د افغانستان د سولې عالي شورا مسؤلان او د حزب اسلامي د مرکچي پلاوي مشر وايي چې سبا پنجشنبه به د دواړو لورو، حکومت او اسلامي حزب تر منځ د سولې تفاهملیک لاسلیک شي.
د ګلبدین حکمتیار په مشرۍ له حزب اسلامي سره د سولې د تفاهملیک متن له پنجشنبې وروسته نهايي متن حسابېږي.
دا څرګندونې د سولې عالي شورا مرستیال او له حزب اسلامي سره د سولې د مذاکره کوونکي پلاوي رئیس عطاالرحمن سلیم ازادي راډیو ته وکړې.
ښاغلی سلیم وايي، دغه تفاهملیک به د پنجشنبې په ورځ د هغه او د حزب اسلامي د مرکچي پلاوي رئیس امین کریم تر منځ په کابل کې لاسلیک شي.
ښاغلي سلیم زیاته کړه:
"انشاءالله توافقنامه وروستۍ شوې، د دواړو مرکچي ټیمونو تر منځ به لاسلیک شي او نور کسان به هم لاسلیک وکړي، انشاءالله د توافقنامې متن به سبا له لاسلیک وروسته، د دواړو لورو لهخوا وروستی متن وګڼل شي."
ښاغلی سلیم وايي، دغه تفاهملیک به په وروستیو پړاونو کې د سولې عالي شورا د رئیس پیر سید احمد ګېلاني او د حزب اسلامي مشر ګلبدین حکمتیار لهخوا لاسلیک او ورپسې به د افغان ولسمشر له لوري هم ورباندې لاسلیک وشي.
هغه زیاته کړه، د دې توافقنامې له وروستي لاسلیک وروسته به افغان حکومت د ملګرو ملتونو امنیت شورا ته وړاندیز وکړي چې د ښاغلي حکمتیار نوم له تور لېسته وباسي.
د افغانستان د سولې عالي شورا د معلوماتو له مخې د حکمتیار په مشرۍ د حزب اسلامي او افغان حکومت تر منځ د سولې تفاهملیک ۲۵ مادې لري.
په ورته وخت کې د ګلبدین حکمتیار په مشرۍ د حزب اسلامي د مرکچي پلاوي رئیس محمد امین کریم ازادي راډیو ته تائید کړه چې دغه تفاهملیک به د پنجشنبې په ورځ لاسلیک شي.
خو نوموړی وايي چې هوکړهلیک به د سولې د عالي شورا له رئیس او د ملي امنیت شورا سلاکار محمد حنیف اتمر سره لاسلیک کړي.
ښاغلي کریم زیاته کړه:
"هوکړهلیک به تر راتلونکو ۲۴ ساعتونو لاسلیک شي، ښاغلی پیر سید احمد ګېلاني زه او اتمر صیب به دغه هوکړهلیک لاسلیک کړو."
په ورته وخت کې د ولسي جرګې مشر عبدالرؤف ابراهیمي هوکړې ته د دواړو خواوو له رسېدو هرکلی کوي او هیله ښيي چې دغه بهیر دوام وکړي.
ښاغلي ابراهیمي وویل:
"په دې ورځو کې د افغانستان د جګړې له یوه اړخ سره د سولې د پروسې له بشپړولو او قریبالوقوع هوکړې څخه هرکلی کوو او هیله لرو چې دغه لړۍ دوام وکړي."
که څه هم افغان ولسمشر له حزب اسلامي سره د سولې د تفاهملیک لاسلیک په افغانستان کې د جنګ د کموالي په برخه کې ګټور بولي، خو د سیاسي چارو افغان کارپوه فدا محمد نظري وايي چې حزب اسلامي په طالبانو دومره نفوذ نهلري چې هغوی سولې ته وهڅوي.
راپور: رحمتالله افغان
