دامريکا اردو وايي : دوه امريکايي عسکر په افغانستان کې په دوه جلا بريدونو کې وژل شوي دي ٠

دامريکا داردو اعلاميه وايي چي لومړے عسکر پرون په کندهار کي دافغاني او امريکايي ځواکونو دځمکنيو عملياتو په ترځ کي دوسله کسانو لخوا دسپکو وسلو او راکټ لانچرو دبريد له امله مړ شوي ، او يو بل امريکايي عسکر ټپي شوي دي ٠

اعلاميه زياتوي چي دبريد په وړاندي د امريکايي او افغاني ځواکونو دمتقابلو ډزو له امله دوه اورپکي مړه او يو ټپي شوي دي ٠

دامريکا اردو وايي چي دسمندري ځواکونو يو بل عسکر دکنړ مرکز اسعد آباد ته نژدي دامريکايي ځواکونو په يو اډه دهاوانونو ، راکټ لانچرو او وسپکووسلو دبريد په ترځ کي مړ شوي دي ٠

_________________________________________________________

لږترلږه اته کسه عراقي پوليس د يو ځان وژونکي بريد له امله نن مړه شوي دي ٠

يو کس چي بمونه يي له ځان پورې تړلي وو دبغداد شمال ته باقوبه ښار کې دجديدالشموله پوليسانو په يوه ګڼه کې ځان الوزلے چې لږترلږه اته تنه پوليسان يي وژلي او لسګونه نوريي ټپيان کړي دي ٠

دغه بريد دچټکوځواکونو دشمول او روزنې په يو مرکز کې شوے ٠
پوليس وايي چې دمړو شمير کيداي شي زيات شي ٠

بلې خواته دناتو تړون عمومي منشي ياپ دي هوپ شوفير دبغداد په زرغونه سيمه کې دتړون نوے قوماندانۍ پرانيسته ٠

زرغونه سيمه دبغداد هغه برخه ده چيرته چې حکومتي يو شمير ودانۍ او سفارتونه دي او ټينګ امنيت يې نيول شوے ٠

ناتو تړون به دعراق داردو ستر افسران وروزي ٠

دغه راز نن دعراق دملي امنيت سلاکار موفق الربيع دفرانسې خبري آژانس ته ويلي دي چې امريکايي او عراقي ځواکونو د القاعده شبکي يولوي غړے پرون په بغداد کې ويشتلے او وژلے دے ٠
دعراق دملي امنيت سلاکار ويلي دي چې دابوعزام په نامه دغه کس کيداي شي په بغداد کې دبمي بريدونو له امله دنژدي يو زرو دوه سوه کسانو دوژنې مسئول وي ٠

__________________________________________________________

داسرائيلو دفاع وزير شاوول موفاز وايي چي په غزے تړانګه کې دفلسطيني اورپکو ضد هوايي بريدونه به دوام وکړي ٠

وروسته له دې چې دفلسطينيانو د حماس ګوند اورپکو له غزے څخه په اسرائيلو د توغنديوبريدونه وکړل ، اسرائيلي اردو په غزے تړانګه کې ددغه ګوند په مليشو او ددوي دوسلو په ځايونو يولړهوايي بريدونه ترسره کړي ٠

دحماس ګوند يومشر محمد الزهار بيا وروسته په فلسطيني اورپکو غږ وکړ چي بريدونه دې ودروي ٠

خو دفاع وزيرشاوول موفاز نن داسرائيلو داردو راډيو ته وويل چي دمحمد الزهار په خبرو قناعت نه کوي ٠

ده ويلي چي دفلسطينيانوله خوا دتوغنديو ددغه شان بريدونو دمخنيوي لپاره به اسرائيل له هرډول ضروري وسايلو کار واخلي ٠
__________________________________________________________

ايران غواړي دنړۍ له ټولو لويه غالۍ جوړه کړي او له دي لارې په دغه صنعت کې دسيالۍ اوچت ګام واخلي ٠

دغه غالۍ چې شپږ زره متره مربع مساحت به ولري ، دايران دغاليو دشرکت له خوا اوبدل کيږي ٠

دشرکت چارواکو ويلي دي چې ددغې غالۍ اوبدل به درې مياشتې وروسته پيل شي او د دوه زرو غالئ اوبدونکو له خوا په يو نيم کال کي ترسره کيږي ٠

دغه غالي په ابوظبي کي دشيخ زايد دجومات لپاره جوړيږي او بيه به يې څه دپاسه اته مليونه ډالره وي ٠

لاس اوبدل شوے غالۍ له تيلو وروسته دايران دوهم صادراتي جنس دي ٠

خو په ايران کې دغه صنعت وروسته له دې يو څه زيانمن شو چې ورته چينايي هندي او پاکستانې غاليو چې دايران دغاليو ډيزاين يې کاپي کړے نړيوال بازار کې ځاي ونيو ٠

د طالبانو د حکومت د ترانسپورت او هوایي چلند وزارت د هواپيژندنې ریاست په ۲۳ ولایتونو کې د باران او سېل وړاندوینه کړې ده.

د دغه ریاست د وړاندوینې له مخې د پنجشنبې په ورځ به نورستان ، کونړ ، ننګرهار ، لغمان ، کاپیسا ، پنجشیر ، پروان ، بغلان ، سمنګان ، بدخشان ، کندوز ، تخار ، بلخ ، سرپل ، فاریاب ، غور ، بادغیس ، دایکنډي ، بامیان ، غزني ، میدان وردک ، لوگر او پکتیا ولایتونه د شدید ورښت، برښنا او سملاسي سیلونو شاهدان وي.

د باران اندازه له لسو تر دیرش ملي مترو پورې اټکل شوې.

په افغانستان کې د څو وروستیو اونیو سیلونو او بارانونو او نورو طبیعي پيښو سلګونه کسان مړه او ټپيان کړل او خلکو ته یې دروند مالي زیان واړوه.

په دې ترڅ کې د بدخشان چارواکو ویلي چې په کوف اب ولسوالۍ کې یې د هغو څلورو کسانو مړي د چهارشنبې په ورځ را وایستل چې د واورې ښوېدو له کبله مړه شوي وو.

دغه سازمان د چهارشنبې په ورځ ( د ثور ۲مه) پر خپله ایکس پاڼه لیکلي چې علي وزیر نژدې شل میاشتې " د خپل سره توقیفونو " په کړیو او د بیا نیولو او دوسیو په تکرار کې تېر کړې دي.

د سازمان په خبره، که څه هم د پاکستان یوې محکمې د روان ۲۰۲۶ کال د مارچ په ۱۶مه د علي وزیر د خوشې کېدو حکم وکړ، خو له څو ساعتونو وروسته بیرته ونیول شو.

د بښنې نړیوال سازمان په دادو زندان کې د علي وزیر د نه خوړو وروستی اعتراض ته هم اندیښنه ښودلې او ویلې یې دي چې هغه داسې مهال له درملنې انکار کړی چې د شکرې، د وینې له لوړ فشار او د زړه له ناروغیو کړېږي.

د پاکستان حکومت علي وزیر تورن کړی چې د پاکستاني ریاست، پوځ او استخباراتو پر ضد يې په ولسي غونډو کې ویناوي کړې دي.

د پښتون ژغورنې غورځنګ بیا دا تورونه رد کړي او ویلې یې دي چې علي وزیر" د حکومتي جبر پر خلاف د غږ پورته کولو په جرم" زنداني شوی دی.

اروپایي ټولنې اوکراین ته د ۹۰ میلیارده یورو پور پر ورکړې هوکړه وکړه.

د قبرس دولت چې د اروپایي ټولنې دوره‌ ‌یي مشري ور له غاړې ده د چهارشنبې په ورځ ( د ثور ۲مه) وویل، تمه ده د ټولنې ۲۷ غړي هېوادونه د پنجشنبې تر ماښامه د دې پور لیکلې هوکړه لاسلیک کړي.

دا ګام د هنګري په دولت کې له راغلو سیاسي بدلونونو وروسته اخیستل کیږي.

ټاکل شوې وه چې اروپایي ټولنه تېر کال اوکراین ته د دفاعي بودجې او اقتصادي وړتیا لپاره دغه پور ورکړي، خو هغه مهال هنګري له دې سره هوکړه ونه کړه.

د هنګري پخوانی صدر اعظم ویکتور اوربان د روسیې پلوی و.

تمه ده چې افغانه ورزشکاره صوفیه سروري بروکسل کې د جوجیستو د سیالیو په ګراپلینګ څانګه کې برخه واخلي.

نوموړې په خپل انستاګرام خپره کړې چې د NAGA سازمان په چوکاټ کې دغه سیالۍ د اپریل په ۲۶ مه پیلیږي.

هغه وايي د GI او NOGI په برخو کې خپلو سیالو لوبغاړو سره میدان ته کوزیږي. خو دا نه دي ویل شوي چې سیالانې یې څوک دي.

صوفیې سروري په دې وروستیو کې په جرمني کې د جوجیستو د نړیوال لیګ اتلولي خپله کړه .

افغانستان کې د طالبانو حکومت د نورو محدودیتونو ترڅنګ د ښځو په ورزش هم محدودیت لګولی دی.

د افغانستان د بشري حقوقو لپاره د ملګرو ملتونو ځانګړی راپور ورکوونکی هغه رپوټونه د جدي اندیښنې وړ بولي چې وايي اروپايي اتحادیه د طالبانو د حکومت استازو ته بلنه ورکوي چې بروکسل ته ورشي څو دځینو افغان کډوالو د ستنولو په هکله ورسره خبرې وکړي.

ریچارد بنیت د چهارشنبې په ورځ په خپله ایکسپاڼه ولیکل چې د ښځو ، د بشري حقوقو د ملاتړوکسانو او پخوانیو چارواکو د بشري حقوقو څخه د پراخې سرغړونې له کبله هرډول ستنول دا اصل چې کډوال به په جبري توګه نه ستنول کیږي،ماتوي.

سرچینو د فرانسې خبري اژانس ته ویلي چې د طالبانو د حکومت استازي راتلونکو اونیو کې بروکسل ته بلل شوي ترڅو د اروپايي اتحادیې چارواکي افغانستان ته د ځینو کډوالو دبیرته ستنولو په هکله ورسره خبرې وکړي.

د اروپايي اتحادیې یو شمیر هیوادونه غواړي جرمونو کې ښکیل ځینې افغان کډوال چې د اقامت اسناد نلري افغانستان ته ستانه کړي.

د تجارتي مالونو د انتقال په درې بیړیو باندې په هرمز تنګي کې د چهارشنبې په ورځ ډزې وشوې.

رویترز خبري اژانس دبریتانې د سمندري تجارت او امنیت د ادارې د سرچینو له قوله رپوټ ورکړ چې دلایبریا بیرغ لاندې یوې بیړۍ باندې د عمان په شمال ختیځ کې ډزې شوي دي.

د بیړۍ کاپیتان ویلي چې د ایران یوه توپ لرونکې کوچنۍ کشتۍ دغې بیړۍ ته ورنږدې شوې او ورباندې یې ډزې کړي خو بیړۍ چلوونکو ته زیان نه دی رسیدلی.

دغه راز دیوې یونانۍ کمپنۍ ترادارې لاندې د یوې تجارتي بیړۍ چې ورباندې ډزې شوي کاپیتان یې ویلي چې پیل کې ورته ویل شوي وو چې هرمز تنګي څخه تیریدلای سي.

د بریتانیې د سمندري تجارت او امنیت اداره زیاتوي چې دریمه بیړۍ باندې چې د پاناما تربیرغ لاندې چلیږي د ایران لویځ لوري ته اته سمندري میله لیرې ډزې شوي خو چلوونکو ته یې زیان نه دی اوښتی.

افغانستان کې د طالبانو حکومت وايي د بهرنیو چارو وزارت مرستیال د اروپايي اتحادیې له ځانګړې استازي سره په کتنه کې د سیاسي ، اقتصادي او تجارتي اړیکو د پراختیا په هکله خبرې کړي دي.

خبرپاڼه وايي د بهرنیو چارو وزارت مالي او اداري مرستیال محمد نعیم په دې کتنه د اروپايي اتحادیې له بشري مرستو مننه کړې او ټینګار یې کړی چې دغه مرستې د دوامدارو پرمختایي پروګرامونو پر لور واوړي.

اعلامیه زیاتوي چې د اروپايی اتحادیې ځانګړي استازي ژیل بیرتراند له افغانستان سره د مرستو ددوام ډاډ ورکړی او ویلي دي چې داروپا دروازې دافغاني صادراتو په مخ خلاصې دي او په ځانګړې توګه دافغانستان وچه میوه په اروپا کې ښه بازار لري.

ددغې لیدنې خبر په داسې حال کې خپریږي چې رپوټونه وايي اروپايي اتحادیه د طالبانو یو تخنیکي پلاوي ته بلنه ورکوي چې بروکسل ته ورشي او ددغې اتحادیې له هیوادو د یوشمیر افغان کډوالو د ایستلو پر لارو چارو ورسره خبرې وکړي.

د اروپایي ټولنې د اووه ویشت غړیو هیوادو له ډلې شاوخوا شل هیوادونو دا هڅې پيل کړې دي چې هغه افغانان له خپلې خاورې وباسي چې په جرمونو کې ښکېل دي.

د بشري حقوقو د څار سازمان وايي پاکستاني چارواکو د پاکستان او افغانستان ترمنځ د پولو په اوږدو کې له نښتو وروسته، دافغان کډوالو خلاف چاپو، خپل‌ سریو نیونو او جبري ستنولو ته زور ورکړی دی.

دغه سازمان په خپله نننۍ خبرپاڼه کې وايي چې د پاکستاني پولیسو دغه چلند د زرګونو افغان کډوالو د ورځنۍ ژوند چارې لکه روغتیايی خدماتو ، زده کړو او نورخدماتو ته لاس رسی له جدي خنډونو سره مخ کړي دي.

ددغه سازمان د افغانستان دبرخې څیړونکې فرشته عباسي وايي "پاکستاني چارواکي د دې پر ځای چې افغان کډوالو ته ساتنې ته د اړمنو انسانانو په سترګه وګوري، د هغوی ترمنځ وېره خپروي. د پولیسو ناوړه چلند خلک دې ته اړ باسي چې له خوړو او روغتیايي خدمتونو تېر شي،"

نوموړې له پاکستاني چارواکو غوښتي چې دافغان کډوالو اجباري ستنول سملاسي ودروي.

پاکستان تراوسه د بشري حقوقو د څارسازمان ددغو څرګندونو په اړه کوم غبرګون نه دی ښودلی.

پانامې هغه ایرانی تعبه امریکا ته سپارلی چې د چین له لارې ایران ته د توکو په صادارتو تورن دی.

د امریکا عدلیې وزارت ویلي، دغه ایرانی تبعه چې رضا دیندار نومیږي، پانامې تیره اونۍ امریکا ته وسپاره.

د قضايي چارواکو په خبره، ۴۴کلن دیندار د دوشنبې په ورځ د سیاټل په محکمه کې حاضر شوی دی.

دیندار د هغې شبکې په چلولو تورن دی چې له متحده ایالاتو څخه یې توکي اخیستل او د چین له لارې یې ایران ته لیږدول.

د واشنګټن د لویدیځې سیمې د څارنوالۍ دفتر ویلي، رضا دیندار ایران ته د ۹۷زرو او ۶۰۰ ډالرو په ارزښت د توکو په چاقاق، د پیسو په مېنځلو، د صادراتو لپاره د جعلي اسنادو د جوړولو په ګډون په نهوو قضیو کې تورن دی.

د څارنوالۍ په ټکو، که هغه محکوم شي نو شل کلن بند به تیروي.

امریکايي چارواکي وايي، د رضا دغه اقدامات پر ایران د امریکا له خوا د لګول شویو بندیزونو څخه سرغړونه ده.

امریکا په ۱۹۹۰کال کې ایران ته د توکو، ټکنالوژۍ او خدمتونو پر مستقیم او غیرمستقیم صادراتو بندیز ولګوه چې په ۲۰۰۱ کال کې نافذ شو.

د طالبانو د حکومت د المپیک، بدنې روزنې او ورزش کمېټې اعلان کړی چې د کورش، سامبو او د دودیزې غیږې نیونې فیستوال به د پنجشنبې په ورځ د (غويي ۳مه) په کابل کې پیل شي.

د طالبانو تر واک لاندې باختر خبري اژانس د دغې کمېټې د مشر احمدالله وثیق په حواله لیکلي،"په دغه فیستوال کې به د افغانستان په ګډون له ازبکستان، قرغیزستان، تاجکستان، ترکمنستان، ایران او ترکیې څخه ۱۶۰ لوبغاړي برخه واخلي".

دغه فیستوال به د غويي تر پنځمې دوام وکړي.

پر افغانستان د طالبانو له واکمنیدو راهیسې په تیرو نژدې پنځو کلونو کې ښځې له هر ډول ورزشي فعالیتونو راګرځول شوي او د نارینو په ځینو لوبو محدودیتونو لګول شوي دي.