماین چاودنې ۲ پولیس وژلي

ارشیف

د بغلان ولایت په نهرین ولسوالي کې د سړک غاړې ته د ماین چاودنې په نتيجه کې ۲ پولیس وژل شوي او ۵ نور ټپیان شوي دي.

د بغلان یوه امنیتي چارواکي چې نه یې غوښتل نوم یې خپور شي، ازادي راډيو ته وویل چې دا پېښه نن (د جولای په ۳یمه) داسې مهال رامنځته شوه چې د پولیسو موټر پر ماین وخوت.

د بغلان د پولیسو ویاند واما جاوېد تائيدوي چې په دې پېښه کې پولیسو ته تلفات اوښتي خو د شمېر په اړه یې څه نه دي ویلي.

نهرین ولسوالي د بغلان په ختيځ کې موقعیت لري او د دې ولایت له ناامنو ولسوالیو ګڼل کېږي.

ترکیه کې د بندیزونو نرمېدل، د ودونو سالونونه بېرته پرانیستل شول

ارشیف

په ترکیه کې، چې د کرونا ویروس د خپرېدو له کبله له ډېرې مودې راهیسې د ودونو سالونونه تړل شوي وو، بېرته پرانیستل شول.

سیردال امان دېرش کلن دی چې د چارشنبې په ورځ یې په دیاربکر کې واده وو.

هغه وویل: "موږ په دې بدبختۍ کې د نېکمرغۍ احساس کوو چې په لومړۍ ورځ مو د واده سالون ونیولای شوای."

د واده د سالونونو پرانیستنه روانه اوونۍ د ترکيې له هغو اقداماتو یو دی چې د کرونا ویروس په خاطر يې د لګېدلو بندیزونو د لیرې کولو په برخه کې کړي دي.

د جون میاشتې په پیل کې ترکیې رستورانونه او کافۍ پرانیستې او پر سفر بندیز يې روانه اوونۍ پای ته ورساوه.

په ترکیه کې د کوویډ۹ دوه لکه مثبتې پيښې ثبت شوي او پنځه زره یو سل او پنځوس کسان له دې ویروسه مړه شوي دي.

چارواکي: جلال اباد کې د اور لګېدنې له امله ۱۸ موټر سوځېدلي

د اورلګېدنې سبب لا تر اوسه نه دی معلوم شوی چې د څه شي له امله رامنځته شوې ده.

د ننګرهار به مرکز جلال اباد کې د اور لګېدنې له امله ۱۸ موټرې سوځېدلي دي.

د ننګرهار د والي ویاند عطاالله خوګیاڼي نن ازادي راډيو ته وویل چې دغه اورلګېدنه تېره شپه ناوخته د جلال اباد ښار د کابل هډې د موټرو د تم کېدو په یوه سرای کې رامنځته شوې چې په خبره یې، په کې له یو لک او ۲۰ زیاتو امریکایي ډالرو په اندازه زیان اوښتی دی.

خوګیاڼی وایي، د اور وژنې ټيم په خپل وخت د پېښې ځای ته رسېدل و چې په ترڅ کې یې تر شلو زیات موټر له سوځېدو وژغورل شول.

د اورلګېدنې سبب لا تر اوسه نه دی معلوم شوی چې د څه شي له امله رامنځته شوې ده.

د یادونې وړ ده چې سخته ګرمي، تېز بادونه او د خلکو بې پروایي هغه څه دي چې د اوړي په موسم کې د اورګېدنې پېښې ډېرې رامنځته کېږي او د ګڼو مالي زیانونو ترڅنګ په کې خلکو ته د سر زیانونه هم اړوي.

د بین الافغاني خبرو پیل په اړه د پاتې مسایلو د ژر حل غوښتنه وشوه

خلیلزاد

افغان او امریکايي چارواکو ټينګار کړی چې د بین الافغاني خبرو په اړه پاتې مسايل باید ژر تر ژره حل شي ځکه ځنډ مخربینو ته فرصت برابروي.

د افغانستان د سولې لپاره د امریکا ځانګړي استازي زلمي خلیلزاد وايي: "له افغان ولسمشر محمد اشرف غني او د ملي مصالحې عالي شورا له مشر عبدالله عبدالله سره یې په وروستۍ ويډيويي غونډه کې د سولې او اقتصادي ګټو په اړه خبرې وکړې او دواړه لوري پر دې موافق دي چې د سولې اقتصادي ګټې تر جګړې زیاتې دي."

دا خبره زلمي خلیلزاد نن (د جولای په ۳یمه نېټه) پر خپله ټويټر پاڼه لیکلې ده.

ده زیاته کړې چې تلپاتې سوله په دې مانا ده چې پانګونې به زیاتې شي، مصارف به کم شي او سرمایه به وده وکړي.

خلیلزاد پر ټويټر لیکلي چې دا غونډه د روانې اوونۍ په اوږدو کې جوړه شوه.

د امریکا کانګرس پر چین بندیزونه تصویب کړل

د امریکا د کانګرس یوه څنډه

د امریکا کانګرس پر چین د هانګ کانګ په تړاو بندیزونه تصویب کړي دي.

امریکايي کانګرس د هانګ په تړاو نوي بندیزونه وروسته له هغې تاییدوي چې بیجینګ، د ملي امنیت یو قانون نافذ کړ.

دا نوی قانون په نړۍ کې د یو شمېر هېوادونو له خوا غندل شوی دی.

د امریکا سنا د پنجشنبې په ورځ په اکثریت د هانګ کانګ د کورواکۍ د طرحې ملاتړ وکړ.

تر دې یوه ورځ مخکې د امریکا استازو جرګې هم ورته پرېکړه کړې وه.

دا مصوبه اوس ولسمشر ټرمپ ته استول شوې چې توشیح یې کړي.

مصوبه کې هغه بانکونه جریمه کېږي چې له هغو چینایي چارواکو سره راکړه ورکړه کوي څوک چې دا نوی قانون عملي کوي.

د امریکا د کانګرس دا مصوبه د چین د کمونیست ګوند هغه چارواکي هم په نښه کوي چې د نوې قانون د نفاذ مسئولیت لري او هغه پولیس چې د هانګ کانګ اعتراضونه یې ځپلي دي.

مخکې له دې چې د امریکا سنا دا نوي بندیزونه نافذ کړي بیجینک پر واشنګټن ټینګار کړی و چې د هانګ کانګ په چارو کې د لاسوهنه بنده کړي او د دوام په صورت کې یې د ځوابي اقداماتو خبرداری ورکړی و.

بریتانیا په ۱۹۹۷ میلادي کال کې هانګ کانګ د لږ تر لږه پنځوسو کلونو لپاره د ځینو ازاديو په تضمین چین ته وسپاره.

منتقدان وايي، د چین نوی قانون چې په کې د عمري بند تر سزا پورې شامل دي، د دې ازادیو د پای ته رسېدو په معنی دی.

اروپايي ټولنه: روسیه دې د ټولپوښتنې پرمهال د بې نظمیو په اړه څېړنې وکړي

بروکسل کې د اروپايي ټولنې دفتر

اروپايي ټولنې له روسیې غوښتي، څو د هغو راپورونو په اړه څېړنې وکړي چې په دې هېواد کې د ملي ټولپوښتنې پرمهال د بې نظمیو په اړه ورکړل شوي دي.

په دې ټولپوښتنه کې، د روسیې په اساسي قانون کې د بدلون طرحه تایید شوه.

په وړاندیز شویو بدلونونو کې د نورو مسئلو ترڅنګ، تر ۲۰۳۶ میلادي کال پورې په واک کې د ولادیمیر پوتین احتمالي پاتې کیدو ته هم لاره هوارېږي.

کرملین د پنجشنبې په ورځ دا ټولپوښتنه وستایله، او هغه یې پر ولادیمیر پوتین د باور په برخه کې یوه بریالۍ ټولپوښتنه وبلله.

تقریباً په سلو کې ۷۸ کسانو په اساسي قانون کې تر ۲۰۰ د زیاتو مواردو د بدلون په پلوۍ رای ورکړي دي.

پوتین په ټلویزوني وینا کې د ټولپوښتنې د پایلو په غبرګون کې وویل: "ما د روسیې په اساسي قانون کې د بدلونونو د اړتیا په اړه ډېرې خبرې وکړې، دا زموږ د سیاسي سیستم د ټینګښت لپاره دي او همدارنګه زموږ ټولنیزو تضمینونو او مځکنۍ بشپړتیا د ټنګښت لپاره مهم دي، همدارنګه زموږ د معنوي او تاریخي او اخلاقي ارزښتونو په اړه دي چې نسلونه سره راټولوي، زه په عین حال کې هغه کسان چې د دې پر ضد یې رایې ورکړې هم درک کوم."

د رای ورکولو په ځینو مرکزونو کې د بې نظمیو راپورنه او یو شمېر هغو خبریالانو او فعالانو ته چې د رایې ورکولو د څارنې هڅه یې کوله ګواښونه، د دې سبب شول چې د اروپايي ټولنې ۲۷ غړي هېوادونه په دې اړه سمدستي د څېړنو غوښتنه وکړي.

د اروپايي ټولنې ویاند پیټرسټانو وویل، تمه لري چې ددې راپورونو په اړه به جدي څېړنه وشي ځکه د نوموړې په وینا دا جدي تورونه دي.

د امریکا له لوري وینزویلا ته د تلونکو بېړیو ضبطولو هڅه

ارشیف

امریکا هڅه کوي چې د ایران د تېلو بیړۍ چې وینزویلا ته روانې دي، ضبط کړي.

امریکايي څارنوالانو یوې محکمه کې غوښتنه کړې چې د ایران د تېلو بار څلور ټانکرونه چې وینزویلا ته روان دي ونیسي.

دا د امریکا د بندیزونو سره مخ او د امریکا ضد پر دې دوو متحدانو د واشنګټن له خوا د فشار راوړلو تازه هڅه ده.

د دې بېړیو د ضبطولو غوښتنه او په اړه یې شکایت د چارشنبې په ورځ د ډي سي ایالت په یوه فډرالي محکمه کې ثبت شوی، او په کې ادعا شوې چې د تېلو دا خرڅلاو د یو داسې ایراني سوداګر له خوا کېږي چې د ایران د سپاه پاسداران انقلاب ځواک سره تړاو لري.

د ایران سپاه پاسداران ځواک امریکا د بهرنیو ترهګرو سازمانونو په لیست کې شامل کړی.

په محکمه د ثبت شوې ادعا له مخې د امریکا د قدس ځواک د ۲۰۱۸ میلادي کال د سېپټېمبر میاشتې راهېسې د انتقال د یوې شبکې له لارې چې بندیزونه پرې لګېدلي او لسګونه د انتقال تنظیمونکي، بېړۍ او اسانتیا برابرونکي په کې ښکېل دي، تېل لېږدولي دي.

په شکایت کې دا څلور تېل لېږدونکي ټانکرونه د بیلا، بیرینګ، پانډي او لونا په نومونو یاد شوي چې د امریکايي څارنوالانو په وینا یو اعشاریه یو میلیونه بیرله تېل په کې بار دي.

طالبانو د هند په نیمه وچه کې القاعده شبکې سره همکاري رد کړه

ارشیف

طالبانو د هند په نیمه وچه کې د القاعده شبکې سره د دې ډلې د همکارۍ په اړه د امریکا د دفاع وزارت وروستی راپور رد کړی دی.

طالب ویاند ذبیح الله مجاهد پرون رسنیو ته په یوه استولې اعلامیه کې ویلي چې طالبان د هند د نیمې وچې په شمول په هیڅ ځای کې له کومې بهرنۍ ډلې سره همکاري نه کوي.

د طالبانو په اعلامیه کې ویل شوي چې هڅه کوي د دوی او امریکا ترمنځ شوی تړون عملي او افغانستان ته سوله راشي.

په اعلامیه کې له امریکايي چارواکو غوښتل شوي چې د دوحې هوکړې ته ژمن پاتې شي.

د امریکا د دفاع وزارت په یو نوې راپور کې ویلي، د هند په نیمه وچه کې د القاعده شبکه اوس هم له طالبانو سره نږدې اړیکې لري او طالبان له دې ډلې سره همکارۍ ته دوام ورکوي.

د چارشنبې په ورځ د پنټاګون څخه په خپاره شوي دې راپور کې راغلي چې د هند په نیمه وچه کې القاعده شبکه پر امریکا سرتیرو بریدونو کې خپله دوامداره ګټه لري.

د القاعده شبکې په شمول له ترهګرو ډلو سره د طالبانو د اړیکو پرې کول، د امریکا او طالبانو ترمنځ د هغې هوکړې مهمه برخه ده چې د فبرورۍ په ۲۹ مه نېټه دوحه کې لاسلیک شوې.

د ویشتل شوې اوکراینۍ الوتکې قربانیانو کورنیو ته د تاوان ورکولو غوښتنه وشوه

په دې الوتکه کې ۱۷۶ کسان سپاره وو، چې له تهران څخه د اوکراین پلازمېنې کییف ته روانه وو.

د افغانستان په شمول د هغو هېوادونو چارواکو چې وګړي یې د روان کال جنوري میاشت کې په ایران کې د نسکورې شوې اوکراینۍ الوتکې پېښه کې وژل شوي، یو ځل بیا د دې پېښې په اړه د څېړنو او د قربانیانو کورنیو ته د تاوان ورکولو غوښتنه کړې.

د افغانستان د بهرنیو چارو وزارت د پنجشنبې په ورځ په یو بیان کې وویل، د افغانستان، کاناډا، بریتانیا، سویډن او اوکراین د بهرنیو چارو وزیرانو د ویډیو کنفرانس له لارې خبرې وکړې او د همکارۍ یوه هوکړه یې لاسلیک کړه.

د یادو هېوادونو د بهرنیو چارو وزیران په ایران کې د نسکورې شوې اوکراینۍ الوتکې د قربانیانو د کورنیو د ملاتړ او ورته د ځواب ویلو د همغږۍ د نړیوالې ډلې غړي دي.

د خبرپاڼې په وینا، دا هوکړه لیک د ایران سره د خبرو اترو لپاره لاسلیک شوی، څو د دې هوايي پېښې بشپړې څېړنې وشي، او د قربانیانو کورنیو ته تاوان ورکړل شي.

ایران لومړی ویلي وو، دا اوکراین د هوايي شرکت دا مسافر وړونکې الوتکه د فني ستونزې له کبله نسکوره شوې، خو وروسته یې ومنله چې په تېروتنه د سپاه پاسداران ځواک په توغندي لګېدلې ده.

په دې الوتکه کې ۱۷۶ کسان سپاره وو، چې له تهران څخه د اوکراین پلازمېنې کییف ته روانه وو.

د الوتکې ټولې سپرلۍ چې ۱۳ افغانان هم په کې وو، په پېښه کې ووژل شول.

چارواکي: ننګرهار کې د ریکشا چلونکي د وژنې په تور ۲ نیول شوي

آرشیف

په ننګرهار کې پولیسو دوه تنه د یو ریکشه چلونکي د وژنې په تور نیولي دي.

د ننګرهار د والي ویاند عطاالله خوږیاڼي په دې اړه د دوشنبې په ورځ ازادي راډیو ته وویل: "دوه کسانو لومړۍ ریکشا چلونکی وژلی او وروسته یې ریکشا له ځانه سره بیولې وه، پولیسو دواړه کسان نیولي او تښتول شوې ریکشا یې هم اخیستې."

دا ریکشا چلونکی په دې وروستیو کې د ننګرهار د اډې فارم سیمه کې وژل شوی و.

هرات کې د ممیزو د پروسس فابریکه پرانیستل شوه

دا فابریکه د کرنې د وزارت له بودیجې څخه د پنځه سوه زره ډالرو په لګښت په تېرو څلورو میاشتو کې اباده شوې ده.

د هرات په صنعتي ښارګوټي کې د ممیزو( کشمشو) د پروسس لومړنۍ فابریکې د پنجشنبې په ورځ کار پیل کړ.

د هرات د والي ویاند جیلاني فرهاد ازادي راډیو ته وویل، د دې فابریکې په پرانیستې سره، ۲۰۰ تنو ته د کار زمینه برابرېږي او همدارنګه په دې ولایت کې د کشمشو د پروسس ظرفیت لوړېږي.

ښاغلي فرهاد زیاته کړه: "موږ دا مهال په ورځنۍ توګه ۲۰۰ ټنه کشمش پروسس کوو، چې د دې فابریکې په فعالېدو سره کولی شو، د پروسس ورځنی ظرفیت له ۲۵۰۰ څخه تر ۳۰۰۰ ټنو پورې ورسوو، همدارنګه په همدې اندازه صادارات هم زیاتوي."

د نوموړې په وینا دا فابریکه د کرنې د وزارت له بودیجې څخه د پنځه سوه زره ډالرو په لګښت په تېرو څلورو میاشتو کې اباده شوې ده.

د ننګرهار سره رود ولسوالۍ اجرائیه امر په موټر چاودنې ۲ تنه ټپیان کړل

د ننګرهار ولایت د جلال‌اباد ښار یوه برخه

د ننګرهار د سره رود ولسوالۍ د اجرائیه امر په موټر چاودنې دوه تنه ټپیان کړل.

د ننګرهار د والي ویاند عطاءالله خوګیاڼي ازادي راډيو ته وویل چې نن له غرمې وروسته د جلال‌اباد ښار د لومړۍ ناحیې په مربوطاتو کې د سره رود ولسوالۍ د اجرائیه امر عبدالواسع انتظار په موټر پسې نښلول شوي ماین چاودنه وکړه چې په خبره‌یې، خپله عبدالواسع انتظار او د نوموړي یو زوی یې ټپیان کړي دي.

د خوګیاڼي په وینا، د عبدالواسع انتظار ټپونه ژور دي، خو زوی یې سر سري ټپي شوی چې دا مهال د ننګرهار په حوزوي روغتون کې تر درملنې لاندې دي.

د یادونې وړ ده چې تېره سې شنبه هم د جلال‌اباد ښار په همدې ناحیې پورې مربوط اکاخېل پلازې مخې ته په یوه موټر پسې نښلول شوي ماین چاودنه کړې وه چې د معلوماتو له مخې، د سر له زیان پرته په‌کې د دوو موټرو په ګډون مالي زیانونه اوښتي وو.

چارواکي: د کابل-جلال‌اباد پر لویه لاره د کونړ د والي په موټر برید شوی

عبدالستار ميرزکوال

د لغمان چارواکي وایي، تېر ماښام د کابل-جلال‌اباد پر لویه لاره د کونړ د والي د موټرو پر کاروان وسله‌وال برید شوی دی.

د لغمان د والي ویاند اسدالله دولت‌زي ازادي راډيو ته وویل چې پېښه تېر ماښام د کابل-جلال‌اباد د لویې لارې په اوږدو کې د سرخکانو په سیمه کې شوې ده.

ځينو سرچینو په سیمه کې د ازادي راډيو خبریال ته ویلي چې په دغه برید کې د کونړ والي ته کوم زیان نه‌دی اوښتی، خو دوه ساتونکي یې ټپیان شوي دي.

دا په داسې حال کې ده چې تېره اوونۍ پر همدغه لاره د نورستان د والي حافظ عبدالقیوم د موټرو پر کاروان برید شوی و چې دی ورڅخه روغ وتلی وو، خو ساتونکو او موټرو ته‌یې زیان اوښتی وو.

د دغو بریدونو مسؤلیت چا نه‌دی منلی.

د یادونې وړ ده چې تر نسبي امن او کرارۍ وروسته د کابل-جلال‌اباد د لارې ناامنیو خلک اندېښمن کړي او له ځایي مسؤلینو غواړي چې د لارې خوندیتوب ته جدي پام وکړي.

نور راوښيه

XS
SM
MD
LG