افغانستان د اسیا زړه کنفرانس کې په سیمه کې د پاکستان د لا انزوا کېدو هڅه وکړه چې د یو شمېر کارپوهانو په وینا په دې کار کې یو څه بریالی هم شو.
افغان ولسمشر د افغانستان په اړه د اسیا زړه کنفرانس یو وار بیا پر پاکستان انتقاد وکړ چې د ده په وینا تر اوسه په افغانستان کې یوه نااعلان شوې جګړه مخ ته وړي.
ښاغلي غني زیاته کړه:
"له پاکستان سره زموږ د پراخو دوه اړخیزو او څو اړخیزو تماسونو سره-سره هغه نا اعلان شوې جګړه چې ما د ۲۰۱۴ میلادي کال په ژمي کې دغې پدیدې ته دا نوم ورکړ، نهیوازې سړه شوې نهده بلکې د ۲۰۱۶ میلادي کال په جریان کې لا پسې پراخه او سخته شوې ده."
اشرف غني وویل، هغه جګړه چې وسلهوال طالبانیې افغانستان کې د افغان دولت په وړاندې مخ ته وړي که د پاکستان له ملاتړه برخمن نهوي، طالبانیې یوه میاشت هم مخ ته نهشي وړلای.
غني له پاکستانه وغوښتل چې هغه ۵۰۰ میلیونه ډالره مرسته چې دې هېواد له افغانستان سره د بیارغونې په برخه کې کړې، ښه به دا وي چې دغه پیسې په خپله د سخت دریځو ډلو په ځپلو ولګوي.
د افغانستان جمهوري ریاست وایي، افغانستان وتوانېد چې د اسیا زړه هېوادونو د کنفرانس ګډونوالو ته په سیمه کې د روان وضعیت یو ریښتینی تصویر وړاندې کړي.
د ولسمشر مرستیال ویاند شاه حسین مرتضوي په دې اړه ازادي راډیو ته وویل:
"افغان حکومت په دې غونډه کې چې لسګونو هېوادونو پهکې ګډون وکړ سیمې ته د ورپېښو چلنجونو او ستونزو یو روښانه تصویر وړاندې کړ. ولسمشر د ترورېزم د خطرونو پر وړاندې د یو شمېر هېوادونو د نهپاملرنې او مسؤلیت د نهترسره کولو مسئله هم یاده کړه."
د کابل او اسلاماباد کړکېچنو اړیکو ته په پام سره یو شمېر کارپوهانو هم د دې تمه کوله چې افغانستان به یو ځل بیا پاکستان ته د انتقاد ګوته ونیسي.
د سیاسي چارو کارپوه کبیر رنجبر وایي، پاکستان په سیمه کې د انزوا پر لوري روان دی او د افغان ولسمشر دغه حرکت چې د پاکستان مرستهیې رد کړه پاکستان ته یو ښکاره پیغام و چې د طالبانو په ګډون د سخت دریځو ډلو له ملاتړه لاس واخلي.
ښاغلي رنجبر زیاته کړه:
"زه فکر کوم چې د اسیا زړه کنفرانس موږ نور هم په سیمهییزه کچه یوې اجماع ته نېږدې کړو."
خو پاکستان بیا په دغه کنفرانس کې د افغان ولسمشر پر هغو څرګندونو خواشیني څرګنده کړې ده چې د پاکستان د میلیونونو ډالرو د مرستې له منلو یې ډډه وکړه.
د پاکستان صدراعظم د بهرنیو اړیکو سلاکار سرتاج عزیز په دغه کنفرانس کې له ګډون وروسته اسلاماباد ته له ستنېدو سره سم تېره ورځ په یوه خبري کنفرانس کې وویل چې که څه هم دی د افغان ولسمشر خبرو خواشینی کړی خو د افغانستان امنیتي وضعیت ته په پام سره چې هره ورځ خونړۍ پېښې کېږي، د اشرف غني څرګندونې درک کولای شي.
ښاغلي عزیز زیاته کړه:
"دا ښکاره خبره ده چې د ښاغلي اشرف غني څرګندونې خواشینونکې دي، خو د پوهېدو وړ هم ځکه دي چې په افغانستان کې د ترهګرۍ او د خلکو د مړینې کچه لوړه شوې او د پاکستان په پرتله پهکې بمي چاودنې هم ډېرې شوي دي."
د افغانستان په اړه د اسيا زړه کنفرانس چې د هند په امرتسر ښار کې جوړ شوی او د شاوخوا ۳۰ هېوادونو استازو پهکې ګډون کړی و پرون د یوې ګډې اعلامیې په خپرولو سره پای ته ورسېد.
د جمهوري ریاست لهخوا په خپره شوې خبرپاڼه کې ویل شوي چې په اعلامیه کې د اسیا زړه د شپږم کنفرانس ګډونوالو یو وار بیا د یوه باثباته، سولهییز او سوکاله افغانستان او د اسيا زړه ټولې سیمې ته چې افغانستان ورسره وتړل شي، هدف ته په رسېدو کې دغه سیمهییز چوکاټ د سیاسي ډیالوګ او له نېږدې د سیمهییزې همکارۍ لپاره حیاتي وباله.
په اعلامیه کې دغهراز په دې هم ټینګار شوی چې په سیمه کې د ستونزو د لهمنځه وړلو لپاره تر ټولو اغېزمنه وسیله، سیمهییزې همکارۍ ته پراختیا ورکول دي.
دغهراز د سیمهییزې همکارۍ د پراختیا او په سیمه کې د باور او اعتماد فضا د ایجادولو لپاره د افغانستان حکومت د هڅو کلک ملاتړ شوی دی.
