د افغانستان د بشري حقونو خپلواک کمېسیون په هېواد کې له ښځو سره د زور زیاتي په زیاتېدو اندېښنه ښيي.
دا کمېسیون وايي، د ښځو د پوهې د کچې ټیټوالی، محاکمو ته د دوی نه لاسرسی، د زور زیاتي د قضیو ځنډېدل، ناوړه دودونه، د فساد شتون، د غېر مسؤلو وسلهوالو موجودیت او د ښځو پر وړاندې د زور زیاتي د منع د قانون نه پلي کېدل، هغه موارد دي چې د ښځو پر وړاندې یې د زور زیاتې پېښې زیاتې کړي دي.
د دې کمېسیون مسؤلین وايي، په دې وروستیو کې د ښځو پر وړاندې د زور زیاتي د پېښو شمېرې لوړې شوي او ددوی په خبره د روان میلادي کال له پیل راهیسې په دې اړه هېواد کې ۲۶۲۱ قضیې ثبتې شوي دي.
د بشري حقونو د خپلواک کمېسیون ویاند رفیع الله بیدار د سې شنبې په ورځ ازادي راډیو ته وویل، په دې قضیو کې ۳۰ پېښې د وژنو او جنسي تیریو دي.
ښاغلي بیدار زیاته کړه:
"په وروستیو ۸ میاشتو کې د ښځو پر وړاندې د زرو زیاتي شمېرې لوړې ښودل کېږي. زموږ په سیمه ییزو دفترونو کې د ښځو پر وړاندې د زور زیاتي ۲۶۲۱ قضیې ثبتې شوي چې ۳۰ قضېې یې د وژنو او نورې یې د جنسي تیریو دي. په دې قضیو کې ۱۷ غور ولایت کې ثبت شوي دي."
ښاغلي بیدار وايي، د ښځو پر وړاندې د زور زیاتي قضیې د غور له ولایته وروسته، د هېواد په شمالي ولایتونو کې زیاتې ښودلي دي.
غور ولایت کې د ۱۸ کلنې ریحانې د سر پرې کېدل او د میړه لهخوا د زهرا په نامه د یوې میرمنې سوځول، له ښځو سره د زور زیاتي تازه پېښې دي.
د افغانستان د بشري حقونو خپلواک کمېسیون وايي، دغه تازه پېښې د ښځو پر وړاندې د زور زیاتي یوازینی پېښې نه دي، بلکې د دې کمېسیون لهخوا په لسګونو داسې نورې قضیې هم ثبتې شوي چې د مختلفو دلایلو له امله کورنیو پټې ساتلي دي.
یاد کمېسیون له حکومته غواړي چې دا ډول قضیې جدي وپلټي او عاملین دې مجازات کړي څو د دغو زور زیاتیو مخه ونیول شي.
د افغانستان د کورنیو چارو وزیر تاج محمد جاهد د ښځو پر وړاندې د زور زیاتي پېښې تائیدوي خو وايي چې د پولیسو په لیکو کې د ښځو شاملیدل کولای شي چې دا ډول پېښې کمې کړي.
نوموړي دا خبرې د سې شنبې په ورځ کابل د کورنیو چارو وزارت او د اروپايي ټولنې د پولیسو د ماموریت په ګډه ناسته کې وکړې.
ښاغلي جاهد زیاته کړه:
"ښځې د یو زیانمنېدونکي قشر په توګه تل، په ټولنه کې له بېلابېلو زور زیاتيو سره مخ شوي دي. د پولیسو په لیکو کې د ښځو موجودیت ضروري ګڼل کېږي. دا کولای شي چې د ښځو د حقونو د دفاع او د دوی پر وړاندې د زور زیاتي په مخنیوي کې مهم رول ولري."
په ورته وخت کې د ښځو د حقونو فعالانې وايي، د ښځو پر وړاندې زور زیاتی به هغه مهال کم شي چې خلک، دیني عالمان، حکومت اړوند ارګانونه او مدني فعالان د دې ستونزې په وړاندې جدي مبارزه وکړي.
راپور: خان محمد سیند
