د لاسرسي لېنکونه

د هند پوځ وايي، د پنجشنبې سهار وختي یې د پاکستاني ترورېستانو د یوې حملې مخه نیولې او درې حمله کوونکي یې وژلي دي.

کشمیر کې د هند او پاکستان تر منځ د لانجو او نښتو په دوام د پنجشنبې په سهار د جمو کشمیر په لنګېټ سیمه کې هندي پوځیانو درې وسله‎وال حمله کوونکي وژلي دي.

په لنګېټ کې د هند د پوځ یوه قومندان راجیف ساها رسنیو ته وویل، دغو درې حمله کوونکو چې پاکستاني توکي هم ورسره و، د هندي پوځیانو پر کمپ حمله وکړه خو د پوځیانو د کلکې دفاع له امله له پښو وغورځول شول.

ښاغلي ساها زیاته کړه:

"کېدای شي نور هم و، خو موږ یوازې درې تنه ترورېستان له‎منځه یوړل. نو دا په دې معنی ده چې یوازې درې ترورېستان و او زموږ ممنوعه ساحې ته ننوتلي و. کوم وسایل چې له دوی سره و په هغو پاکستاني نښانونه و نو دوی پاکستاني ترورېستان و."

ښاغلي ساها وویل، په دې اړه تحقیقات روان دي او د یادو حمله کوونکو د نورو ارتباطاتو په اړه به وروسته جزئیات شریک شي.

اسوشېټېډ پرېس خبري آژانس لیکلي دا تازه پېښه په کشمیر کې تېره میاشت د څلورو وسله‎والو له‎خوا د ۱۹ هندي سرتېرو له وژلو وروسته کېږي چې د هند او پاکستان تر منځ لانجې یې نورې هم زیاتې کړې.

د اسوشېټېډ پریس په باور په کشمیر باندې هند او پاکستان له کلونو راهیسې سره په نښتو او لانجو اخته دي او یو بل په سیمه کې په ناکراریو تورنوي.

خو د پاکستان صدراعظم نواز شریف بیا په پارلمان کې د وینا پر مهال هند تورن کړ چې په کشمیر کې د ده په خبره د خپلو ظلمونو د پټولو لپاره په پاکستان د تورونو سلسله پيل کړې ده.

د پاکستان صدراعظم نواز شریف

د پاکستان صدراعظم نواز شریف

نواز شریف زیاتوي:

"هند په کشمیر کې د خپلو ظلمونو څخه د سترګې پټولو په خاطر پاکستان باندې د تورونو د پورې کولو سلسله پیل کړې ده. موږ په ساده الفاظو باندې واضح کړه چې پاکستان امن غواړي او د دې خبره بل هېڅ مطلب نه‌دی. خو زموږ د خاورې او هېواد په خلاف د هر ډول عمل سخت ځواب ورکول کېږي."

دا په شاوخوا یوه میاشت کې په کشمیر کې د هندي او پاکستاني پوځیانو تر منځ د نښتو درېیمه پېښه ده چې تازه غبرګونونه‌یې پارولي دي.

هند او پاکستان د کشمیر په سر دوه واره لویې جګړې کړي چې ګڼ‎ شمېر خلکو ته په‎کې مرګ ژوبله اوښتې ده.

راپور: صفي‌الله ستانکزی

XS
SM
MD
LG