د افغانستان د انرژۍ او اوبو وزارت وايي، ډېر ژر به خصوصي شرکتونه د اوبو برېښنا د تولید پر درېیو پروژو کار پيل کړي.
د افغانستان حکومت به د خصوصي سکټور د پیاوړي کولو، د خپلو اوبو د مهارولو، د انرژۍ د امنیت او د بندونو د ښه مدیریت لپاره له خصوصي شرکتونو سره عمده قراردادونه وکړي.
د افغانستان د انرژۍ او اوبو وزارت مرستیال وايي، افغانستان کې د برق د تولید د لږ تر لږه ۳ سترو پروژو د پيل په اړه له کورنیو، خصوصي شرکتونو سره هوکړه شوې او قرادادونه بهیې ډېر ژر لاسلیک شي.
د امانالله غالب په وینا، د دې پروژو له بشپړېدو سره به کلیوالي خلکو ته کارونه پیدا شي او حکومت به پر وارداتي برېښنا اتکا کمه کړي.
امانالله غالب زیاته کړه:
"تر اوسه له خصوصي سکټور سره د ۳ پروژو قرارداد یا شوی یا هم کېدونکی دی. د مزار شریف د ۵۰ مېګا واټه برق د تولید پر پروژه به غضنفر ګروپ پانګونه کوي او نړیوال بانک به همکاري ورسره کوي. د کجکي پر بند به د ترکیې ۷۷ شرکت پانګونه کوي او د سروبي د ۱۸۰ مېګا واټه برق پروژه ده چې په خیر ډېر ژر بهیې کار پيل شي."
په داسې سترو قرادادونو کې د افغانستان حکومت هم شامل دی.
د اوبو او انرژۍ وزارت مرستیال په وینا، حکومت غواړي چې د انرژۍ د تولید پروژې کورنیو، خصوصي شرکتونو ته ورکړي څو پانګهوال خپل هېواد کې پانګونې ته وهڅول شي.
د هغه په وینا، د انرژۍ د تولید په سترو پروژو کې حکومت او نړیوال بانک د پانګهوالو ملاتړ کوي.
امانالله غالب زیاته کړه:
"موږ غواړو چې زیاتې خصوصي کمپنۍ چې د افغانانو دي، رامخکې شي او قراردادونه ورسره وکړو او له ګاونډیو هېوادونو د برق د اخیستلو پر ځای، د اړتیا وړ برېښنا له افغاني شرکتونو وپېرو. په دې ډول به د افغانانو لپاره کارونه زیات شي، اقتصادي وده ورسره ښه کېږي او زموږ د برق امنیت هم تأمینولائ شي. په دې ډول به زموږ پر خپلو اوبو، زموږ مدریت هم زیات او ښه شي."
ښاغلي غالب ازادي راډیو ته څرګنده کړه چې په کونړ کې د اوبو پر دوو بندونو "سورتاق" او "څاګۍ" چې په مجموعي ډول د ۱۲۰۰ مېګا واټه برېښنا د تولید توان به ولري، غور روان دی او د سروې تر بشپړېدو وروسته بهیې قرارداد خصوصي شرکتونو ته وسپارل شي.
هغه زیاته کړه چې د پاکستان حکومت د کونړ پر سیند د اوبو د برېښنا د تولید د یوه بند د جوړېدو وړاندیز هم ورته کړی دی.
امانالله غالب څرګنده کړه چې د کونړ پر دریاب د داسې بند د جوړېدو په صورت کې به افغانستان ان د دې توان ولري چې د پاکستان ځینو سیمو ته برېښنا صادره کړي.
په همدې حال کې، یوې سرچینې چې نهیې غوښتل نومیې څرګند شي، ازادي راډیو ته وویل چې د "سروبي دوه"د برېښنا د تولید بند جوړولو قرارداد به ډېر ژر د "الکوزي ګروپ" په نوم له خصوصي شرکت سره نهايي شي.
د افغانستان د انرژۍ او اوبو وزیر علي احمد عثماني افغانستان ټایمز ته ویلي چې دا بند به لږ تر لږه ۱۸۰ مېګا واټه برق کړي.
د "سروبي دوه" برېښنا تر ډېره حده د کابل ښار د اړتیاوو د پوره کولو لپاره لګول کېږي.
د رپوټونو په حواله، "الکوزي ګروپ" پر دې پروژه د لږ تر لږه ۳۰۰ میلیونه ډالره پانګونې ژمنه کړې ده.
خو افغانستان اوسمهال د خپلې اړتیا د پوره کولو لپاره زیات برق د منځنۍ اسیا له هېوادونو واردوي.
د افغانستان د اقتصادي چارو یو شمېر څارونکي پر حکومت انتقاد کوي چې د اوبو زیاته اندازه، پرته له دې چې ډېره ګټه ورڅخه واخیستل شي، ګاونډیو هېوادونو ته بهېږي.
